ಕರ್ನಾಟಕದಲ್ಲಿ ಮತ್ತೆ 5 ಓಮಿಕ್ರಾನ್ ಪ್ರಕರಣ: ಮೂವರು ವಿದೇಶ, ಇಬ್ಬರು ದಿಲ್ಲಿಯಿಂದ ಬಂದವರು
ಕರ್ನಾಟಕದಲ್ಲಿ ಮತ್ತೆ ಐದು ಹೊಸ ತಳಿ ಓಮಿಕ್ರಾನ್ ಕೋವಿಡ್ ಪ್ರಕರಣಗಳು ಪತ್ತೆಯಾಗಿವೆ. ಇವರಲ್ಲಿ ಮೂವರು ವಿದೇಶಗಳಿಂದ ಬಂದವರಾಗಿದ್ದರೆ, ಇಬ್ಬರು ದಿಲ್ಲಿಯಲ್ಲಿ ಮದುವೆ ಸಮಾರಂಭ ಮುಗಿಸಿ ಬೆಂಗಳೂರಿಗೆ ಮರಳಿದ್ದರು.
Admin
0
6
ಬೆಂಗಳೂರು: ಕರ್ನಾಟಕದಲ್ಲಿ ಮತ್ತೆ ಐದು ಪ್ರಕರಣಗಳು ಪತ್ತೆಯಾಗಿವೆ. ವಿದೇಶಗಳು ಹಾಗೂ ಬೇರೆ ರಾಜ್ಯಗಳಿಂದ ಬಂದ ಒಟ್ಟು ಮೂವರು ಪುರುಷರು ಮತ್ತು ಇಬ್ಬರು ಮಹಿಳೆಯಲ್ಲಿ ಓಮಿಕ್ರಾನ್ ತಳಿ ವೈರಸ್ ಇರುವುದು ದೃಢಪಟ್ಟಿದೆ. ಇದರಿಂದ ರಾಜ್ಯದಲ್ಲಿ ಪತ್ತೆಯಾದ ಒಟ್ಟು ಓಮಿಕ್ರಾನ್ ಪ್ರಕರಣಗಳು ಎಂಟಕ್ಕೆ ಏರಿಕೆಯಾಗಿವೆ. ಹಾಗೆಯೇ ಭಾರತದ ಒಟ್ಟು ಓಮಿಕ್ರಾನ್ ಪ್ರಕರಣಗಳ ಸಂಖ್ಯೆ 83ಕ್ಕೆ ತಲುಪಿದೆ.
ಓಮಿಕ್ರಾನ್ ಪತ್ತೆಯಾದ ರಾಜ್ಯದ ಐವರೂ ವಯಸ್ಕರಾಗಿದ್ದಾರೆ. ಇವರಲ್ಲಿ ಬ್ರಿಟನ್‌ನಿಂದ ಮರಳಿದ 19 ವರ್ಷದ ಯುವತಿ ಸೇರಿದ್ದಾರೆ. ದಿಲ್ಲಿಯಿಂದ ರಾಜ್ಯಕ್ಕೆ ಬಂದ 70 ವರ್ಷ ವಯಸ್ಸಿನ ವೃದ್ಧೆ, ದಿಲ್ಲಿಯಿಂದ ಬಂದ 36 ವರ್ಷದ ವ್ಯಕ್ತಿಯಲ್ಲಿ ಓಮಿಕ್ರಾನ್ ಕಂಡುಬಂದಿದೆ. ಇನ್ನು ನೈಜೀರಿಯಾದಿಂದ ಮರಳಿದ 52 ವರ್ಷದ ವ್ಯಕ್ತಿ ಮತ್ತು ದಕ್ಷಿಣ ಆಫ್ರಿಕಾದಿಂದ ಮರಳಿದ 33 ವರ್ಷದ ಪುರುಷ ಓಮಿಕ್ರಾನ್ ಸೋಂಕಿಗೆ ಒಳಗಾದವರು. ಇವರೆಲ್ಲರೂ ಕೋವಿಶೀಲ್ಡ್ ಲಸಿಕೆಯ ಎರಡೂ ಡೋಸ್‌ಗಳನ್ನು ಪಡೆದುಕೊಂಡಿದ್ದಾರೆ. ಬ್ರಿಟನ್, ನೈಜೀರಿಯಾ ಮತ್ತು ದಕ್ಷಿಣ ಆಫ್ರಿಕಾ- ಮೂರೂ ಓಮಿಕ್ರಾನ್ ಅತ್ಯಧಿಕ ಸಂಖ್ಯೆಯಲ್ಲಿ ಪತ್ತೆಯಾದ ದೇಶಗಳಾಗಿವೆ.
19 ವರ್ಷದ ಯುವತಿ ಬ್ರಿಟನ್‌ನಿಂದ ಕೋವಿಡ್ ನೆಗೆಟಿವ್ ವರದಿಯೊಂದಿಗೆ ಡಿ. 13ರಂದು ಬೆಂಗಳೂರಿಗೆ ಬಂದಿದ್ದರು. ವಿಮಾನ ನಿಲ್ದಾಣದಲ್ಲಿ ಅವರ ಕೋವಿಡ್ ವರದಿ ಪಾಸಿಟಿವ್ ಬಂದಿತ್ತು. ಅವರಲ್ಲಿ ಯಾವುದೇ ರೋಗ ಲಕ್ಷಣಗಳಿಲ್ಲ. ಅವರನ್ನು ನೇರವಾಗಿ ವಿಮಾನ ನಿಲ್ದಾಣದಿಂದ ಆಸ್ಪತ್ರೆಗೆ ಸಾಗಿಸಲಾಗಿತ್ತು. ಹೀಗಾಗಿ ಪ್ರಾಥಮಿಕ ಸಂಪರ್ಕಿತರು ಯಾರೂ ಇಲ್ಲ.
ನೈಜೀರಿಯಾದಿಂದ ಬಂದ 52 ವರ್ಷದ ವ್ಯಕ್ತಿ ಕೂಡ ಕೋವಿಡ್ ನೆಗೆಟಿವ್ ವರದಿಯೊಂದಿಗೆ ಕೆಐಎಗೆ ಬಂದಿದ್ದರು. ವಿಮಾನ ನಿಲ್ದಾಣದಲ್ಲಿ ಅವರ ವರದಿ ಪಾಸಿಟಿವ್ ಬಂದಿದ್ದರೂ, ಬೆಳಗಾವಿಗೆ ಸಂಪರ್ಕ ವಿಮಾನದ ಮೂಲಕ ತೆರಳಲು ಅನುಮತಿ ನೀಡಲಾಗಿತ್ತು. ಅಲ್ಲಿ ಅವರು ಐಸೋಲೇಷನ್‌ನಲ್ಲಿದ್ದರು. ಅವರ ಇಬ್ಬರು ಪ್ರಾಥಮಿಕ ಸಂಪರ್ಕಿತರನ್ನು ಕ್ವಾರೆಂಟೈನ್‌ನಲ್ಲಿ ಇರಿಸಲಾಗಿದೆ.
70 ವರ್ಷದ ಮಹಿಳೆ ದಿಲ್ಲಿಯಲ್ಲಿ ಮದುವೆ ಸಮಾರಂಭದಲ್ಲಿ ಭಾಗವಹಿಸಿ ಡಿ. 3ರಂದು ಮರಳಿದ್ದರು. ದಿಲ್ಲಿಯಲ್ಲಿ ಓಮಿಕ್ರಾನ್ ಖಚಿತಗೊಂಡ ಪ್ರಕರಣವೊಂದರ ಜತೆಗೆ ಅವರು ಪ್ರಾಥಮಿಕ ಸಂಪರ್ಕ ಹೊಂದಿದ್ದರು. ಅವರಲ್ಲಿ ಲಘು ಲಕ್ಷಣಗಳಿವೆ. ಅವರ ಮೂವರು ಪ್ರಾಥಮಿಕ ಸಂಪರ್ಕಿತರಲ್ಲಿ ಇಬ್ಬರಲ್ಲಿ ಕೋವಿಡ್ ಪಾಸಿಟಿವ್ ಬಂದಿದೆ. ದ್ವಿತೀಯ ಸಂಪರ್ಕಿತರಿಬ್ಬರಲ್ಲಿಯೂ ನೆಗೆಟಿವ್ ಕಂಡುಬಂದಿದೆ.
36 ವರ್ಷದ ವ್ಯಕ್ತಿ ಕೂಡ ದಿಲ್ಲಿಯಲ್ಲಿ ಮದುವೆ ಮುಗಿಸಿ ಡಿ. 3ರಂದು ಬೆಂಗಳೂರಿಗೆ ಮರಳಿದ್ದರು. ಅವರಲ್ಲಿ ಕೋವಿಡ್ ಲಕ್ಷಣಗಳು ಇಲ್ಲ. ಅವರನ್ನು ಖಾಸಗಿ ಆಸ್ಪತ್ರೆಯಲ್ಲಿ ದಾಖಲಿಸಲಾಗಿದೆ.
ಮತ್ತೊಬ್ಬ 33 ವರ್ಷದ ವ್ಯಕ್ತಿ ದಕ್ಷಿಣ ಆಫ್ರಿಕಾದಿಂದ ಡಿ. 8ರಂದು ದಿಲ್ಲಿಗೆ ಬಂದು, ಅಲ್ಲಿಂದ ಬೆಂಗಳೂರಿಗೆ ಅದೇ ದಿನ ಮರಳಿದ್ದರು. ಅವರನ್ನು ದಿಲ್ಲಿಯಲ್ಲಿ ಪರೀಕ್ಷೆಗೆ ಒಳಪಡಿಸಿದಾಗ ಕೋವಿಡ್ ನೆಗೆಟಿವ್ ವರದಿ ಬಂದಿತ್ತು. ಅವರು ಮನೆಯಲ್ಲಿಯೇ ಐಸೋಲೇಟ್ ಆಗಿದ್ದರು. ಡಿ. 10ರಂದು ಅವರಲ್ಲಿ ಲಘು ಲಕ್ಷಣಗಳು ಕಾಣಿಸಿಕೊಂಡಿದ್ದರಿಂದ ಖಾಸಗಿ ಲ್ಯಾಬ್‌ಗೆ ತೆರಳಿ ತಾವೇ ಪರೀಕ್ಷೆಗೆ ಒಳಗಾಗಿದ್ದರು. ಮರುದಿನ ಅವರ ವರದಿ ಪಾಸಿಟಿವ್ ಬಂದಿತ್ತು. ಈಗ ಅವರನ್ನು ಖಾಸಗಿ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ಅವರ ಸಂಪರ್ಕಕ್ಕೆ ಬಂದಿದ್ದ ಎಲ್ಲ ನಾಲ್ವರು ಪ್ರಾಥಮಿಕ ಹಾಗೂ 25 ದ್ವಿತೀಯ ಸಂಪರ್ಕಿತರಲ್ಲಿ ನೆಗೆಟಿವ್ ವರದಿ ಬಂದಿದೆ.
