ಬೆಂಗಳೂರು: ಚೈನ್‌ ಲಿಂಕ್‌ ಮೂಲಕ ಕೋಟ್ಯಂತರ ರೂ. ವಂಚಿಸಿದ್ದ ಆರೋಪಿ ಬಂಧನ

: ಆನ್‌‍ಲೈನ್‌ ಮೂಲಕ ಹೂಡಿಕೆ ಮಾಡಿದರೆ ಹೆಚ್ಚಿನ ಲಾಭಾಂಶ ನೀಡುವುದಾಗಿ ನಂಬಿಸಿ 2 ಸಾವಿರಕ್ಕೂ ಹೆಚ್ಚು ಮಂದಿಗೆ ವಂಚಿಸಿ ಕೋಟ್ಯಂತರ ರೂ. ಹಣ ವಸೂಲಿ ಮಾಡಿದ್ದ ಪ್ರಕರಣದ ಸಂಬಂಧ ಓರ್ವನನ್ನು ಪೊಲೀಸರು ಬಂಧಿಸಿದ್ದಾರೆ. ರಂಗನಾಥ್‌ ಬಂಧಿತ ಆರೋಪಿ. ಈತ ಆನ್‌‍ಲೈನ್‌ ಮೂಲಕ ಅನಧಿಕೃತವಾಗಿ ಡಿಜಿಟೆಕ್‌ ಕಂಪನಿ ಆರಂಭಿಸಿ ಹಣದ ವ್ಯವಹಾರ ನಡೆಸುತ್ತಿದ್ದ. ಡಿಜಿಟೆಕ್‌ ಮಾರ್ಕ್ಲೈವ್‌ ವೆಬ್‌‍ಸೈಟ್‌ ಮೂಲಕ ಸೇರಿದಂತೆ ವಿವಿಧ ಪ್ರದೇಶಗಳ ಜನರನ್ನು ಚೈನ್‌ ಲಿಂಕ್‌ ಸದಸ್ಯರನ್ನಾಗಿ ಮಾಡಿಕೊಂಡು ಅವರಿಗೆ ಹೆಚ್ಚಿನ ಲಾಭಾಂಶ ನೀಡುವ ಆಮಿಷವೊಡ್ಡಿ ಕೋಟ್ಯಂತರ ರೂ. ಹಣ ಹೂಡಿಕೆ ಮಾಡಿಸಿಕೊಂಡು ವಂಚಿಸುತ್ತಿದ್ದ ಎಂದು ತಿಳಿದು ಬಂದಿದೆ. 15 ಸಾವಿರ ರೂ. ಹೂಡಿಕೆ ಮಾಡಿದರೆ 2021ರ ಡಿಸೆಂಬರ್‌ ನಂತರ 1 ಲಕ್ಷ ರೂ., 2022ರ ನಂತರ 5 ಲಕ್ಷ ರೂ., 2023ರ ನಂತರ 12 ಲಕ್ಷ ರೂ. ಹಾಗೂ 2025ರ ಜನವರಿವರೆಗೆ ಹೂಡಿಕೆ ಮಾಡಿದರೆ 25 ಲಕ್ಷ ರೂ. ಹಿಂತಿರುಗಿಸುವುದಾಗಿ ಆಮಿಷ ಒಡ್ಡಿದ್ದ. 50 ಸಾವಿರ ಒಂದೇ ಬಾರಿ ಹಣ ಹೂಡಿಕೆ ಮಾಡಿದರೆ 2021ರ ಡಿಸೆಂಬರ್‌ ವೇಳೆಗೆ 3 ಲಕ್ಷ , 2022ರ ವೇಳೆಗೆ 30 ಲಕ್ಷ, 2023ಕ್ಕೆ 45 ಲಕ್ಷ, ಇನ್ನು, 2025ರ ಜನವರಿವರೆಗೆ ಹೂಡಿಕೆ ಮಾಡಿದರೆ 2 ಕೋಟಿ ರೂ. ಹಾಗೂ ಒಂದು ಲಕ್ಷ ಹೂಡಿಕೆ ಮಾಡಿದರೆ 2021ರ ಡಿಸೆಂಬರ್‌ ವೇಳೆಗೆ 7 ಲಕ್ಷ, 2022ರ ವೇಳೆಗೆ 40 ಲಕ್ಷ, 2023ರ ವೇಳೆಗೆ 90 ಲಕ್ಷ ಹಾಗೂ 2025ರ ಜನವರಿ ವೇಳೆಗೆ 3 ಕೋಟಿ ಹಣ ನೀಡುವುದಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಚಾರ ಮಾಡಿ ಸಾರ್ವಜನಿಕರನ್ನು ವಂಚಿಸುತ್ತಿದ್ದ ಎನ್ನುವ ಮಾಹಿತಿ ವಿಚಾರಣೆ ವೇಳೆ ಬೆಳಕಿಗೆ ಬಂದಿದೆ. ಆರೋಪಿಯು ಸಾರ್ವಜನಿಕರಿಗೆ ಹೆಚ್ಚಿನ ಲಾಭಾಂಶದ ಆಮಿಷವೊಡ್ಡಿ ಕೋಟ್ಯಂತರ ರೂ. ವಂಚಿಸಿರುವುದರ ಜತೆಗೆ ಸರಕಾರಕ್ಕೂ ಯಾವುದೇ ತೆರಿಗೆ ಪಾವತಿಸದೆ ಕೋಟಿ ಕೋಟಿ ರೂ. ಲಪಟಾಯಿಸುತ್ತಿದ್ದ ಎಂಬ ಮಾಹಿತಿ ಆಧರಿಸಿ ಸಿಸಿಬಿ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದಾರೆ. ವಂಚಕ ವಾಜಿರ್‌ಎಕ್ಸ್‌ ಮೂಲಕ ಟ್ರೋನ್‌ ಕಾಯಿನ್‌ಗಳನ್ನು ಖರೀದಿ ಮಾಡಿ ಸದಸ್ಯರಿಗೆ ತಾವೇ ರೂಪಿಸಿದ್ದ ಕಾನೂನು ಮಾನ್ಯತೆ ಇಲ್ಲದ ಡಿಟಿಎಂ ಟೋಕನ್‌ಗಳನ್ನು ನೀಡಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ. ವಂಚನೆಯ ಆನ್‌ಲೈನ್‌ ಜಾಲಕ್ಕೆ ಸದಸ್ಯರನ್ನು ಸೇರಿಸುವ ಏಜೆಂಟರಿಗೆ ಶೇ. 25 ಹಾಗೂ ಟೀಂ ಲೀಡರ್‌ಗೆ ಶೇ. 1 ರಷ್ಟು ಕಮಿಷನ್‌ ನೀಡುವ ಆಮಿಷ ತೋರಿಸಿ ಸುಮಾರು ಎರಡು ಸಾವಿರ ಜನರನ್ನು ವಂಚಿಸಿದ್ದ ಎನ್ನಲಾಗಿದೆ. ಆರೋಪಿ ರಂಗನಾಥ್‌ ವಿರುದ್ಧ ಐಟಿ ಕಾಯಿದೆ ಸೇರಿದಂತೆ ಹಲವಾರು ರೀತಿಯ ಪ್ರಕರಣಗಳನ್ನು ದಾಖಲಿಸಿ ತನಿಖೆ ಕೈಗೊಳ್ಳಲಾಗಿದೆ ಎಂದು ಜಂಟಿ ಪೊಲೀಸ್‌ ಆಯುಕ್ತ ಸಂದೀಪ್‌ ಪಾಟೀಲ್‌ ತಿಳಿಸಿದ್ದಾರೆ.