ಬೆಂಗಳೂರಿನಲ್ಲಿ 'ಪುಷ್ಪ' ಚಿತ್ರಕ್ಕೆ ಸಿಕ್ಕಿರುವ ಶೋಗಳೆಷ್ಟು? ಕನ್ನಡ ವರ್ಷನ್‌ಗೆ ಶುರುವಾಗಿದೆ ತಾರತಮ್ಯ!

ಅಲ್ಲು ಅರ್ಜುನ್, ರಶ್ಮಿಕಾ ಮಂದಣ್ಣ, ಧನಂಜಯ್ ಅಭಿನಯದ '' ಚಿತ್ರವು ದೊಡ್ಡಮಟ್ಟದಲ್ಲಿ ತೆರೆಗೆ ಬರಲು ಸಜ್ಜಾಗಿದೆ. ಈ ವರ್ಷದ ಅತೀ ಹೆಚ್ಚು ನಿರೀಕ್ಷೆ ಇಟ್ಟುಕೊಂಡಿರುವ ಸಿನಿಮಾ ಇದಾಗಿದೆ. ಅಲ್ಲು ಅರ್ಜುನ್‌ಗೆ ಕರ್ನಾಟಕದಲ್ಲೂ ದೊಡ್ಡಮಟ್ಟದ ಅಭಿಮಾನಿ ಬಳಗವಿದೆ. ಹಾಗಾಗಿ, ಇಲ್ಲಿಯೂ ಗ್ರ್ಯಾಂಡ್ ಆಗಿಯೇ ತೆರೆಗೆ ಬರಲಿದೆ. ಈ ಬಾರಿ ಅಲ್ಲು ಅರ್ಜುನ್‌ ಅವರ 'ಪುಷ್ಪ' ಸಿನಿಮಾವು ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ತೆರೆಗೆ ಬರುತ್ತಿದೆ. ಹಾಗಾಗಿ, ಕನ್ನಡದಲ್ಲೂ ಈ ಸಿನಿಮಾವನ್ನು ನೋಡುವ ಬಯಕೆಯನ್ನು ಕನ್ನಡಿಗರು ಇಟ್ಟುಕೊಂಡಿದ್ದಾರೆ. ಆದರೆ, ಆಗಿರುವುದೇ ಬೇರೆ! ತೆಲುಗು ವರ್ಷನ್‌ಗೆ 675+ ಶೋಗಳು!ಡಿ.17ರಂದು 'ಪುಷ್ಪ' ಸಿನಿಮಾ ತೆರೆಗೆ ಬರುತ್ತಿದೆ. ಈ ಸಿನಿಮಾವು ಕರ್ನಾಟಕದಲ್ಲೂ ದೊಡ್ಡಮಟ್ಟದಲ್ಲಿ ರಿಲೀಸ್ ಆಗುತ್ತಿದೆ. ಬೆಂಗಳೂರಿನಲ್ಲೇ ಡಿ.17ರಂದು ಸುಮಾರು 675ಕ್ಕೂ ಅಧಿಕ ಶೋಗಳು 'ಪುಷ್ಪ'ಗೆ ಸಿಕ್ಕಿವೆ. ಅದು ತೆಲುಗು ವರ್ಷನ್‌ಗೆ ಮಾತ್ರ. ಉಳಿದಂತೆ ಕನ್ನಡ ವರ್ಷನ್‌ಗೆ 2 ಶೋ, ತಮಿಳು ವರ್ಷನ್‌ಗೆ 10 ಶೋ, ಮಲಯಾಳಂ ವರ್ಷನ್‌ಗೆ 4 ಶೋ ಸಿಕ್ಕಿವೆ! ಮಾತೃಭಾಷೆ ಕನ್ನಡ ಇರುವ ಬೆಂಗಳೂರಿನಲ್ಲೇ 'ಪುಷ್ಪ' ಚಿತ್ರದ ಕನ್ನಡ ವರ್ಷನ್‌ಗೆ 2 ಶೋ ಸಿಕ್ಕಿರುವುದು ಅಚ್ಚರಿ ಎನಿಸಿದೆ. ಜೊತೆಗೆ ಕನ್ನಡಿಗರಿಗೆ ಬೇಸರ ಮೂಡಿಸಿದೆ. ಹೈದರಾಬಾದ್‌ನಲ್ಲಿ 780+ ಶೋಗಳು