ಕಾಶ್ಮೀರದಲ್ಲಿ ಆಪರೇಷನ್‌ ಟೆರರ್: ಎನ್‌ಕೌಂಟರ್‌ನಲ್ಲಿ ಲಷ್ಕರ್‌ ಕಮಾಂಡರ್‌ ಹತ್ಯೆ

ಶ್ರೀನಗರ (ಜಮ್ಮು ): ಗುಪ್ತಚರ ಮಾಹಿತಿ ಅನುಸರಿಸಿ ಜಮ್ಮು ಮತ್ತು ಕಾಶ್ಮೀರದ ಬಾರಾಮುಲ್ಲಾ ಜಿಲ್ಲೆಯ ಸೊಪೊರ್‌ ಪ್ರದೇಶದಲ್ಲಿ ಭದ್ರತಾ ಪಡೆಗಳು ನಡೆಸಿದ ಕಾರ್ಯಾಚರಣೆಯಲ್ಲಿ ಪಾಕಿಸ್ತಾನ ಪೋಷಿತ ಲಷ್ಕರೆ ತಯ್ಬಾ ಸಂಘಟನೆಯ ಮುಖ್ಯ ಕಮಾಂಡರ್‌ ಸೇರಿದಂತೆ ಇಬ್ಬರು ಉಗ್ರರನ್ನು ಹತ್ಯೆಗೈಯಲಾಗಿದೆ. ಶೋಧ ಕಾರ್ಯಕ್ಕೆ ಮುಂದಾದ ಭದ್ರತಾ ಪಡೆಗಳು ಉಗ್ರರಿಗೆ ಮೊದಲು ಶರಣಾಗುವಂತೆ ಅವಕಾಶ ನೀಡಿದರು. ಬದಲಿಗೆ ಉಗ್ರರು ಗುಂಡಿನ ದಾಳಿ ನಡೆಸಿದ ಪರಿಣಾಮ, ಪ್ರತಿ ದಾಳಿಗೆ ಪಡೆಗಳು ಮುಂದಾದವು. ಮೃತ ಲಷ್ಕರ್‌ ಕಮಾಂಡರ್‌ನನ್ನು ಫಯಾಜ್‌ ಅಹ್ಮದ್‌ ವಾರ್‌ ಎಂದು ಗುರುತಿಸಲಾಗಿದೆ. ಆತನೊಂದಿಗಿದ್ದ ಶಾಹೀನ್‌ ಅಹ್ಮದ್‌ ಮಿರ್‌ ಅಲಿಯಾ ಶಾಹೀನ್‌ ಮೊಲ್ವಿಯನ್ನು ಕೂಡ ಹೊಡೆದುರುಳಿಸಲಾಗಿದೆ. ಉಗ್ರರ ಬಳಿ 2 ಎಕೆ-47 ರೈಫಲ್‌ಗಳು, ನಾಲ್ಕು ಮ್ಯಾಗ್‌ಜೀನ್‌ಗಳು ಸಿಕ್ಕಿವೆ ಎಂದು ಪೊಲೀಸ್‌ ವಕ್ತಾರರು ತಿಳಿಸಿದ್ದಾರೆ. ಉಗ್ರ ಸಂಘಟನೆಗಳೊಂದಿಗೆ 2008ರಿಂದಲೂ ನಿಕಟ ಸಂಪರ್ಕ ಹೊಂದಿದ್ದ ಫಯಾಜ್‌, ಹಿಜ್ಬುಲ್‌ ಮುಜಾಹಿದ್ದೀನ್‌ ಸಂಘಟನೆಯಲ್ಲಿ ಸಕ್ರಿಯನಾಗಿದ್ದ ವೇಳೆ ಕಾರ್ಯಾಚರಣೆವೊಂದರಲ್ಲಿ ಶಸ್ತ್ರಾಸ್ತ್ರ ಸಮೇತ ಪೊಲೀಸರಿಗೆ ಶರಣಾಗಿದ್ದ. 2020ರ ಮಾರ್ಚ್‌ನಲ್ಲಿ ಬಿಡುಗಡೆಗೊಂಡ ನಂತರ ಆತ ಲಷ್ಕರ್‌ ಕಮಾಂಡರ್‌ ಆಗಿ ಉತ್ತರ ಕಾಶ್ಮೀರದಲ್ಲಿ ಉಗ್ರ ದಾಳಿಗಳ ನೇತೃತ್ವ ವಹಿಸಿದ್ದ. ಕಳೆದ ವರ್ಷ ಏಪ್ರಿಲ್‌ನಲ್ಲಿ ಜಂಟಿ ತಾಲೀಮು ನಡೆಸುತ್ತಿದ್ದ ಪೊಲೀಸರು - ಭದ್ರತಾ ಪಡೆಗಳ ಮೇಲೆ ಗುಂಡಿನ ದಾಳಿ ನಡೆಸಿ ಮೂವರು ಸಿಆರ್‌ಪಿಎಫ್‌ ಯೋಧರನ್ನು ಹತ್ಯೆಗೈದಿದ್ದ ಎಂದು ಪೊಲೀಸರು ಹೇಳಿದ್ದಾರೆ. ಐಇಡಿ ಹೊತ್ತಿದ್ದ ಡ್ರೋನ್‌: ಸುಮಾರು ಐದು ಕೆ. ಜಿ.ಗಳಷ್ಟು ಸುಧಾರಿತ ಸ್ಫೋಟಕ ಸಾಧನ (ಐಇಡಿ) ಹೊತ್ತುಕೊಂಡು ಜಮ್ಮು ಜಿಲ್ಲೆಯ ಕಾನಾಚಕ್‌ನ ಗಡಿಯಲ್ಲಿ ಹಾರಾಡುತ್ತಿದ್ದ ಡ್ರೋನ್‌ವೊಂದನ್ನು ಜಮ್ಮು ಮತ್ತು ಕಾಶ್ಮೀರ ಪೊಲೀಸರು ಗುಂಡಿಕ್ಕಿ ಹೊಡೆದುರುಳಿಸಿದ್ದಾರೆ. ನಸುಕಿನ ಒಂದು ಗಂಟೆಗೆ ಕಡಿಮೆ ಎತ್ತರದಲ್ಲಿ ಹಾರಾಡುತ್ತಿದ್ದ ಡ್ರೋನ್‌, ದಾಳಿಗೆ ಮುಂದಾಗಿತ್ತು. ಆದರೆ ಮುಂಚಿತವಾಗಿಯೇ ಅದನ್ನು ಗುರುತಿಸಿದ ಇಲಾಖೆಯ ಕ್ಷಿಪ್ರ ಕಾರ್ಯಪಡೆಯ ಸಿಬ್ಬಂದಿಯು ದಾಳಿಯ ಯತ್ನ ವಿಫಲಗೊಳಿಸಿದ್ದಾರೆ ಎಂದು ಹೆಚ್ಚುವರಿ ಎಡಿಜಿಪಿ ಮುಕೇಶ್‌ ಸಿಂಗ್‌ ತಿಳಿಸಿದ್ದಾರೆ. ಆರು ರೆಕ್ಕೆಗಳಿದ್ದ ಹೆಕ್ಸಾಕಾಪ್ಟರ್‌ಗೆ ಜಿಪಿಎಸ್‌ ಸಾಧನ ಅಳವಡಿಸಲಾಗಿತ್ತು. ಐಇಡಿ ಸ್ಫೋಟಕ್ಕೆ ಸಹಾಯವಾಗುವ ವೈರ್‌ಗಳ ಜೋಡಣೆ ಮಾತ್ರ ಬಾಕಿ ಉಳಿದಿತ್ತು ಎಂದು ತಿಳಿದುಬಂದಿದೆ. ಚೀನಾ, ತೈವಾನ್‌ ಮತ್ತು ಹಾಂಕಾಂಗ್‌ನಲ್ಲಿ ತಯಾರಾದ ಸಾಧನಗಳು ಡ್ರೋನ್‌ ಅವಶೇಷಗಳಲ್ಲಿ ಪತ್ತೆಯಾಗಿವೆ. ಕಳೆದ ಜೂನ್‌ ಅಂತ್ಯಕ್ಕೆ ಜಮ್ಮುವಿನ ವಿಮಾನ ನಿಲ್ದಾಣದಲ್ಲಿನ ಭಾರತೀಯ ವಾಯುಪಡೆ ನೆಲೆಯನ್ನು ಗುರಿಯಾಗಿಸಿ ಪಾಕ್‌ ಪೋಷಿತ ಉಗ್ರರು ಡ್ರೋನ್‌ ದಾಳಿ ನಡೆಸಿದ್ದರು.