ಟ್ರಾಫಿಕ್‌ ಸಿಗ್ನಲ್‌ ನಿಯಂತ್ರಣಕ್ಕೆ ಜಪಾನ್‌ ತಂತ್ರಜ್ಞಾನ; 89 ಕೋಟಿ ರೂ. ವೆಚ್ಚದಲ್ಲಿ ಡಲ್ಟ್‌ ನಿಂದ ಯೋಜನೆ ಅನುಷ್ಠಾನ
ಡಲ್ಟ್‌ನ ಇತ್ತೀಚಿನ ಅಧ್ಯಯನದ ಪ್ರಕಾರ, ನಗರದ ಪ್ರಮುಖ ಸಿಗ್ನಲ್‌ಗಳಲ್ಲಿ ಶೇ.15ರಿಂದ 30ರಷ್ಟು ಸಮಯವು ವ್ಯರ್ಥವಾಗುತ್ತಿದೆ. ನೂತನ ತಂತ್ರಜ್ಞಾನದ ಸಹಾಯದಿಂದ ಈ ಸಮಯವನ್ನು ಬಹುಮಟ್ಟಿಗೆ ಉಳಿಸಬಹುದಾಗಿದೆ.
Admin
0
7
ಬೆಂಗಳೂರು: ನಗರದ ಪ್ರಮುಖ ಜಂಕ್ಷನ್‌ಗಳಲ್ಲಿ ಸಿಗ್ನಲ್‌ಗಳಲ್ಲಿ ಕಾಯುತ್ತ ನಾಗರಿಕರು ತಮ್ಮ ಅಮೂಲ್ಯ ಸಮಯವನ್ನು ಕಳೆಯುವುದು ಇಂದಿನ ದಿನಗಳಲ್ಲಿ ಸಾಮಾನ್ಯವಾಗಿದೆ. ಇದರಿಂದ ಅನೇಕ ವಾಹನ ಸವಾರರು ಬೇಸತ್ತಿದ್ದಾರೆ. ಸಿಗ್ನಲ್‌ಗಳಲ್ಲಿ ಕಾಯುವ ಸಮಯವನ್ನು ತಗ್ಗಿಸುವ ನಿಟ್ಟಿನಲ್ಲಿ ನಗರದ ಪ್ರಮುಖ 29 ಜಂಕ್ಷನ್‌ಗಳಲ್ಲಿ ಜಪಾನಿ ತಂತ್ರಜ್ಞಾನವನ್ನು ಅನುಷ್ಠಾನಗೊಳಿಸಲಾಗುತ್ತಿದೆ.
ಡಲ್ಟ್‌ (ದಿ ಡೈರೆಕ್ಟರೇಟ್‌ ಆಫ್‌ ಅರ್ಬನ್‌ ಲ್ಯಾಂಡ್‌ ಟ್ರಾನ್ಸ್‌ಪೋರ್ಟ್‌) ಯೋಜನೆಯನ್ನು ಅನುಷ್ಠಾನಗೊಳಿಸುವ ಹೊಣೆಗಾರಿಕೆ ಹೊತ್ತಿದೆ. ಜಪಾನಿ ಸಂಸ್ಥೆ ನಗೋಯಾ ಎಲೆಕ್ಟ್ರಿಕ್‌ ವರ್ಕ್ಸ್‌ ಕಂಪನಿ ಯೋಜನೆಯ ಗುತ್ತಿಗೆ ಪಡೆದಿದೆ. ಕಂಪನಿಯು ಮುಂದಿನ ಒಂದು ವಾರದ ಅವಧಿಯಲ್ಲಿ ಪ್ರಾಥಮಿಕ ಕಾಮಗಾರಿಯನ್ನು ಆರಂಭಿಸುವ ನಿರೀಕ್ಷೆ ಇದೆ.
ನಗರದಲ್ಲಿ'ಸುಧಾರಿತ ಸಂಚಾರ ಮಾಹಿತಿ ಮತ್ತು ನಿಯಂತ್ರಣಾ ವ್ಯವಸ್ಥೆ' ಯೋಜನೆ ಜಾರಿ ಕುರಿತು 2014ರಲ್ಲಿ ಮೊದಲ ಬಾರಿಗೆ ಘೋಷಣೆ ಮಾಡಲಾಗಿತ್ತು. 2022ರಲ್ಲಿಇದು ಅನುಷ್ಠಾನಕ್ಕೆ ಬರುವ ಸಾಧ್ಯತೆ ಇದೆ. ಯೋಜನೆ ಜಾರಿಗೆ ಸಂಬಂಧಿಸಿದಂತೆ ಜು.16ರಂದು ಸಂಚಾರ ಪೊಲೀಸರು, ಗುತ್ತಿಗೆ ಸಂಸ್ಥೆಯ ಅಧಿಕಾರಿಗಳೊಂದಿಗೆ ಡಲ್ಟ್‌ ಆಯುಕ್ತೆ ವಿ.ಮಂಜುಳ ಅವರು ಮೊದಲ ಸಭೆ ನಡೆಸಿದರು. ಈ ಯೋಜನೆಯ ಪರಿಷ್ಕೃತ ಅಂದಾಜು ವೆಚ್ಚ 89 ಕೋಟಿ ರೂ. ಆಗಿದೆ.
ಜಪಾನಿನ ತಂತ್ರಜ್ಞಾನವು 29 ಜಂಕ್ಷನ್‌ಗಳಲ್ಲಿ ವಾಹನ ಸವಾರರಿಗೆ ಕಾಯುವ ಸಮಯವನ್ನು ತಗ್ಗಿಸಲಿದೆ. ರಸ್ತೆ ಮೂಲಸೌಕರ್ಯಗಳ ಪರಿಣಾಮಕಾರಿ ಬಳಕೆಯಿಂದ ಈ ವ್ಯವಸ್ಥೆಯು ಜಂಕ್ಷನ್‌ಗಳಲ್ಲಿ ವಾಹನಗಳ ಉದ್ದ ಸಾಲನ್ನು ಕಡಿಮೆ ಮಾಡುವ ನಿರೀಕ್ಷೆಯಿದೆ. ಸುಧಾರಿತ ಸಂಚಾರ ಮಾಹಿತಿ ಮತ್ತು ನಿಯಂತ್ರಣಾ ವ್ಯವಸ್ಥೆಯು ವಾಹನಗಳ ಡಿಟೆಕ್ಟರ್‌ಗಳ ಸಹಕಾರದಿಂದ ಟ್ರಾಫಿಕ್‌ ಸ್ಥಿತಿಯನ್ನು ಆಧರಿಸಿ ಸಿಗ್ನಲ್‌ ಸಮಯವನ್ನು ಕ್ರಿಯಾತ್ಮಕವಾಗಿ ಹೊಂದಿಸಲು ಸಾಧ್ಯವಾಗುತ್ತದೆ ಎಂದು ಗುತ್ತಿಗೆದಾರರು ಮಾಹಿತಿ ನೀಡಿದರು.
''ಈ ಯೋಜನೆಗೆ ಪೂರಕವಾಗಿ 200 ಜಂಕ್ಷನ್‌ಗಳಲ್ಲಿ ಸಂಚಾರ ಪೊಲೀಸರು ಪ್ರತ್ಯೇಕ ಯೋಜನೆಯನ್ನು ಅನುಷ್ಠಾನಗೊಳಿಸಲಿದ್ದಾರೆ. ಮುಂದಿನ ಆರು ತಿಂಗಳಲ್ಲಿ ಸಿಗ್ನಲ್‌ಗಳಲ್ಲಿ ವಾಹನಗಳ ಉದ್ದ ಸಾಲನ್ನು ಅಳೆಯಲು ಸೆನ್ಸರ್‌ಗಳನ್ನು ಅಳವಡಿಸಲಾಗುತ್ತದೆ. ಮುಖ್ಯವಾಗಿ ಮುಂದಿನ ಒಂದು ವರ್ಷಗಳಲ್ಲಿ ಸಂಚಾರ ಮಾಹಿತಿ ಕೇಂದ್ರ ಆರಂಭವಾಗಲಿದೆ. ಮುಂದಿನ 5 ವರ್ಷಗಳ ಮಟ್ಟಿಗೆ ಕಂಪನಿಯು ಈ ವ್ಯವಸ್ಥೆಯ ಉಸ್ತುವಾರಿ ವಹಿಸಲಿದೆ,'' ಎಂದು ಡಲ್ಟ್‌ ಆಯುಕ್ತೆ ವಿ.ಮಂಜುಳ ತಿಳಿಸಿದರು.
