ಕೋವಿಡ್‌ ನಡುವೆಯೂ ಬ್ಯಾಂಕ್‌ಗಳಿಗೆ 1 ಲಕ್ಷ ಕೋಟಿ ರೂ. ಲಾಭ!

ಮುಂಬಯಿ: ಕೋವಿಡ್‌ ಬಿಕ್ಕಟ್ಟಿನ ನಡುವೆಯೂ ಬ್ಯಾಂಕ್‌ಗಳು 2020-21ರ ಸಾಲಿನಲ್ಲಿ ದಾಖಲೆಯ 1 ಲಕ್ಷ ಕೋಟಿ ರೂ. ನಿವ್ವಳ ಗಳಿಸಿವೆ. ಸತತ 5 ವರ್ಷಗಳಿಂದ ನಷ್ಟ ದಾಖಲಿಸುತ್ತಿದ್ದ ಸಾರ್ವಜನಿಕ ಬ್ಯಾಂಕ್‌ಗಳು ಲಾಭದ ಹಳಿಗೆ ಮರಳಿವೆ. 2019-20ರಲ್ಲಿ 5,000 ಕೋಟಿ ರೂ. ನಷ್ಟವಾಗಿದ್ದರೆ, 2020ರಲ್ಲಿ1,02,252 ಕೋಟಿ ರೂ. ಲಾಭ ಗಳಿಸಿವೆ. ವಲಯಕ್ಕೆ ಕಳೆದ ವರ್ಷ ಲಭಿಸಿರುವ ಒಟ್ಟು ಲಾಭದಲ್ಲಿ ಅರ್ಧದಷ್ಟನ್ನು ಎಚ್‌ಡಿಎಫ್‌ಸಿ ಬ್ಯಾಂಕ್‌ ಮತ್ತು ತಮ್ಮದಾಗಿಸಿವೆ. ಎಚ್‌ಡಿಎಫ್‌ಸಿ ಬ್ಯಾಂಕ್‌ 31,116 ಕೋಟಿ ರೂ. ಲಾಭ ಗಳಿಸಿದ್ದರೆ, ಎಸ್‌ಬಿಐ 20,410 ಕೋಟಿ ರೂ. ಲಾಭ ಗಳಿಸಿದೆ. ಎಚ್‌ಡಿಎಫ್‌ಸಿ ಬ್ಯಾಂಕ್‌ನ ಲಾಭದಲ್ಲಿ ಶೇ.30 ಹಾಗೂ ಎಸ್‌ಬಿಐ ಲಾಭದಲ್ಲಿ ಶೇ.18 ಹೆಚ್ಚಳವಾಗಿದೆ. ಐಸಿಐಸಿಐ ಬ್ಯಾಂಕ್‌ 16,192 ಕೋಟಿ ರೂ. ಲಾಭ ಗಳಿಸಿದ್ದು, ಶೇ.20ರಷ್ಟು ಏರಿಕೆಯಾಗಿದೆ. ಸಾಲ ವಿತರಣೆಯಲ್ಲಿ ಖಾಸಗಿ ಬ್ಯಾಂಕ್‌ಗಳು ಮಾರುಕಟ್ಟೆ ಪಾಲನ್ನು ಹೆಚ್ಚಿಸಿಕೊಂಡಿದ್ದರೆ, ಪಿಎಸ್‌ಯು ಬ್ಯಾಂಕ್‌ಗಳು ಮಂದಗತಿಯಲ್ಲಿದ್ದವು. ಸಾರ್ವಜನಿಕ ಬ್ಯಾಂಕ್‌ಗಳು ಕಳೆದ 5 ವರ್ಷಗಳಲ್ಲಿ ಮೊದಲ ಬಾರಿಗೆ ಸಂಘಟಿತವಾಗಿ ನಿವ್ವಳ ಲಾಭ ಗಳಿಸಿವೆ. 