ಡೆಲ್ಟಾಪ್ಲಸ್‌ ಮಾರಣಾಂತಿಕ ಎನ್ನುವುದಕ್ಕೆ ಸಾಕಷ್ಟು ಪುರಾವೆ ಇಲ್ಲ ಎಂದ ಏಮ್ಸ್‌ ನಿರ್ದೇಶಕರು

ಹೊಸದಿಲ್ಲಿ: ಕೊರೊನಾ ರೂಪಾಂತರಿ ಮಾರಣಾಂತಿಕ ಎನ್ನುವುದಕ್ಕೆ ಸಾಕಷ್ಟು ಪುರಾವೆ ಇಲ್ಲ ಎಂದು ದಿಲ್ಲಿಯ ಅಖಿಲ ಭಾರತ ವೈದ್ಯಕೀಯ ವಿಜ್ಞಾನ ಸಂಸ್ಥೆ ನಿರ್ದೇಶಕ ಡಾ.ರಣದೀಪ್‌ ಗುಲೇರಿಯಾ ಹೇಳಿದ್ದಾರೆ. ''ಡೆಲ್ಟಾ ಪ್ಲಸ್‌ ವೈರಾಣು 'ಕಳವಳಕಾರಿ' ಎಂದು ಕೇಂದ್ರ ಸರಕಾರವೇ ಒಪ್ಪಿಕೊಂಡಿರುವುದರಿಂದ ಜನಸಾಮಾನ್ಯರಲ್ಲಿ ಡೆಲ್ಟಾ ಬಗ್ಗೆ ಭಯ ಹೆಚ್ಚಾಗುತ್ತಿದೆ. ವೇಗದ ಪ್ರಸರಣ ಮತ್ತು ಲಸಿಕೆಗಳಿಗೆ ಸಡ್ಡು ಹೊಡೆಯುವ ಸಾಮರ್ಥ್ಯ ಡೆಲ್ಟಾ ರೂಪಾಂತರಿಗೆ ಇದೆ ಎನ್ನುತ್ತಿರುವುದು ಕೂಡ ಭೀತಿ ಹೆಚ್ಚಿಸಿದೆ. ಆದರೆ ಇವನ್ನೆಲ್ಲ ಖಚಿತಪಡಿಸುವಷ್ಟು ಸಾಕ್ಷ್ಯ ಮತ್ತು ಅಂಕಿ-ಅಂಶಗಳು ಸದ್ಯಕ್ಕೆ ಲಭ್ಯವಿಲ್ಲ," ಎಂದು ಗುಲೇರಿಯಾ ಹೇಳಿದ್ದಾರೆ. ಸುದ್ದಿಸಂಸ್ಥೆ ಜತೆಗೆ ಮಾತನಾಡಿರುವ ಅವರು, "ಡೆಲ್ಟಾ ಪ್ಲಸ್‌ನಂಥ ರೂಪಾಂತರಿಗಳು ಅತಿಹೆಚ್ಚು ಪ್ರಮಾಣದಲ್ಲಿ ಸಾವಿಗೆ ಕಾರಣವಾಗುವ ಬಗ್ಗೆ ನಿಖರ ದಾಖಲೆಗಳು ಲಭ್ಯವಿಲ್ಲ. ಲಸಿಕೆಗಳ ನಿಯಂತ್ರಣಕ್ಕೂ ಸಿಗದೆಯೇ ರೂಪಾಂತರಿಗಳು ಪಾರಾಗುವ ಬಗ್ಗೆಯೂ ಸಾಕಷ್ಟು ಮಾಹಿತಿಗಳು ನಮ್ಮೆದುರು ಇಲ್ಲ. ಹಾಗಾಗಿ ಜನರು ಅನಗತ್ಯ ಆತಂಕ ಪಡುವ ಬದಲು, ಮುಂಜಾಗ್ರತೆ ನಿಯಮಗಳನ್ನು ಪಾಲಿಸುವುದು ಉತ್ತಮ,'' ಎಂದು ಕಿವಿಮಾತು ಹೇಳಿದ್ದಾರೆ. ''ಇತ್ತೀಚೆಗೆ ಬೆಳಕಿಗೆ ಬರುತ್ತಿರುವ ಕೊರೊನಾದ ಹೊಸ ರೂಪಾಂತರಿಗಳಿಂದ ಪಾರಾಗಲು ಜನರು ಮುನ್ನೆಚ್ಚರಿಕೆಯನ್ನು ಮೊದಲು ಪಾಲಿಸಬೇಕು. ಮಾಸ್ಕ್‌ಗಳನ್ನು ಸರಿಯಾಗಿ ತೊಡುವುದು, ಕೈಗಳ ಸ್ವಚ್ಛತೆ ಕಾಪಾಡಿಕೊಳ್ಳುವುದು ಮತ್ತು ಸಾಮಾಜಿಕ ಅಂತರ ಕಾಯ್ದುಕೊಂಡಿದ್ದರೆ ರೂಪಾಂತರಿಗಳ ಸೋಂಕಿನ ಅಬ್ಬರವನ್ನು ಸುಲಭವಾಗಿ ನಿಯಂತ್ರಿಸಬಹುದು,'' ಎಂದು ಅವರು ಹೇಳಿದ್ದಾರೆ. ಜೂನ್‌ 11ರಂದು ಮೊದಲ ಬಾರಿಗೆ ದೇಶದಲ್ಲಿ ಪತ್ತೆಯಾದ ಡೆಲ್ಟಾ ಪ್ಲಸ್‌ ಕೊರೊನಾ ರೂಪಾಂತರಿಯು ಸದ್ಯ 12 ರಾಷ್ಟ್ರಗಳಿಗೆ ವ್ಯಾಪಿಸಿದೆ. ಕೊರೊನಾ ಮೂರನೇ ಅಲೆಗೆ ಇದೇ ರೂಪಾಂತರಿ ಕಾರಣವಾಗಲಿದೆ ಎಂದು ಅಂದಾಜಿಸಲಾಗುತ್ತಿದೆ. ಶ್ವಾಸಕೋಶದ ಜೀವಕೋಶಗಳನ್ನು ಡೆಲ್ಟಾ ಪ್ಲಸ್‌ ಹೆಚ್ಚಾಗಿ ಬಾಧಿಸಲಿದೆ ಎಂದು ಇತ್ತೀಚೆಗೆ ಲಸಿಕೆ ಅಭಿಯಾನ ಸಲಹಾ ಸಮಿತಿಯ ಮುಖ್ಯಸ್ಥ ಡಾ. ಎನ್‌.ಕೆ. ಅರೋರಾ ಹೇಳಿದ್ದರು. ಲಸಿಕೆಗಳ ಕಾಕ್‌ಟೇಲ್‌ ಅಧ್ಯಯನ ಅಗತ್ಯ ಸದ್ಯ ಬಳಕೆಯಲ್ಲಿರುವ ವಿವಿಧ ಕಂಪನಿಗಳ ಕೊರೊನಾ ಲಸಿಕೆಯ ಡೋಸ್‌ಗಳ ಮಿಶ್ರಣವು (ಕಾಕ್‌ಟೇಲ್‌- ಒಂದೇ ಕಂಪನಿಯ ಎರಡನೇಯ ಅಥವಾ ಬೂಸ್ಟರ್‌ ಡೋಸ್‌ ಬದಲಿಗೆ ಬೇರೆ ಕಂಪನಿಯ ಲಸಿಕೆ ಪಡೆಯುವುದು) ಕೊರೊನಾ ಸೋಂಕು, ರೂಪಾಂತರಿಗಳ ಅಬ್ಬರ ತಡೆಗೆ ತುಂಬ ಪರಿಣಾಮಕಾರಿ ಎನ್ನುವ ಬಗ್ಗೆ ಮತ್ತಷ್ಟು ಅಧ್ಯಯನದ ಅಗತ್ಯವಿದೆ. ಕೆಲವು ಸಂಶೋಧಕರು ಮಿಶ್ರಿತ ಡೋಸ್‌ಗಳು ಪ್ರತಿಕಾಯ ವೃದ್ಧಿಯಲ್ಲಿಹೆಚ್ಚು ಪರಿಣಾಮಕಾರಿ ಎನ್ನುತ್ತಿದ್ದಾರೆ. ಆದರೆ, ವಿಸ್ತೃತ ಅಧ್ಯಯನ, ಅಡ್ಡಪರಿಣಾಮಗಳ ಪರಿಶೀಲನೆ ಬಗ್ಗೆ ಹೆಚ್ಚು ಗಮನಹರಿಸಿ ವಿಜ್ಞಾನಿಗಳು ಖಾತ್ರಿ ನೀಡುವುದು ಬಾಕಿ ಇದೆ ಎಂದು ಗುಲೇರಿಯಾ ತಿಳಿಸಿದ್ದಾರೆ. 7 ಯುರೋಪ್‌ ರಾಷ್ಟ್ರಗಳಲ್ಲಿ ಕೋವಿಶೀಲ್ಡ್‌ 'ಪಾಸ್‌' ಪುಣೆಯ ಸೀರಂ ಇನ್‌ಸ್ಟಿಟ್ಯೂಟ್‌ ಆಫ್‌ ಇಂಡಿಯಾ ಉತ್ಪಾದಿಸುತ್ತಿರುವ 'ಕೋವಿಶೀಲ್ಡ್‌' ಲಸಿಕೆಯನ್ನು ಸ್ವಿಟ್ಜರ್‌ಲೆಂಡ್‌ ಸೇರಿದಂತೆ ಯುರೋಪ್‌ನ ಏಳು ರಾಷ್ಟ್ರಗಳು 'ಹಸಿರು ಪಾಸ್‌ಪೋರ್ಟ್‌ ಪಟ್ಟಿ'ಗೆ ಸೇರ್ಪಡೆ ಮಾಡಿವೆ. ಆಸ್ಟ್ರಿಯಾ, ಜರ್ಮನಿ, ಸ್ಲೊವೆನಿಯಾ, ಗ್ರೀಸ್‌, ಐಸ್‌ಲ್ಯಾಂಡ್‌, ಐರ್ಲೆಂಡ್‌, ಸ್ಪೇನ್‌ಗಳು ಕೋವಿಶೀಲ್ಡ್‌ ಲಸಿಕೆ ಪಡೆದವರಿಗೆ ಸಾಂಕ್ರಾಮಿಕ ಸಂದರ್ಭಗಳಲ್ಲಿ ಕೂಡ ತಮ್ಮ ದೇಶಕ್ಕೆ ಪ್ರವೇಶಿಸಲು ಸಮ್ಮತಿ ನೀಡಿವೆ. ಸ್ವಿಟ್ಜರ್‌ಲ್ಯಾಂಡ್‌ ಕೂಡ ಇದೇ ದಾರಿ ಅನುಸರಿಸಿದೆ. ಯುರೋಪಿಯನ್‌ ಮೆಡಿಸಿನ್ಸ್‌ ಏಜೆನ್ಸಿ (ಇಎಂಎ)ಯಿಂದ ಕೋವಿಶೀಲ್ಡ್‌ ಸೇರಿದಂತೆ ಫೈಜರ್‌, ಮಾಡೆರ್ನಾ ಹಾಗೂ ಜಾನ್ಸನ್‌ ಆ್ಯಂಡ್‌ ಜಾನ್ಸನ್‌ ಕಂಪನಿಯ ಕೊರೊನಾ ನಿರೋಧಕ ಲಸಿಕೆಗಳಿಗೆ ಮಾತ್ರ ಮಾನ್ಯತೆ ನೀಡಿದೆ. ಮಕ್ಕಳ ಲಸಿಕೆಗೆ ಪರವಾನಗಿ ಕೋರಿದ ಜೈಡಸ್‌ ಕ್ಯಾಡಿಲಾ 12 ವರ್ಷಕ್ಕಿಂತ ಅಧಿಕ ವಯೋಮಾನದ ಮಕ್ಕಳಿಗೆ ತುರ್ತು ಬಳಕೆಗಾಗಿ ತಮ್ಮ ಕೊರೊನಾ ನಿರೋಧಕ ಲಸಿಕೆಯನ್ನು ನೀಡಲು ಅಗತ್ಯವಾದ ಅನುಮತಿ ನೀಡುವಂತೆ ಜೈಡಸ್‌ ಕ್ಯಾಡಿಲಾ ಕಂಪನಿಯು ಭಾರತೀಯ ಔಷಧ ಗುಣಮಟ್ಟ ನಿಯಂತ್ರಕ ಸಂಸ್ಥೆಗೆ (ಡಿಸಿಜಿಐ) ಅರ್ಜಿ ಸಲ್ಲಿಸಿದೆ. ವಾರ್ಷಿಕ 12 ಕೋಟಿ ಡೋಸ್‌ಗಳನ್ನು ತಯಾರಿಸುವ ಸಿದ್ಧತೆಯಲ್ಲಿರುವ ಕಂಪನಿಗೆ ಅನುಮತಿ ಸಿಕ್ಕಲ್ಲಿ, ಮುಂದಿನ 2 ತಿಂಗಳೊಳಗೆ ದೇಶಾದ್ಯಂತ ಮಕ್ಕಳಿಗೆ ಕೊರೊನಾ ನಿರೋಧಕ ಲಸಿಕೆ ಲಭ್ಯವಾಗಲಿದೆ. 'ಜೈಕೋವಿಡ್‌' ಎಂದು ಕರೆಯಲಾಗಿರುವ ಈ ಲಸಿಕೆಯು ದೇಶದಲ್ಲೇ ಮೊದಲ ಡಿಎನ್‌ಎ ಆಧಾರಿತ ಲಸಿಕೆ ಎನಿಸಿದೆ. ಭಾರತ್‌ ಬಯೋಟೆಕ್‌ ಕೂಡ ತನ್ನ ಕೊವ್ಯಾಕ್ಸಿನ್‌ ಲಸಿಕೆಯನ್ನು 2-18 ವರ್ಷದ ಮಕ್ಕಳಿಗೆ ನೀಡುವ ಕುರಿತು ಎರಡನೇ ಮತ್ತು ಮೂರನೇ ಹಂತದ ಪ್ರಯೋಗ ನಡೆಸುತ್ತಿದೆ. ಸ್ಪುಟ್ನಿಕ್‌ ಲೈಟ್‌ ಪ್ರಯೋಗಕ್ಕೆ ಅನುಮತಿ ನಿರಾಕರಣೆ ರಷ್ಯಾ ಅಭಿವೃದ್ಧಿಪಡಿಸಿರುವ 'ಸುಟ್ನಿಕ್‌ ಲೈಟ್‌' ಕೊರೊನಾ ನಿರೋಧಕ ಲಸಿಕೆಯ ಮೂರನೇ ಹಂತದ ಪ್ರಯೋಗಕ್ಕೆ ಅನುಮತಿ ನೀಡಲು ಡಿಸಿಜಿಐ ನಿರಾಕರಿಸಿದೆ. ಮೂರನೇ ಹಂತದ ಪ್ರಯೋಗಕ್ಕೆ ಡಾ.ರೆಡ್ಡೀಸ್‌ ಲ್ಯಾಬೊರೇಟರಿ ಪ್ರಸ್ತಾವ ಸಲ್ಲಿಸಿತ್ತು. ಕೇಂದ್ರ ಸರಕಾರದ ವಿಷಯ ತಜ್ಞರ ಸಮಿತಿ (ಎಸ್‌ಇಸಿ) ಶಿಫಾರಸು ಆಧರಿಸಿ ಡಿಸಿಜಿಐ ಅನುಮತಿ ನಿರಾಕರಿಸಿದೆ. ಇದು ಒಂದೇ ಡೋಸ್‌ನ ಲಸಿಕೆಯಾಗಿದ್ದು, ಕೊರೊನಾ ನಿಯಂತ್ರಣದಲ್ಲಿ ಶೇ.78-83ರಷ್ಟು ಪರಿಣಾಮಕಾರಿ ಎಂದು ಅರ್ಜೆಂಟಿನಾದ ಆರೋಗ್ಯ ಸಚಿವಾಲಯವು ಈ ಹಿಂದೆ ಹೇಳಿತ್ತು.