ದೇವಸ್ಥಾನದೊಳಗೆ ನುಗ್ಗಲು ಪ್ರಯತ್ನಿಸಿದ ಪೊಲೀಸ್: ಕಾವಲುಗಾರನ ಗುಂಡಿಗೆ ಬಲಿ

ಕಾಶ್ಮೀರ: ರಾತ್ರಿ ವೇಳೆ ದೇವಸ್ಥಾನವೊಂದರ ಒಳಗೆ ನುಗ್ಗಲು ಪ್ರಯತ್ನಿಸಿದ್ದ ಸಿಬ್ಬಂದಿಯೊಬ್ಬರನ್ನು ಭದ್ರತಾ 'ದೇಶವಿರೋಧಿ ವ್ಯಕ್ತಿ' ಎಂದು ತಪ್ಪಾಗಿ ಭಾವಿಸಿ ಮಾಡಿದ ಘಟನೆ ಜಮ್ಮು ಮತ್ತು ಕಾಶ್ಮೀರದಲ್ಲಿ ನಡೆದಿದೆ. ಹತ್ಯೆಯಾದ ವ್ಯಕ್ತಿಯನ್ನು ಲಂಗಟೆ ಹಂದ್ವಾರ ನಿವಾಸಿಯಾಗಿರುವ ಪೊಲೀಸ್ ಕಾನ್‌ಸ್ಟೆಬಲ್ ಅಜಯ್ ಧಾರ್ ಎಂದು ಗುರುತಿಸಲಾಗಿದೆ. ಈ ಘಟನೆ ಬಹಳ ದುರದೃಷ್ಟಕರ ಎಂದು ಪೊಲೀಸರು ಹೇಳಿದ್ದಾರೆ. ಮಂಗಳವಾರ ರಾತ್ರಿ ವೇಳೆ ಕಾನ್‌ಸ್ಟೆಬಲ್ ಅಜಯ್ ಧಾರ್ ಅವರು ದೇವಸ್ಥಾನದ ಬಾಗಿಲನ್ನು ಬಲವಾಗಿ ಗುದ್ದಲು ಆರಂಭಿಸಿದ್ದರು. ಅವರನ್ನು ಬೆದರಿಸಲು ಪೊಲೀಸ್ ಇಲಾಖೆಯ ಅವರ ಸಹೋದ್ಯೋಗಿ ಕಾವಲುಗಾರ ಗಾಳಿಯಲ್ಲಿ ಗುಂಡು ಹಾರಿಸಿದ್ದ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. 'ಕಾವಲುಗಾರ ಗಾಳಿಯಲ್ಲಿ ಗುಂಡು ಹಾರಿಸಿದ್ದರೂ ಧಾರ್ ಅವರು, ತಮ್ಮ ಪರಿಚಯ ಹೇಳಿಕೊಳ್ಳದೆಯೇ ಹೊರಗಿನಿಂದ ಬಾಗಿಲು ಬಡಿಯುವುದನ್ನು ಮುಂದುವರಿಸಿದ್ದರು. ಹೀಗಾಗಿ ಯಾರೋ ದೇಶವಿರೋಧಿ ಶಕ್ತಿಗಳು ದೇವಸ್ಥಾನದ ಮೇಲೆ ದಾಳಿ ನಡೆಸಲು ಪ್ರಯತ್ನಿಸುತ್ತಿವೆ ಎಂದು ಕಾವಲುಗಾರ ತಪ್ಪಾಗಿ ಭಾವಿಸಿದ್ದ' ಎಂದು ಪೊಲೀಸ್ ಮಹಾ ನಿರ್ದೇಶಕ ವಿಜಯ್ ಕುಮಾರ್ ಹೇಳಿದ್ದಾರೆ. ಅಜಯ್ ಧಾರ್ ಅವರು ಏಕೆ ಹಾಗೆ ಬಾಗಿಲು ಬಡಿದಿದ್ದರು ಎನ್ನುವುದು ಸ್ಪಷ್ಟವಾಗಿಲ್ಲ. ಕಿವಿಯೊಳಗೆ ಹೆಡ್‌ಫೋನ್ ಹಾಕಿಕೊಂಡಿದ್ದ ಧಾರ್, ಬಾಗಿಲ ಒಳಗಿನಿಂದ ಕಾವಲುಗಾರನ ಮಾತುಗಳಿಗೆ ಸ್ಪಂದಿಸಿರಲಿಲ್ಲ. ಇದರಿಂದ ಅನುಮಾನಗೊಂಡ ಕಾವಲುಗಾರ ಗುಂಡು ಹಾರಿಸಿದ್ದಾನೆ. ಗಾಯಗೊಂಡ ಪೊಲೀಸ್ ಸಿಬ್ಬಂದಿಯ ಗುರುತು ಪತ್ತೆಯಾದ ಕೂಡಲೇ ಸಮೀಪದ ಆಸ್ಪತ್ರೆಗೆ ಸಾಗಿಸಲಾಯಿತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಅವರು ಮೃತಪಟ್ಟರು. ಕಾಶ್ಮೀರದ ಬಹುತೇಕ ಪ್ರಮುಖ ದೇವಾಲಯಗಳಿಗೆ ಪೊಲೀಸರು ಹಾಗೂ ಸೈನಿಕರ ಕಾವಲನ್ನು ನಿಯೋಜಿಸಲಾಗಿದೆ. ರಾತ್ರಿ ವೇಳೆ ದೇವಸ್ಥಾನಗಳ ಬಳಿ ಸುಳಿದಾಡುವ ನಾಗರಿಕರನ್ನು ಭದ್ರತಾ ಸಿಬ್ಬಂದಿ ತಪ್ಪಾಗಿ ಭಾವಿಸಿ ಗುಂಡು ಹಾರಿಸಿದ ಅನೇಕ ಘಟನೆಗಳು ವರದಿಯಾಗಿದ್ದವು.