ಬೆಂಗಳೂರಿನಲ್ಲಿ ದುರಂತಗಳ ಸರಮಾಲೆ; ಮತ್ತೊಂದು ಕಟ್ಟಡ ಕುಸಿತ; ಬೀದಿಗೆ ಬಿದ್ದವು 18 ಕುಟುಂಬ!

: ವಿಲ್ಸನ್‌ ಗಾರ್ಡನ್‌ನ ಲಕ್ಕಸಂದ್ರದಲ್ಲಿ ಉರುಳಿಬಿದ್ದ ಮೂರು ಅಂತಸ್ತಿನ ಕಟ್ಟಡವನ್ನು ತೆರವುಗೊಳಿಸುವ ಕಾರ್ಯ ಮುಗಿಯುವುದರೊಳಗೆ ಕೆಎಂಎಫ್‌ ಆವರಣದಲ್ಲಿರುವ ಬೆಂಗಳೂರು ಹಾಲು ಒಕ್ಕೂಟಕ್ಕೆ ಸೇರಿದ ನೌಕರರ ಮೂರು ಅಂತಸ್ತಿನ ವಸತಿ ಸಮುಚ್ಚಯ ನೆಲದೊಳಗೆಯೇ ಮಂಗಳವಾರ ಬೆಳಗ್ಗೆ ಕುಸಿದಿದ್ದು, ನಾಲ್ವರು ಗಾಯಗೊಂಡಿದ್ದಾರೆ. ಈ ಕಟ್ಟಡದಲ್ಲಿ 18 ಕುಟುಂಬಗಳು ನೆಲೆಸಿದ್ದು, ಸಮಯ ಪ್ರಜ್ಞೆಯಿಂದ ಎಲ್ಲರೂ ಪಾರಾಗಿದ್ದು, ಮತ್ತೊಂದು ಭಾರಿ ದುರಂತ ತಪ್ಪಿದೆ. ಕಳೆದ 20 ದಿನಗಳಿಂದ ನಗರದಲ್ಲಿ ಒಂದಲ್ಲ ಒಂದು ದುರ್ಘಟನೆಗಳು ಸಂಭವಿಸುತ್ತಿದ್ದು, ನಗರದ ನಿವಾಸಿಗಳಲ್ಲಿ ಆತಂಕ ಮೂಡಿಸಿದೆ. ಕಟ್ಟಡ ನೆಲದೊಳಗೆ ಕುಸಿಯುವ ಕೊನೆ ಕ್ಷಣದಲ್ಲಿ ಅಲ್ಲಿ ವಾಸವಿದ್ದವರು ಹೊರಗೆ ಓಡಿ ಬಂದು ಪ್ರಾಣ ಉಳಿಸಿಕೊಂಡಿದ್ದಾರೆ. ಪಾರಾಗುವ ವೇಳೆ ಕಟ್ಟಡ ಕುಸಿದು ಬಿದ್ದ ಪರಿಣಾಮ ಬಾಲಕೃಷ್ಣ (56), ಪೂರ್ಣಿಮಾ (40) 70 ವರ್ಷದ ವೃದ್ಧರು ಸೇರಿದಂತೆ ನಾಲ್ವರು ಗಾಯಗೊಂಡಿದ್ದಾರೆ. ಇದರಲ್ಲಿ ಪೂರ್ಣಿಮಾ ಸೇರಿ ಇಬ್ಬರಿಗೆ ಹೆಚ್ಚಿನ ಗಾಯವಾಗಿದ್ದು, ಫೋರ್ಟಿಸ್‌ ಆಸ್ಪತ್ರೆಯಲ್ಲಿ ಶಸ್ತ್ರಚಿಕಿತ್ಸೆಗೊಳಪಡಿಸಲಾಗಿದೆ. 18 ಮನೆಗಳು ಕುಸಿತ ಕೆಎಂಎಫ್‌ ನೌಕರರು, ಕಾರ್ಮಿಕರು, ಭದ್ರತಾ ಸಿಬ್ಬಂದಿಯ ವಾಸಕ್ಕೆಂದು ಬೆಂಗಳೂರು ಹಾಲು ಒಕ್ಕೂಟ (ಬಮೂಲ್‌)ದ ಆವರಣದಲ್ಲಿ ಈ ಮೂರು ಅಂತಸ್ತಿನ ಕಟ್ಟಡ ನಿರ್ಮಿಸಲಾಗಿತ್ತು. ಇದರಲ್ಲಿ 18 ಮನೆಗಳಿದ್ದವು. ಸುಮಾರು 50 ಮಂದಿ ವಾಸವಾಗಿದ್ದರು. ಇವರಲ್ಲಿ ಬಹಳಷ್ಟು ಮಂದಿ ಮೊದಲನೇ ಪಾಳಿ ಕೆಲಸಕ್ಕೆ ತೆರಳಿದ್ದರು. ಉಳಿದವರಲ್ಲಿ ಕೆಲವರು ತಿಂಡಿ ತಿನ್ನಲೆಂದು ಹೊರ ಬಂದಿದ್ದರು. ಇನ್ನು ಕೆಲವರು ಮನೆಯಲ್ಲೇ ಇದ್ದು, ಬೆಳಗಿನ ಕೆಲಸ ಕಾರ್ಯಗಳಲ್ಲಿ ಮಗ್ನರಾಗಿದ್ದರು. ಕಟ್ಟಡದ ಒಂದು ಭಾಗ ಕುಸಿಯುವುದನ್ನು ನೋಡಿದ ಒಬ್ಬರು, ಮನೆಯಿಂದ ಹೊರಗೆ ಓಡಿ ಬಂದು ಎಲ್ಲರೂ ಹೊರಗೆ ಬನ್ನಿ ಎಂದು ಕೂಗಿ ಕೊಂಡಿದ್ದಾರೆ. ಇದನ್ನು ಕೇಳಿದ ಇತರ ನಿವಾಸಿಗಳು ಹೊರಗೆ ಓಡಿ ಬಂದಿದ್ದಾರೆ. ಹೀಗಾಗಿ, ಕ್ಷಣ ಮಾತ್ರದಲ್ಲಿ ಹತ್ತಾರು ಮಂದಿ ಪ್ರಾಣಪಾಯದಿಂದ ಪಾರಾಗಿದ್ದಾರೆ. ಒಂದೇ ಕರೆಗೆ ದೌಡಾಯಿಸಿದ ಅಗ್ನಿಶಾಮಕ ಸಿಬ್ಬಂದಿ ಕಟ್ಟಡ ಕುಸಿತದ ಕೆಲವೇ ನಿಮಿಷಗಳ ಹಿಂದೆ ಮನೆಯಲ್ಲಿದ್ದ ಎಲ್ಲರೂ ಆತಂಕದಿಂದ ಹೊರ ಬರುತ್ತಿದ್ದಂತೆ ಮೂರು ಅಂತಸ್ತಿನ ಕಟ್ಟಡದ ಒಂದು ಭಾಗ ಬಿದ್ದಿದೆ. ಕೂಡಲೇ ಮನೆಯವರು ಅಗ್ನಿಶಾಮಕ ಸಿಬ್ಬಂದಿ ಹಾಗೂ ಆಡುಗೋಡಿ ಪೊಲೀಸರಿಗೆ ಕರೆ ಮಾಡಿ ಮಾಹಿತಿ ನೀಡಿದ್ದಾರೆ. ಸ್ಥಳಕ್ಕೆ ದೌಡಾಯಿಸಿರುವ ಸಿಬ್ಬಂದಿ ರಕ್ಷಣಾ ಕಾರ್ಯಾಚರಣೆ ನಡೆಸಿದ್ದಾರೆ. ಬಮೂಲ್‌ ನಿರ್ಲಕ್ಷ್ಯ ಬಮೂಲ್‌ ಸುಮಾರು 40 ವರ್ಷಗಳ ಹಿಂದೆ ಈ ವಸತಿ ಸಮುಚ್ಚಯ ನಿರ್ಮಿಸಿತ್ತು. ಇದರಲ್ಲಿ 18 ಮನೆಗಳಿದ್ದವು. ಹಳೆ ಕಟ್ಟಡವಾಗಿದ್ದರಿಂದ ಮಣ್ಣು ಉದುರುತ್ತಿತ್ತು. ಮಳೆ ಬಂದರೆ ನೀರು ಸುರಿಯುತ್ತಿತ್ತು. ಈ ಬಗ್ಗೆ ಬೆಂಗಳೂರು ಹಾಲು ಒಕ್ಕೂಟದ ಆಡಳಿತ ಮಂಡಳಿ ಗಮನಕ್ಕೆ ತಂದರೂ, ಯಾರೂ ಎಚ್ಚೆತ್ತುಕೊಂಡಿರಲಿಲ್ಲ. ಕಟ್ಟಡದ ಗುಣಮಟ್ಟದ ಪರಿಶೀಲನೆ ನಡೆಸಿರಲಿಲ್ಲ. ಅಲ್ಲಿನ ನೌಕರರು ಒಕ್ಕೂಟದ ವಸತಿಗೃಹ ಸಿಕ್ಕಿದೆ ಎಂಬ ಕಾರಣಕ್ಕೆ ಅನಿವಾರ್ಯವಾಗಿ ವಾಸ ಇದ್ದರು. ಸಾಕು ಶ್ವಾನಗಳ ರಕ್ಷಣೆಸಂಪೂರ್ಣ ಕಟ್ಟಡ ಕುಸಿಯುವ ಮುನ್ನವೇ ಆತಂಕದಿಂದ ಎಲ್ಲರೂ ಮನೆಯಿಂದ ಹೊರ ಬಂದಿದ್ದಾರೆ. ಈ ವೇಳೆ ಎರಡು ಸಾಕು ನಾಯಿಗಳು ಮನೆಯಲ್ಲಿರುವುದನ್ನು ಗಮನಿಸಿದ ಅಗ್ನಿಶಾಮಕ ಸಿಬ್ಬಂದಿ ಅದನ್ನೂ ರಕ್ಷಿಸಿದ್ದಾರೆ. ಅವಶೇಷಗಳಡಿ ಸಿಲುಕಿದ ಸಾಮಗ್ರಿಗಳು ಕಟ್ಟಡ ಕುಸಿತಗೊಂಡ ಕೂಡಲೇ ನಿವಾಸಿಗಳೆಲ್ಲ ಜೀವ ಉಳಿಸಿಕೊಳ್ಳುವ ಭರದಲ್ಲಿ ಬರಿಗೈನಲ್ಲಿ ಹೊರ ಬಂದಿದ್ದಾರೆ. ಹೀಗಾಗಿ, ನಿವಾಸಿಗಳ ಬಟ್ಟೆಗಳು, ಪಾತ್ರೆಗಳು, ಆಹಾರ ಸಾಮಗ್ರಿಗಳು, ಟಿವಿ, ಫ್ರಿಜ್‌ ಸೇರಿದಂತೆ ಎಲ್ಲ ವಸ್ತುಗಳು ಕಟ್ಟಡದಡಿ ಸಿಲುಕಿವೆ. ನನ್ನ ಕಥೆ ಮುಗಿಯಿತು ಅಂದುಕೊಂಡೆ..!! ಕಟ್ಟಡ ಬೀಳುತ್ತಿದೆ. ತಕ್ಷಣ ಹೊರಗೆ ಓಡಿ ಬನ್ನಿ ಅಂಥ ಪಕ್ಕಪಕ್ಕದವರು ಕೂಗಿದರು. ನಾನು ಮನೆಯಿಂದ ಹೊರಗೆ ಬಂದಾಗ ಕಟ್ಟಡದ ಭಾಗಗಳು ಉದುರಿ ಬೀಳುತ್ತಿದ್ದವು. ಕಟ್ಟಡದಿಂದ ಕೆಳಗಿಳಿಯಲು ಆಗುತ್ತಿರಲಿಲ್ಲ. ಒಂದು ಕ್ಷಣ ನನ್ನ ಕಥೆ ಇಲ್ಲಿಗೆ ಮುಗಿಯಿತು ಎಂದು ಅನ್ನಿಸಿತು. ಅಳು ಬರಲಾರಂಭಿಸಿತು. ಅಷ್ಟರೊಳಗೆ ಆಪದ್ಭಾಂದವರಂತೆ ಹುಡುಗರು ಬಂದು ನನ್ನನ್ನು