ಲಸಿಕೆ ಅಡೆತಡೆಗೆ ಸುಪ್ರೀಂ ಕೋರ್ಟ್‌ ಕಿಡಿ: ಲಸಿಕೆಗೆ ಏಕರೂಪ ದರ ನಿಗದಿಗೆ ತಾಕೀತು

ಹೊಸದಿಲ್ಲಿ: ಕೇಂದ್ರ ಸರಕಾರದ ಕೋವಿಡ್‌ ಲಸಿಕಾ ನೀತಿಯನ್ನು ಸುಪ್ರೀಂ ಕೋರ್ಟ್‌ ಮತ್ತೊಮ್ಮೆ ತೀವ್ರ ತರಾಟೆಗೆ ಒಳಪಡಿಸಿದೆ. ಪಡೆಯಲು ಕಡ್ಡಾಯಗೊಳಿಸಿರುವ ಕೋವಿನ್‌ ನೋಂದಣಿ ಸಮಸ್ಯೆ, ಲಸಿಕೆ ಖರೀದಿ ನೀತಿಯ ಗೊಂದಲ, ದರ ತಾರತಮ್ಯ, ಲಸಿಕೆ ಕೊರತೆ ಸೇರಿದಂತೆ ಹಲವು ವಿಷಯಗಳನ್ನು ಪ್ರಸ್ತಾಪಿಸಿದ ಸರ್ವೋಚ್ಚ ನ್ಯಾಯಾಲಯ, ''ತಳಮಟ್ಟದ ಸಮಸ್ಯೆ ಅರಿಯಲು ನೆಲಕ್ಕೆ ಕಿವಿಗೊಟ್ಟು ಕೇಳಿ,'' ಎಂದು ಕೇಂದ್ರಕ್ಕೆ ತಾಕೀತು ಮಾಡಿತು. ''2021ರ ಅಂತ್ಯದ ವೇಳೆಗೆ ಎಲ್ಲರಿಗೂ ಲಸಿಕೆ ನೀಡುವ ಘೋಷಣೆಯನ್ನು ಮಾಡಿದೆ. ಆದರೆ ಅದಕ್ಕೆ ಪೂರಕವಾದ ನೀತಿಗಳು ಬೇಕಲ್ಲ? ಈ ಹಾದಿಯಲ್ಲಿ ಹತ್ತಾರು ಅಡೆತಡೆಗಳು ಉಳಿದಿವೆ. ಮೊದಲು ಅವುಗಳನ್ನು ಗುರುತಿಸಿ, ಇತ್ಯರ್ಥಪಡಿಸಿ,'' ಎಂದು ನ್ಯಾಯಮೂರ್ತಿ ಡಿ.ವೈ.ಚಂದ್ರಚೂಡ್‌ ನೇತೃತ್ವದ ಪೀಠ ಸಲಹೆ ನೀಡಿತು. ''45 ವರ್ಷ ಮೇಲ್ಪಟ್ಟ ಎಲ್ಲರಿಗೂ ಲಸಿಕೆ ಒದಗಿಸುವ ಬದ್ಧತೆಯನ್ನು ಕೇಂದ್ರ ತೋರಿದೆ, ಇದು ಸರಿಯಿದೆ. ಆದರೆ 18ರಿಂದ 44 ವಯೋಮಾನದವರ ವಿಷಯದಲ್ಲಿ ತಾರತಮ್ಯ ಇದೆ. ಇವರಿಗೆ ಬೇಕಾದ ಲಸಿಕೆಯಲ್ಲಿ ಶೇ.50ರಷ್ಟನ್ನು ರಾಜ್ಯಗಳು ಉತ್ಪಾದಕರಿಂದ ನೇರ ಖರೀದಿಸಬೇಕಿದ್ದು, ಕೇಂದ್ರಕ್ಕಿಂತ ಹೆಚ್ಚಿನ ದರ ತೆರಬೇಕಿದೆ. ಉಳಿದ ಅರ್ಧದಷ್ಟನ್ನು