ಜೀವನ್‌ ಪ್ರಮಾಣ್‌ ಪತ್ರ ಸಲ್ಲಿಕೆ ಗಡುವು ಡಿ.31ಕ್ಕೆ ವಿಸ್ತರಣೆ

ಹೊಸದಿಲ್ಲಿ: ಪಿಂಚಣಿದಾರರಿಗೆ ಸಲ್ಲಿಸಲು ಕೊನೆ ದಿನಾಂಕವನ್ನು ಸರಕಾರ ಡಿ.31ಕ್ಕೆ ವಿಸ್ತರಿಸಿದೆ. ಈ ಹಿಂದೆ ನ.30ಕ್ಕೆ ಗಡುವು ನಿಗದಿಯಾಗಿತ್ತು. ಇದರಿಂದ ಜೀವನ್‌ ಪ್ರಮಾಣ ಪತ್ರ ಸಲ್ಲಿಸದ ಎಲ್ಲ ಕೇಂದ್ರ ಸರಕಾರಿ ಪಿಂಚಣಿದಾರರಿಗೆ ಮತ್ತೊಂದು ತಿಂಗಳಿನ ಅವಧಿ ಸಿಗಲಿದೆ. ಪಿಂಚಣಿದಾರರು ಪಡೆಯುತ್ತಿರುವುದನ್ನು ಖಾತರಿಪಡಿಸುವ ಸಲುವಾಗಿ ಜೀವನ್‌ ಪ್ರಮಾಣ್‌ ಪತ್ರ ಸಕಾಲದಲ್ಲಿ ಸಲ್ಲಿಸುವುದು ಅಗತ್ಯವಾಗಿದೆ. ಈ ಮುಂದುವರಿದ ಗಡುವಿನ ಅವಧಿಯಲ್ಲಿ ಪಿಂಚಣಿ ಎಂದಿನಂತೆ ಸಿಗಲಿದೆ. ಈ ವಿಸ್ತರಣೆಯಿಂದ ಬ್ಯಾಂಕ್‌ ಶಾಖೆಗಳಲ್ಲಿ ಪಿಂಚಣಿದಾರರ ದಟ್ಟಣೆ ಕಡಿಮೆಯಾಗಲಿದೆ. ಕೋವಿಡ್‌-19 ಕುರಿತ ಸಾಮಾಜಿಕ ಅಂತರ ನಿಯಮ ಪಾಲನೆಗೆ ಸಹಕಾರಿಯಾಗಲಿದೆ. ಬ್ಯಾಂಕ್‌ ಶಾಖೆ, ಅಂಚೆ ಕಚೇರಿ, ಡಿಜಿಟಲ್‌ ಅಥವಾ ಮನೆಬಾಗಿಲಿಗೆ ಬ್ಯಾಂಕ್‌ಗಳು ಒದಗಿಸುವ ಸೇವೆಯ ಮೂಲಕ ಜೀವನ್‌ ಪ್ರಮಾಣ್‌ ಪತ್ರವನ್ನು ಸಲ್ಲಿಸಬಹುದು. ಜೀವನ್‌ ಪ್ರಮಾಣ ಪತ್ರ ಪಡೆಯುವುದು ಹೇಗೆ? ಸಾರ್ವಜನಿಕ ವಲಯದ ಹಲವಾರು ಬ್ಯಾಂಕ್‌ಗಳು ಮತ್ತು ಅಂಚೆ ಇಲಾಖೆಯು ಪಿಂಚಣಿದಾರರಿಗೆ ಮನೆಯಿಂದಲೇ ಅಕ್ಟೋಬರ್‌ 1 ರಿಂದ ಅವರ ವಾರ್ಷಿಕ ಜೀವನ್‌ ಪ್ರಮಾಣ್‌ ಪತ್ರ (ಡಿಜಿಟಲ್‌ ಲೈಫ್‌ ಸರ್ಟಿಫಿಕೇಟ್ -ಡಿಎಲ್‌ಸಿ)ವನ್ನು ಸಲ್ಲಿಸಲು ಅವಕಾಶ ನೀಡಿವೆ. ಈ ಸೇವೆ ಹೇಗಿರುತ್ತದೆ ಎಂಬುದನ್ನು ನೋಡೋಣ. ಇದುವರೆಗೆ ಪಿಂಚಣಿದಾರರು ಜೀವನ್‌ ಪ್ರಮಾಣ್‌ ಪತ್ರ ಸಲ್ಲಿಸಲು ಬ್ಯಾಂಕ್‌ ಅಥವಾ ಅಂಚೆ ಕಚೇರಿಗೆ ತೆರಳಬೇಕಾಗುತ್ತಿತ್ತು. ಆದರೆ ಈಗ ಮನೆಯಿಂದಲೇ ಸಲ್ಲಿಸಬಹುದು. ಪಿಂಚಣಿ ಇಲಾಖೆ 2021ರ ಸೆಪ್ಟೆಂಬರ್‌ 20ಕ್ಕೆ ಹೊರಡಿಸಿದ ಸುತ್ತೋಲೆಯ ಪ್ರಕಾರ ಪಿಂಚಣಿದಾರರು 12 ಸಾರ್ವಜನಿಕ ಬ್ಯಾಂಕ್‌ಗಳನ್ನು ಒಳಗೊಂಡಿರುವ 'ಡೋರ್‌ಸ್ಟೆಪ್‌ ಬ್ಯಾಂಕಿಂಗ್‌ ಅಲೈಯನ್ಸ್‌ ಸೇವೆ'ಯನ್ನು ಬಳಸಿ ಮನೆಯಿಂದಲೇ ಸಲ್ಲಿಸಬಹುದು. ಅಂಚೆ ಇಲಾಖೆ ಕೂಡ ಇದೇ ರೀತಿಯ ಸೇವೆ ನೀಡುತ್ತದೆ. ಸೇವೆ ಪಡೆಯುವುದು ಹೇಗೆ? ಪಿಂಚಣಿದಾರರು ಮೊಬೈಲ್‌ ಆ್ಯಪ್‌, ವೆಬ್‌ಸೈಟ್‌ ಅಥವಾ ಟೋಲ್‌-ಫ್ರೀ ಸಂಖ್ಯೆಯ ಮೂಲಕ ಪಿಎಸ್‌ಬಿ ಅಲೈಯನ್ಸ್‌ನ ಮನೆ ಬಾಗಿಲಿಗೆ ಬ್ಯಾಂಕಿಂಗ್‌ ಸೇವೆಯನ್ನು ಬುಕ್‌ ಮಾಡಬಹುದು. ಬ್ಯಾಂಕ್‌ನ ಏಜೆಂಟರು ಪಿಂಚಣಿದಾರರ ಮನೆಗೆ ನಿಗದಿತ ದಿನಾಂಕ ಮತ್ತು ಸಮಯಕ್ಕೆ ಬರುತ್ತಾರೆ. ಮನೆಬಾಗಿಲಿನಲ್ಲೇ ಏಜೆಂಟರು ಜೀವನ್‌ ಪ್ರಮಾಣ್‌ ಆ್ಯಪ್‌ ಬಳಸಿ ಡಿಜಿಟಲ್‌ ಲೈಫ್‌ ಸರ್ಟಿಫಿಕೇಟ್‌ ಸಲ್ಲಿಸಬಹುದು. ಈ ಸೇವೆಯನ್ನು ಕಾಯ್ದಿರಿಸಲು ಗೂಗಲ್‌ ಪ್ಲೇಸ್ಟೋರ್‌ನಿಂದ 'ಡೋರ್‌ಸ್ಟೆಪ್‌ ಬ್ಯಾಂಕಿಂಗ್‌' ಆ್ಯಪ್‌ ಅನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಈ ವೆಬ್‌ಸೈಟ್‌ doorstepbanks.com ಅಥವಾ www.dsb.imfast.co.in/doorstep/login ಅನ್ನೂ ಬಳಸಬಹುದು. ಟೋಲ್‌ಫ್ರೀ ಸಂಖ್ಯೆ 18001213721 ಅಥವಾ 18001037188 ಅನ್ನು ಬಳಸಬಹುದು. ಅಲೈಯನ್ಸ್‌ ವೆಬ್‌ ಸೈಟ್‌ನಲ್ಲಿ ಇದಕ್ಕೆ ಸೇವಾ ಶುಲ್ಕ ನಿಗದಿಪಡಿಸಿಲ್ಲವಾದರೂ, ಎಸ್‌ಬಿಐ ವೆಬ್‌ಸೈಟ್‌ ಪ್ರಕಾರ 75 ರೂ. ಹಾಗೂ ಜಿಎಸ್‌ಟಿ ಅನ್ವಯವಾಗುತ್ತದೆ. ಪೋಸ್ಟ್‌ ಮ್ಯಾನ್‌ ಮೂಲಕ ಹೇಗೆ? ಅಂಚೆ ಇಲಾಖೆಯು 2020ರ ನವೆಂಬರ್‌ನಲ್ಲಿ ಪೋಸ್ಟ್‌ ಮ್ಯಾನ್‌ ಮೂಲಕ ಡಿಜಿಟಲ್‌ ಜೀವನ್‌ ಪ್ರಮಾಣ್‌ ಪತ್ರವನ್ನು ಸಲ್ಲಿಸಲು ಅವಕಾಶ ಕಲ್ಪಿಸಿತು. ಇಂಡಿಯಾ ಪೋಸ್ಟ್‌ ಮೂಲಕ ಈ ಸೇವೆ ಪಡೆಯಲು ಪೋಸ್ಟ್‌ಇನ್ಫೋ (Postinfo) ಆಪ್‌ ಡೌನ್ಲೋಡ್‌ ಮಾಡಬೇಕು. ಇಂಡಿಯಾ ಪೋಸ್ಟ್‌ ಪೇಮೆಂಟ್‌ ಬ್ಯಾಂಕ್‌ (ಐಪಿಪಿಬಿ) ವೆಬ್‌ಸೈಟ್‌ ಪ್ರಕಾರ ಈ ಸೇವೆ ಖಾತೆದಾರರು ಅಲ್ಲದವರಿಗೂ ಇದೆ. ಡಿಜಿಟಲ್‌ ಲೈಫ್‌ ಸರ್ಟಿಫಿಕೇಟ್ (ಡಿಎಲ್‌ಸಿ) ಸೇವೆ ಪಡೆದುಕೊಳ್ಳಲು ಹತ್ತಿರದ ಅಂಚೆ ಕಚೇರಿಯನ್ನು ಸಂಪರ್ಕಿಸಬೇಕು ಅಥವಾ ಪೋಸ್ಟ್‌ ಮ್ಯಾನ್‌ ಮನೆಗೆ ಭೇಟಿ ನೀಡಲು ಪೋಸ್ಟ್‌ಇನ್ಫೋ ಆಪ್‌ ಮೂಲಕ ಮನವಿ ಕಳುಹಿಸಬೇಕು. http://ccc.cept.gov.in/covid/request.aspx ಈ ವೆಬ್‌ಸೈಟ್‌ ಮೂಲಕವೂ ರಿಕ್ವೆಸ್ಟ್‌ ಕಳುಹಿಸಬಹುದು. ಅದೇ ಕ್ಷಣದಲ್ಲಿ ಡಿಎಲ್‌ಸಿ ಸರ್ಟಿಫಿಕೇಟ್‌ ಕ್ರಿಯೇಟ್‌ ಆಗಲಿದೆ. ಪ್ರಕ್ರಿಯೆ ಪೂರ್ಣಗೊಂಡ ನಂತರ ಪ್ರಮಾಣ್‌ ಐಡಿ (Pramaan ID) ಜನರೇಟ್‌ ಆಗಲಿದೆ. ಇದನ್ನು ರಾಷ್ಟ್ರೀಯ ಮಾಹಿತಿ ಕೇಂದ್ರ (ಎನ್‌ಐಸಿ) ನೇರವಾಗಿ ಪಿಂಚಣಿದಾರರ ಜತೆ ಹಂಚಿಕೊಳ್ಳಲಿದೆ. ಪ್ರಮಾಣ್‌ ಐಡಿ ಜನರೇಟ್‌ ಆದ ನಂತರ ಪಿಂಚಣಿದಾರರು https://jeevanpramaan.gov.in/ppouser/login ನಿಂದ ಡಿಎಲ್‌ಸಿಯನ್ನು ಡೌನ್ಲೋಡ್‌ ಮಾಡಿಕೊಳ್ಳಬಹುದು. ಪ್ರತೀ ಬಾರಿ ಡಿಎಲ್‌ಸಿ ಜನರೇಟ್‌ ಮಾಡಿದಾಗೂ 70 ರೂಪಾಯಿಗಳ ಸೇವಾ ಶುಲ್ಕ (ಜಿಎಸ್‌ಟಿ/ಸೆಸ್‌ ಸೇರಿ) ಪಡೆದುಕೊಳ್ಳಲಾಗುತ್ತದೆ. ಮನೆ ಬಾಗಿಲಿಗೆ ಡಿಎಲ್‌ಸಿ ನೀಡಲು ಯಾವುದೇ ಶುಲ್ಕವನ್ನು ಪಡೆದುಕೊಳ್ಳಲಾಗುವುದಿಲ್ಲ.