ಕನ್ನಡದ 'ಬೆಲ್‌ ಬಾಟಂ' ಕಥೆಗಾರ ಟಿ.ಕೆ. ದಯಾನಂದ್‌ಗೆ ಟಾಲಿವುಡ್‌ನಲ್ಲಿ ಬೇಡಿಕೆ!

ನಟರು, ನಿರ್ದೇಶಕರು ಪರಭಾಷೆಯಲ್ಲಿಅವಕಾಶ ಪಡೆಯುವುದು ಸಾಮಾನ್ಯ ಸಂಗತಿ. ಈಗ ಕನ್ನಡದ ಕಥೆಗಾರರನ್ನು ಟಾಲಿವುಡ್‌ ಕೈಬೀಸಿ ಕರೆದಿದೆ. ಕನ್ನಡದಲ್ಲಿ ಹಲವು ಬಾರಿ ಅತ್ಯುತ್ತಮ ಕಥೆ ಪ್ರಶಸ್ತಿ ಪಡೆದಿರುವ ಕಥೆಗಾರ, 'ಬೆಲ್‌ಬಾಟಂ', 'ಆ್ಯಕ್ಟ್ 1978' ಚಿತ್ರಗಳಿಗೆ ಕಥೆ, ಚಿತ್ರಕಥೆ ಮತ್ತು ಸಂಭಾಷಣೆ ಬರೆದಿರುವ ದಯಾನಂದ್‌ ಅವರನ್ನು ಟಾಲಿವುಡ್‌ ಮಂದಿ ಹುಡುಕಿಕೊಂಡು ಬಂದಿದ್ದಾರೆ. ಇದುವರೆಗೆ ಕನ್ನಡ ಚಿತ್ರರಂಗದಲ್ಲಿ ಸ್ಕ್ರಿಪ್ಟ್‌ ರೈಟಿಂಗ್‌ಗೆ ತೆಲುಗಿನವರನ್ನು ಕರೆದುಕೊಂಡು ಬರುತ್ತಿದ್ದರು. ಈಗ ಕನ್ನಡದ ಪ್ರತಿಭೆಗೆ ಟಾಲಿವುಡ್‌ ಮಣೆ ಹಾಕಿದೆ. 'ಮೆಗಾ ಸ್ಟಾರ್‌' ಚಿರಂಜೀವಿ ಸಿನಿಮಾಗಳ ಎಕ್ಸಿಕ್ಯುಟಿವ್‌ ಪ್ರೊಡ್ಯೂಸರ್‌ ವಾಕಡ ಅಪ್ಪೂರಾವ್‌ ಅವರು ತಮ್ಮ ಮುಂದಿನ ಪ್ರಾಜೆಕ್ಟ್‌ಗೆ ದಯಾನಂದ್‌ ಅವರನ್ನು ಆಯ್ಕೆ ಮಾಡಿದ್ದಾರೆ. ಮಹಿಳಾ ಪ್ರಧಾನ ಚಿತ್ರ ಇದಾಗಿದ್ದು, ಚಿತ್ರಕ್ಕೆ ಸ್ಕ್ರಿಪ್ಟ್‌ ಮತ್ತು ಡೈಲಾಗ್‌ ಬರೆಯಲಿದ್ದಾರೆ ದಯಾನಂದ್‌. ದಯಾನಂದ್‌ ಬರಹಗಾರರಾಗಿ ಕೆಲಸ ಮಾಡಿದ್ದ 'ಬೆಲ್‌ಬಾಟಂ', 'ಆ್ಯಕ್ಟ್ 1978' ಸಿನಿಮಾಗಳನ್ನು ನೋಡಿದ ವಾಕಡ ಅಪ್ಪೂರಾವ್‌, ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ದಯಾನಂದ್‌ ಕೆಲಸ ಮಾಡಿದ ಎರಡೂ ಸಿನಿಮಾಗಳಲ್ಲಿ ಅಧ್ಯಯನ ಕಾಣಿಸಿದ್ದರಿಂದ ಅವರನ್ನು ಆಯ್ಕೆ ಮಾಡಿದ್ದಾರೆ. 'ಎಸ್‌.ಎಸ್‌. ರಾಜಮೌಳಿ ನಿರ್ದೇಶನದ 'ಆರ್‌ಆರ್‌ಆರ್‌' ಸಿನಿಮಾದ ಆಪರೇಟಿವ್‌ ಕ್ಯಾಮೆರಾಮನ್‌ ರಮೇಶ್‌ ನನ್ನನ್ನು ಸಂಪರ್ಕಿಸಿ ಈ ವಿಷಯ ತಿಳಿಸಿದರು. ಒನ್‌ಲೈನ್‌ ಸ್ಟೋರಿ ಅವರ ಬಳಿ ಇದೆ. ಅದನ್ನು ವಿಸ್ತರಿಸಿ ಕಥೆ, ಚಿತ್ರಕಥೆ ಮತ್ತು ಡೈಲಾಗ್‌ ಮಾಡಿಕೊಡುವಂತೆ ನನ್ನನ್ನು ಸಂಪರ್ಕಿಸಿದ್ದಾರೆ. ಈಗಾಗಲೇ ಸ್ಕ್ರಿಪ್ಟ್‌ ವರ್ಕ್ ಶುರುಮಾಡಿದ್ದೇನೆ. ಚಿತ್ರದ ನಾಯಕಿ ಪಾತ್ರಕ್ಕೆ 3-4 ನಟಿಯರ ಲಿಸ್ಟ್‌ ಮಾಡಿದ್ದಾರೆ. ಸ್ಕ್ರಿಪ್ಟ್‌ ರೆಡಿ ಆಗುತ್ತಿದ್ದಂತೆ ಫೈನಲ್‌ ಮಾಡಲಿದ್ದಾರೆ' ಎಂದಿದ್ದಾರೆ ದಯಾನಂದ್‌. ಕನ್ನಡದಲ್ಲಿ 'ಬೆಲ್‌ಬಾಟಂ 2' ಮತ್ತು ಹೊಸಬರ ಒಂದು ಸಿನಿಮಾಗೂ ದಯಾನಂದ್‌ ಕೆಲಸ ಮಾಡಿದ್ದು, ಈ ಎರಡೂ ಸಿನಿಮಾಗಳು ಸೆಟ್ಟೇರಬೇಕಿವೆ. ಬಿಲ್ಲು ಬಾಣ ತಯಾರಿಸುವ ಸಮುದಾಯಕ್ಕೆ ಸಂಬಂಧಿಸಿದ ಸಿನಿಮಾಗೆ ಕಥೆ ಮಾಡಿದ್ದು, ಇದು ಮಿಸ್ಟರಿ ಥ್ರಿಲ್ಲರ್‌ ಸಿನಿಮಾ ಆಗಲಿದೆ ಎಂದಿದ್ದಾರೆ ಅವರು. ಇದಲ್ಲದೆ, ಮುಂದಿನ ವರ್ಷ ತಾವೇ ನಿರ್ದೇಶನ ಮಾಡಲಿರುವ ಸಿನಿಮಾಗೆ ಕಥೆಯನ್ನೂ ಅವರು ಸಿದ್ಧ ಮಾಡಿಕೊಂಡಿದ್ದಾರೆ. ಈ ಮೊದಲು ದಯಾನಂದ್‌ 'ಬೆಂಕಿಪಟ್ಣ' ಎಂಬ ಚಿತ್ರ ನಿರ್ದೇಶನ ಮಾಡಿದ್ದರು. 'ಬೆಲ್‌ ಬಾಟಂ' ಚಿತ್ರದ ಸಕ್ಸಸ್‌ ನಂತರ ದಯಾನಂದ್‌ರಿಗೆ ಬೇಡಿಕೆ ಹೆಚ್ಚಾಗಿದೆ.