ಜೆಫ್‌ ಬಿಜೋಸ್‌ ಹಿಂದಿಕ್ಕಿ ಸಿರಿವಂತರ ಪಟ್ಟಿಯಲ್ಲಿ ನಂ.1 ಸ್ಥಾನಕ್ಕೇರಿದ ಫ್ರಾನ್ಸ್‌ನ ಬರ್ನಾರ್ಡ್‌ ಅರ್ನಾಲ್ಟ್‌
ಫೋರ್ಬ್ಸ್‌ ಸಿರಿವಂತರ ಪಟ್ಟಿಯಲ್ಲಿ ಅಮೆಜಾನ್‌ ಸಂಸ್ಥಾಪಕ ಜೆಫ್‌ ಬಿಜೋಸ್‌ ಹಿಂದಿಕ್ಕಿ, ಫ್ರಾನ್ಸ್‌ನ ಬರ್ನಾರ್ಡ್‌ ಅರ್ನಾಲ್ಟ್‌ ಮೊದಲ ಸ್ಥಾನಕ್ಕೇರಿದ್ದಾರೆ.72 ವರ್ಷದ ಅರ್ನಾಲ್ಟ್‌ ಬಳಿ ಸದ್ಯ 198.2 ಬಿಲಿಯನ್‌ ಡಾಲರ್ ಆಸ್ತಿ ಇದೆ.
Admin
0
6
ಅಮೆಜಾನ್‌ ಸಂಸ್ಥಾಪಕ ಹಿಂದಿಕ್ಕಿ ಫ್ರಾನ್ಸ್‌ನ ವಿಶ್ವದ ಅತೀ ಸಿರಿವಂತ ವ್ಯಕ್ತಿಯಾಗಿ ಮೂಡಿ ಬಂದಿದ್ದಾರೆ. ಅರ್ನಾಲ್ಟ್‌ ಐಷಾರಾಮಿ ಉತ್ಪನ್ನಗಳನ್ನು ತಯಾರಿಸುವ ‘ಎಲ್‌ವಿಎಂಎಚ್‌ ಮೊಯೆಟ್‌ ಹೆನ್ನೆಸ್ಸಿ ಲೂಯಿ ವಿಟಾನ್‌’ ಕಂಪನಿ ಅಧ್ಯಕ್ಷ ಹಾಗೂ ಸಿಇಒ ಆಗಿದ್ದಾರೆ.
ಫೋರ್ಬ್ಸ್‌ ವಿಶ್ವದ ಬಿಲಿಯನೇರ್‌ಗಳ ಆಸ್ತಿಯಲ್ಲಾಗುವ ಬದಲಾವಣೆಗಳನ್ನು ಟ್ರ್ಯಾಕ್‌ ಮಾಡುತ್ತದೆ. ಇದರ ಸಿರಿವಂತರ ಪಟ್ಟಿಯ ಪ್ರಕಾರ ಈಗ ಬರ್ನಾರ್ಡ್‌ ಅರ್ನಾಲ್ಟ್‌ ಮೊದಲ ಸ್ಥಾನದಲ್ಲಿದ್ದಾರೆ.
72 ವರ್ಷದ ಅರ್ನಾಲ್ಟ್‌ ಲೂಯಿ ವಿಟಾನ್‌, ಸೆಫೋರಾ ಸೇರಿ 70ಕ್ಕೂ ಅಧಿಕ ಬ್ರ್ಯಾಂಡ್‌ಗಳನ್ನು ಹೊಂದಿದ್ದಾರೆ. ಸದ್ಯ ಅವರು 198.2 ಬಿಲಿಯನ್‌ ಡಾಲರ್ (ಸುಮಾರು 14.7 ಲಕ್ಷ ಕೋಟಿ ರೂ.) ಆಸ್ತಿ ಹೊಂದಿದ್ದಾರೆ. ಅರ್ನಾಲ್ಟ್‌ ಅವರ ಐದು ಮಕ್ಕಳಲ್ಲಿ ನಾಲ್ವರು ಇದೇ ಎಲ್‌ವಿಎಂಎಚ್‌ ಸಾಮ್ರಾಜ್ಯದಲ್ಲಿ ತೊಡಗಿಸಿಕೊಂಡಿದ್ದಾರೆ.
