ಪುಲ್ವಾಮಾ ಉಗ್ರರ ದಾಳಿ ಸ್ಥಳದ ಸಿಆರ್‌ಪಿಎಫ್ ಶಿಬಿರದಲ್ಲಿ ರಾತ್ರಿ ಕಳೆದ ಅಮಿತ್ ಶಾ
ಜಮ್ಮು ಮತ್ತು ಕಾಶ್ಮೀರದಲ್ಲಿ ಭಯೋತ್ಪಾದನೆ ಹಾಗೂ ಹಿಂಸಾಚಾರ ಸಾಕಷ್ಟು ಕಡಿಮೆಯಾಗಿದೆ. ಇಲ್ಲಿನ ಸನ್ನಿವೇಶ ಸುಧಾರಿಸಿದೆ. ಆದರೆ ನಾವು ಇಷ್ಟಕ್ಕೆ ತೃಪ್ತಿಪಡುವಂತಿಲ್ಲ. ಕಾಶ್ಮೀರವನ್ನು ಸಂಪೂರ್ಣ ಶಾಂತಿಯ ತಾಣವನ್ನಾಗಿ ನೋಡಬೇಕು ಎಂದು ಗೃಹ ಸಚಿವ ಅಮಿತ್ ಶಾ ಹೇಳಿದರು.
Admin
0
6
ಶ್ರೀನಗರ: ಜಮ್ಮು ಮತ್ತು ಕಾಶ್ಮೀರದಲ್ಲಿ ಸನ್ನಿವೇಶ ಸಾಕಷ್ಟು ಸುಧಾರಿಸಿದೆ. ಆದರೆ ಒಟ್ಟಾರೆ ಶಾಂತಿ ಸಾಧನೆಯ ಬಗ್ಗೆ ನಾವು ತೃಪ್ತಿ ಪಡಬಾರದು. ವಿಚಾರದಲ್ಲಿ ನರೇಂದ್ರ ಮೋದಿ ಸರ್ಕಾರ ಶೂನ್ಯ ಸಹಿಷ್ಣುತೆ ಹೊಂದಿದೆ ಎಂದು ಗೃಹ ಸಚಿವ ಸೋಮವಾರ ಹೇಳಿದರು.
ಮೂರು ದಿನಗಳ ಭೇಟಿಯ ಕೊನೆಯ ದಿನವಾದ ಸೋಮವಾರ, 2019ರ ಫೆಬ್ರವರಿಯಲ್ಲಿ ಪಾಕಿಸ್ತಾನ ಪ್ರಾಯೋಜಿತ ಉಗ್ರರು ಆತ್ಮಾಹುತಿ ಕಾರ್ ಬಾಂಬ್ ದಾಳಿ ನಡೆಸಿ 40 ಅರೆಸೇನಾ ಪಡೆ ಯೋಧರನ್ನು ಹತ್ಯೆ ಮಾಡಿದ ಜಾಗವಾದ ಪುಲ್ವಾಮಾದ ಲೇಥ್ಪೊರಾದಲ್ಲಿನ ಕ್ಯಾಂಪಸ್‌ನಲ್ಲಿ ರಾತ್ರಿ ಕಳೆದರು.
'ನಿಮ್ಮೊಂದಿಗೆ ಒಂದು ರಾತ್ರಿ ಕಳೆದು ನಿಮ್ಮ ಸಮಸ್ಯೆಗಳನ್ನು ಅರ್ಥಮಾಡಿಕೊಳ್ಳಲು ನಾನು ಬಯಸಿದ್ದೇನೆ. ನನ್ನ ಕೇಂದ್ರಾಡಳಿತ ಪ್ರದೇಶದ ಭೇಟಿಯಲ್ಲಿ ಅತ್ಯಂತ ಮುಖ್ಯವಾದ ಕಾರ್ಯಕ್ರಮ ಇದು' ಎಂದು ಸಿಆರ್‌ಪಿಎಫ್ ಕ್ಯಾಂಪಸ್‌ನಲ್ಲಿ ಭದ್ರತಾ ಸಿಬ್ಬಂದಿಯನ್ನು ಉದ್ದೇಶಿಸಿ ಮಾತನಾಡುವಾಗ ಅವರು ಹೇಳಿದರು.
'ಜಮ್ಮು ಮತ್ತು ಕಾಶ್ಮೀರದಲ್ಲಿ ಕಾನೂನು ಹಾಗೂ ಸುವ್ಯವಸ್ಥೆ ಸನ್ನಿವೇಶ ಸಾಕಷ್ಟು ಸುಧಾರಿಸಿದೆ. ನಮ್ಮ ಜೀವಮಾನದಲ್ಲಿ ಶಾಂತಿಯುತ ಜಮ್ಮು ಮತ್ತು ಕಾಶ್ಮೀರವನ್ನು ನೋಡಬೇಕು ಎಂಬ ಪ್ರಧಾನಿಯವರ ಆಶಯವನ್ನು ಸಾಕಾರಗೊಳಿಸುವ ಸಾಮರ್ಥ್ಯ ನಮಗೆ ಇದೆ' ಎಂದು ಭರವಸೆ ವ್ಯಕ್ತಪಡಿಸಿದರು.
'ನಾವು ಅವರಿಗಾಗಿ ನೋಡುತ್ತಿದ್ದಾಗ ಮಾತ್ರ ಕಲ್ಲು ತೂರಾಟದ ಘಟನೆಗಳು ನಡೆಯುತ್ತಿದ್ದವು. ಕಾಶ್ಮೀರದಲ್ಲಿ ಕಲ್ಲು ತೂರಾಟ ಸಾಮಾನ್ಯ ಎನ್ನುವಂತಹ ಸಮಯವಿತ್ತು. ಅಂತಹ ಘಟನೆಗಳು ಈಗ ಭಾರಿ ಪ್ರಮಾಣದಲ್ಲಿ ಇಳಿಕೆಯಾಗಿವೆ. ಆದರೆ ಅಷ್ಟಕ್ಕೆ ನಾವು ತೃಪ್ತಿಪಡುವ ಅಗತ್ಯವಿಲ್ಲ' ಎಂದರು.
'ನರೇಂದ್ರ ಮೋದಿ ಸರ್ಕಾರವು ಭಯೋತ್ಪಾದನೆ ವಿರುದ್ಧ ಶೂನ್ಯ ಸಹಿಷ್ಣುತಾ ನೀತಿ ಹೊಂದಿದೆ. ನಾವು ಅದನ್ನು ಸಹಿಸುವುದಿಲ್ಲ. ಅದು ಮನುಕುಲಕ್ಕೆ ವಿರುದ್ಧ. ಮಾನವೀಯತೆಯ ವಿರುದ್ಧ ಹೇಯ ಕೃತ್ಯಗಳನ್ನು ಎಸಗುವವರೊಂದಿಗೆ ನಂಟು ಹೊಂದಿರುವ ವ್ಯಕ್ತಿಗಳಿಂದ ಕಾಶ್ಮೀರದ ಜನತೆಯನ್ನು ರಕ್ಷಿಸುವುದು ನಮ್ಮ ಮೊದಲ ಆದ್ಯತೆಯಾಗಬೇಕು' ಎಂದು ಹೇಳಿದರು.
2019ರ ಆಗಸ್ಟ್ ತಿಂಗಳಲ್ಲಿ 370ನೇ ವಿಧಿಯನ್ನು ರದ್ದುಗೊಳಿಸಿದ ನಂತರ ಕಾಶ್ಮೀರದಲ್ಲಿ ಯಾವುದೇ ರಕ್ತಪಾತವಾಗದಂತೆ ನೋಡಿಕೊಂಡಿರುವುದಕ್ಕೆ ಸಿಆರ್‌ಪಿಎಫ್ ಹಾಗೂ ಇತರೆ ಭದ್ರತಾ ಪಡೆಗಳಿಗೆ ಅಮಿತ್ ಶಾ ಕೃತಜ್ಞತೆ ಸಲ್ಲಿಸಿದರು.
'ಜಮ್ಮು ಮತ್ತು ಕಾಶ್ಮೀರದ ಮೂಲಸೌಕರ್ಯ, ಕೈಗಾರಿಕೆ ಮತ್ತು ಶಿಕ್ಷಣ ವಲಯದಲ್ಲಿನ ಅಭಿವೃದ್ಧಿ ವಿಚಾರದಲ್ಲಿ ಸಾಕಷ್ಟು ಬದಲಾವಣೆಗಳು ನಡೆಯುತ್ತಿವೆ. ದುಷ್ಟಶಕ್ತಿಗಳನ್ನು ಮಣಿಸುವುದರಲ್ಲಿ ಸೇನೆ ಹಾಗೂ ಸಿಆರ್‌ಪಿಎಫ್ ವಹಿಸಿರುವ ಪರಿಣಾಮಕಾರಿ ಪಾತ್ರದ ಪರಿಣಾಮವಿದು' ಎಂದು ಶ್ಲಾಘಿಸಿದರು.
