ಕೋವಿಡ್ 19 ಸೋಂಕು ತಗುಲಿದವರಲ್ಲಿ ಮಧುಮೇಹ ಹೆಚ್ಚಲು ಕಾರಣಗಳೇನು?

ಅಹಮದಾಬಾದ್: ವರ್ಷಕ್ಕೆ ಎರಡು ಬಾರಿ ವೈದ್ಯಕೀಯ ತಪಾಸಣೆ ನಡೆಸುವ 48 ವರ್ಷದ ರಿಯಲ್ ಎಸ್ಟೇಟ್ ಬ್ರೋಕರ್ ಅನಿಲ್ ಮೆಹ್ತಾ ಅವರಲ್ಲಿ ಒಮ್ಮೆಯೂ ರಕ್ತದಲ್ಲಿ ಅಧಿಕ ಅಂಶ ಪತ್ತೆಯಾಗಿರಲಿಲ್ಲ. ಅವರಿಗೆ ಬಿಪಿ, ಸ್ಥೂಲಕಾಯದಂತಹ ಸಮಸ್ಯೆಗಳೂ ಇರಲಿಲ್ಲ. ಅವರದು ಬಹಳ ಆರೋಗ್ಯವಂತ ಶಿಸ್ತಿನ ಜೀವನ. ಸಾಮಾನ್ಯವಾಗಿ ರೋಗವು ಶೇ 80ರಷ್ಟು ಶ್ವಾಸಕೋಶ ಸೋಂಕಿನಿಂದಾಗಿ ಆಸ್ಪತ್ರೆ ದಾಖಲಾತಿಗೆ ಕಾರಣವಾಗುತ್ತದೆ. ಆದರೆ ಕೋವಿಡ್‌ಗೆ ತುತ್ತಾದ ಅನಿಲ್ ಅವರಲ್ಲಿ 500 ಎಂಜಿ/ಡಿಎಲ್‌ಗಿಂತಲೂ ಮೀರಿದ ನಿಯಂತ್ರಿಸಲಾಗದ ಸಕ್ಕರೆ ಮಟ್ಟ ಕಂಡುಬಂದಿತ್ತು. ಕೋವಿಡ್ 19ರಿಂದ ಅನಿಲ್ ಚೇತರಿಸಿಕೊಂಡು ಆರು ತಿಂಗಳಾಗಿದೆ. ಅವರು ಈಗ ಮಧುಮೇಹಿ. ಪ್ರತಿನಿತ್ಯವೂ ಅವರು ತಮ್ಮ ಸಕ್ಕರೆ ಮಟ್ಟವನ್ನು ಪರೀಕ್ಷಿಸಿಕೊಳ್ಳುವ ಮತ್ತು ತಪ್ಪದೇ ಮಾತ್ರೆಗಳನ್ನು ನುಂಗುವ ಸ್ಥಿತಿ ಬಂದಿದೆ. 'ಕೋವಿಡ್ ನನಗೆ ಕಾಯಂ ಉಡುಗೊರೆಯನ್ನಾಗಿ ಮಧುಮೇಹವನ್ನು ನೀಡಿದೆ' ಎನ್ನುತ್ತಾರೆ ಅವರು. ಭಾರತದ ಮಧುಮೇಹಿ ರಾಜಧಾನಿ ಎನಿಸಿರುವ ಗುಜರಾತ್‌ನಲ್ಲಿ ಕೋವಿಡ್ 19 ನಂತರ ಮಧುಮೇಹಿಗಳ ಸಂಖ್ಯೆಯಲ್ಲಿ ವಿಪರೀತ ಏರಿಕೆಯಾಗಿದೆ. ಕೋವಿಡ್ ಕಾರಣದಿಂದ ಹಾಗೂ ಕೋವಿಡ್ ಸಂದರ್ಭದಲ್ಲಿ ಪರೀಕ್ಷೆ ವೇಳೆ ಇದು ಪತ್ತೆಯಾಗುತ್ತಿದೆ. 