ಪ್ರೇಮ್ ಮತ್ತು ಮದುವೆ ಬಗ್ಗೆ ಕೆಟ್ಟ ಕಾಮೆಂಟ್ಸ್: ಕನಲಿ ಕೆಂಡವಾದ ರಕ್ಷಿತಾ!

25 ಕೋಟಿ ರೂಪಾಯಿ ಫೇಕ್ ಲೋನ್ ಪ್ರಕರಣದಿಂದ ಶುರುವಾದ ಚಾಲೆಂಜಿಂಗ್ ಸ್ಟಾರ್ ವಿವಾದ ಇದೀಗ ನಿರ್ದೇಶಕ 'ಜೋಗಿ' ಪ್ರೇಮ್‌ವರೆಗೂ ಬಂದು ನಿಂತಿದೆ. ತಮ್ಮ ಫಾರ್ಮ್ ಹೌಸ್‌ನಲ್ಲಿ ಮಾಧ್ಯಮಗಳ ಜೊತೆ ಮಾತನಾಡುವಾಗ ನಟ ದರ್ಶನ್, 'ಜೋಗಿ' ಪ್ರೇಮ್‌ಗೆ 'ಪುಡಂಗು' ಎಂಬ ಪದ ಬಳಸಿದ್ದರು. ''ಉಮಾಪತಿ ನನಗೆ ಪರಿಚಯ ಆಗಿದ್ದು ಮಿಸ್ಟರ್ ಜೋಗಿ ಪ್ರೇಮ್‌ರಿಂದ. ಉಮಾಪತಿ ಹಾಗೂ ಮಿಸ್ಟರ್ ನನ್ನ ಮನೆಗೆ ಬಂದರು. ಸಿನಿಮಾ ಬಗ್ಗೆ ನಾವು ಮೂರು ಜನ ಮಾತನಾಡಿದ್ವಿ. ಹೊರಗೆ ಬಂದ ತಕ್ಷಣ ಒಂದು ಮ್ಯಾಟರ್ ಬಂತು.. 'ತಾರಕ್' ಪ್ರೆಸ್‌ಮೀಟ್‌ನಲ್ಲಿ ನಾನು ಹೇಳಿದ್ದೆ 70 ದಿನದ ಮೇಲೆ ನಾನು ಯಾರಿಗೂ ಕಾಲ್‌ಶೀಟ್ ಕೊಡಲ್ಲ ಅಂತ. ಆದರೆ, ಪ್ರೇಮ್‌ಗಾಗಿ ದರ್ಶನ್ ನೂರು ದಿನ ಡೇಟ್ಸ್ ಕೊಡ್ತಿದ್ದಾರೆ ಅಂತ ಸುದ್ದಿ ಆಯ್ತು. ಪ್ರೇಮ್ ಏನು ಪುಡಂಗಾ, ಎರಡು ಕೊಂಬೈತಾ? 'ಕರಿಯ'ದಲ್ಲೂ ನಾವು ನೋಡಿದ್ದೇವೆ ಪ್ರೇಮ್‌ದು ಏನು ಅಂತ.. ಆಮೇಲೆ ಇದನ್ನ ನಾನು ಮಾಡಲ್ಲ ಅಂತ ಹೇಳಿದೆ. ತರುಣ್ ಬಂದರು ಸಿನಿಮಾ ಆಯ್ತು'' ಎಂದು 'ದಾಸ' ದರ್ಶನ್ ಮೀಡಿಯಾ ಮುಂದೆ ಹೇಳಿದ್ದರು. ದರ್ಶನ್ ಹೀಗೆ ಹೇಳಿದ್ದು ನಿರ್ದೇಶಕ ಪ್ರೇಮ್ ಮತ್ತವರ ಪತ್ನಿ ರಕ್ಷಿತಾ ಪ್ರೇಮ್‌ಗೆ ಬೇಸರ ತರಿಸಿದೆ. ''ದರ್ಶನ್ ಮಾತಿನಿಂದ ನನಗೆ ಹರ್ಟ್ ಆಗಿದೆ'' ಎಂಬುದನ್ನು ನಿರ್ದೇಶಕ ಪ್ರೇಮ್ ಮಾಧ್ಯಮಗಳ ಮುಂದೆಯೇ ಹೇಳಿದರು. ಈ ನಡುವೆ ನಟಿ ರಕ್ಷಿತಾ ಕೂಡ ಪತಿ ಪ್ರೇಮ್ ಪರ ನಿಂತು ತಮ್ಮ ಬೇಸರವನ್ನು ಹೊರಹಾಕಿದ್ದರು. ಪರಿಣಾಮ, ಸೋಷಿಯಲ್ ಮೀಡಿಯಾದಲ್ಲಿ ರಕ್ಷಿತಾಗೆ ಕೆಲ ಕೆಟ್ಟ ಕಾಮೆಂಟ್ಸ್ ಲಭ್ಯವಾಗಿದೆ. ಇದರಿಂದ ಕನಲಿ ಕೆಂಡವಾಗಿದ್ದಾರೆ. ''ಹಾರ್ಟ್ ಬ್ರೋಕನ್'' ''ಇದು ನಮ್ಮ ಚಿತ್ರರಂಗ. ನಮ್ಮ ಮನೆ. ಇಲ್ಲಿ ಯಾರೂ ದೊಡ್ಡವರಲ್ಲ, ಚಿಕ್ಕವರಲ್ಲ. ಅವರು ಮಾಡುವ ಕೆಲಸ ಅವರನ್ನು