370 ಹಾಗೂ 35ಎ ವಿಧಿಗಳನ್ನು ರದ್ದುಗೊಳಿಸಿದ ಬಳಿಕ ಭಾರಿ ತೀಕ್ಷ್ಣ ಪ್ರತಿಕ್ರಿಯೆ ವ್ಯಕ್ತವಾಗಲಿದೆ ಎಂದು ಹೇಳಲಾಗಿತ್ತು. ರಕ್ತಪಾತವೇ ನಡೆಯಬಹುದು ಎಂದೆಲ್ಲ ಊಹಿಸಲಾಗಿತ್ತು. ಆದರೆ ನಾನು ಇಲ್ಲಿಗೆ ಬಂದು ನಿಮಗೆ ಮುಕ್ತವಾಗಿ ಹೇಳುತ್ತಿದ್ದೇನೆ, ನಿಮ್ಮ ಜಾಗರೂಕತೆಯಿಂದಾಗಿ ಒಂದೇ ಒಂದು ಗುಂಡು ಹಾರಲಿಲ್ಲ. ಇದು ಬಹಳ ದೊಡ್ಡ ಸಂಗತಿ ಎಂದರು.
ದೇಶ ಹಾಗೂ ಜಮ್ಮು ಮತ್ತು ಕಾಶ್ಮೀರದ ಹಿತಾಸಕ್ತಿಯಿಂದ ನಿರ್ಧಾರ ತೆಗೆದುಕೊಂಡ ಬಳಿಕ 28,000 ಯೋಧರು ಹಾಗೂ ಜಮ್ಮು ಮತ್ತು ಕಾಶ್ಮೀರ ಪೊಲೀಸರಿಂದಾಗಿ ಯಾವುದೇ ರಕ್ತ ಹರಿಯಲಿಲ್ಲ. ಕಾಶ್ಮೀರದಲ್ಲಿ ಅಭಿವೃದ್ಧಿಯ ಹೊಸ ಯುಗ ಆರಂಭವಾಯಿತು. ಸಿಆರ್‌ಪಿಎಫ್ ಪಡೆ ಮೇಲಿನ ದಾಳಿ ಬಳಿಕ ಜಗತ್ತಿನಾದ್ಯಂತ ಪರಿಚಿತವಾಗಿರುವ ಪುಲ್ವಾಮಾದಲ್ಲಿ 2000 ಕೋಟಿ ರೂ ವೆಚ್ಚದಲ್ಲಿ ವೈದ್ಯಕೀಯ ಕಾಲೇಜು ಸ್ಥಾಪಿಸಲಾಗುವುದು ಎಂದು ತಿಳಿಸಿದರು.
2004-14ರ ಅವಧಿಯಲ್ಲಿ ಪ್ರತಿ ವರ್ಷ ಸರಾಸರಿ 208 ನಾಗರಿಕರು ಮತ್ತು 105 ಭದ್ರತಾ ಸಿಬ್ಬಂದಿ ಹತ್ಯೆಯಾಗುತ್ತಿದ್ದರು. 2014-21ನೇ ಅವಧಿಯಲ್ಲಿ ಅದು ಪ್ರತಿ ವರ್ಷ ಸರಾಸರಿ 60 ಸಿಬ್ಬಂದಿ ಹಾಗೂ 30 ನಾಗರಿಕರಿಗೆ ಇಳಿಕೆಯಾಗಿದೆ. ಭಯೋತ್ಪಾದನಾ ದಾಳಿಗಳಲ್ಲಿ 30 ನಾಗರಿಕರು ಕೂಡ ಏಕೆ ಸಾಯಬೇಕು ಎಂದು ಪ್ರಶ್ನಿಸಿದರು. ಅದಕ್ಕೂ ಮುನ್ನ ಅವರು ಲೇಥ್ಪೊರಾದಲ್ಲಿನ ಸ್ಮಾರಕವೊಂದರಲ್ಲಿ ಹುತಾತ್ಮ ಸೈನಿಕರಿಗೆ ವಂದನೆ ಸಲ್ಲಿಸಿದರು.
