ದೇಶಕ್ಕೆ ಬಂತು ಮತ್ತೊಂದು ಕೊರೊನಾ ಲಸಿಕೆ, ಮಾಡೆರ್ನಾ ವಾಕ್ಸಿನ್‌ ಬಳಕೆಗೆ ಕೇಂದ್ರದಿಂದ ಅನುಮತಿ
ಸಿಪ್ಲಾ ಕಂಪನಿಗೆ ಮಾಡೆರ್ನಾ ಲಸಿಕೆಯನ್ನು ಆಮದು ಮಾಡಿಕೊಂಡು ಭಾರತದಲ್ಲಿ ತುರ್ತು ಸಂದರ್ಭದಲ್ಲಿ ಬಳಕೆ ಮಾಡಲು ಸರಕಾರ ಅನುಮತಿ ನೀಡಿದೆ. ಶೀಘ್ರದಲ್ಲೇ ಫೈಜರ್ ಲಸಿಕೆ ಕೂಡ ಭಾರತ ಪ್ರವೇಶಿಸುವ ಸಾಧ್ಯತೆ ಇದೆ.
Admin
0
6
ಹೊಸದಿಲ್ಲಿ: ಫಾರ್ಮಾ ದೈತ್ಯ ಸಿಪ್ಲಾಗೆ ಮಾಡೆರ್ನಾ ಕೊರೊನಾ ಲಸಿಕೆಯನ್ನು ಆಮದು ಮಾಡಿಕೊಂಡು ಭಾರತದಲ್ಲಿ ತುರ್ತು ಸಂದರ್ಭದಲ್ಲಿ ಬಳಕೆ ಮಾಡಲು ಸರಕಾರ ಅನುಮತಿ ನೀಡಿದೆ.
ಔಷಧ ನಿಯಂತ್ರಕರಿಗೆ ಸಲ್ಲಿಸಿದ್ದ ಅರ್ಜಿಯಲ್ಲಿ ಸಿಪ್ಲಾ, 'ಅಮೆರಿಕದಂಥ ದೇಶಗಳಲ್ಲಿ ಬಳಕೆಗೆ ಅನುಮತಿ ಪಡೆದುಕೊಂಡಿರುವ ಲಸಿಕೆಗಳಿಗೆ ದೇಶದಲ್ಲಿ ಪರೀಕ್ಷೆ ನಡೆಸಬೇಕಾಗಿಲ್ಲ. ಮತ್ತು ಮೊದಲ 100 ಲಸಿಕೆ ಪಡೆದುಕೊಂಡವರ ಸುರಕ್ಷತೆಯ ಮೌಲ್ಯಮಾಪನ ದತ್ತಾಂಶಗಳನ್ನು ನೀಡಿದರೆ ಸಾಕು' ಎಂಬ ಸರಕಾರದ ತೀರ್ಮಾನವನ್ನು ಉಲ್ಲೇಖಿಸಿತ್ತು.
ಮಾಡೆರ್ನಾ ಕೊರೊನಾ ವಿರುದ್ಧ ಶೇ. 90ರಷ್ಟು ಪರಿಣಾಮಕಾರಿ ಎನ್ನಲಾಗಿದೆ. ಫೈಜರ್‌ನಂತೆ ಮಾಡೆರ್ನಾ ಕೂಡ ಎಂಆರ್‌ಎನ್‌ಎ ಲಸಿಕೆಯಾಗಿದೆ.
ಶೀಘ್ರದಲ್ಲೇ ಫೈಜರ್ ಕೂಡ ಎಂಟ್ರಿ
ಇತ್ತೀಚೆಗೆ ಫೈಜರ್ ಸಿಇಒ ಅಲ್ಬೆರ್ಟ್‌ ಬೌರ್ಲಾ, ಕಂಪನಿಯ ಲಸಿಕೆ ಶೀಘ್ರದಲ್ಲಿ ಭಾರತದಲ್ಲಿ ಲಭ್ಯವಾಗಲಿದೆ ಮತ್ತು ಅನುಮತಿ ನೀಡುವ ಪ್ರಕ್ರಿಯೆ ಅಂತಿಮ ಹಂತದಲ್ಲಿದೆ ಎಂದು ಹೇಳಿದ್ದಾರೆ.
"ಫೈಜರ್ ಭಾರತದಲ್ಲಿ ಕೋವಿಡ್‌-19 ಲಸಿಕೆಗೆ ಅನುಮೋದನೆ ಪಡೆಯುವ ಅಂತಿಮ ಹಂತದಲ್ಲಿದೆ. ಶೀಘ್ರದಲ್ಲೇ ನಾವು ಸರ್ಕಾರದೊಂದಿಗೆ ಒಪ್ಪಂದವನ್ನು ಅಂತಿಮಗೊಳಿಸುತ್ತೇವೆ ಎಂದು ನಾನು ಭಾವಿಸುತ್ತೇನೆ," ಎಂದು ಬೌರ್ಲಾ ತಿಳಿಸಿದ್ದಾರೆ.
