ಪುನೀತ್‌ ಭಾವಚಿತ್ರಕ್ಕೆ ಪುಷ್ಪ ನಮನ ಸಲ್ಲಿಸಿ ಕಣ್ಣೀರಿಟ್ಟ ತೆಲುಗು ನಟ ರಾಮ್ ಚರಣ್ ತೇಜಾ

‘ಪವರ್ ಸ್ಟಾರ್’ ಇನ್ನಿಲ್ಲ ಎಂಬ ಸಂಗತಿಯನ್ನು ಈಗಲೂ ಯಾರಿಂದಲೂ ಅರಗಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಫಿಟ್ ಅಂಡ್ ಫೈನ್ ಆಗಿದ್ದ ಅಪ್ಪುಗೆ ಯಾವುದೇ ಅನಾರೋಗ್ಯ ಕಾಡುತ್ತಿರಲಿಲ್ಲ. ಹೀಗಿರುವಾಗಲೇ, ಅಕ್ಟೋಬರ್ 29 ರಂದು ಪುನೀತ್ ರಾಜ್‌ಕುಮಾರ್ ಹಠಾತ್ ವಿಧಿವಶರಾದರು. ಪ್ರೀತಿಯ ಅಪ್ಪು ನಿಧನದಿಂದ ಆಘಾತಗೊಂಡಿರುವ ದೊಡ್ಮನೆ ಕುಟುಂಬಕ್ಕೆ ತಾರೆಯರು ಸಾಂತ್ವನ ಹೇಳುತ್ತಿದ್ದಾರೆ. ಇತ್ತೀಚೆಗಷ್ಟೇ ತಮಿಳು ನಟರಾದ ಶಿವಕಾರ್ತಿಕೇಯನ್, ಶಿವಾಜಿ ಪ್ರಭು, ತೆಲುಗು ನಟ ನಾಗಾರ್ಜುನ ದೊಡ್ಮನೆಗೆ ಭೇಟಿ ಕೊಟ್ಟು ಕುಟುಂಬಸ್ಥರಿಗೆ ಸಾಂತ್ವನ ಹೇಳಿದ್ದರು. ಇಂದು (ನವೆಂಬರ್ 3) ಪುನೀತ್ ರಾಜ್‌ಕುಮಾರ್ ಹಾಗೂ ಶಿವರಾಜ್ ಕುಮಾರ್ ಮನೆಗೆ ತೆಲುಗು ನಟ ತೇಜಾ ಭೇಟಿ ಕೊಟ್ಟು ಸಾಂತ್ವನದ ಮಾತುಗಳನ್ನ ಹೇಳಿದರು. ಪುಷ್ಪ ನಮನ ಸಲ್ಲಿಸಿದ ರಾಮ್ ಚರಣ್ ತೇಜಾ ಇಂದು ಮಧ್ಯಾಹ್ನ 12 ಗಂಟೆ ಸುಮಾರಿಗೆ ಬೆಂಗಳೂರಿನ ಸದಾಶಿವನಗರದಲ್ಲಿರುವ ಪುನೀತ್ ರಾಜ್‌ಕುಮಾರ್ ನಿವಾಸಕ್ಕೆ ರಾಮ್ ಚರಣ್ ತೇಜಾ ಭೇಟಿ ಕೊಟ್ಟರು. ಅಪ್ಪು ಭಾವಚಿತ್ರಕ್ಕೆ ಪುಷ್ಪ ನಮನ ಸಲ್ಲಿಸಿದ ರಾಮ್ ಚರಣ್ ತೇಜಾ ಭಾವುಕರಾದರು. ಅಪ್ಪು ಕುಟುಂಬಸ್ಥರೊಂದಿಗೆ ರಾಮ್ ಚರಣ್ ಕೆಲ ಕಾಲ ಮಾತನಾಡಿದರು. ಬಳಿಕ ಶಿವರಾಜ್ ರಾಜ್‌ಕುಮಾರ್ ಮನೆಗೂ ರಾಮ್ ಚರಣ್ ಭೇಟಿ ನೀಡಿದರು. ರಾಮ್ ಚರಣ್ ತೇಜಾ ಹೇಳಿದ್ದೇನು? ‘’ಪುನೀತ್ ರಾಜ್‌ಕುಮಾರ್ ಅವರ ನಿಧನದಿಂದ ಚಿತ್ರರಂಗಕ್ಕೆ ತುಂಬಲಾರದ ನಷ್ಟ ಉಂಟಾಗಿದೆ. ಸ್ವಂತ ಕುಟುಂಬದ ಸದಸ್ಯರು ತೀರಿಕೊಂಡಿದ್ದರೆ ಹೇಗೆ ಅನಿಸುತ್ತಿತ್ತೋ, ಅಷ್ಟೇ ನೋವು ನಮಗೂ ಆಗಿದೆ. ಪುನೀತ್ ಇನ್ನಿಲ್ಲ ಎಂಬುದನ್ನ ನನಗೆ ಅರಗಿಸಿಕೊಳ್ಳೋಕೆ ಸಾಧ್ಯವಾಗುತ್ತಿಲ್ಲ. ನನಗೆ ಮಾತು ಕೂಡ ಬರುತ್ತಿಲ್ಲ. ವಾಸ್ತವ ಏನು? ನಡೆದಿದ್ಯಾ.. ಇಲ್ವಾ.. ಅನ್ನೋದು ನನಗೆ ಅರ್ಥವೇ ಆಗುತ್ತಿಲ್ಲ. ನಮ್ಮ ಮನೆಗೆ ಬಂದಾಗೆಲ್ಲಾ ಅವರು ತುಂಬಾ ಆತ್ಮೀಯವಾಗಿ ಇರುತ್ತಿದ್ದರು. ಮಾನವೀಯ ಮೌಲ್ಯಗಳು ಪುನೀತ್‌ರಲ್ಲಿ ತುಂಬಾ ಇತ್ತು. ಪುನೀತ್ ಅವರೇ ನೀವೆಲ್ಲೇ ಇದ್ದರೂ ವೀ ಲವ್ ಯೂ. ವೀ ಮಿಸ್ ಹಿಮ್’’ ಎಂದರು ರಾಮ್ ಚರಣ್ ತೇಜಾ. ಶಿವರಾಜ್‌ಕುಮಾರ್ ಹೇಳಿದ್ದೇನು? ತಮ್ಮ ನಿವಾಸಕ್ಕೆ ರಾಮ್ ಚರಣ್ ತೇಜಾ ಭೇಟಿ ಕೊಟ್ಟ ಬಳಿಕ ನಟ ಶಿವರಾಜ್ ಕುಮಾರ್ ಕೂಡ ಮಧ್ಯಮಗಳ ಜೊತೆಗೆ ಮಾತನಾಡಿದರು. ‘’ಮೊನ್ನೆ ಶಿವಕಾರ್ತಿಕೇಯನ್ ಅವರು ಬಂದಿದ್ದರು. ನಾಗಾರ್ಜುನ ಬಂದಿದ್ದರು. ಇವತ್ತು ನಕೀರನ್ ಗೋಪಾಲ್ ಮತ್ತು ರಾಮ್ ಚರಣ್ ತೇಜಾ ಬಂದಿದ್ದರು. ಸಾಕಷ್ಟು ಗಣ್ಯರು ಬರುತ್ತಿದ್ದಾರೆ. ದುಃಖವನ್ನು ನಮ್ಮ ಜೊತೆಗೆ ಹಂಚಿಕೊಳ್ಳುತ್ತಿದ್ದಾರೆ. ಆ ಪ್ರೀತಿಯನ್ನ ಅಪ್ಪು ಗಳಿಸಿಕೊಂಡಿದ್ದಾರೆ. ಅಪ್ಪು ಇಲ್ಲ ಅಂತ ಹೇಳೋಕೆ ಮನಸ್ಸಿಗೆ ತುಂಬಾ ಕಷ್ಟ ಆಗುತ್ತದೆ. ಹೇಗೆ ಇದೆಲ್ಲಾ ಆಯ್ತು ಅಂತ ಎಲ್ಲರೂ ಕೇಳುತ್ತಾರೆ. ನಮಗೂ ಅದೇ ಪ್ರಶ್ನೆ ಕಾಡುತ್ತಿದೆ. ಈ ನೋವಿನಿಂದ ನಾವು ಯಾವಾಗ ಸುಧಾರಿಸಿಕೊಳ್ಳುತ್ತೇವೆ ಅನ್ನೋದು ನಮಗೇ ಗೊತ್ತಿಲ್ಲ. ಊಟ ಮಾಡಬಹುದು, ಮಲಗಬಹುದು ಆದರೆ ಮನಸ್ಸಿನಲ್ಲಿ ನೋವಂತೂ ಕಾಡುತ್ತಲೇ ಇರುತ್ತದೆ’’ ಎಂದು ದುಃಖದಲ್ಲೇ ನಟ ಶಿವರಾಜ್ ಕುಮಾರ್ ಹೇಳಿದರು.