ಉತ್ತರ ಪ್ರದೇಶ ವಿಧಾನಸಭಾ ಚುನಾವಣೆ 2022: ಬಿಜೆಪಿಯ 100 ಶಾಸಕರಿಗೆ ಟಿಕೆಟ್‌ ನಿರಾಕರಣೆ..!?
ಅಷ್ಟೊಂದು ದೊಡ್ಡ ಸಂಖ್ಯೆಯ ಶಾಸಕರಿಗೆ ಟಿಕೆಟ್‌ ನಿರಾಕರಿಸುವುದೆಂದರೆ ಹುಡುಗಾಟದ ಮಾತಲ್ಲ. ಅದನ್ನು ಮಾಡಲು ನಾಯಕತ್ವಕ್ಕೆ ಗಟ್ಟಿ ಎದೆಗಾರಿಕೆ ಇರಬೇಕಾಗುತ್ತದೆ. ಟಿಕೆಟ್‌ ವಂಚಿತ ಶಾಸಕರು ಸುಮ್ಮನೆ ಕೂರುವುದಿಲ್ಲ..!
Admin
0
5
ಲಖನೌ (): ದೇಶದ ರಾಜಕೀಯ ಶಕ್ತಿ ಕೇಂದ್ರ ಎಂದೇ ಗುರುತಿಸಿಕೊಂಡಿರುವ ಉತ್ತರ ಪ್ರದೇಶವನ್ನು ಗೆಲ್ಲಲು ಪ್ರಮುಖ ಪಕ್ಷಗಳು ಪಣ ತೊಟ್ಟು ನಿಂತಿವೆ. ಮುಂದಿನ ವರ್ಷದ ಆರಂಭದಲ್ಲಿ ನಡೆಯುವ ರಾಜ್ಯ ವಿಧಾನಸಭೆ ಚುನಾವಣೆಯನ್ನು ಪ್ರತಿಷ್ಠೆಯಾಗಿ ಪರಿಗಣಿಸಿರುವ ಆಡಳಿತಾರೂಢ , ಮತ್ತೊಂದು ಅವಧಿಗೆ ಅಧಿಕಾರ ಉಳಿಸಿಕೊಳ್ಳಲು ಆಕ್ರಮಣಕಾರಿ ರಣತಂತ್ರ ಹೆಣೆಯಲು ಮುಂದಾಗಿದೆ. ಪಕ್ಷದ ಹಾಲಿ ಶಾಸಕರ ಪೈಕಿ ಸುಮಾರು 100 ಮಂದಿಗೆ ಟಿಕೆಟ್‌ ನೀಡದಿರಲು ಪಕ್ಷ ತೀರ್ಮಾನಿಸಿದೆ ಎಂದು ತಿಳಿದು ಬಂದಿದೆ.
ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್‌ ನೇತೃತ್ವದ ಬಿಜೆಪಿ ಸರಕಾರ ಐದು ವರ್ಷಗಳ ಸ್ಥಿರ ಆಡಳಿತ ನೀಡಿದೆ. ಪಕ್ಷದ ಪ್ರತಿಯೊಬ್ಬ ಸಚಿವ, ಶಾಸಕರಿಗೂ ನಿರ್ದಿಷ್ಟ ಕಾರ್ಯ ಪಟ್ಟಿ ನೀಡಿ ಸಾಧನೆಯ ಲಿಸ್ಟ್‌ ಸಿದ್ಧಪಡಿಸಲಾಗಿದೆ. ಹೈಕಮಾಂಡ್‌ ಬಿಗಿ ಹಿಡಿತದ ನಡುವೆಯೂ ಪಕ್ಷದ ಕೆಲವು ಶಾಸಕರು ಭಿನ್ನರಾಗ ತೆಗೆದದ್ದಲ್ಲದೆ ಕಳಪೆ ಪ್ರದರ್ಶನ ನೀಡಿದ್ದಾರೆ. ಸುಮಾರು 100 ಶಾಸಕರು 'ಅಸಮರ್ಥ'ರ ಪಟ್ಟಿ ಸೇರಿದ್ದಾರೆ. ಬರುವ ಚುನಾವಣೆಯಲ್ಲಿ ಇವರಿಗೆ ಟಿಕೆಟ್‌ ನೀಡುವುದು ಬೇಡ ಎನ್ನುವ ಅಭಿಪ್ರಾಯ ಪಕ್ಷದ ರಾಜ್ಯ ನಾಯಕರಿಂದ ವ್ಯಕ್ತವಾಗಿದೆ.
'ಇದೇ ವಿಷಯ ಕುರಿತು ವಿಸ್ತೃತ ಸಮಾಲೋಚನೆ ನಡೆಸಿ ಅಂತಿಮ ನಿರ್ಧಾರ ಕೈಗೊಳ್ಳಲು ಅಮಿತ್‌ ಶಾ ಅವರು ಶುಕ್ರವಾರ (ಅಕ್ಟೋಬರ್ 29) ರಾಜ್ಯಕ್ಕೆ ಆಗಮಿಸಲಿದ್ದಾರೆ. ಲಖನೌನಲ್ಲಿ ಠಿಕಾಣಿ ಹೂಡಿ, ಸಿಎಂ ಆದಿತ್ಯನಾಥ್‌ ಹಾಗೂ ಇತರ ನಾಯಕರ ಜತೆ ಚರ್ಚಿಸಿ ನಿರ್ಧಾರ ಕೈಗೊಳ್ಳಲಿದ್ದಾರೆ' ಎಂದು ಬಿಜೆಪಿ ಮೂಲಗಳು ತಿಳಿಸಿವೆ.
2017ರ ಚುನಾವಣೆಗೆ ಮೊದಲು, ಬಿಜೆಪಿಯ ಶಿಸ್ತು ಸಿದ್ಧಾಂತ ಅರಿಯದ ಇತರೆ ಪಕ್ಷಗಳ ಹಲವು ನಾಯಕರನ್ನು ಸೇರಿಸಿಕೊಳ್ಳಲಾಗಿತ್ತು. ಟಿಕೆಟ್‌ ನೀಡಿ ಅಂದಿನ ಚುನಾವಣೆಯಲ್ಲಿ ಅವರನ್ನು ಗೆಲ್ಲಿಸಿಕೊಳ್ಳಲಾಗಿತ್ತು. ನಂತರ ಅವರಲ್ಲಿ ಕೆಲವರು ತಮ್ಮ ವೈಯಕ್ತಿಕ ಪ್ರತಿಷ್ಠೆ ಮುಂದು ಮಾಡಿಕೊಂಡು ಸರಕಾರದ ವಿರುದ್ಧ ಅಪಸ್ವರ ಎತ್ತಿದ್ದರು. ಇನ್ನೂ ಕೆಲವು ಮೂಲ ಬಿಜೆಪಿ ಶಾಸಕರು ಸಹ ಅಭಿವೃದ್ಧಿ ವಿಚಾರದಲ್ಲಿ ಉತ್ತಮ ಸಾಧನೆ ತೋರಿಸುವಲ್ಲಿ ವಿಫಲರಾಗಿದ್ದಾರೆ.
