ಲಸಿಕೆಯ ಸಾಧನೆಗೆ ಮನ್​ ಕಿ ಬಾತ್​ನಲ್ಲಿ ಮೋದಿ ಬಣ್ಣನೆ, ಆರೋಗ್ಯ ಸಿಬ್ಬಂದಿ ಸೇವೆಗೆ ಮೆಚ್ಚುಗೆ; ಡ್ರೋನ್ ನೀತಿ ಪ್ರಸ್ತಾಪ

ಹೊಸದಿಲ್ಲಿ: ‘ಭಾರತವು ಲಸಿಕೆಯ ಶತಕೋಟಿ ಸಾಧನೆಯೊಂದಿಗೆ ಇಡೀ ಜಗತ್ತಿಗೆ ತನ್ನ ಸಾಮರ್ಥ್ಯ ಏನು ಎನ್ನುವುದನ್ನು ಮತ್ತೊಮ್ಮೆ ಮನವರಿಕೆ ಮಾಡಿಕೊಟ್ಟಿದೆ. ದೇಶ ಈಗ ಮೈಲುಗಲ್ಲಿನ ಹೆಗ್ಗಳಿಕೆಯ ಜತೆಗೆ ನವ ಶಕ್ತಿ ಮೈಗೂಡಿಸಿಕೊಂಡು ಮುನ್ನಡೆದಿದೆ’ ಎಂದು ಪ್ರಧಾನಿ ಬಣ್ಣಿಸಿದ್ದಾರೆ. ಮಾಸಿಕ ಬಾನುಲಿ ಕಾರ್ಯಕ್ರಮ 'ಮನ್‌ ಕಿ ಬಾತ್‌'ನಲ್ಲಿ ಭಾನುವಾರ ಮಾತನಾಡಿದ ಪ್ರಧಾನಿ, ‘ಲಸಿಕೆ ಅಭಿಯಾನ ಅದ್ಭುತ ಯಶಸ್ಸು ಕಂಡಿದೆ. ನೂರು ಕೋಟಿ ಸಾಧನೆ ಬಹುದೊಡ್ಡ ಹೆಗ್ಗಳಿಕೆ. ಈ ಮೂಲಕ ಜಗತ್ತಿಗೆ ಭಾರತದ ಶಕ್ತಿಯ ಬಗ್ಗೆ ಗೌರವ ಮೂಡಿದೆ. ಒಗ್ಗೂಡಿ ನಡೆದರೆ ಅಸಾಧ್ಯ ಎನ್ನುವುದು ಯಾವುದೂ ಇಲ್ಲಎನ್ನುವುದು ಈ ಮೂಲಕ ಸಾಬೀತಾಗಿದೆ. ಲಸಿಕೆ ವಿಷಯದಲ್ಲಿ ಒಗ್ಗಟ್ಟಿನ ಮಂತ್ರ (ಸಬ್ಕಾ ಪ್ರಯಾಸ್‌) ಫಲಿಸಿದೆ’ ಎಂದರು. ಆರೋಗ್ಯ ಸೇವಾ ಕಾರ್ಯಕರ್ತರ ದಣಿವರಿಯದ ದುಡಿಮೆಯನ್ನು ಮೋದಿ ಶ್ಲಾಘಿಸಿದರು. ಹತ್ತಾರು ಅಡೆತಡೆಗಳ ನಡುವೆಯೂ ಪ್ರತಿಶತ ನೂರಕ್ಕೆ ನೂರರಷ್ಟು ಮೊದಲ ಡೋಸ್‌ ಲಸಿಕೆ ನೀಡಿಕೆ ಸಾಧನೆ ಮಾಡಿದ ಉತ್ತರಾಖಂಡ ಮತ್ತು ಹಿಮಾಚಲ ಪ್ರದೇಶವನ್ನು ಕೊಂಡಾಡಿದರು. ಅ.21ಕ್ಕೆ ಭಾರತ 100 ಕೋಟಿ ಡೋಸ್‌ ಲಸಿಕೆ ಪೂರೈಸುವ ಮೂಲಕ ಮೈಲುಗಲ್ಲಿನ ಸಾಧನೆ ಮಾಡಿದೆ. ಅಮೃತ ಮಹೋತ್ಸವ: ದೇಶ 75ನೇ ಸ್ವಾತಂತ್ರ್ಯೋತ್ಸವ ಸಂಭ್ರಮದಲ್ಲಿದೆ. ಈ 'ಅಮೃತ ಮಹೋತ್ಸವ' ಬಣ್ಣಿಸುವ ಹಾಡುಗಳನ್ನು ನಮ್ಮ ಸಂಸ್ಕೃತಿಕ ಸಚಿವರು ಬಿಡುಗಡೆ ಮಾಡಿದ್ದಾರೆ. ಇದು ಯುವಜನರಿಗೆ ಪ್ರೇರಣಾದಾಯಕ. ನವ ಭಾರತದ ಸಾಧನೆ ಬಿಂಬಿಸುವ ಸೃಜನಶೀಲ ಬರಹಗಳು ತರುಣ ತರುಣಿಯರಿಂದ ಹೊರ ಹೊಮ್ಮಬೇಕಿದೆ ಎಂದು ಕರೆ ನೀಡಿದರು. ದೇಶಭಕ್ತಿ ಮೂಡಿಸುವ ಕಾರ್ಯ ತೊಟ್ಟಿಲಿನಿಂದಲೇ ಶುರುವಾಗಬೇಕು. ದೇಶಭಕ್ತಿಯ ಲಾಲಿಹಾಡುಗಳು ರಚಿಸಬೇಕು. ಸೃಜಶೀಲರು ಉತ್ತಮ ಕವಿತೆಗಳನ್ನು ಕಟ್ಟಬೇಕು. ಲಾಲಿಹಾಡುಗಳು ದೇಶಭಕ್ತಿಯ ಜತೆಗೆ ನವ ಭಾರತದ ಸಾಧನೆಯನ್ನು ಸಂಭ್ರಮಿಸುವಂತಿರಬೇಕು. 21ನೇ ಶತಮಾನದ ಕನಸುಗಳನ್ನು ತೆರೆದಿಡಬೇಕು ಎಂದು ಪ್ರಧಾನಿ ಸಲಹೆ ಮಾಡಿದರು. ಸ್ವಾತಂತ್ರ್ಯ ಚಳವಳಿ ತ್ಯಾಗ ಬಲಿದಾನಗಳ ಪ್ರತೀಕ. ಅದನ್ನು ಯಾರೂ ಮರೆಯುವಂತಿಲ್ಲ. ಇದರ ಅಮೃತ ಮಹೋತ್ಸವದ ಅಂಗವಾಗಿ ಹತ್ತಾರು ರೀತಿಯ ಸ್ಮರಣೀಯ ಕಾರ್ಯಕ್ರಮಗಳು ನಡೆಯುತ್ತಿದೆ. ಅದರಲ್ಲಿ ಸ್ವಾತಂತ್ರ್ಯೋತ್ಸವದ ಸ್ಮರಣೆ ಹಾಗೂ ದೇಶಭಕ್ತಿಯ ಮಹತ್ವ ಬಿಂಬಿಸುವ ರಂಗೋಲಿ ಸ್ಪರ್ಧೆಯನ್ನು ದೇಶಾದ್ಯಂತ ನಡೆಸಬೇಕು ಎಂದು ಸಚಿವರಿಗೆ ಸಲಹೆ ನೀಡಿದರು. ಡ್ರೋನ್‌ ನೀತಿ ಪ್ರಸ್ತಾಪ: ದೇಶದ ಭದ್ರತೆ ವಿಷಯದಲ್ಲಿ ಪ್ರಮುಖ ಪಾತ್ರ ವಹಿಸಲಿರುವ ಡ್ರೋನ್‌ಗಳ ಬಗ್ಗೆಯೂ ಪ್ರಧಾನಿ ಪ್ರಸ್ತಾಪ ಮಾಡಿದರು. ಈಗ ಇರುವ ತಂತ್ರಜ್ಞಾನ ಮತ್ತು ಮುಂದೆ ಆವಿಷ್ಕಾರಗೊಳ್ಳುವ ಭವಿಷ್ಯತ್ತಿನ ಮಾದರಿ ಗಮನದಲ್ಲಿಟ್ಟುಕೊಂಡು ಡ್ರೋನ್‌ ನೀತಿಯನ್ನು ಸಿದ್ಧಪಡಿಸಲಾಗಿದೆ ಎಂದರು. ಹೂಡಿಕೆ ಬಿಕ್ಕಟ್ಟುಗಳನ್ನು ಸುಲಲಿತಗೊಳಿಸಲಾಗಿದೆ. ಶುಲ್ಕ ಕೂಡ ಸುಲಭಗೊಂಡಿದ್ದು ಗಣನೀಯವಾಗಿ ತಗ್ಗಿಸಲಾಗಿದೆ. ದೇಶಿ ಮತ್ತು ವಿದೇಶಿ ಕಂಪನಿಗಳು ಡ್ರೋನ್‌ ಸ್ಟಾರ್ಟ್‌ಅಪ್‌ ಕ್ಷೇತ್ರದಲ್ಲಿ ಅಪಾರ ಹೂಡಿಕೆ ಮಾಡಿವೆ. ಇದಕ್ಕೆ ಹೊಸ ನೀತಿಯೇ ಕಾರಣ ಎಂದು ವಿವರಿಸಿದರು. ಅನೇಕ ಕಂಪನಿಗಳು ಉತ್ಪಾದನಾ ಘಟಕಗಳನ್ನು ತೆರೆದಿವೆ. ಸೇನೆ, ನೌಕಾ ಪಡೆ ಮತ್ತು ವಾಯು ಪಡೆಯಂತಹ ಪ್ರತಿಷ್ಠಿತ ವಿಭಾಗಗಳಿಂದ ಡ್ರೋನ್‌ ಖರೀದಿಗೆ ಒಲವು ವ್ಯಕ್ತವಾಗಿದೆ. 500 ಕೋಟಿ ರೂ. ಮೊತ್ತದ ಖರೀದಿ ಆದೇಶವನ್ನು ಈ ಸಂಸ್ಥೆಗಳು ಈಗಾಗಲೇ ನೀಡಿವೆ. ಇದು ಇಲ್ಲಿಗೆ ನಿಲ್ಲುವುದಿಲ್ಲ. ಡ್ರೋನ್‌ ತಂತ್ರಜ್ಞಾನ ಕ್ಷೇತ್ರದಲ್ಲಿ ಭಾರತವು ವಿಶ್ವದ ನಂಬರ್‌ ಒನ್‌ ಸ್ಥಾನಕ್ಕೆ ಏರಲಿದೆ. ಅದಕ್ಕೆ ಬೇಕಾದ ಎಲ್ಲಾ ಕ್ರಮಗಳನ್ನು ಸರಕಾರ ಕೈಗೊಂಡಿದೆ ಎಂದರು. ದುಪ್ಪಟ್ಟುಗೊಂಡ ಮಹಿಳಾ ಪ್ರಾತಿನಿಧ್ಯ: ರಕ್ಷಣಾ ವಲಯದಲ್ಲಿ ಮಹಿಳೆಯರ ಪಾಲ್ಗೊಳ್ಳುವಿಕೆ ಗಣನೀಯವಾಗಿ ಹೆಚ್ಚಿದೆ. ವಿಶೇಷವಾಗಿ ಪೊಲೀಸ್‌ ಇಲಾಖೆಯಲ್ಲಿ ನಾರಿ ಶಕ್ತಿ ವಿಜೃಂಬಿಸುತ್ತಿದೆ. ಪೊಲೀಸ್‌ ಸಂಶೋಧನೆ ಮತ್ತು ಅಭಿವೃದ್ಧಿ ಬ್ಯೂರೊ ಮಾಹಿತಿ ಪ್ರಕಾರ, ಇಲಾಖೆಯಲ್ಲಿನ ಮಹಿಳೆಯರ ಸಂಖ್ಯೆ 2.15 ಲಕ್ಷಕ್ಕೆ ಏರಿಕೆಯಾಗಿದೆ. ಈ ಪ್ರಮಾಣ 2014ರಲ್ಲಿ ಕೇವಲ 1.05 ಲಕ್ಷದಷ್ಟಿತ್ತು. ಇದೇ ಅವಧಿಯಲ್ಲಿ ಸಶಸ್ತ್ರ ಪಡೆಗಳಲ್ಲಿನ ಮಹಿಳಾ ಸಿಬ್ಬಂದಿ ಪ್ರಮಾಣವೂ ದುಪ್ಪಟ್ಟುಗೊಂಡಿದೆ ಎಂದು ಪ್ರಧಾನಿ ತಿಳಿಸಿದರು.