Ganavi Laxman: 'ಮಗಳು ಜಾನಕಿ' ಖ್ಯಾತಿಯ ಗಾನವಿ ಲಕ್ಷ್ಮಣ್‌ಗೆ ಬಂಪರ್ ಚಾನ್ಸ್‌!
'ಮಗಳು ಜಾನಕಿ' ಧಾರಾವಾಹಿಯಿಂದ ಭಾರಿ ಖ್ಯಾತಿ ಪಡೆದ ನಟಿ ಗಾನವಿ ಲಕ್ಷ್ಮಣ್ ಅವರು ರಿಷಬ್ ಶೆಟ್ಟಿ ನಟನೆಯ 'ಹೀರೋ' ಚಿತ್ರದಿಂದ ನಾಯಕಿಯಾದರು. ಈಗ ಅವರಿಗೆ ಮತ್ತೊಂದು ಭರ್ಜರಿ ಅವಕಾಶವೊಂದು ಒಲಿದುಬಂದಿದೆ.
Admin
0
5
'ಮಗಳು ಜಾನಕಿ' ಧಾರಾವಾಹಿಯಿಂದ ಖ್ಯಾತಿ ಪಡೆದವರು ನಟಿ ಗಾನವಿ ಲಕ್ಷ್ಮಣ್. ಧಾರಾವಾಹಿಯಿಂದ ಮನೆಮಾತಾದ ಅವರು ನಂತರ ಸ್ಯಾಂಡಲ್‌ವುಡ್‌ಗೂ ಪ್ರವೇಶ ಮಾಡಿದರು. ರಿಷಬ್ ಶೆಟ್ಟಿ ನಾಯಕರಾಗಿ ಕಾಣಿಸಿಕೊಂಡಿದ್ದ 'ಹೀರೋ' ಸಿನಿಮಾಗೆ ಹೀರೋಯಿನ್ ಆಗಿದ್ದರು. ಆ ಮೂಲಕ ಬೆಳ್ಳಿತೆರೆಗೂ ಕಾಲಿಟ್ಟರು. 'ಹೀರೋ' ನಂತರ ಇದೀಗ ಗಾನವಿ ಲಕ್ಷ್ಮಣ್‌ಗೆ ಭರ್ಜರಿ ಅವಕಾಶವೊಂದು ಹುಡುಕಿಕೊಂಡು ಬಂದಿದೆ. ಏನದು ಅಂತೀರಾ? ಗಾನವಿ ಈಗ 'ಸೆಂಚುರಿ ಸ್ಟಾರ್' ಶಿವರಾಜ್‌ಕುಮಾರ್ ಅಭಿನಯದ 'ವೇದ' ಸಿನಿಮಾಕ್ಕೆ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಆ ಮೂಲಕ ತಮ್ಮ ಕರಿಯರ್‌ನ ಮೊದಲ ಬಿಗ್ ಬಜೆಟ್ ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ಶಿವಣ್ಣನ ಹೋಮ್ ಬ್ಯಾನರ್‌ನ ಸಿನಿಮಾವಿದು'ವೇದ' ಚಿತ್ರವು ಶಿವರಾಜ್‌ಕುಮಾರ್ ಅಭಿನಯದ 125ನೇ ಚಿತ್ರವಾಗಿದೆ. ಇದರ ನಿರ್ಮಾಣದ ಹೊಣೆಯನ್ನು ಮೊದಲ ಬಾರಿಗೆ ಗೀತಾ ಶಿವರಾಜ್‌ಕುಮಾರ್ ವಹಿಸಿಕೊಂಡಿದ್ದಾರೆ. ಎಲ್ಲ ಅಂದುಕೊಂಡಂತೆಯೇ ಆಗಿದ್ದರೆ, ನವೆಂಬರ್‌ನಲ್ಲಿ ಈ ಸಿನಿಮಾ ಟೇಕ್ ಆಫ್‌ ಆಗಬೇಕಿತ್ತು. ಆದರೆ, ಪುನೀತ್ ರಾಜ್‌ಕುಮಾರ್ ಅವರ ನಿಧನದಿಂದ ಶೂಟಿಂಗ್ ಅನ್ನು ಮುಂದಕ್ಕೆ ಹಾಕಿಕೊಂಡಿತ್ತು ಚಿತ್ರತಂಡ. ಡಿ.6ರಂದು ಚಿತ್ರೀಕರಣಕ್ಕೆ ಚಾಲನೆ ನೀಡಲಾಗಿದೆ. ಇದೀಗ ಈ ಸಿನಿಮಾಕ್ಕೆ ನಾಯಕಿಯಾಗಿ ಗಾನವಿ ಲಕ್ಷ್ಮಣ್ ಆಯ್ಕೆ ಆಗಿದ್ದಾರೆ.
