3 ಕಾಲಘಟ್ಟಗಳನ್ನು ಒಳಗೊಂಡ ರಮೇಶ್ ಅರವಿಂದ್ ನಟನೆಯ 'ಶಿವಾಜಿ ಸುರತ್ಕಲ್ 2' ಸಿನಿಮಾ ಕಥೆ ಏನು?
ನಟ ರಮೇಶ್ ಅರವಿಂದ್, ಮೇಘನಾ ಗಾಂವ್ಕರ್ ನಟನೆಯ 'ಶಿವಾಜಿ ಸುರತ್ಕಲ್ 2' ಸಿನಿಮಾದ ಹೊಸ ಲುಕ್ ಶಿವರಾತ್ರಿ ದಿನ ರಿಲೀಸ್ ಆಗಲಿದೆ. ಈ ಕುರಿತು ಚಿತ್ರತಂಡ ಮಾಹಿತಿ ನೀಡಿದೆ. ಈಗ ಎಲ್ಲೆಲ್ಲಿ ಶೂಟಿಂಗ್ ನಡೆಸಲಾಗಿದೆ? ಎಂಬ ಬಗ್ಗೆಯೂ ಮಾಹಿತಿ ನೀಡಿದ್ದಾರೆ.
Admin
0
1
(ಹರೀಶ್‌ ಬಸವರಾಜ್‌)
'ಶಿವಾಜಿ ಸುರತ್ಕಲ್' ( ) ಸಿನಿಮಾ ಮೂಲಕ 2020ರಲ್ಲಿ ಸದ್ದು ಮಾಡಿದ್ದ ನಟ ರಮೇಶ್ ಅರವಿಂದ್ ಮತ್ತು ನಿರ್ದೇಶಕ ಆಕಾಶ್‌ ಶ್ರೀವತ್ಸ ಈ ಚಿತ್ರದ ಮುಂದುವರಿದ ಭಾಗದ ಚಿತ್ರೀಕರಣದಲ್ಲಿ ತೊಡಗಿಕೊಂಡಿದ್ದಾರೆ. ಈ ಬಾರಿ ಶಿವಾಜಿ ಮತ್ತೊಂದು ಕೇಸ್‌ ಮೂಲಕ ಬರಲಿದ್ದಾರೆ. ಈ ಸಿನಿಮಾದ ಚಿತ್ರೀಕರಣ ಇತ್ತೀಚೆಗೆ ಗೋಕರ್ಣ, ಸುರತ್ಕಲ್ ಸೇರಿದಂತೆ ಹಲವು ಕಡೆಗಳಲ್ಲಿ ನಡೆದಿದ್ದು, ಶಿವರಾತ್ರಿ ಪ್ರಯುಕ್ತ ಚಿತ್ರತಂಡ ರಮೇಶ್ ( ) ಅವರ ಹೊಸ ಲುಕ್ ಅನ್ನು ಇಂದು ರಿವೀಲ್‌ ಮಾಡುತ್ತಿದೆ. ಕಳೆದ ಬಾರಿ ಬರೀ ಕೇಸ್‌ ಸುತ್ತ ಕಥೆ ಹೆಣೆದಿದ್ದ ನಿರ್ದೇಶಕರು ಈ ಬಾರಿ ಶಿವಾಜಿಯವರ ವೈಯಕ್ತಿಕ ಜೀವನದ ಬಗ್ಗೆಯೂ ತೋರಿಸಲಿದ್ದಾರೆ.
ಈ ಸಿನಿಮಾ ಮೂರು ಕಾಲಘಟ್ಟಗಳನ್ನು ಒಳಗೊಂಡಿದೆ. ಶಿವಾಜಿ, ಅವರ ತಂದೆ ಮತ್ತು ಶಿವಾಜಿ ಪುತ್ರಿಯ ಪಾತ್ರಗಳು ಪ್ರಮುಖವಾಗಿರಲಿವೆ. ‘ಈ ಬಾರಿ ಶಿವಾಜಿಯವರ ಖಾಸಗಿ ಜೀವನವನ್ನು ಮತ್ತಷ್ಟು ಹತ್ತಿರದಿಂದ ತೋರಿಸುತ್ತೇವೆ. ಚಿತ್ರ ಮೂರು ತಲೆಮಾರುಗಳನ್ನೂ ಒಟ್ಟಿಗೆ ತರಲಿದೆ. ಶಿವಾಜಿಯವರ ತಂದೆ ವಿಜೇಂದ್ರ ಸುರತ್ಕಲ್ ಮೊದಲ ಬಾರಿಗೆ ಈ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಆ ಪಾತ್ರವನ್ನು ಹಿರಿಯ ನಟ ನಾಸರ್‌ ಅಭಿನಯಿಸುತ್ತಿದ್ದಾರೆ. ಶಿವಾಜಿಯ ಮಗಳಾದ ಸಿರಿ ಸುರತ್ಕಲ್ ಕೂಡ ಬರುತ್ತಾರೆ. ಆ ಮುದ್ದು ಮಗಳು ಶಿವಾಜಿಗೆ ಸಿಕ್ಕಿದ್ದೆಲ್ಲಿ, ಭಾಗ -1ರಲ್ಲಿಈ ಮಗಳು ಯಾಕೆ ಇರಲಿಲ್ಲ ಎಂಬ ವಿವರಗಳಿಗೆ ಸಿನಿಮಾವನ್ನೇ ನೋಡಬೇಕು. ಈ ಪಾತ್ರವನ್ನು ಆರಾಧ್ಯ ಎಂಬ ಬಾಲ ನಟಿ ನಿರ್ವಹಿಸುತ್ತಿದ್ದಾರೆ’ ಎಂದು ಹೇಳಿದ್ದಾರೆ ನಿರ್ದೇಶಕ ಆಕಾಶ್‌ ಶ್ರೀವತ್ಸ.
