Manvitha: ಹಳ್ಳಿ ಹುಡುಗಿ ಪಾತ್ರಕ್ಕಾಗಿ ಮಂಡ್ಯಕ್ಕೆ ಹೋಗಲಿದ್ದಾರೆ 'ಟಗರು ಪುಟ್ಟಿ' ಮಾನ್ವಿತಾ ಕಾಮತ್!

ಪದ್ಮಾ ಶಿವಮೊಗ್ಗ ಮಾಸ್‌ ಮತ್ತು ಕ್ಲಾಸ್‌ ಸಿನಿಮಾಗಳನ್ನು ಕೊಟ್ಟಿರುವ ನಿರ್ದೇಶಕ ಪಿ.ಸಿ. ಶೇಖರ್‌ ಹೊಸ ಸಿನಿಮಾ ಮಾಡಲಿದ್ದು, ನಟಿ ಮಾನ್ವಿತಾ ಕಾಮತ್‌ ಅವರನ್ನು ನಾಯಕಿಯಾಗಿ ಆಯ್ಕೆ ಮಾಡಿದ್ದಾರೆ. ಉಳಿದಂತೆ ಬಹುತೇಕ ಹೊಸಬರನ್ನೇ ಆಯ್ಕೆ ಮಾಡಿಕೊಂಡು ಸಿನಿಮಾ ಮಾಡುತ್ತಿದ್ದಾರೆ. ನಾಯಕಿಯ ಪಾತ್ರ ಬಹಳ ಪವರ್‌ಫುಲ್‌ ಮತ್ತು ಸ್ಟ್ರಾಂಗ್‌ ಆಗಿರುವುದರಿಂದ ಅನುಭವಿ ನಟಿ ಮಾನ್ವಿತಾರನ್ನು ಆಯ್ಕೆ ಮಾಡಿದ್ದಾಗಿ ಶೇಖರ್‌ ಹೇಳಿದ್ದಾರೆ. 'ಲವ್‌ ಸ್ಟೋರಿ ಮತ್ತು ಥ್ರಿಲ್ಲರ್‌ ಸಿನಿಮಾ ಇದು. ಹೀರೋ ಮತ್ತು ಉಳಿದೆಲ್ಲಾ ಪಾತ್ರಗಳಿಗೆ ಹೊಸಬರೇ ಇರಲಿದ್ದಾರೆ. ಆದರೆ, ನಾಯಕಿಯ ಪಾತ್ರಕ್ಕೆ ಅನುಭವಿ ನಟಿ ಬೇಕಿತ್ತು. ರೈತ ಕುಟುಂಬದಿಂದ ಬಂದ ಹಳ್ಳಿ ಹುಡುಗಿಯ ಪಾತ್ರದಲ್ಲಿ ಡಾಮಿನೇಟಿಂಗ್‌ ಆಗಿ ನಟಿಸಬೇಕಿತ್ತು. ಆದ್ದರಿಂದ ಮಾನ್ವಿತಾರನ್ನು ಆಯ್ಕೆ ಮಾಡಿದೆ. ಹಳ್ಳಿಗಳಲ್ಲಿ ಹೆಣ್ಣು ಮಕ್ಕಳಿಗೆ ಹೆಚ್ಚಿನ ಸ್ವಾತಂತ್ರ್ಯ ಇರೋಲ್ಲ. ಅಂಥ ವಾತಾವರಣದಲ್ಲಿ ಸಿಡಿದೇಳುವ ಹುಡುಗಿಯ ಪಾತ್ರ ಇದು. ಗಂಡು ಹುಡುಗರಿಗೆ ಸರಿಸಮಾನವಾಗಿ ಇರುವ ಹುಡುಗಿ. ತನ್ನತನವನ್ನು ಬಿಟ್ಟುಕೊಡದ, ಸಮಾಜವನ್ನು ಧೈರ್ಯದಿಂದ ಎದುರಿಸಿ ಹೋರಾಡುವ ಹುಡುಗಿ ಅವಳು' ಎಂದಿದ್ದಾರೆ ಅವರು. ಪಿ.ಸಿ.ಶೇಖರ್‌ ನಿರ್ದೇಶನದ ಒಂಬತ್ತನೇ ಸಿನಿಮಾ ಇದು. ಆಷಾಢದ ನಂತರ ಚಿತ್ರ ಸೆಟ್ಟೇರಲಿದೆ. ಅರ್ಜುನ್‌ ಜನ್ಯ ಸಂಗೀತ ಸಂಯೋಜನೆ ಮಾಡಲಿದ್ದಾರೆ. ಇವರಿಬ್ಬರ ಕಾಂಬಿನೇಷನ್‌ನ ಎಂಟನೇ ಚಿತ್ರ ಇದಾಗಲಿದೆ. ಜನಪ್ರಿಯ ಛಾಯಾಗ್ರಾಹಕ ವೈದಿ ಅವರಿಗೆ ಸಹಾಯಕ ಛಾಯಾಗ್ರಾಹಕರಾಗಿ ಕೆಲಸ ಮಾಡಿರುವ ಶಕ್ತಿ ಶೇಖರ್‌ ಮೊದಲ ಬಾರಿಗೆ ಸಿನೆಮಾಟೋಗ್ರಾಫರ್‌ ಆಗಿ ಕೆಲಸ ಮಾಡಲಿದ್ದಾರೆ. ಶೇಖರ್‌ ಸಿನಿಮಾಗಳಿಗೆ ಸಂಭಾಷಣೆ ಬರೆಯುತ್ತಾ ಬಂದಿರುವ ಸಚಿನ್‌ ಸಂಭಾಷಣೆ ಬರೆಯಲಿದ್ದಾರೆ. ಪ್ರಜ್ವಲ್‌ ನಟನೆಯ ಹೊಸ ಚಿತ್ರವನ್ನೂ ಶೇಖರ್‌ ನಿರ್ದೇಶನ ಮಾಡಲಿದ್ದಾರೆ. ಪ್ರಜ್ವಲ್‌ ಎರಡು ಸಿನಿಮಾಗಳಲ್ಲಿ ಬಿಝಿಯಾಗಿದ್ದು, ಈ ಚಿತ್ರದ ನಂತರ ಸೆಟ್ಟೇರಲಿದೆ ಎಂದಿದ್ದಾರೆ ಅವರು. ಮೊದಲ ಬಾರಿಗೆ ಪಿ.ಸಿ. ಶೇಖರ್‌ ನಿರ್ದೇಶನದ ಚಿತ್ರದಲ್ಲಿನಟಿಸುತ್ತಿರುವುದಕ್ಕೆ ಹರ್ಷ ವ್ಯಕ್ತಪಡಿಸಿದ್ದಾರೆ ಮಾನ್ವಿತಾ. 'ಶೇಖರ್‌ ಅವರ ಸಿನಿಮಾದಲ್ಲಿಅವಕಾಶ ಸಿಕ್ಕಿದ್ದು ಖುಷಿ ಕೊಟ್ಟಿದೆ. ಅವರ ಸಿನಿಮಾಗಳು ವಿಭಿನ್ನವಾಗಿರುತ್ತವೆ. ಛಾಯಾಗ್ರಹಣ, ಟೋನ್‌, ಹ್ಯೂಮರ್‌, ಎಸೆನ್ಸ್‌ ಎಲ್ಲವೂ ಇರುತ್ತೆ. ರೋಮಿಯೋ ನನ್ನ ಫೇವರಿಟ್‌ ಸಿನಿಮಾ. ಅವರು ಕಥೆ ಹೇಳಿದಾಗ ಚಿತ್ರದ ಫೀಲ್‌ ಗೊತ್ತಾಗಿಬಿಡ್ತು. ಈ ಪಾತ್ರವನ್ನು ಚೆನ್ನಾಗಿ ನಿಭಾಯಿಸಬಹುದು ಎನ್ನಿಸಿತು. ಮೊದಲ ಬಾರಿಗೆ ಇಂಥದ್ದೊಂದು ಪಾತ್ರದಲ್ಲಿನಟಿಸುತ್ತಿದ್ದೇನೆ' ಎಂದಿದ್ದಾರೆ ಮಾನ್ವಿತಾ. ಟಗರು, ಇಂಡಿಯಾ ವರ್ಸಸ್‌ ಇಂಗ್ಲೆಂಡ್‌ ಸಿನಿಮಾಗಳ ನಂತರ ಮತ್ತೆ ಚಿತ್ರೀಕರಣಕ್ಕೆ ಮರಳುತ್ತಿದ್ದಾರೆ ಮಾನ್ವಿತಾ. ಪಾತ್ರದ ತಯಾರಿಗಾಗಿ ಮಂಡ್ಯದ ಕಡೆ ಹೋಗಲು ನಿರ್ಧರಿಸಿದ್ದಾರೆ. 'ಹಳ್ಳಿ ಹುಡುಗಿಯ ಪಾತ್ರ ಮಾಡೋದು ಸುಲಭವಲ್ಲ. ಗಟ್ಟಿಗಿತ್ತಿ ಹುಡುಗಿಯ ಬಾಡಿ ಲಾಂಗ್ವೇಜ್‌ ಕಲಿಯಲು, ಮಂಡ್ಯದ ಕಡೆ ನಾಲ್ಕು ದಿನ ಹೋಗಬೇಕು ಎಂದುಕೊಂಡಿದ್ದೇನೆ. ಅವರ ಮಧ್ಯೆ ಇದ್ದರೆ ಮಾತ್ರ ನಾವು ಕಲಿಯಲು ಸಾಧ್ಯ. ಪ್ರತಿಯೊಂದು ಚಿತ್ರಕ್ಕೂ, ಪಾತ್ರಕ್ಕೂ ತಯಾರಿ ಅತ್ಯಗತ್ಯ ಅಂತ ಗೊತ್ತಾಗಿದೆ' ಎಂದಿದ್ದಾರೆ ಅವರು. ಕೋಟ್ಸ್‌ ಹಳ್ಳಿಗಳಲ್ಲಿ ಹೆಣ್ಣುಮಕ್ಕಳು ಹೀಗೇ ಇರಬೇಕು ಎನ್ನುವ ಮನೋಭಾವವನ್ನು ಬ್ರೇಕ್‌ ಮಾಡಬೇಕೆನ್ನೋ ಹುಡುಗಿಯ ಪಾತ್ರದಲ್ಲಿ ಮಾನ್ವಿತಾ ನಟಿಸಲಿದ್ದಾರೆ. ರೊಮ್ಯಾಂಟಿಕ್‌ ಲವ್‌ ಸ್ಟೋರಿ ಜತೆ ಥ್ರಿಲ್‌ ನೀಡುವ ಸಿನಿಮಾ ಇದಾಗಿದೆ. ಇವೆರಡೂ ಅಂಶಗಳು ಸೇರಿದಾಗ ಹೊಸ ಡೈಮೆನ್ಷನ್‌ ಸಿಗುತ್ತದೆ. -ಪಿ.ಸಿ. ಶೇಖರ್‌, ನಿರ್ದೇಶಕ