ಬೆಂಗಳೂರು ವಿಮಾನ ಪ್ರಯಾಣಿಕರಿಗೆ ಮತ್ತೊಂದು ಹೊರೆ: ಬಳಕೆದಾರರ ಶುಲ್ಕ ಏಪ್ರಿಲ್‌ನಿಂದ ತುಟ್ಟಿ!

ಬೆಂಗಳೂರು: ಇಂಧನ ದರ, ವಿಮಾನ ಟಿಕೆಟ್ ದರ ಹೆಚ್ಚಳದ ಜತೆಗೆ, ಬೆಂಗಳೂರಿನಿಂದ ವಿಮಾನದಲ್ಲಿ ತೆರಳುವ ಪ್ರಯಾಣಿಕರಿಗೆ ಮತ್ತೊಂದು ಬೆಲೆ ಏರಿಕೆ ಹೊರೆ ಬೀಳಲಿದೆ. ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ (ಕೆಐಎ) ತೆರಳುವ ವಿಮಾನ ಪ್ರಯಾಣಿಕರು 2022ರ ಏಪ್ರಿಲ್ ಆರಂಭದಿಂದ ದೇಶಿ ವಿಮಾನಗಳಿಗೆ 350 ರೂ ಮತ್ತು ಅಂತಾರಾಷ್ಟ್ರೀಯ ವಿಮಾನಗಳಿಗೆ 1,200 ರೂ ಮೊತ್ತವನ್ನು ಬಳಕೆದಾರರ ಅಭಿವೃದ್ಧಿ ಶುಲ್ಕವನ್ನಾಗಿ () ಪಾವತಿಸಬೇಕಾಗಲಿದೆ. ಪ್ರಸ್ತುತ ಈ ದರ ಕ್ರಮವಾಗಿ 184 ರೂ ಮತ್ತು 839 ರೂ ಇದೆ. ಅಂತಾರಾಷ್ಟ್ರೀಯ ಪ್ರಯಾಣಿಕರಿಗೆ ಹಾಲಿ ಇರುವ ಅಭಿವೃದ್ಧಿ ಶುಲ್ಕವು ಸುಮಾರು ಶೇ 43ರಷ್ಟು ಹೆಚ್ಚಳವಾಗಲಿದೆ. ವಿಮಾನ ನಿಲ್ದಾಣದಿಂದ ಹೊರಡುವ ಪ್ರಯಾಣಿಕರಿಗೆ ವಿಧಿಸಲಾಗುವ ಶುಲ್ಕದ ಪರಿಷ್ಕೃತ ದರವನ್ನು ವಿಮಾನ ನಿಲ್ದಾಣಗಳ ಆರ್ಥಿಕ ನಿಯಂತ್ರಣ ಪ್ರಾಧಿಕಾರ (ಎಇಆರ್‌ಎ) ಪ್ರಕಟಿಸಿದೆ. ಈ ವರ್ಷದ ಅಕ್ಟೋಬರ್ ತಿಂಗಳಿನಿಂದಲೇ ಪರಿಷ್ಕೃತ ದರ ಜಾರಿಯಾಗಬೇಕೆಂದು ಕೆಐಎ ನಿರ್ವಹಣೆ ಮಾಡುವ ಅಂತಾರಾಷ್ಟ್ರೀಯ ನಿಯಮಿತ (ಬಿಐಎಎಲ್) ಬಯಸಿತ್ತು. ಆದರೆ ಅದರ ಮನವಿಯನ್ನು ತಿರಸ್ಕರಿಸಲಾಗಿದೆ. ಹೀಗಾಗಿ ಈ ನಿರ್ಧಾರದ ಕುರಿತು ಪ್ರತಿನಿಧಿಗಳು ಅಸಮಾಧಾನಗೊಂಡಿದ್ದಾರೆ ಎನ್ನಲಾಗಿದೆ. ರನ್‌ವೇ, ಟರ್ಮಿನಲ್ 2 ಮತ್ತು ಅವುಗಳಿಗೆ ಸಂಬಂಧಿಸಿದ ನಿರ್ಮಾಣ ಯೋಜನೆಗಳು ಸೇರಿದಂತೆ 13,300 ಕೋಟಿ ರೂ ಬೃಹತ್ ಮೊತ್ತದ ವಿಸ್ತರಣೆ ಕಾರ್ಯಕ್ರಮಗಳನ್ನು ಪೂರ್ಣಗೊಳಿಸಲು ಹಾಗೂ ಕಾರ್ಯಾಚರಣೆಗೆ ಮುಕ್ತಗೊಳಿಸಲು ವಿಮಾನ ನಿಲ್ದಾಣ ಸಿದ್ಧತೆ ನಡೆಸಿದೆ. ಈ ಸಂದರ್ಭದಲ್ಲಿನ ಬೇಡಿಕೆಗಳನ್ನು ತಲುಪಲು ಹೂಡಿಕೆ ಬಹಳ ಮಹತ್ವದ್ದಾಗಿದೆ ಎಂದು ಬಿಐಎಎಲ್ ವಕ್ತಾರರು ತಿಳಿಸಿದ್ದಾರೆ. 'ಕಳೆದ 11 ವರ್ಷಗಳಲ್ಲಿ, ಬಿಐಎಎಲ್ ತನ್ನ ಆದಾಯಗಳನ್ನು ಈ ಸಾಮರ್ಥ್ಯ ವೃದ್ಧಿ ಯೋಜನೆಗಳಲ್ಲಿ ಮರು ಹೂಡಿಕೆ ಮಾಡಿದ್ದು, ಈ ಯೋಜನೆ ಒಮ್ಮೆ ಮುಕ್ತಾಯವಾದ ಬಳಿಕ ಷೇರುದಾರರಿಗೆ ಪ್ರಬಲ ಗಳಿಕೆಯನ್ನು ಒದಗಿಸಲಿದೆ ಎಂಬ ಭರವಸೆ ಹೊಂದಿದೆ. ನಮ್ಮ ನಗದು ಹರಿವಿನ ಅಗತ್ಯಗಳನ್ನು ಈಡೇರಿಸಲು ಸಾಲುವಷ್ಟು ಟಾರಿಫ್ ಆರ್ಡರ್ ಸಿಗದೆ ಇರುವುದು ನಿರಾಶೆಯುಂಟುಮಾಡಿದೆ. ಇದು ಕಾರ್ಯಾಚರಣೆ ವೆಚ್ಚಗಳನ್ನು ಭರಿಸುವ ವಿಚಾರದಲ್ಲಿ ನಮಗೆ ಸವಾಲಾಗಿ ಪರಿಣಮಿಸಲಿದೆ. ಅಲ್ಲದೆ, ಈ ಹೂಡಿಕೆಯನ್ನು ಮರಳಿ ಪಡೆಯುವ ಅವಧಿಯಲ್ಲಿ ಸಮಸ್ಯೆ ಮತ್ತಷ್ಟು ಉಲ್ಬಣಗೊಳ್ಳಲಿದೆ. ಸಾಂಕ್ರಾಮಿಕದ ಸನ್ನಿವೇಶದಲ್ಲಿ ಸಂಚಾರ ಬಹಳ ಕಡಿಮೆ ಇದೆ' ಎಂದು ಅವರು ಹೇಳಿದ್ದಾರೆ.