Puneeth Rajkumar: ಚಿರು ಸರ್ಜಾ, 'ಸಂಚಾರಿ' ವಿಜಯ್, ಪುನೀತ್ ಸಾವಿನಲ್ಲಿ ಇದೆ ಒಂದು ಸಾಮ್ಯತೆ!
ಅಭಿಮಾನಿಗಳ ಅಪ್ಪು, ಪ್ರೀತಿಯ 'ಪವರ್ ಸ್ಟಾರ್' ಪುನೀತ್ ರಾಜ್‌ಕುಮಾರ್ ಅಗಲಿದ್ದಾರೆ. ದೊಡ್ಮನೆಯ ಪ್ರೀತಿಯ ಕಂದ ಅಪ್ಪು ಅಗಲಿಕೆ ಅಭಿಮಾನಿಗಳಿಗೆ ಸಹಿಸಲಾರದ ನೋವು ತಂದಿದೆ. ಕಾಕತಾಳೀಯವೆಂದರೆ, ಚಿರು ಸರ್ಜಾ, 'ಸಂಚಾರಿ' ವಿಜಯ್, ಪುನೀತ್ ಸಾವಿನಲ್ಲಿ ಒಂದು ಸಾಮ್ಯತೆ ಇದೆ.
Admin
0
6
ಕರುನಾಡಿನ ಪಾಲಿಗೆ ಅಕ್ಟೋಬರ್ 29ರ ಶುಕ್ರವಾರ ಕರಾಳ ದಿನವಾಗಿದೆ. ಕನ್ನಡ ಕಲಾರಸಿಕರು ಪ್ರೀತಿಯಿಂದ ಅಪ್ಪು ಎಂದು ಕರೆಯುವ ದೊಡ್ಮನೆಯ ಪ್ರೀತಿಯ ಕಂದ ನಮ್ಮನ್ನೆಲ್ಲ ಅಗಲಿದ್ದಾರೆ. ಸಣ್ಣ ಸುಳಿವನ್ನೂ ಕೂಡ ನೀಡಿದ ಕ್ರೂರಿ ಜವರಾಯ ಅಪ್ಪು ಜೀವವನ್ನು ಕೊಂಡೊಯ್ದಿದ್ದಾನೆ. ಕೆಲವೇ ಕೆಲವು ತಿಂಗಳ ಹಿಂದಷ್ಟೇ ರಾಷ್ಟ್ರ ಮೆಚ್ಚಿದ ನಟ ಸಂಚಾರಿ ವಿಜಯ್ ಅವರೂ ಕೂಡ ಇಂಥದ್ದೇ ಅಕಾಲ ಮರಣಕ್ಕೆ ತುತ್ತಾಗಿದ್ದರು. ಕಳೆದ ವರ್ಷ ಕೂಡ ಯಾವ ಸೂಚನೆಯನ್ನೂ ನೀಡದೇ ಎದ್ದು ಹೋಗಿದ್ದರು! ಈ ಮೂವರು ಮಹಾನ್ ಪ್ರತಿಭೆಗಳ ಸಾವು ಕನ್ನಡಿಗರಿಗೆ ಸಹಿಸಲಾರದ ನೋವು ನೀಡುತ್ತಿದೆ. ಕಾಕತಾಳೀಯವೆಂದರೆ, ಈ ಮೂವರ ಸಾವಿನ ವಿಚಾರದಲ್ಲೂ ಒಂದು ಸಾಮ್ಯತೆ ಇದೆ.
ಈ ಮೂವರದ್ದು ಒಂದೇ ಜನ್ಮದಿನಾಂಕ! ಹೌದು, ಪುನೀತ್, ಚಿರು ಸರ್ಜಾ ಮತ್ತು 17ನೇ ತಾರೀಖಿನಂದೇ ಹುಟ್ಟಿದ್ದರು. ಪುನೀತ್ ರಾಜ್‌ಕುಮಾರ್ ಅವರು 1975 ಮಾರ್ಚ್‌ 17ರಂದು ಜನಿಸಿದ್ದರು. ಚಿರಂಜೀವಿ ಸರ್ಜಾ ಅವರು 1984ರ ಅಕ್ಟೋಬರ್ 17ರಂದು ಹುಟ್ಟಿದ್ದರು. ಹಾಗೆಯೇ, ರಾಷ್ಟ್ರ ಪ್ರಶಸ್ತಿ ಪುರಸ್ಕೃತ ನಟ ಸಂಚಾರಿ ವಿಜಯ್ ಅವರು 1983ರ ಜುಲೈ 17ರಂದು ಜನಿಸಿದ್ದರು. ಸದ್ಯ ಈ ವಿಚಾರ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದೆ. ಕಳೆದ ಒಂದೂವರೆ ವರ್ಷಗಳಲ್ಲಿ ಈ ಮೂವರು ಪ್ರತಿಭೆಗಳನ್ನು ಕನ್ನಡ ಚಿತ್ರರಂಗ ಕಳೆದುಕೊಂಡು ಬಡವಾಗಿದೆ. ವಿಪರ್ಯಾಸವೆಂದರೆ, ಈ ಮೂವರದ್ದು ಸಾಯುವ ವಯಸ್ಸೇ ಅಲ್ಲ!