‘ಶಿವಾಜಿ ಸುರತ್ಕಲ್, ದಿ ಮಿಸ್ಟೀರಿಯಸ್‌ ಕೇಸ್‌ ಆಫ್‌ ಮಾಯಾವಿ’ ( ) ಎಂಬ ಶೀರ್ಷಿಕೆಯ ಈ ಸಿನಿಮಾದಲ್ಲಿ ಮಾಯಾವಿ ಯಾರು, ಶಿವಾಜಿ ತನಗೆ ಎದುರಾದ ಮತ್ತೊಂದು ವಿಚಿತ್ರ ಪ್ರಕರಣವನ್ನು ಹೇಗೆ ಪರಿಹರಿಸುತ್ತಾರೆ ಎಂಬುದೇ ಸಿನಿಮಾದ ಮೂಲ ಕಥೆ. ಈಗಾಗಲೇ ನಾವು 21 ದಿನಗಳ ಚಿತ್ರೀಕರಣ ಮುಗಿಸಿದ್ದೇವೆ. ಅದ್ಭುತವಾದ ದೃಶ್ಯಗಳನ್ನು ಈ ಬಾರಿಯ ಶೆಡ್ಯೂಲ್‌ನಲ್ಲಿ ಚಿತ್ರೀಕರಿಸಲಾಗಿದ್ದು, ಹಿರಿಯ ನಟರಾದ ಶೋಭರಾಜ್‌, ಶ್ರೀನಿವಾಸ ಪ್ರಭು ಮತ್ತು ನವನಟ ಸುಮಂತ್‌ ಭಟ್‌ ಸಹ ಹಿಂದಿನ ಶೆಡ್ಯೂಲ್‌ನಲ್ಲಿ ಭಾಗವಹಿಸಿದ್ದರು’ ಎಂದು ಮಾಹಿತಿ ನೀಡಿದ್ದಾರೆ ಆಕಾಶ್‌.
ಈ ಚಿತ್ರದ ಮುಂದಿನ ಚಿತ್ರೀಕರಣ ಬೆಂಗಳೂರಿನಲ್ಲಿ ನಡೆಯಲಿದೆ. ಮೇಘನಾ ಗಾಂವ್ಕರ್ ( ) ಡಿಸಿಪಿ ದೀಪಾ ಕಾಮತ್‌ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಸೃಷ್ಟಿ ಶೆಟ್ಟಿ ಹಾಗೂ ಮಧುರಾ ಗೌಡ ಈ ಚಿತ್ರದಿಂದ ಚಿತ್ರರಂಗಕ್ಕೆ ಪರಿಚಯಗೊಳ್ಳುತ್ತಿದ್ದಾರೆ. ದಕ್ಷಿಣ ಭಾರತದ ಖ್ಯಾತ ಸಿನಿಮಾಟೋಗ್ರಾಫರ್‌ ಮಧು ಅಂಬಟ್‌ ಅವರ ಪುತ್ರ ದರ್ಶನ್‌ ಅಂಬಟ್‌ ಈ ಚಿತ್ರಕ್ಕೆ ಸಿನಿಮಾಟೋಗ್ರಾಫರ್‌ ಆಗಿದ್ದಾರೆ. ದರ್ಶನ್‌ ಈಗಾಗಲೇ ತೆಲುಗು, ಮಲಯಾಳಂ ಸಿನಿಮಾಗಳಿಗೆ ಸಿನಿಮಾಟೋಗ್ರಫಿ ಮಾಡಿದ್ದಾರೆ.