ಖಾಸಗಿ ಆಸ್ಪತ್ರೆಗಳಿಗೆ ನೀಡಲಾಗುತ್ತಿದೆ. ಈ ರೀತಿಯ ತಾರತಮ್ಯ ಹಂಚಿಕೆಯ ಹಿಂದಿನ ಔಚಿತ್ಯ ಏನು,'' ಎಂದು ಕೋರ್ಟ್‌ ಪ್ರಶ್ನೆ ಮಾಡಿತು. ''45 ವರ್ಷ ಮೇಲ್ಪಟ್ಟವರ ವಿಷಯದಲ್ಲಿ ನಿಮ್ಮ ಕಾಳಜಿ ತುಂಬ ಚೆನ್ನಾಗಿದೆ. ಅದು ಹಾಗೆಯೇ ಇರಬೇಕು ಕೂಡ. ಆದರೆ 18-44 ವಯೋಮಾನದವರ ವಿಷಯಕ್ಕೆ ಬಂದಾಗ ನಿಮ್ಮ ಆದ್ಯತೆ ಬದಲಾಗುತ್ತದೆ. ಈ ಭಿನ್ನತೆ ಯಾಕೆ? ಹಾಗೆ ನೋಡಿದರೆ ಕೊರೊನಾ ಎರಡನೇ ಅಲೆಯಲ್ಲಿ 45 ವರ್ಷ ಮೇಲ್ಪಟ್ಟವರಿಗೆ ಸೋಂಕು ಅಷ್ಟು ಭೀಕರವಾಗಿ ತಟ್ಟಿಲ್ಲ. 18-44 ವರ್ಷದೊಳಗಿನವರನ್ನೇ ಹೆಚ್ಚು ಕಾಡಿದೆ. ಲಸಿಕೆಯನ್ನು ಕೇಂದ್ರ ಖರೀದಿಸುವುದಾದರೆ, 45 ವರ್ಷ ಮೇಲ್ಪಟ್ಟವರಿಗೆ ಮಾತ್ರ ಸೀಮಿತಗೊಳಿಸುವುದು ಯಾಕೆ,'' ಎಂದು ನ್ಯಾಯಮೂರ್ತಿಗಳಾದ ಚಂದ್ರಚೂಡ್‌, ಎಲ್‌.ಎನ್‌.ರಾವ್‌ ಮತ್ತು ಎಸ್‌.ರವೀಂದ್ರ ಭಟ್‌ ಒಳಗೊಂಡ ಪೀಠ ಪ್ರಶ್ನಿಸಿದೆ. ಮೇ 1ರಿಂದ 24ರವರೆಗಿನ ಅಂಕಿ-ಅಂಶಗಳ ಪ್ರಕಾರ, ದೇಶದ ಶೇ.50ರಷ್ಟು ಸೋಂಕಿತರು 18ರಿಂದ 40 ವರ್ಷ ಒಳಗಿನವರಾಗಿದ್ದಾರೆ. ಈ ಅಂಕಿ ಸಂಖ್ಯೆಗಳನ್ನು ಗಮನದಲ್ಲಿಟ್ಟುಕೊಂಡು ಸೂಕ್ತ ಲಸಿಕೆ ನೀತಿ ರೂಪಿಸುವಂತೆ ಕೋರ್ಟ್‌ ಸಲಹೆ ಮಾಡಿದೆ. ಬೆಲೆ ತಾರತಮ್ಯ: ಒಂದೇ ರೀತಿಯ ಲಸಿಕೆ ಖರೀದಿಸುವಾಗಲೂ ಕೇಂದ್ರಕ್ಕಿಂತ ರಾಜ್ಯಗಳು ಹೆಚ್ಚು ಬೆಲೆ ತೆರಬೇಕಾಗಿದೆ. ಖಾಸಗಿ ಆಸ್ಪತ್ರೆಗಳು ಖರೀದಿಸುವಾಗ ಈ ಎರಡಕ್ಕಿಂತಲೂ ಹೆಚ್ಚಿನ ದರ ತೆರಬೇಕಾಗುತ್ತದೆ. ಹೊರೆ ಎನಿಸುವ ಇಂತಹ ಪ್ರತ್ಯೇಕ ದರ ನೀತಿ ಯಾಕೆ ಅನುಸರಿಸುತ್ತೀರಿ ಎಂದು ನ್ಯಾಯಪೀಠವು ಖಾರವಾಗಿ ಪ್ರಶ್ನಿಸಿತು. ''ಈ ಬಿಕ್ಕಟ್ಟಿನ ಸಂದರ್ಭದಲ್ಲಿ ಉತ್ಪಾದಕರಿಗೆ ದರ ನಿಗದಿ ಅಧಿಕಾರ ನೀಡಿರುವುದು ಸರಿಯಲ್ಲ. ಇಡೀ ದೇಶಕ್ಕೆ ಅನ್ವಯವಾಗುವ ಏಕ ದರ ನಿಗದಿಪಡಿಸುವ ಜವಾಬ್ದಾರಿಯನ್ನು ಕೇಂದ್ರ ಸರಕಾರವೇ ತೆಗೆದುಕೊಳ್ಳಬೇಕು. ಕಾಫಿಯ ವಾಸನೆ ನೋಡಿ ಮತ್ತು ದೇಶಾದ್ಯಂತ ಎಲ್ಲರಿಗೂ ಲಸಿಕೆಗೆ ಏಕರೂಪದ ದರ ನಿಗದಿಪಡಿಸಿ'' ಎಂದು ಸಲಹೆ ಮಾಡಿತು. ಜಾಗತಿಕ ಟೆಂಡರ್‌: ಲಸಿಕೆ ಕೊರತೆ ನೆಪ ಮಾಡಿಕೊಂಡು ಜಾಗತಿಕ ಟೆಂಡರ್‌ ಕರೆದಿರುವ ದಿಲ್ಲಿ ರಾಜ್ಯ ಸರಕಾರ ಮತ್ತು ಮುಂಬಯಿ ಮಹಾನಗರ ಪಾಲಿಕೆಯ ನಡೆಯನ್ನು ಕೂಡ ಕೋರ್ಟ್‌ ಪರಾಮರ್ಶೆಗೆ ಒಳಪಡಿಸಿತು. ''ಇದು ಸಾಂಕ್ರಾಮಿಕ ಬಿಕ್ಕಟ್ಟು. ಇಡೀ ದೇಶ ಒಂದೇ ರೀತಿ ಸಂಕಷ್ಟ ಎದುರಿಸುತ್ತಿದೆ. ಈ ಸಂದರ್ಭದಲ್ಲಿ ಮನಸೋ ಇಚ್ಛೆ ಲಸಿಕೆ ಖರೀದಿಗೆ ಮುಂದಾದರೆ ಹೇಗೆ? ಏಕ ನೀತಿ ಬೇಡವೇ? ಇಡೀ ದೇಶವನ್ನು ಕೇಂದ್ರ ಪ್ರತಿನಿಧಿಸುತ್ತಿರುವಾಗ ಇಂತಹ ಬಿಡಿ ನಿರ್ಧಾರಗಳು ಮಾರಕ,'' ಎಂದು ಅಭಿಪ್ರಾಯಪಟ್ಟಿತು. ಲಸಿಕೆಗಾಗಿ ಕೋವಿನ್‌ ಆ್ಯಪ್‌ನಲ್ಲಿ ನೋಂದಣಿ ಕಡ್ಡಾಯಗೊಳಿಸಿರುವ ಕ್ರಮವನ್ನೂ ಕೋರ್ಟ್‌ ಪ್ರಶ್ನೆ ಮಾಡಿತು. ''ಇದು ನಗರ ಪ್ರದೇಶದ ಜನರಿಗೆ ಅನುಕೂಲಕಾರಿ ಆಗಿರಬಹುದು. ಆದರೆ, ಗ್ರಾಮೀಣ ಭಾಗದ ಜನರ ಪರಿಸ್ಥಿತಿಯನ್ನೂ ಒಮ್ಮೆ ಅವಲೋಕನ ಮಾಡಿ. ಇಂಟರ್‌ನೆಟ್‌ ಕೊರತೆ, ನೋಂದಣಿಗೆ ಬೇಕಾದ ಕೌಶಲ ಸಮಸ್ಯೆ ಸೇರಿದಂತೆ ಹತ್ತಾರು ಅಡೆತಡೆಗಳು ಗ್ರಾಮೀಣ ಭಾಗದಲ್ಲಿ ಕಾಡುತ್ತವೆ. ಇದರಿಂದ ಲಸಿಕೆಯ ಸಮಾನ ಹಂಚಿಕೆಗೆ ಧಕ್ಕೆ ಒದಗುತ್ತದೆ. ವಾಸ್ತವ ಅರಿತು ಹೊಂದಾಣಿಕೆಯ ನೀತಿ ರೂಪಿಸಿ,'' ಎಂದು ತಾಕೀತು ಮಾಡಿತು. ಈ ಸಮಸ್ಯೆಗಳ ಕುರಿತು ಪ್ರತಿಕ್ರಿಯೆ ನೀಡಲು ಕೇಂದ್ರಕ್ಕೆ ನಾಲ್ಕು ವಾರಗಳ ಕಾಲಾವಕಾಶ ನೀಡಿ, ವಿಚಾರಣೆಯನ್ನು ಮುಂದೂಡಲಾಯಿತು. ತರಾಟೆಯ ಬಳಿಕ ಶಹಬ್ಬಾಸ್‌ಗಿರಿ ತೀವ್ರ ತರಾಟೆಯ ಬಳಿಕ, ಸೋಂಕು ನಿಯಂತ್ರಣಕ್ಕಾಗಿ ಅಂತಾರಾಷ್ಟ್ರೀಯ ಮಟ್ಟದಲ್ಲಿಕೇಂದ್ರ ನಡೆಸುತ್ತಿರುವ ಪ್ರಯತ್ನಕ್ಕೆ ಸುಪ್ರೀಂ ಕೋರ್ಟ್‌ ಮೆಚ್ಚುಗೆ ವ್ಯಕ್ತಪಡಿಸಿತು. ''ವಿದೇಶಾಂಗ ಸಚಿವರು ಅಮೆರಿಕಕ್ಕೆ ತೆರಳಿ ನಡೆಸುತ್ತಿರುವ ಸಂಧಾನವು ಈ ಸಂದರ್ಭ ಅಗತ್ಯವನ್ನು ಸಾರುತ್ತದೆ. ಇದು ಅತ್ಯುತ್ತಮ ಪ್ರಯತ್ನ. ನಾವು ಇಲ್ಲಿಯಾರನ್ನೂ ನಿಂದಿಸುತ್ತಿಲ್ಲ. ಎಲ್ಲಾ ಪ್ರಯತ್ನಗಳು ದೇಶದ ಸಂಕಷ್ಟ ನಿವಾರಣೆಗೆ ನೆರವಾಗಬೇಕು ಎನ್ನುವುದು ನಮ್ಮ ಕಾಳಜಿ,'' ಎಂದು ನ್ಯಾಯಪೀಠ ಸಮಾಧಾನ ಪಡಿಸಿತು. ಪರಿಸ್ಥಿತಿ ನಿಯಂತ್ರಣಕ್ಕೆ ಪ್ರಧಾನಿ ನರೇಂದ್ರ ಮೋದಿ ಅವರು ಹಲವು ದೇಶಗಳ ಪ್ರಮುಖರ ಜತೆ ನಡೆಸಿರುವ ಸಂಧಾನ ಕುರಿತು ಸಾಲಿಸಿಟರ್‌ ಜನರಲ್‌ ತುಷಾರ್‌ ಮೆಹ್ತಾ ಅವರು ನ್ಯಾಯಾಲಯದ ಗಮನಕ್ಕೆ ತಂದರು.