ಅಷ್ಟೊಂದು ದೊಡ್ಡ ಸಂಖ್ಯೆಯ ಶಾಸಕರಿಗೆ ಟಿಕೆಟ್‌ ನಿರಾಕರಿಸುವುದೆಂದರೆ ಹುಡುಗಾಟದ ಮಾತಲ್ಲ. ಅದನ್ನು ಮಾಡಲು ನಾಯಕತ್ವಕ್ಕೆ ಗಟ್ಟಿ ಎದೆಗಾರಿಕೆ ಇರಬೇಕಾಗುತ್ತದೆ. ಟಿಕೆಟ್‌ ವಂಚಿತ ಶಾಸಕರು ಸುಮ್ಮನೆ ಕೂರುವುದಿಲ್ಲ. ಅವರಲ್ಲಿ ಬಹುಪಾಲು ಮಂದಿ ಎದುರಾಳಿ ಪಕ್ಷ ಸೇರುತ್ತಾರೆ. ಕೆಲವು ಸ್ವತಂತ್ರ ಸ್ಪರ್ಧೆ ಮಾಡಿ ಅಧಿಕೃತ ಅಭ್ಯರ್ಥಿಗೆ ಪಟ್ಟು ನೀಡುತ್ತಾರೆ. 'ಇಂತಹ ಸಂಭವನೀಯ ಅಪಾಯ ತಪ್ಪಿಸುವುದಕ್ಕಾಗಿಯೇ ಶಾ ಅವರು ವಿಸ್ತೃತ ಸಮಾಲೋಚನೆ ನಡೆಸಲಿದ್ದಾರೆ' ಎಂದು ಪಕ್ಷದ ನಿಕಟವರ್ತಿಗಳು ತಿಳಿಸಿದ್ದಾರೆ.
ಕಳೆದ ಚುನಾವಣೆಯಲ್ಲಿ 403 ಸದಸ್ಯ ಬಲದ ವಿಧಾನಸಭೆಯಲ್ಲಿ ಬಿಜೆಪಿ 312 ಸ್ಥಾನ ಗೆದ್ದುಕೊಂಡಿತ್ತು. ರಾಜ್ಯದಲ್ಲಿ 2017ರ ಸ್ಥಿತಿಗೆ ಹೋಲಿಸಿದರೆ ಬಿಜೆಪಿ ಸಂಘಟನಾತ್ಮಕವಾಗಿ ಈಗ ಬಲಿಷ್ಠವಾಗಿದೆ. ಅಂದು ತೀರಾ ದುರ್ಬಲ ಸ್ಥಿತಿಯಲ್ಲಿಯೂ ಅಮಿತ್‌ ಶಾ ಅವರು ಉಸ್ತುವಾರಿ ವಹಿಸಿ ಪಕ್ಷ ಗೆಲುವಿಗೆ ನೆರವಾಗಿದ್ದರು. ಈ ಸಾರಿ ಅಂತಹ ದೊಡ್ಡ ತಾಪತ್ರಯಗಳು ಇಲ್ಲ. ಪಕ್ಷ ಅಧಿಕಾರದಲ್ಲಿದೆ. ಕೇಂದ್ರದ ಸಾಥ್‌ ಇದೆ. ಸಂಘಟನಾತ್ಮಕವಾಗಿ ಸದೃಢತೆ ಇದೆ. ಮೋದಿ ಮೇನಿಯಾ ಭರ್ಜರಿಯಾಗಿದೆ. ಅಧಿಕಾರ ಉಳಿಸಿಕೊಳ್ಳುವುದು ಸುಲಭ ಎನ್ನುವುದು ತಜ್ಞರ ಲೆಕ್ಕಾಚಾರವಾಗಿದೆ. ಉತ್ತರಪ್ರದೇಶದಲ್ಲಿ ಬಿಜೆಪಿ 2.3 ಕೋಟಿ ಸದಸ್ಯತ್ವ ಹೊಂದಿದೆ. ಇದಕ್ಕೆ ಈ ವರ್ಷವೇ ಇನ್ನೂ 1.5 ಕೋಟಿ ಹೊಸ ಸದಸ್ಯರನ್ನು ಸೇರಿಸಲು ಪಕ್ಷ ನಿರ್ಧರಿಸಿದೆ. ಅಮಿತ್‌ ಶಾ ಭೇಟಿ ಬಳಿಕ ಸದಸ್ಯತ್ವ ಅಭಿಯಾನ ಆರಂಭಿಸಲು ರಾಜ್ಯ ನಾಯಕರು ನಿರ್ಧರಿಸಿದ್ದಾರೆ.