ಗಾನವಿ ಆಯ್ಕೆ ಬಗ್ಗೆ ಪ್ರತಿಕ್ರಿಯೆ ನೀಡುವ ನಿರ್ದೇಶಕ ಹರ್ಷ, 'ಗಾನವಿ ನಮ್ಮ ಸಿನಿಮಾಕ್ಕೆ ಆಯ್ಕೆ ಆಗಿರುವುದಕ್ಕೆ ಖುಷಿಯಿದೆ. 'ಹೀರೋ' ಸಿನಿಮಾದಲ್ಲಿನ ಅವರ ನಟನೆ ಕಂಡು ತುಂಬ ಇಂಪ್ರೆಸ್ ಆಗಿದ್ದೆ. ನಮ್ಮ ಸಿನಿಮಾಕ್ಕೆ ಅವರೇ ಸರಿಯಾದ ಆಯ್ಕೆ ಎನಿಸಿತು. ಅವರು ನಿಜಕ್ಕೂ ತುಂಬ ಒಳ್ಳೆಯ ನಟಿ' ಎಂದಿದ್ದಾರೆ. ಶಿವಣ್ಣ, ಗಾನವಿ ಜೊತೆಗೆ ಉಮಾಶ್ರೀ, ಅರುಣ್ ಸಾಗರ್ ಪುತ್ರಿ ಅದಿತಿ ಸಾಗರ್ ಕೂಡ ಈ ಚಿತ್ರದಲ್ಲಿ ಬಣ್ಣ ಹಚ್ಚಲಿದ್ದಾರೆ. 'ಭಜರಂಗಿ', 'ವಜ್ರಕಾಯ', 'ಭಜರಂಗಿ 2' ನಂತರ ನಿರ್ದೇಶಕ ಹರ್ಷ ಮತ್ತು ಶಿವಣ್ಣ ಜೊತೆಯಾಗಿ ಮಾಡುತ್ತಿರುವ 4ನೇ ಸಿನಿಮಾ ಇದಾಗಿದೆ.
ಇನ್ನು ಚಿತ್ರಕ್ಕಾಗಿ ಭರ್ಜರಿ ಸೆಟ್‌ವೊಂದನ್ನು ಹಾಕಲಾಗಿದೆ. 'ಹಳ್ಳಿ ಥೀಮ್‌ನ ಸೆಟ್‌ ಅನ್ನು ಹಾಕಲಾಗಿದೆ. ಇಡೀ ಕಥೆ 1960ರ ಕಾಲಘಟ್ಟದಲ್ಲಿ ಸಾಗುತ್ತದೆ. ಮೊದಲ ಹಂತದ ಚಿತ್ರೀಕರಣ 15 ದಿನ ನಡೆಯಲಿದೆ' ಎಂದು ಮಾಹಿತಿ ನೀಡುತ್ತಾರೆ ಹರ್ಷ. ಈ ಹಿಂದೆ 'ಭಜರಂಗಿ 2' ಸಿನಿಮಾಕ್ಕೆ ಕೆಲಸ ಮಾಡಿದ ಸಂಗೀತ ನಿರ್ದೇಶಕ ಅರ್ಜುನ್ ಜನ್ಯ, ಸಂಕಲನಕಾರ ದೀಪು ಎಸ್‌. ಕುಮಾರ್, ಕಲಾ ನಿರ್ದೇಶಕ ರವಿ ಸಂತೆಹಕ್ಲು, ವಸ್ತ್ರ ವಿನ್ಯಾಸಕ ಯೋಗಿ ಜಿ. ರಾಜ್, ಸಂಭಾಷಣೆಕಾರ ರಘು ನಿಡುವಳ್ಳಿ 'ವೇದ' ಚಿತ್ರಕ್ಕೆ ಕೆಲಸ ಮಾಡಲಿದ್ದಾರೆ. ಲಕ್ಕಿ ಗೋಪಾಲ್ ಕಾರ್ಯಕಾರಿ ನಿರ್ಮಾಪಕರಾಗಿ ಕಾರ್ಯನಿರ್ವಹಿಸಲಿದ್ದಾರೆ.