ಎಲ್ಲೆಲ್ಲಿ ಯೋಜನೆ ಜಾರಿ?
ಎಂ.ಜಿ.ರಸ್ತೆ, ಹೊಸೂರು ರಸ್ತೆ ಮತ್ತು ಹಳೇ ಮದ್ರಾಸು ರಸ್ತೆಯ 29 ಜಂಕ್ಷನ್‌ಗಳಲ್ಲಿ ಈ ಯೋಜನೆಯು ಅನುಷ್ಠಾನಗೊಳ್ಳಲಿದೆ. ಡಲ್ಟ್‌ನ ಇತ್ತೀಚಿನ ಅಧ್ಯಯನದ ಪ್ರಕಾರ, ನಗರದ ಪ್ರಮುಖ ಸಿಗ್ನಲ್‌ಗಳಲ್ಲಿ ಶೇ.15ರಿಂದ 30ರಷ್ಟು ಸಮಯವು ವ್ಯರ್ಥವಾಗುತ್ತಿದೆ. ನೂತನ ತಂತ್ರಜ್ಞಾನದ ಸಹಾಯದಿಂದ ಈ ಸಮಯವನ್ನು ಬಹುಮಟ್ಟಿಗೆ ಉಳಿಸಬಹುದಾಗಿದೆ.
ಸುಧಾರಿತ ಸಂಚಾರ ಮಾಹಿತಿ ಮತ್ತು ನಿಯಂತ್ರಣಾ ವ್ಯವಸ್ಥೆ ಜಾರಿಯು ಸ್ವಾಗತಾರ್ಹ ಕ್ರಮವಾಗಿದೆ. ಈಗಿರುವ ಟ್ರಾಫಿಕ್‌ ಸಿಗ್ನಲ್‌ಗಳು ಬೇರೆ ಬೇರೆ ದಿಕ್ಕುಗಳಲ್ಲಿ ಟ್ರಾಫಿಕ್‌ ದಟ್ಟಣೆ ಪ್ರಮಾಣವನ್ನು ಅರ್ಥ ಮಾಡಿಕೊಳ್ಳುವುದಿಲ್ಲ. ನೆರೆಯ ಜಂಕ್ಷನ್‌ಗಳಲ್ಲಿ ವಾಹನಗಳ ಹರಿವನ್ನು ಗಣನೆಗೆ ತೆಗೆದುಕೊಂಡು ಸಿಗ್ನಲ್‌ ಸಮಯವನ್ನು ಅತ್ಯುತ್ತಮವಾಗಿಸುವ ಸಾಮರ್ಥ್ಯವಿರುವ ಸಾಕಷ್ಟು ಹೊಸ ತಂತ್ರಜ್ಞಾನಗಳಿವೆ. ಮೇಲ್ಸೇತುವೆಗಳ ನಿರ್ಮಾಣ ಅಥವಾ ರಸ್ತೆಗಳ ವಿಸ್ತರಣೆಗೆ ಬದಲಾಗಿ ಈ ರೀತಿಯ ಜಾರಿ ಉತ್ತಮ ಮಾರ್ಗವಾಗಿದೆ.
ವಿನೋಬಾ ಐಸ್ಯಾಕ್‌, ಟ್ರಾಫಿಕ್‌ ತಜ್ಞ