ದೊಡ್ಡವರು, ಚಿಕ್ಕವರನ್ನಾಗಿ ಮಾಡುತ್ತದೆ. ನಾವೆಲ್ಲರೂ ಪರಸ್ಪರ ಪ್ರೀತಿಸುತ್ತೇವೆ, ಗೌರವ ನೀಡುತ್ತೇವೆ. ಆದರೆ ಈ ತರಹದ ಘಟನೆ ನಡೆಯಬಾರದಿತ್ತು. ನಾನು ಪ್ರೀತಿಸುವ, ನಾನು ಕಾಳಜಿ ತೋರಿಸುವ ಜನರ ಮಧ್ಯೆ ಈ ತರಹದ ಬೆಳವಣಿಗೆ ಆಗುತ್ತಿರುವುದು ದುರಾದೃಷ್ಟಕರ'' ಎಂದು ಇನ್ಸ್ಟಾಗ್ರಾಮ್‌ನಲ್ಲಿ ರಕ್ಷಿತಾ ಪ್ರೇಮ್ ಬರೆದುಕೊಂಡಿದ್ದಾರೆ. ಸಿಡಿಮಿಡಿಗೊಂಡ ರಕ್ಷಿತಾ ಪ್ರೇಮ್ ''ನನ್ನನ್ನ ಯಾಕೆ ಟಾರ್ಗೆಟ್ ಮಾಡಲಾಗುತ್ತಿದೆ? ಪ್ರೇಮ್ ನನ್ನ ಪತಿ.. ಹೀಗಾಗಿ ನಾನು ಟಾರ್ಗೆಟ್ ಆದರೂ ಪರ್ವಾಗಿಲ್ಲ. ನಾನು ಪ್ರೇಮ್ ಪರ ನಿಂತ ಮಾತ್ರಕ್ಕೆ ಉಳಿದವರೆಲ್ಲರ ವಿರುದ್ಧ ನಿಂತಿದ್ದೇನೆ ಅಂತಲ್ಲ. ನಾನು ಪ್ರೇಮ್ ಪರವಾಗಿದ್ದೇನೆ. ಇದು ಅವರಿಗೂ ಗೊತ್ತಿದೆ. ಈಗ ನನ್ನ ಮದುವೆ ಬಗ್ಗೆ ಕಾಮೆಂಟ್ ಮಾಡುತ್ತಿರುವ ಎಲ್ಲರಿಗೂ ನಾಚಿಕೆಯಾಗಬೇಕು'' ಎಂದು ಇನ್ಸ್ಟಾಗ್ರಾಮ್‌ನಲ್ಲಿ ರಕ್ಷಿತಾ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ರಕ್ಷಿತಾ ಪ್ರೇಮ್ ಪ್ರತಿಕ್ರಿಯೆ ''ಈ ಬೆಳವಣಿಗೆ ತುಂಬಾ ಅನಿರೀಕ್ಷಿತ. ಅವರು ಹಾಗೆ ಮಾತನಾಡುತ್ತಾರೆ ಎಂದು ನಾನು ನಿರೀಕ್ಷೆ ಮಾಡಿರಲಿಲ್ಲ. ಸಹಜವಾಗಿ ಯಾರೇ ಆದರೂ ಅಪ್‌ಸೆಟ್ ಆಗೇ ಆಗುತ್ತಾರೆ. ಪ್ರೇಮ್ ಬಗ್ಗೆ ಅಂತ ಅಲ್ಲ. ಯಾರ ಬಗ್ಗೆಯೂ ಹಗುರವಾಗಿ ಮಾತನಾಡುವುದು ತಪ್ಪೇ. ಆದರೆ, ಆ ಕ್ಷಣದಲ್ಲಿ ಅವರ ಮೈಂಡ್ ಸ್ಟೇಟ್ ಬಗ್ಗೆಯೂ ನಾವು ಅರ್ಥ ಮಾಡಿಕೊಳ್ಳಬೇಕಿದೆ. ನನಗೆ ಅದರಿಂದ ಕೋಪ ಬಂದಿಲ್ಲ. ಬೇಜಾರಾಗಿದೆ. ಇದರಿಂದ ನಮ್ಮ ಬಾಂಡ್ ಚೇಂಜ್ ಆಗುವುದಿಲ್ಲ. ನಾನು ಪ್ರೇಮ್ ಪರ ಇದ್ದೇನೆ. ಹಾಗಂತ ನಾನು ದರ್ಶನ್ ವಿರುದ್ಧ ಅಂತಲ್ಲ. ಮುಂದೆಯೂ ನಾನು ದರ್ಶನ್ ಜೊತೆಗೆ ಮಾತನಾಡುತ್ತೇನೆ. ದರ್ಶನ್-ಉಮಾಪತಿ ಮಧ್ಯೆ ಎಲ್ಲವೂ ಸರಿ ಹೋಗುತ್ತೆ ಎಂದು ನಾನು ಭಾವಿಸುತ್ತೇನೆ. ದರ್ಶನ್ ತುಂಬಾ ಒಳ್ಳೆಯವರು'' ಎಂದು ಮಾಧ್ಯಮವೊಂದಕ್ಕೆ ನಟಿ ರಕ್ಷಿತಾ ಪ್ರೇಮ್ ಹೇಳಿದ್ದಾರೆ.