12 ಪಿಎಸ್‌ಯು ಬ್ಯಾಂಕ್‌ಗಳ ಪೈಕಿ ಪಂಜಾಬ್‌ ಆ್ಯಂಡ್‌ ಸಿಂಧ್‌ ಬ್ಯಾಂಕ್‌ ಮತ್ತು ಸೆಂಟ್ರಲ್‌ ಬ್ಯಾಂಕ್‌ ಆಫ್‌ ಇಂಡಿಯಾ ನಷ್ಟಕ್ಕೀಡಾಗಿವೆ. ಖಾಸಗಿ ವಲಯದಲ್ಲಿ ಯಸ್‌ ಬ್ಯಾಂಕ್‌ ಕಳೆದ ವರ್ಷ 3,462 ಕೋಟಿ ರೂ. ನಷ್ಟಕ್ಕೀಡಾಗಿದೆ. ಹೀಗಿದ್ದರೂ ಇದಕ್ಕೂ ಹಿಂದಿನ ವರ್ಷಕ್ಕೆ ಹೋಲಿಸಿದರೆ ನಷ್ಟದ ಪ್ರಮಾಣ ತಗ್ಗಿದೆ. ಬ್ಯಾಂಕ್‌ಗಳು ಲಾಭ ಗಳಿಸಲು ಕಾರಣ ? ಸಾರ್ವಜನಿಕ ಬ್ಯಾಂಕ್‌ಗಳು 2019-20ರಲ್ಲಿ26,015 ಕೋಟಿ ರೂ. ನಷ್ಟದಲ್ಲಿದ್ದರೆ, 2020-21ರಲ್ಲಿ 31,817 ಕೋಟಿ ರೂ. ನಿವ್ವಳ ಲಾಭ ಗಳಿಸಲು ಮುಖ್ಯ ಕಾರಣ ವಸೂಲಾಗದ ಸಾಲದ ಸಮಸ್ಯೆ ಕಡಿಮೆಯಾಗುತ್ತಿರುವುದು. ಸಾಲ ವಸೂಲಾತಿಯಲ್ಲಿ ಉಂಟಾಗಿರುವ ಸುಧಾರಣೆ. ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾ 12 ದೊಡ್ಡ ಸುಸ್ತಿ ಸಾಲ ಪ್ರಕರಣಗಳನ್ನು ವರ್ಗೀಕರಿಸಿ ದಿವಾಳಿ ಪ್ರಕ್ರಿಯೆ ಕೈಗೊಳ್ಳಲು ಬ್ಯಾಂಕ್‌ಗಳ ಮೇಲೆ ಒತ್ತಡ ಹೇರಿತ್ತು. ನಂತರ 40 ಖಾತೆಗಳ ವಿರುದ್ಧ ದಿವಾಳಿ ಪ್ರಕ್ರಿಯೆ ಶುರುವಾಗಿತ್ತು. ಐಸಿಆರ್‌ಎ ರೇಟಿಂಗ್‌ ಏಜೆನ್ಸಿಯ ಪ್ರಕಾರ ಸಾರ್ವಜನಿಕ ಬ್ಯಾಂಕ್‌ಗಳು ಬಾಂಡ್‌ ವ್ಯವಹಾರದಲ್ಲಿ ಉತ್ತಮ ಲಾಭ ಗಳಿಸಿರುವುದೂ ಲಾಭ ಹೆಚ್ಚಳಕ್ಕೆ ಕಾರಣವಾಗಿದೆ. ಹೀಗಿದ್ದರೂ ಆರ್‌ಬಿಐ ಸದ್ಯಕ್ಕೆ ಬಡ್ಡಿ ದರಗಳನ್ನು ಏರಿಸುವ ಸಾಧ್ಯತೆ ಇಲ್ಲದಿರುವುದರಿಂದ 2021-22ರಲ್ಲಿ ಬ್ಯಾಂಕ್‌ಗಳಿಗೆ ಬಡ್ಡಿ ಆದಾಯ ಇಳಿಕೆಯಾಗುವ ಸಾಧ್ಯತೆಯೂ ಇದೆ ಎನ್ನುತ್ತಾರೆ ಬ್ಯಾಂಕಿಂಗ್‌ ತಜ್ಞರು.