‘ನನ್ನನ್ನ ಕಳುಹಿಸಿ ಅವನನ್ನ ಕರೆಯಿಸಿಕೊಂಡುಬಿಡಿ ಪ್ಲೀಸ್.. ನಾನು ಇರುವುದಿಲ್ಲ’ ಎನ್ನುತ್ತಾ ಗದ್ಗದಿತರಾದ ರಾಘಣ್ಣ

ತಮ್ಮ ಕಿರಿಯ ಸಹೋದರ ಪುನೀತ್ ರಾಜ್‌ಕುಮಾರ್ ನಿಧನದ ಸುದ್ದಿ ಕೇಳಿ ತೀರಾ ನೊಂದರೂ, ದುಃಖದಲ್ಲಿದ್ದರೂ, ನೋವನ್ನು ನುಂಗಿಕೊಂಡು ಕಲ್ಲುಬಂಡೆಯಂತಿದ್ದವರು ರಾಘವೇಂದ್ರ ರಾಜ್‌ಕುಮಾರ್. ಮನಸ್ಸಿನಲ್ಲಿ ಅಗಾಧ ನೋವಿದ್ದರೂ, ಕಣ್ಣೀರು ಹಾಕದೆ ಇಷ್ಟು ದಿನಗಳನ್ನು ತಳ್ಳಿದ ರಾಘವೇಂದ್ರ ರಾಜ್‌ಕುಮಾರ್ ಇಂದು ಅಕ್ಷರಶಃ ಭಾವುಕರಾಗಿಬಿಟ್ಟರು. ‘’ನನ್ನನ್ನ ಕಳುಹಿಸಿ ಅವನನ್ನು ಕರೆಯಿಸಿಕೊಂಡುಬಿಡಿ ಪ್ಲೀಸ್.. ನಾನು ಇರುವುದಿಲ್ಲ’’ ಎನ್ನುತ್ತಾ ರಾಘಣ್ಣ ಗದ್ಗದಿತರಾದರು. ರಾಘವೇಂದ್ರ ರಾಜ್‌ಕುಮಾರ್ ಅವರ ಮಾತುಗಳನ್ನ ಕೇಳಿದ ಶಿವರಾಜ್‌ ಕುಮಾರ್ ಕೂಡ ಕಣ್ಣೀರು ಹಾಕಿದರು. ಇಂತಹ ಮನಕಲಕುವ ಸನ್ನಿವೇಶಕ್ಕೆ ಸಾಕ್ಷಿಯಾಗಿದ್ದು ‘’ ವೇದಿಕೆ. ಹೌದು, ಇಂದು ಪುನೀತ್ ರಾಜ್‌ಕುಮಾರ್ ಅವರಿಗೆ ನಮನ ಸಲ್ಲಿಸುವ ಸಲುವಾಗಿ ಕನ್ನಡ ಚಿತ್ರರಂಗದ ಕಡೆಯಿಂದ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ‘ಪುನೀತ್ ನಮನ’ ಕಾರ್ಯಕ್ರಮವನ್ನು ಹಮ್ಮಿಕೊಂಡಿತ್ತು. ಬೆಂಗಳೂರಿನ ಅರಮನೆ ಮೈದಾನದ ಗಾಯತ್ರಿ ವಿಹಾರದಲ್ಲಿ ‘ಪುನೀತ್ ನಮನ’ ಕಾರ್ಯಕ್ರಮ ನಡೆಯುತ್ತಿದೆ. ‘ಪುನೀತ್ ನಮನ’ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದ ರಾಘವೇಂದ್ರ ರಾಜ್‌ಕುಮಾರ್ ಮತ್ತು ಶಿವರಾಜ್‌ ಕುಮಾರ್ ಪ್ರೀತಿಯ ಅಪ್ಪುರನ್ನ ನೆನೆದು ಕಣ್ಣೀರಿಟ್ಟರು. ರಾಘವೇಂದ್ರ ರಾಜ್‌ಕುಮಾರ್ ಹೇಳಿದ್ದೇನು? ‘’20 ದಿನಗಳಿಂದ ನೊಂದುಕೊಂಡು, ತಡೆದುಕೊಂಡು, ನುಂಗಿಕೊಂಡು ಏನಾಯ್ತಪ್ಪಾ ಅಂತ ಮೆಲುಕು ಹಾಕಿದರೆ… ಒಬ್ಬ ತಮ್ಮ.. ನಮಗೆ ಅವನೇ ಪವರ್. ಪವರ್ ಹೋದ್ಮೇಲೆ ಬಲ್ಬ್ ಇದ್ದು ನಾವು ಏನು ಮಾಡೋಕೆ ಆಗುತ್ತೆ ಅಂತ ಅಂದುಕೊಂಡ್ವಿ. ಅವತ್ತು ಅವನು ಮಲಗಿದ್ದ. ಅವನ ಸುತ್ತ-ಮುತ್ತ ರಾಜ್ಯದ ಶಕ್ತಿ ಇತ್ತು. ಸರ್ಕಾರ, ಅಭಿಮಾನಿಗಳು, ಪೊಲೀಸರು, ಮೀಡಿಯಾ.. ಎಲ್ಲಾ ಇದ್ದರು. ಇವರನ್ನೆಲ್ಲಾ ಮೂರು ದಿನ ಪಕ್ಕದಲ್ಲೇ ಕೂರಿಸಿಕೊಂಡಿದ್ದ. ಈ ನೋವನ್ನ ಅಪ್ಪ-ಅಮ್ಮನಿಗೆ ಹೇಳೋಣ ಅಂದ್ರೆ, ಅಲ್ಲೇ ತೆಗೆದುಕೊಂಡು ಹೋಗಿ ಅವನನ್ನ ಮಲಗಿಸಿದ್ವಿ’’ ‘’ನಾನು ಶಿವಣ್ಣನನ್ನು ಫಸ್ಟ್ ನೋಡಿದೆ. ನಮಗೆ ಒಂಥರಾ ನಾಚಿಕೆ ಆಗಿಬಿಡ್ತು, ಇಬ್ಬರ ಮುಖಗಳನ್ನು ನೋಡಿಕೊಳ್ಳೋಕೆ. ನಾವಿಬ್ಬರು ಇವನನ್ನ ಕಳುಹಿಸಿಕೊಡ್ಬೇಕಾ? ಈ ತರಹದ ದಿನ ಬೇಕಾ ಅಂತ ನಾಚಿಕೆ ಆಯ್ತು. ಕನ್ನಡಿಯಲ್ಲಿ ನಮ್ಮ ಮುಖವನ್ನು ನೋಡಿಕೊಳ್ಳೋಕೆ ಬೇಜಾರು ಆಗುತ್ತೆ. ಅವನಿಂದ ಪೇಸ್ ಮೇಕರ್ ಹಾಕಿಸಿಕೊಂಡು ನಾನು ಬದುಕಬೇಕಾ ಅಂತ ಭಾರೀ ಕಷ್ಟ ಆಗುತ್ತೆ. ನನ್ನ ಜನ್ಮಕ್ಕೆ ಇಷ್ಟು ದಿನ ಇರಬೇಕಾ ಅಂತ ನಾಚಿಕೆ ಆಗುತ್ತಿದೆ ನನಗೆ. ಇದೇ ವೇದಿಕೆಯಲ್ಲಿ ರಾಜ್‌ಕುಮಾರ್ ಫಂಕ್ಷನ್‌ನಲ್ಲಿ ನನ್ನ ಆಯಸ್ಸನ್ನು ಅವನಿಗೆ ಕೊಡ್ತೀನಿ ಅಂತ ನಾನು ಹೇಳಿದ್ದೆ ಅವನಿಗೆ. ಆದರೆ, ಅವನ ಆಯಸ್ಸನ್ನು ಅವನು ನನಗೆ ಕೊಟ್ಟು ಹೋದ’’ ‘’ನೀವೆಲ್ಲಾ ಸೇರಿ ನನಗೆ ಒಂದು ಸಹಾಯ ಮಾಡಿ.. ಹೇಗಾದರೂ ಮಾಡಿ ನನ್ನನ್ನ ಕಳುಹಿಸಿ ಅವನನ್ನ ಕರೆಯಿಸಿಕೊಂಡುಬಿಡಿ ಪ್ಲೀಸ್.. ಭಾರೀ ಕಷ್ಟ ಆಗುತ್ತಿದೆ ನನಗೆ. ನಾನು ಇರುವುದಿಲ್ಲ. ಇದೊಂದು ಮಾಡಿಕೊಡಿ’’ ‘’ನಾವು ಪುನೀತ್ ಅವರನ್ನ ಹೂತಿಲ್ಲ. ಬಿತ್ತಿದ್ದೀವಿ. ಬರ್ತಾ ನನ್ನ ತಮ್ಮನಾಗಿ ಬಂದ. ಹೋಗುತ್ತಾ ನನ್ನ ತಂದೆಯಾಗಿ ಹೋಗಿಬಿಟ್ಟ. ಬಂದುಬಿಡು ನನ್ನ ಕಂದ.. ನಾನು ಹೋಗುತ್ತೇನೆ ಆ ಜಾಗಕ್ಕೆ.. ದಯವಿಟ್ಟು ಕ್ಷಮಿಸಿ.. ತುಂಬಾ ನೊಂದಿದ್ದೇನೆ. ನಾನು ನೊಂದುಕೊಂಡರೆ ಅಶ್ವಿನಿ, ಅಪ್ಪು ಮಕ್ಕಳು ನೊಂದುಕೊಳ್ಳುತ್ತಾರೆ ಅಂತ ತಡೆದಿದ್ದೆ. ಆದರೆ, ಇವತ್ತು ಆಗಲಿಲ್ಲ. ನೋವು ಮರೆಯೋಕೆ ಶಕ್ತಿ ಕೊಡು ಅಂತ ನಾನು ದೇವರಲ್ಲಿ ಕೇಳಲ್ಲ. ಈ ನೋವಿನ ಜೊತೆಗೆ ಹೋಗೋಕೆ ಶಕ್ತಿ ಕೊಡು ಅಂತ ಕೇಳುತ್ತೇನೆ’’ ಎಂದು ಕಣ್ಣೀರು ಹಾಕುತ್ತಲೇ ರಾಘವೇಂದ್ರ ರಾಜ್‌ಕುಮಾರ್ ಹೇಳಿದರು. ರಾಘಣ್ಣನ ಮಾತುಗಳನ್ನು ಕೇಳಿ ಶಿವಣ್ಣ ಕೂಡ ಕಣ್ಣೀರಿಟ್ಟರು.