'ಕಳೆದ ವರ್ಷ ಪ್ರಕಟವಾದ ಮಧುಮೇಹ, ಸ್ಥೂಲಕಾಯ ಮತ್ತು ಮೆಟಬಾಲಿಸಂ ನಿಯತಕಾಲಿಕೆಯಲ್ಲಿನ ವಿಶ್ಲೇಷಣೆಯು ಕೋವಿಡ್ ತೀವ್ರಗೊಂಡು ಮಧುಮೇಹವುಂಟಾಗಿ ಶೇ 14.4ರಷ್ಟು ಮಂದಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ ಎಂದು ಹೇಳಿತ್ತು. ಈ ಸಾಂಕ್ರಾಮಿಕದ ಕಾರಣದಿಂದ ಭಾರತದಲ್ಲಿ ಸುಮಾರು 1 ಕೋಟಿ ಹೊಸ ಮಧುಮೇಹಿಗಳ ಸೃಷ್ಟಿಯಾಗಲಿದೆ ಎಂದು ಅಂದಾಜಿಸಲಾಗಿದೆ' ಎನ್ನುತ್ತಾರೆ ಕೋವಿಡ್ ಸಂಕು ತಗುಲಿದ ಬಳಿಕ ಪತ್ತೆಯಾದ ಸುಮಾರು 80 ರೋಗಿಗಳಿಗೆ ಚಿಕಿತ್ಸೆ ನೀಡಿರುವ ವೈದ್ಯ ಡಾ. ಸಂಜೀವ್ ಪಾಟಕ್. ಸ್ಟೀರಾಯ್ಡ್ ಬಳಕೆಯಿಂದಲೂ ಮಧುಮೇಹ! 'ಇನ್ಸುಲಿನ್ ಉತ್ಪಾದಿಸುವ ಮೇದೋಜ್ಜೀರಕಗ್ರಂಥಿಯಲ್ಲಿನ ಬೀಟಾ ಕೋಶಗಳ ಮೇಲೆ ದಾಳಿ ಮಾಡಬಹುದು. ಇದರಿಂದ ಕೋಶಗಳು ತಮ್ಮ ಕಾರ್ಯಚಟುವಟಿಕೆಗಳನ್ನು ನಿಭಾಯಿಸಲು ವಿಫಲವಾಗಬಹುದು ಅಥವಾ ತೊಡಕು ಎದುರಿಸಬಹುದು. ಇದರಿಂದಾಗಿ ರಕ್ತದಲ್ಲಿ ಅಧಿಕ ಸಕ್ಕರೆ ಮಟ್ಟ ಅಥವಾ ಮಧುಮೇಹ ಉಂಟಾಗಬಹುದು. ಸ್ಟೀರಾಯ್ಡ್‌ಗಳು ತಾತ್ಕಾಲಿಕ ಬಳಕೆಯಾಗಿದ್ದರೂ, ಅದರಿಂದಲೂ ಮಧುಮೇಹ ಹೆಚ್ಚಬಹುದು' ಎನ್ನುತ್ತಾರೆ ಅವರು. ಸ್ಥೂಲಕಾಯ, ರಕ್ತದೊತ್ತಡ, ಕೆಟ್ಟ ಜೀವನಶೈಲಿ ಮತ್ತು ಸಾಂಕ್ರಾಮಿಕದಿಂದ ಉಂಟಾದ ಒತ್ತಡಗಳಂತಹ ಪೂರ್ವ ಅಸ್ತಿತ್ವದಲ್ಲಿರುವ ಅಂಶಗಳು ಕೂಡ ಇದಕ್ಕೆ ಕಾರಣವಾಗಬಹುದು. ಅಪಾಯಕ್ಕೆ ಹತ್ತಿರವಿರುವ ಅನೇಕ ರೋಗಿಗಳಲ್ಲಿ ಕೋವಿಡ್ ಬೇಗನೆ ಮಧುಮೇಹವನ್ನು ಸೃಷ್ಟಿಸುತ್ತದೆ. ಇನ್ನು ಅನೇಕ ಪ್ರಕರಣಗಳಲ್ಲಿ ಸಂಭಾವ್ಯ ಮಧುಮೇಹ ಇದ್ದರೂ ಪತ್ತೆಯಾಗಿರದೆ ಇರಬಹುದು' ಎಂದು ಮಧುಮೇಹ ತಜ್ಞ ಡಾ. ಬನ್ಸಿ ಸಬೂ ಹೇಳಿದ್ದಾರೆ.