ದೇಶದ ದೂರದರ್ಶನದಲ್ಲಿ ಅತೀ ಹೆಚ್ಚು ವೀಕ್ಷಣೆಗೆ ಒಳಗಾದ ವ್ಯಕ್ತಿಯಾಗಿ ಪ್ರಧಾನಿ ಮೋದಿ ದಾಖಲೆ
2020ರ ಮಾರ್ಚ್ 24ರಂದು ಪ್ರಥಮ ಲಾಕ್ಡೌನ್ ಘೋಷಣೆಯಾದ ಸಂದರ್ಭ ಪ್ರಧಾನಿ ಮಾಡಿದ ಭಾಷಣವನ್ನೂ ಅತಿ ಹೆಚ್ಚು ಮಂದಿ ವೀಕ್ಷಿಸಿದ್ದರು. ಲಾಕ್ಡೌನ್ ಅವಧಿಯಲ್ಲಿ ದೇಶದ ಜನತೆ ಮೂರ್ನಾಲ್ಕು ತಿಂಗಳುಗಳ ಕಾಲ ಮನೆಯಿಂದ ಹೊರಬಾರದಂತೆ ನಿರ್ಬಂಧಿಸಲಾಗಿತ್ತು. ಕೋವಿಡ್ ಸೋಂಕು ತಡೆಗಟ್ಟುವ ಸಲುವಾಗಿ ಕೇಂದ್ರ ಸರ್ಕಾರ ಇಡೀ ದೇಶವನ್ನೇ ಲಾಕ್ಡೌನ್ ಮಾಡಿತ್ತು. ಈ ಅವಧಿಯಲ್ಲಿ ಮನೆಯಲ್ಲಿಯೇ ಇದ್ದ ಜನರು ಪ್ರಧಾನಿ ಮೋದಿ ಅವರ ಭಾಷಣವನ್ನು ಹೆಚ್ಚು ವೀಕ್ಷಿಸಿದ್ದಾರೆ.
Admin
0
8
ಹೊಸದಿಲ್ಲಿ: ಭಾರತದ ರಾಜಕೀಯ ರಂಗದಲ್ಲಿ ಹೆಚ್ಚು ಪ್ರಭಾವ ಹೊಂದಿರುವ ಪ್ರಧಾನಿ ಅವರು ಕಳೆದ ವರ್ಷ ದೇಶದ ದೂರದರ್ಶನದಲ್ಲಿ ಅತಿ ಹೆಚ್ಚು ವೀಕ್ಷಣೆಗೆ ಒಳಪಟ್ಟ ವ್ಯಕ್ತಿ ಎನ್ನುವ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಕೋವಿಡ್ ಬಿಕ್ಕಟ್ಟು, ಲಸಿಕೆ ಅನ್ವೇಷಣೆ, ರೈತರ ಪ್ರತಿಭಟನೆ ಸೇರಿದಂತೆ ಹತ್ತಾರು ವಿಷಯಗಳ ಕುರಿತು ಪ್ರಧಾನಿ ಮೋದಿ ರಾಷ್ಟ್ರ ಉದ್ದೇಶಿಸಿ ಹಲವು ಬಾರಿ ಪದೇ ಪದೇ ಭಾಷಣ ಮಾಡಿದ್ದರು. ‘ಅವರ ಪ್ರತಿ ಮಾತುಗಳನ್ನು ಕೇಳಲು ಇಡೀ ದೇಶ ತವಕಿಸುತ್ತಿತ್ತು. ಯಾವುದೇ ಜನಪ್ರಿಯ ಮನರಂಜನೆ ಕಾರ್ಯಕ್ರಮಗಳಿಗಿಂತ ಅವರ ಮಾತುಗಳು ಹೆಚ್ಚು ಮನ್ನಣೆ ಗಿಟ್ಟಿಸಿದ್ದವು. ಟಿ.ವಿಯಲ್ಲಿ ಅವರ ಭಾಷಣಕ್ಕೆ ಟಿಆರ್‌ಪಿ ಅಗಾಧವಾಗಿತ್ತು’ ಎಂದು 2019- 20ರ ಬ್ರಾಡ್‌ಕಾಸ್ಟ್‌ ಆಡಿಯೋ ರಿಸರ್ಚ್ ಕೌನ್ಸಿಲ್‌ (ಬಾರ್ಕ್) ವರದಿ ತಿಳಿಸಿದೆ.
‘ಪ್ರಧಾನಿ ನರೇಂದ್ರ ಮೋದಿ ನೀಡಿದ ಸಂದರ್ಶನಗಳು, ಜಾಗತಿಕ ಕಾರ್ಯಕ್ರಮಗಳಲ್ಲಿ ಮಾಡಿದ ಭಾಷಣಗಳು, ರಾಷ್ಟ್ರ ಉದ್ದೇಶಿದ ಭಾಷಣಗಳು ಮತ್ತು ಅವರ ವನ್ಯಜೀವಿ ಸಾಹಸ ಪ್ರದರ್ಶನ ಕಾರ್ಯಕ್ರಮಗಳನ್ನು ಪ್ರಸಾರ ಮಾಡಿದ ಚಾನಲ್‌ಗಳನ್ನು ಜನ ಮುಗಿಬಿದ್ದು ನೋಡಿದ್ದಾರೆ. ವೀಕ್ಷಣೆಯಲ್ಲಿ ಈ ಕಾರ್ಯಕ್ರಮಗಳು ಹೊಸ ದಾಖಲೆ ಸೃಷ್ಟಿಸಿವೆ’ ಎಂದು ಬಾರ್ಕ್ ವರದಿ ತಿಳಿಸಿದೆ.
‘ಕಳೆದ ಬಾರಿ ದಿಲ್ಲಿ ಕೆಂಪು ಕೋಟೆಯಿಂದ ಪ್ರಧಾನಿ ನರೇಂದ್ರ ಮೋದಿ ಅವರು ಮಾಡಿದ ಭಾಷಣ ಎಂದಿನಂತೆ ದೂರದರ್ಶನಗಳಲ್ಲಿ ಪ್ರಸಾರಗೊಂಡಿತು. ಈ ಕಾರ್ಯಕ್ರಮವನ್ನು ದಾಖಲೆಯ 14 ಕೋಟಿ ಮಂದಿ ವೀಕ್ಷಣೆ ಮಾಡಿದರು. 2019ರ ಸ್ವಾತಂತ್ರ್ಯೋತ್ಸವದ ಪ್ರಧಾನಿ ಭಾಷಣಕ್ಕಿಂತಲೂ ಶೇ.40ರಷ್ಟು ಹೆಚ್ಚಿನ ವೀಕ್ಷಕರು ಈ ಕಾರ್ಯಕ್ರಮದ ಭಾಷಣವನ್ನು ನೋಡಿದರು. 2020ರ ಮಾರ್ಚ್ 24ರಂದು ಪ್ರಥಮ ಲಾಕ್ಡೌನ್ ಘೋಷಣೆಯಾದ ಸಂದರ್ಭ ಪ್ರಧಾನಿ ಮಾಡಿದ ಭಾಷಣವನ್ನೂ ಅತಿ ಹೆಚ್ಚು ಮಂದಿ ವೀಕ್ಷಿಸಿದ್ದರು. ಹಿಂದಿನ ಅವರದ್ದೇ ಭಾಷಣಗಳ ನಿಮಿಷಾವಧಿಯ ವೀಕ್ಷಕರ ದಾಖಲೆಯನ್ನು ಅದು ಮುರಿದಿದೆ’ ಎಂದು ಬಾರ್ಕ್ ತಿಳಿಸಿದೆ. ಲಾಕ್ಡೌನ್ ಅವಧಿಯಲ್ಲಿ ದೇಶದ ಜನತೆ ಮೂರ್ನಾಲ್ಕು ತಿಂಗಳುಗಳ ಕಾಲ ಮನೆಯಿಂದ ಹೊರಬಾರದಂತೆ ನಿರ್ಬಂಧಿಸಲಾಗಿತ್ತು. ಕೋವಿಡ್ ಸೋಂಕು ತಡೆಗಟ್ಟುವ ಸಲುವಾಗಿ ಕೇಂದ್ರ ಸರ್ಕಾರ ಇಡೀ ದೇಶವನ್ನೇ ಲಾಕ್ಡೌನ್ ಮಾಡಿತ್ತು. ಈ ಅವಧಿಯಲ್ಲಿ ಮನೆಯಲ್ಲಿಯೇ ಇದ್ದ ಜನರು ಪ್ರಧಾನಿ ಮೋದಿ ಅವರ ಭಾಷಣವನ್ನು ಹೆಚ್ಚು ವೀಕ್ಷಿಸಿದ್ದಾರೆ.
20 ಕೋಟಿ ಜನರಿಂದ ವೀಕ್ಷಣೆ
- 2020 ರ ಏಪ್ರಿಲ್‌ನಲ್ಲಿ 20 ಲಕ್ಷ ಕೋಟಿ ರೂ. ಪರಿಹಾರ ಪ್ಯಾಕೇಜ್‌ ಘೋಷಣೆ ಮಾಡಿ ಪ್ರಧಾನಿ ಮಾಡಿದ್ದ ಭಾಷಣವನ್ನು 20.3 ಕೋಟಿ ಜನ ವೀಕ್ಷಣೆ ಮಾಡಿದ್ದರು.
- ಕೋವಿಡ್ ವಿರುದ್ಧದ ಹೋರಾಟದಲ್ಲಿ ಮೃತಪಟ್ಟ ಆರೋಗ್ಯ ಸಿಬ್ಬಂದಿಗೆ ಗೌರವ ಸಲ್ಲಿಸಲು ಒಂಬತ್ತು ನಿಮಿಷ ದೀಪ ಆರಿಸಲು ಪ್ರಧಾನಿ ಕೇಳಿಕೊಂಡಿದ್ದರು. ಆ ಒಂಬತ್ತು ನಿಮಿಷಗಳ ಅವಧಿಯಲ್ಲಿ ದೂರದರ್ಶನ ವೀಕ್ಷಕರ ಪ್ರಮಾಣ ಶೇ.60ರಷ್ಟು ಕುಸಿದು ಹೋಗಿತ್ತು.
- ಕೋವಿಡ್ ಸಂಬಂಧಿಸಿದ ಸರಕಾರದ ಪ್ರಕಟಣೆಗಳು ಅತಿ ಹೆಚ್ಚು ವೀಕ್ಷಣೆಗೆ ಒಳಪಟ್ಟಿವೆ.
