22 ಮಿ. ಡಾಲರ್‌ ಮೊತ್ತದ ಕ್ರಿಪ್ಟೋ ಕರೆನ್ಸಿ ಹಗರಣ ಬಯಲಿಗೆಳೆದ ಬ್ರಿಟನ್‌ ಪೊಲೀಸರು, ವಿಶ್ವದೆಲ್ಲೆಡೆ ಸಂತ್ರಸ್ತರು!

ಜಾಗತಿಕ ಮಟ್ಟದ ಹಗರಣ ಭೇದಿಸಿರುವ ಪೊಲೀಸರು 22.2 ಮಿಲಿಯನ್‌ ಡಾಲರ್‌ (165 ಕೋಟಿ ರೂ.) ಮೊತ್ತದ ಕ್ರಿಪ್ಟೋ ಕರೆನ್ಸಿಯನ್ನು ವಶಕ್ಕೆ ಪಡೆದಿದ್ದಾರೆ. ಪೊಲೀಸರು ದೊಡ್ಡ ಪ್ರಮಾಣದ ಎಥೆರಿಯಂಗಳಿದ್ದ ಯುಎಸ್‌ಬಿ ಸ್ಟಿಕ್‌ಗಳನ್ನು ವಶಕ್ಕೆ ಪಡೆದಿದ್ದಾರೆ. ವಿಶ್ವದ ಜನಪ್ರಿಯ ಕ್ರಿಪ್ಟೋ ಕರೆನ್ಸಿಯಾಗಿದ್ದು, ಬಿಟ್‌ಕಾಯಿನ್‌ ನಂತರದ ಸ್ಥಾನದಲ್ಲಿದೆ. ಈ ಹಗರಣದ ಮೂಲಕ ಬ್ರಿಟನ್‌, ಅಮೆರಿಕಾ, ಯುರೋಪ್‌, ಚೀನಾ, ಆಸ್ಟ್ರೇಲಿಯಾ ಮತ್ತು ಹಾಂಕಾಂಗ್‌ನ ಗ್ರಾಹಕರಿಗೆ ವಂಚನೆ ಎಸಗಲಾಗಿದೆ ಎಂದು ಗ್ರೇಟರ್‌ ಮ್ಯಾಂಚೆಸ್ಟರ್‌ ಪೊಲೀಸರು (ಜಿಎಂಪಿ) ತಿಳಿಸಿದ್ದಾರೆ. ಸಂತ್ರಸ್ತರು ಹಣವನ್ನು ಠೇವಣಿ ಮಾಡಿದ್ದರು, ಕೆಲವರು ತಮ್ಮ ಜೀವಮಾನದ ಸಂಪಾದನೆಯನ್ನು ಹೂಡಿಕೆ ಮಾಡಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ. ಇವೆಲ್ಲ ಬೈನಾನ್ಸ್ ಸ್ಮಾರ್ಟ್ ಚೈನ್ ಬಳಸಿಕೊಂಡಿರುವ ನಿಜವಾದ ಉಳಿತಾಯ ಮತ್ತು ವ್ಯಾಪಾರ ಸೇವೆ ಎಂದು ನಂಬಿ ಇವರು ಹೂಡಿಕೆ ಮಾಡಿದ್ದರು. ಈ ವಂಚನೆಯನ್ನು ಪತ್ತೆ ಹಚ್ಚುವುದರೊಂದಿಗೆ ವರ್ಚುವಲ್‌ ಕರೆನ್ಸಿಗಳ ಅನಾಮಧೇಯತೆ ಮತ್ತು ಅಂತರಾಷ್ಟ್ರೀಯ ಸ್ವರೂಪ ಮತ್ತೊಮ್ಮೆ ಗಮನ ಸೆಳೆದಿದೆ. ಅಪರಾಧಿಗಳು ಸಾಮಾನ್ಯವಾಗಿ ಅನಾಮಧೇಯತೆಯ ಲಾಭವನ್ನು ಅಕ್ರಮ ಹಣ ವರ್ಗಾವಣೆ, ಭಯೋತ್ಪಾದನೆ, ತೆರಿಗೆ ವಂಚನೆ ಮತ್ತು ಮಾದಕವಸ್ತು ಕಳ್ಳಸಾಗಣೆಗಾಗಿ ಬಳಸಿಕೊಳ್ಳುತ್ತಾರೆ. ಬಹುಪಾಲು ಕ್ರಿಪ್ಟೋ ಕರೆನ್ಸಿ ವಹಿವಾಟುಗಳು ನ್ಯಾಯಸಮ್ಮತವಾಗಿದ್ದರೂ, ಇತ್ತೀಚೆಗೆ ಮೋಸದಾಯಕ ವಹಿವಾಟುಗಳೂ ಬೆಳಕಿಗೆ ಬರುತ್ತಿವೆ. ಈ ವಂಚನೆಯನ್ನು ಪತ್ತೆ ಹಚ್ಚಿದ ಬಳಿಕ ಪೊಲೀಸರು ಈಗ ಈ ಕ್ರಿಪ್ಟೋ ಕರೆನ್ಸಿಗಳ ನಿಜವಾದ ಮಾಲಿಕರನ್ನು ಪತ್ತೆ ಹಚ್ಚಲು ಆರಂಭಿಸಿದ್ದಾರೆ. ಇವರೆಲ್ಲ ವಿಶ್ವಾದ್ಯಂತ ಹರಡಿಕೊಂಡಿದ್ದು, ಕೆಲವರನ್ನು ಪತ್ತೆ ಹಚ್ಚುವುದು ಇನ್ನೂ ಸಾಧ್ಯವಾಗಿಲ್ಲ. ಪೊಲೀಸರಿಗೆ ಪ್ರತಿಕ್ರಿಯೆ ನೀಡಿರುವ ಕ್ರಿಪ್ಟೋ ಕರೆನ್ಸಿಗಳ ಠೇವಣಿದಾರರೊಬ್ಬರು, ನಾನು ಹಲವಾರು ವರ್ಷಗಳಿಂದ ಕ್ರಿಪ್ಟೋ ಕರೆನ್ಸಿ ಬಳಸುತ್ತಿದ್ದೇನೆ. ಆದರೆ ಈ ವಂಚನೆ ಅಚ್ಚರಿ ಉಂಟು ಮಾಡಿದೆ ಎಂದು ಹೇಳಿದ್ದಾರೆ. ಜತೆಗೆ ವಂಚನೆ ಪತ್ತೆ ಹಚ್ಚಿದ್ದಕ್ಕೆ ಪೊಲೀಸರಿಗೆ ಧನ್ಯವಾದ ಸಲ್ಲಿಸಿದ್ದಾರೆ. "ಜನರು ಆನ್‌ಲೈನ್‌ನತ್ತ ಹೆಚ್ಚು ಅವಲಂಬಿತರಾಗುತ್ತಿದ್ದು, ಕ್ರಿಪ್ಟೋ ಕರೆನ್ಸಿಯನ್ನು ಹಣ ಮತ್ತು ವ್ಯಾಪಾರದ ಭವಿಷ್ಯವೆಂದು ನೋಡುತ್ತಿದ್ದಾರೆ. ಆದರೆ ಈ ಬದಲಾವಣೆಯು ಹೊಸ ರೀತಿಯ ಅಪರಾಧಕ್ಕೆ ಕಾರಣವಾಗುತ್ತಿದೆ ಮತ್ತು ಅವಕಾಶವಾದಿ ಅಪರಾಧಿಗಳು ಈ ಪ್ರವೃತ್ತಿಗಳನ್ನು ಹಾಗೂ ತಂತ್ರಜ್ಞಾನದಲ್ಲಿನ ಲೋಪದೋಷಗಳನ್ನು ಬಳಸಿಕೊಳ್ಳಲು ನೋಡುತ್ತಿದ್ದಾರೆ. ಈ ಹೊಸ ಹೊಸ ರೀತಿಯ ಅಪರಾಧಗಳಿಗೆ ಪೊಲೀಸರು ಹೊಂದಿಕೊಳ್ಳುವ ಅಗತ್ಯವಿದೆ," ಎಂದು ಆರ್ಥಿಕ ಅಪರಾಧ ವಿಭಾಗದ ಮುಖ್ಯಸ್ಥ ಜೋ ಹ್ಯಾರೊಪ್‌ ಹೇಳಿದ್ದಾರೆ.