‘ಕರ್ವ’ ನವನೀತ್ ಜೊತೆ ಹಾರರ್ ಥ್ರಿಲ್ಲರ್ ಚಿತ್ರಕ್ಕೆ ಗ್ರೀನ್ ಸಿಗ್ನಲ್ ಕೊಟ್ಟ ನಟ ಶರಣ್

(ಹರೀಶ್‌ ಬಸವರಾಜ್‌) ಸದಾ ಹಾಸ್ಯದ ಛಾಯೆಯುಳ್ಳ ಪಾತ್ರದಲ್ಲೇ ಕಾಣಿಸಿಕೊಳ್ಳುವ ನಟ ಶರಣ್‌ ಇದೀಗ ಹಾರರ್‌ ಥ್ರಿಲ್ಲರ್‌ ಸಿನಿಮಾವೊಂದನ್ನು ಒಪ್ಪಿಕೊಳ್ಳುವ ಮೂಲಕ ವಿಶೇಷ ಕುತೂಹಲ ಮೂಡಿಸಿದ್ದಾರೆ. ತಮ್ಮ ಟೈಮಿಂಗ್‌ ಮತ್ತು ವಿಭಿನ್ನ ಶೈಲಿಯ ಹಾಸ್ಯದ ಮೂಲಕ ಅಭಿಮಾನಿಗಳನ್ನು ಗಳಿಸಿಕೊಂಡಿರುವ ನಟ ಶರಣ್‌, ಈಗ ಹೊಸ ಸಿನಿಮಾವೊಂದನ್ನು ಒಪ್ಪಿಕೊಂಡಿದ್ದು ಅದನ್ನು ‘ಕರ್ವ’ ಖ್ಯಾತಿಯ ನಿರ್ದೇಶಕ ನವನೀತ್‌ ನಿರ್ದೇಶನ ಮಾಡುತ್ತಿದ್ದಾರೆ. ‘ಗುರು ಶಿಷ್ಯರು’ ಸಿನಿಮಾದಲ್ಲಿ ಪಿಟಿ ಟೀಚರ್‌ ಆಗಿ ನಟಿಸುತ್ತಿರುವ ಶರಣ್‌ ಈಗ ನಿರ್ದೇಶಕ ನವನೀತ್‌ ಜತೆ ಹಾರರ್‌ ಕಥೆಗಾಗಿ ಹೆಜ್ಜೆ ಹಾಕಲು ಸಜ್ಜಾಗಿದ್ದಾರೆ. ‘ಕರ್ವ’ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಬಂದ ನವನೀತ್‌ ತದನಂತರ ಆರ್‌. ಜೆ. ರೋಹಿತ್‌ ನಾಯಕರಾಗಿದ್ದ ‘ಬಕಾಸುರ’ ಸಿನಿಮಾವನ್ನು ನಿರ್ದೇಶನ ಮಾಡಿದ್ದರು. ಈಗ ತಮ್ಮ ಮೂರನೇ ಸಿನಿಮಾವನ್ನು ಅವರು ಶರಣ್‌ ಜತೆ ಮಾಡುತ್ತಿದ್ದಾರೆ. ‘ಶರಣ್‌ ಅವರಿಗೆ ನಾನು ನಿರ್ದೇಶನ ಮಾಡುತ್ತಿರುವುದು ಖಚಿತವಾಗಿದೆ. ಇದೇ ಮೊದಲ ಬಾರಿಗೆ ವಿಭಿನ್ನ ಕಥೆಯನ್ನು ಶರಣ್‌ ಅವರ ಮೂಲಕ ಪ್ರೇಕ್ಷಕರಿಗೆ ತಲುಪಿಸುವ ಕೆಲಸವಾಗುತ್ತಿದೆ. ಇದೊಂದು ಹಾರರ್‌ ಥ್ರಿಲ್ಲರ್‌ ಮಾದರಿಯ ಸಿನಿಮಾ. ಶರಣ್‌ ಇದ್ದ ಮೇಲೆ ಹಾಸ್ಯ ಇದ್ದೇ ಇರುತ್ತದೆ. ಹಾಗಂತ ಹಾಸ್ಯವೇ ಪ್ರಧಾನವಲ್ಲ. ಬದಲಿಗೆ ಹಾರರ್‌ ಅಂಶ ಪ್ರಧಾನ. ಡಿಸೆಂಬರ್‌ ಹೊತ್ತಿಗೆ ಸಿನಿಮಾದ ಚಿತ್ರೀಕರಣ ಆರಂಭಿಸಲು ಪ್ಲಾನ್‌ ಮಾಡುತ್ತಿದ್ದೇವೆ. ತರುಣ್‌ ಶಿವಪ್ಪ ಈ ಸಿನಿಮಾಗೆ ಬಂಡವಾಳ ಹೂಡುತ್ತಿದ್ದಾರೆ’ ಎಂದು ಹೇಳಿದರು ನಿರ್ದೇಶಕ ನವನೀತ್‌. ‘ಈ ಸಿನಿಮಾದ ಕಥೆ ಉತ್ತರಾಖಂಡ್‌ನಲ್ಲಿ ನಡೆಯುತ್ತದೆ. ಮಂಜು ಹೆಚ್ಚಾಗಿರುವ ಪ್ರದೇಶದ ಕಥೆಯಿದು. ಅದಕ್ಕಾಗಿ ಚಿತ್ರತಂಡ ಅಲ್ಲಿಯೇ ಕೆಲ ದಿನಗಳ ಕಾಲ ಇದ್ದು ಚಿತ್ರೀಕರಣ ಮಾಡಲು ಪ್ಲಾನ್‌ ಮಾಡಿಕೊಂಡಿದ್ದೇವೆ. ಸದ್ಯಕ್ಕೆ ನಾಯಕಿ ಸೇರಿದಂತೆ ಯಾರ ಆಯ್ಕೆಯೂ ಆಗಿಲ್ಲ. ಇನ್ನೊಂದೆರಡು ದಿನಗಳಲ್ಲಿ ಎಲ್ಲವನ್ನೂ ಫೈನಲ್‌ ಮಾಡಿ ಹೇಳುತ್ತೇವೆ’ ಎಂದು ಮಾಹಿತಿ ನೀಡಿದರು ನವನೀತ್‌. ಈ ಸಿನಿಮಾದಲ್ಲಿ ಹಾಡಿಗಿಂತಲೂ ಬ್ಯಾಕ್‌ಗ್ರೌಂಡ್‌ ಸ್ಕೋರ್‌ ಹೆಚ್ಚು ಸದ್ದು ಮಾಡುತ್ತದೆ. ಅದಕ್ಕಾಗಿ ಸಂಗೀತ ನಿರ್ದೇಶಕರನ್ನು ಇನ್ನೂ ಫೈನಲ್‌ ಮಾಡಿಲ್ಲ. ಎಲ್ಲವೂ ಸದ್ಯದಲ್ಲೇ ಘೋಷಣೆಯಾಗಲಿವೆ. ಉತ್ತರಾಖಂಡ್‌ ಮತ್ತು ಬೆಂಗಳೂರು ಎರಡು ಕಡೆಗಳಲ್ಲಿಯೂ ಸಿನಿಮಾದ ಚಿತ್ರೀಕರಣ ನಡೆಯುತ್ತದೆ. ‘ಕರ್ವ’ ನವನೀತ್‌ ಅವರ ಮೊದಲ ಸಿನಿಮಾವಾದರೂ ವಿಶಿಷ್ಟ ಶೈಲಿಯ ಚಿತ್ರಕಥೆಯಿಂದ ಗಮನ ಸೆಳೆದಿತ್ತು. ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ ಸಹ ಚೆನ್ನಾಗಿ ಆಗಿ, ವಿಮರ್ಶಕರಿಂದಲೂ ಸಿನಿಮಾ ಮೆಚ್ಚುಗೆ ಗಳಿಸಿತ್ತು. ಅದಾದ ಮೇಲೆ ನವನೀತ್‌ ‘ಬಕಾಸುರ’ ಸಿನಿಮಾದಲ್ಲಿಯೂ ಥ್ರಿಲ್ಲಿಂಗ್‌ ಅಂಶಗಳನ್ನು ಸೇರಿಸಿ ಸಿನಿಮಾ ಮಾಡಿದ್ದರು. ಅದು ಕೂಡ ಹಿಟ್‌ ಆಗಿತ್ತು. ಈಗ ಮೂರನೇ ಬಾರಿ ಅವರು ಮತ್ತೊಂದು ಹಾರರ್‌ ಕಥೆಯ ಜತೆಗೆ ಬರುತ್ತಿದ್ದಾರೆ. ‘’ಶರಣ್‌ ಅವರು ಹಾರರ್‌ ಶೈಲಿಯ ಸಿನಿಮಾವನ್ನು ಇದುವರೆಗೂ ಮಾಡಿಲ್ಲ. ನಾನು ಹೋಗಿ ಕಥೆ ಹೇಳಿದಾಗ ಖುಷಿಯಿಂದ ಒಪ್ಪಿಕೊಂಡರು. ಶರಣ್‌ ಅವರ ಅಭಿಮಾನಿಗಳು ಮತ್ತು ಇತರರಿಗೂ ಇಷ್ಟವಾಗುವಂತಹ ಸಿನಿಮಾ ಇದಾಗುತ್ತದೆ. ಕಲಾವಿದರ ಆಯ್ಕೆ ಮತ್ತು ಉಳಿದ ತಂತ್ರಜ್ಞರ ಆಯ್ಕೆ ನಡೆಯುತ್ತಿದ್ದು, ಸದ್ಯದಲ್ಲೇ ನಾವೇ ತಿಳಿಸುತ್ತೇವೆ’’ ಎಂದಿದ್ದಾರೆ ನಿರ್ದೇಶಕ . ‘’ನವನೀತ್‌ ಅವರ ಸಿನಿಮಾ ಒಪ್ಪಿಕೊಂಡಿರುವುದು ನಿಜ. ಆದರೆ ಅದರ ಬಗ್ಗೆ ಹೆಚ್ಚು ಮಾತನಾಡಲು ಇದು ಸೂಕ್ತ ಸಮಯವಲ್ಲ. ಸದ್ಯದಲ್ಲೇ ನಾವೇ ಎಲ್ಲವನ್ನೂ ತಿಳಿಸುತ್ತೇವೆ’’ ಅಂತ ಹೇಳಿದ್ದಾರೆ.