ಸದ್ಯ ಸಿರಿವಂತರ ಪಟ್ಟಿಯಲ್ಲಿ 57 ವರ್ಷದ ಜೆಫ್‌ ಬಿಜೋಸ್‌ 2ನೇ ಸ್ಥಾನದಲ್ಲಿದ್ದು 194.9 ಬಿಲಿಯನ್‌ ಡಾಲರ್ ಆಸ್ತಿ ಹೊಂದಿದ್ದಾರೆ. ಕೊರೊನಾ ಬಿಕ್ಕಟ್ಟಿನಲ್ಲಿ ಅಮೆಜಾನ್‌ನ ಆದಾಯ ವೃದ್ಧಿಸಿದ್ದು, 2020ರಲ್ಲಿ 386 ಬಿಲಿಯನ್‌ ಡಾಲರ್‌ಗೆ ಏರಿಕೆಯಾಗಿದೆ. ಇದರಿಂದ ಜೆಫ್‌ ಬಿಜೋಸ್‌ ಆಸ್ತಿಯಲ್ಲಿಯೂ ಏರಿಕೆಯಾಗಿದೆ. ಆದರೆ ಅರ್ನಾಲ್ಟ್‌ ಬಿಜೋಸ್‌ಗೆ ವೇಗವಾಗಿ ಮುನ್ನಡೆಯುತ್ತಿದ್ದಾರೆ.
ಟೆಸ್ಲಾದ ಎಲಾನ್‌ ಮಸ್ಕ್‌ ಸಿರಿವಂತರ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದ್ದು, 50 ವರ್ಷದ ಮಸ್ಕ್‌ ಬಳಿ 185.5 ಬಿಲಿಯನ್‌ ಡಾಲರ್ ಆಸ್ತಿ ಇದೆ. ಕೆಲ ಸಮಯದ ಹಿಂದೆ ಒಮ್ಮೆ ಮಸ್ಕ್‌ ಕೂಡ ನಂಬರ್‌ 1 ಸ್ಥಾನಕ್ಕೇರಿದ್ದರು.
2021ರ ಜನವರಿಯಲ್ಲಿ ಅರ್ನಾಲ್ಟ್‌ ಒಡೆತನದ ಎಲ್‌ವಿಎಂಎಚ್‌ ಅಮೆರಿಕದ ಜ್ಯುವೆಲ್ಲರಿ ಬ್ರ್ಯಾಂಡ್‌ ಟಿಫ್ಫಾನಿ & ಕೊ.ವನ್ನು 15.8 ಬಿಲಿಯನ್‌ ಡಾಲರ್‌ಗೆ ಖರೀದಿಸಿತ್ತು. ಇದು ಈವರೆಗಿನ ಅತೀ ದೊಡ್ಡ ಐಷಾರಾಮಿ ಬ್ರ್ಯಾಂಡ್‌ನ ಖರೀದಿ ಎನಿಸಿಕೊಂಡಿದೆ.
ಕಳೆದ ಮೇನಲ್ಲೂ ಒಮ್ಮೆ ಜೆಫ್‌ ಬಿಜೋಸ್‌ರನ್ನು ಹಿಂದಿಕ್ಕಿ ಬರ್ನಾರ್ಡ್‌ ಅರ್ನಾಲ್ಟ್‌ ವಿಶ್ವದ ಅತಿ ಸಿರಿವಂತ ವ್ಯಕ್ತಿಯಾಗಿ ಹೊರಹೊಮ್ಮಿದ್ದರು.