ಹೃದಯಾಘಾತದಿಂದ ಚಿರು ನಿಧನಸಾಲು ಸಾಲು ಸಿನಿಮಾಗಳಲ್ಲಿ ಬ್ಯುಸಿ ಆಗಿದ್ದ ನಟ ಚಿರಂಜೀವಿ ಸರ್ಜಾ, ಜೂನ್ 7ರಂದು ಹೃದಯಾಘಾತದಿಂದ ನಿಧನರಾದರು. ಅವರಿಗಿನ್ನೂ ಆಗ 36ರ ಹರೆಯ. ಸರ್ಜಾ ಕುಟುಂಬದ ಸಂಕಟ ನೋಡಿ ಇಡೀ ಕರುನಾಡೇ ಕಣ್ಣೀರಿಟ್ಟಿತ್ತು! ಇನ್ನೂ ಬಾಳಿ ಬದುಕಬೇಕಾದ ಜೀವ ವಯಸ್ಸಲ್ಲದ ವಯಸ್ಸಲ್ಲಿ ಅಸುನೀಗಿದ್ದನ್ನು ಇಂದಿಗೂ ಅರಗಿಸಿಕೊಳ್ಳಲ ಸಾಧ್ಯವಿಲ್ಲ.
ರಸ್ತೆ ಅಪಘಾತದಲ್ಲಿ ಸಂಚಾರಿ ನಿಧನರಾಷ್ಟ್ರ ಪ್ರಶಸ್ತಿ ಪುರಸ್ಕೃತ ನಟ ಸಂಚಾರಿ ವಿಜಯ್ ಅವರಿಗೆ ಜೂನ್ 12ರಂದು ರಸ್ತೆ ಅಪಘಾತವಾಗಿತ್ತು. ಆ ವೇಳೆ ಅವರ ತಲೆಗೆ ಗಂಭೀರವಾದ ಪೆಟ್ಟು ಬಿದ್ದಿತ್ತು. ನಂತರ ಅವರ ಬ್ರೈನ್ ಡೆಡ್ ಆಗಿತ್ತು. ವೈದ್ಯರ ಎರಡ್ಮೂರು ದಿನಗಳ ಹೋರಾಟ ಫಲ ನೀಡಲಿಲ್ಲ. ವಿಜಯ್ ಅವರ ಅಂಗಾಗ ದಾನದ ನಂತರ ಅವರು ಜೂನ್ 15ರಂದು ಉಸಿರು ನಿಲ್ಲಿಸಿದರು. ಅವರಿಗೆ ಆಗ 38 ವರ್ಷ ವಯಸ್ಸು ಅಷ್ಟೇ! ಕರುನಾಡಿನ ಕೀರ್ತಿಯನ್ನು ರಾಷ್ಟ್ರಮಟ್ಟದಲ್ಲಿ ಬೆಳಗಿಸಿದ್ದ ಪ್ರತಿಭೆಯೊಂದು ಆಕಾಲ ಮರಣಕ್ಕೀಡಾಗಿದ್ದು ನೋವು ನೀಡಿತ್ತು.
ಕನ್ನಡಿಗರ ಆತ್ಮೀಯ ಅಪ್ಪು ಇನ್ನಿಲ್ಲ!ಇದೀಗ ಸರಳತೆಯನ್ನೇ ಮೈಗೂಡಿಸಿಕೊಂಡ ಜನಪ್ರಿಯ ನಟ ಪುನೀತ್ ರಾಜ್‌ಕುಮಾರ್ ಅವರ ನಿಧನ ಕನ್ನಡಿಗರನ್ನು ಇನ್ನಿಲ್ಲದಷ್ಟು ಬಾಧಿಸುತ್ತಿದೆ. 46ನೇ ವಯಸ್ಸಿಗೆ ಸಾವು ಎಂದರೆ ಯಾರಿಗೆ ತಾನೇ ಒಪ್ಪಿಕೊಳ್ಳಲು ಸಾಧ್ಯ ಹೇಳಿ? ಐದಾರು ಸಿನಿಮಾಗಳು ಸರತಿಯಲ್ಲಿದ್ದವು. ಹೊಸಬರಿಗೆ ಅವಕಾಶ ನೀಡುವ ಸಲುವಾಗಿಯೇ ಪ್ರೊಡಕ್ಷನ್‌ ಹೌಸ್ ಶುರು ಮಾಡಿದ್ದ ಅಪ್ಪು, ಅದರಿಂದ ಇನ್ನೂ ಅನೇಕರಿಗೆ ಅವಕಾಶ ನೀಡಬೇಕಿತ್ತು. ಅದೆಷ್ಟು ದಾನ-ಧರ್ಮ ಮಾಡುವುದಕ್ಕೆ ಅಪ್ಪು ಕೈ ಮುಂದಾಗಬೇಕಿತ್ತು. ಅದೆಲ್ಲದಕ್ಕೂ ಈಗ ತಡೆ ಬಿದ್ದಿದೆ. ಕ್ರೂರ ವಿಧಿಯ ಅಟ್ಟಹಾಸಕ್ಕೆ ಅಪ್ಪು ಎಂಬ ಸರಳ, ಸಜ್ಜನಿಕೆಯ, ಮಗುವಿನಂತಹ ನಗುವುಳ್ಳ ನಟ ಎದ್ದು ಹೊರಟೇ ಬಿಟ್ಟಿದ್ದಾರೆ.