ಕಾಪಾಡಿದರು. ಶ್ರುತಿ, ಕುಸಿದ ಕಟ್ಟಡದ ನಿವಾಸಿ ಅಕ್ಕ ಪಕ್ಕದ ಕ್ವಾಟ್ರಸ್‌ಗಳಲ್ಲಿ ವಾಸಕ್ಕೆ ವ್ಯವಸ್ಥೆ ಮನೆಗಳನ್ನು ಕಳೆದುಕೊಂಡು ಬೀದಿಗೆ ಬಿದ್ದಿದ್ದ ನೌಕರರಿಗೆ ಕೆಎಂಎಫ್‌ಗೆ ಸೇರಿದ ಬೇರೆ ಬೇರೆ ಬ್ಲಾಕ್‌ಗಳಲ್ಲಿ ಉಳಿದುಕೊಳ್ಳಲು ಆಡಳಿತ ಮಂಡಳಿ ಅನುವು ಮಾಡಿಕೊಟ್ಟಿದೆ ಎಂದು ತಿಳಿದುಬಂದಿದೆ. ಅಪಾಯದಲ್ಲಿವೆ 186 ಮನೆಗಳು ನೌಕರರು, ಕಾರ್ಮಿಕರು ಉಳಿದುಕೊಳ್ಳಲು ಒಟ್ಟು 18 ಮನೆಗಳಿರುವ ಆರು ಬ್ಲಾಕ್‌ಗಳ ವಸತಿ ಸಮುಚ್ಚಯವನ್ನು ಕೆಎಂಎಫ್‌ ನಿರ್ಮಿಸಿದೆ. ಆದರೆ, ಇವುಗಳಲ್ಲಿ ಬ್ಲಾಕ್‌ ಕಟ್ಟಡ ಕುಸಿದುಬಿದ್ದಿದೆ. ಇನ್ನು ಎಚ್‌ ಬ್ಲಾಕ್‌ನಲ್ಲಿ ವಾಸವಾಗಿರುವ ನಿವಾಸಿಗಳನ್ನು ತೆರವುಗೊಳಿಸಲಾಗಿದೆ. ಉಳಿದ ನಾಲ್ಕು ಬ್ಲಾಕ್‌ಗಳ ಸ್ಥಿತಿಯೂ ಶಿಥಿಲಾವಸ್ಥೆಯಲ್ಲೇ ಇವೆ. ಹೀಗಾಗಿ, ಯಾವ ಕಟ್ಟಡ ಯಾವ ಸಮಯದಲ್ಲಿ ಉರುಳಿ ಬೀಳುತ್ತದೋ ಗೊತ್ತಿಲ್ಲ. ಅಲ್ಲಿ ನೆಲೆಸಿರುವ ನಿವಾಸಿಗಳೆಲ್ಲ ಆತಂಕದಲ್ಲೇ ಬದುಕುತ್ತಿದ್ದಾರೆ. ಕಟ್ಟಡ ಕುಸಿತಗೊಂಡ ಬಳಿಕ ಬಮೂಲ್‌ ಅಧ್ಯಕ್ಷ ನರಸಿಂಹ ಮೂರ್ತಿ ಕ್ವಾಟ್ರಸ್‌ಗಳಿಗೆ ಭೇಟಿ ನೀಡಿ ಪರಿಶೀಲಿಸಿದರು. ಈ ವೇಳೆ ಮಾತನಾಡಿದ ಅವರು, ''ಕುಸಿದಿರುವ ಕಟ್ಟಡದ ಜತೆಗೆ ಬಮೂಲ್‌ ಕ್ವಾಟ್ರಸ್‌ ಅಕ್ಕಪಕ್ಕದ ಕಟ್ಟಡಗಳ ಬಗ್ಗೆಯೂ ಪರಿಶೀಲನೆ ನಡೆಸಲಾಗುತ್ತದೆ. ಎಲ್ಲಾ ಕಟ್ಟಡಗಳನ್ನು ನೆಲಸಮ ಮಾಡುವ ಬಗ್ಗೆ ಚರ್ಚಿಸಲಾಗುವುದು. 6 ಬ್ಲಾಕ್‌ಗಳಲ್ಲಿರುವ 186 ಮನೆಗಳ ಪರಿಶೀಲನೆ ನಡೆಸಲಾಗುವುದು'' ಎಂದರು.