ತೆಲುಗು ಮಾತೃಭಾಷೆ ಇರುವ ಹೈದರಾಬಾದ್‌ನಲ್ಲಿ 'ಪುಷ್ಪ' 780+ ಶೋ ಸಿಕ್ಕಿವೆ. ಕನ್ನಡ ಮಾತೃಭಾಷೆಯಾಗಿರುವ ಬೆಂಗಳೂರಿನಲ್ಲಿ 675+ ಶೋ ಸಿಕ್ಕಿವೆ. ಈ ಸಂಖ್ಯೆ ಶುಕ್ರವಾರ (ಡಿ.17) ಬೆಳಗ್ಗೆ ವೇಳೆಗೆ ಇನ್ನಷ್ಟು ಜಾಸ್ತಿಯಾದರೆ, ಅಚ್ಚರಿ ಏನಿಲ್ಲ. ಸದ್ಯ 'ಪುಷ್ಪ' ಕನ್ನಡ ವರ್ಷನ್‌ ಇರುವ 2 ಶೋಗೂ ಕೂಡ ಜನ ಹೋಗಿಲ್ಲ. ಟಿಕೆಟ್ ಬುಕ್ ಮಾಡಲು ಉತ್ಸಾಹ ತೋರುತ್ತಿಲ್ಲ. ಬಹುಶಃ ಕನ್ನಡ ವರ್ಷನ್‌ ನೋಡಲು ಜನರು ಉತ್ಸಾಹ ತೋರಿದ್ದರೆ, ಇನ್ನಷ್ಟು ಶೋಗಳು ಹೆಚ್ಚಾಗುತ್ತಿದ್ದವು ಎನಿಸುತ್ತದೆ. ಆದರೆ, ತೆಲುಗು ವರ್ಷನ್‌ಗೆ ಮಾತ್ರ ಬೆಂಗಳೂರಿನಲ್ಲಿ ಭರ್ಜರಿ ರೆಸ್ಪಾನ್ಸ್ ಸಿಕ್ಕಿದೆ. ಈಗಾಗಲೇ ಬಹುತೇಕ ಕಡೆ ಟಿಕೆಟ್ ಸೋಲ್ಡ್‌ ಔಟ್ ಕೂಡ ಆಗಿದೆ. ಅಂದಹಾಗೆ, 'ಪುಷ್ಪ' ಚಿತ್ರದಲ್ಲಿ ಅಲ್ಲು ಅರ್ಜುನ್‌ಗೆ ನಾಯಕಿಯಾಗಿ ಕನ್ನಡತಿ ರಶ್ಮಿಕಾ ಮಂದಣ್ಣ ಕಾಣಿಸಿಕೊಂಡಿದ್ದಾರೆ. ಕಷ್ಟಪಟ್ಟು ಚಿತ್ತೂರು ಸೊಗಡಿನ ತೆಲುಗು ಕಲಿತು ಅವರು ಚಿತ್ರಕ್ಕೆ ಡಬ್ ಮಾಡಿದ್ದಾರೆ. ಆದರೆ, ಕನ್ನಡ ವರ್ಷನ್‌ನಲ್ಲಿ ಅವರ ಧ್ವನಿ ಇಲ್ಲ! ಅದಕ್ಕೂ ಚಿತ್ರತಂಡದ ಬಳಿ ಕಾರಣ ಇದೆ. 'ಮೊದಲು ತೆಲುಗು ವರ್ಷನ್ ಸಿದ್ಧಪಡಿಸಬೇಕಿತ್ತು. ಅದಕ್ಕಾಗಿ ಅವರಿಂದ ತೆಲುಗು ಡಬ್ ಮಾಡಿಸಿದೆವು. ನಂತರ ಮಿಕ್ಕಿದ ಭಾಷೆಗಳಿಗೆ ಡಬ್ ಮಾಡಿಸಲು ಸಮಯ ಹೊಂದಿಸಿಕೊಳ್ಳಲು ಆಗಲಿಲ್ಲ' ಎಂಬುದು ನೀಡುವ ಕಾರಣ. ಸುಕುಮಾರ್ ನಿರ್ದೇಶನದ ಈ ಸಿನಿಮಾದಲ್ಲಿ ಧನಂಜಯ್ ವಿಲನ್ ಆಗಿ ನಟಿಸಿದ್ದು, ಮೈತ್ರಿ ಮೂವೀ ಮೇಕರ್ಸ್ ನಿರ್ಮಾಣ ಮಾಡಿದೆ. ದೇವಿಶ್ರೀ ಪ್ರಸಾದ್ ಸಂಗೀತ ನೀಡಿದ್ದಾರೆ.