ಬೆಳೆಗಾರರ ಕಣ್ಣಲ್ಲಿ ನೀರು ತಂದ ಮೆಣಸಿನಕಾಯಿ; ಬೆಲೆ ಸಿಗದೆ ಕಂಗಾಲಾದ ರೈತರಿಂದ ಬೆಳೆಯೇ ನಾಶ!

ಕೂಡ್ಲಿಗಿ: ಇತ್ತೀಚೆಗೆ ಸುರಿದ ಅಕಾಲಿಕ ಮಳೆಯಿಂದಾಗಿ ತಾಲೂಕಿನ ರೈತರು ಈ ಬಾರಿ ವಾಣಿಜ್ಯ ಉದ್ದೇಶದಿಂದ ಬೆಳೆಯನ್ನಾಗಿ ಬೆಳೆಯಲಾಗಿದ್ದ ಬೆಳೆದ ಮೆಣಸಿನ ಕಾಯಿಗಳನ್ನು ಸಂರಕ್ಷಿಸಿಕೊಳ್ಳಲಾಗದೇ ರೈತರ ಬದುಕು ಅಡಕತ್ತರಿಗೆ ಸಿಲುಕಿದೆ. ಅಳಿದುಳಿದ ಮೆಣಸಿನ ಕಾಯಿಗಳಿಗೆ ಮಾರುಕಟ್ಟೆಯಲ್ಲಿ ಸಮರ್ಪಕ ಬೆಲೆ ಸಿಗದ ಕಾರಣ ತಾಲೂಕಿನ ಕೆಲ ರೈತರು ತಾವು ಬೆಳೆದ ಮೆಣಸಿನ ಕಾಯಿ ಬೆಳೆ ನಾಶ ಮಾಡುತ್ತಿದ್ದಾರೆ. ಎಲ್ಲೆಲ್ಲಿ ಬೆಳೆ?ತಾಲೂಕಿನ ಈಚಲು ಬೊಮ್ಮನಹಳ್ಳಿ, ಶಿವಪುರ, ಜಂಗಮ ಸೋವೆನಹಳ್ಳಿ, ಗೊಲ್ಲರ ಹಟ್ಟಿ, ಕೆಂಗಲ ಹಟ್ಟಿ, ಕೂಡ್ಲಿಗಿ, ಗಜಾಪುರ, ಅಮರದೇವರ ಗುಡ್ಡ, ಗುಡೇಕೋಟೆ, ಶ್ರೀಕಂಠಾಪುರ, ರಾಮದುರ್ಗ ಹಾಗೂ ಇತರ ಗ್ರಾಮಗಳಲ್ಲಿ ಮೆಣಸಿನ ಕಾಯಿ ಬೆಳೆ ಬೆಳೆಯುವವರು ಹೆಚ್ಚಿದ್ದು, ಅಂದಾಜು 2690 ಹೆಕ್ಟೇರ್‌ಗೂ ಹೆಚ್ಚು ಪ್ರದೇಶದಲ್ಲಿ ಬ್ಯಾಡಗಿ, ಗುಂಟಕಲ್ಲು ಹಾಗೂ ಇತರ ತಳಿಗಳ ಮೆಣಸಿನ ಕಾಯಿ ಬೆಳೆ ಬೆಳೆದಿದ್ದು, ಇವರು ಲಾಭಕ್ಕಿಂತ ನಷ್ಟ ಮಾಡಿಕೊಂಡಿದ್ದೆ ಹೆಚ್ಚಾಗಿದೆ. ಬೆಳೆಗೆ ತಗುಲುವ ಖರ್ಚು:ಒಂದು ಎಕರೆ ಪ್ರದೇಶದಲ್ಲಿ ಮೆಣಸಿನ ಕಾಯಿ ಬೆಳೆಯಲು 2 ಕೆಜಿ ಮೆಣಸಿನ ಬೀಜಗಳನ್ನು ಉಪಯೋಗಿಸಿದ್ದಾರೆ. ಗಿಡಗಳು ಒಂದು ಹಂತಕ್ಕೆ ಬಂದಾಗ ಯಾವುದೇ ರೋಗ ಕಾಡದಂತೆ 12 ರಿಂದ 14 ಬಾರಿ ಔಷಧೋಪಚಾರ ಮಾಡಿದ್ದಾರೆ. ಇದಕ್ಕಾಗಿ ಏನಿಲ್ಲವೆಂದರೂ 50 ಸಾವಿರ ರೂ. ಖರ್ಚಾಗುತ್ತದೆ ಎಂದು ಬೆಳೆಗಾರರು ಹೇಳಿದ್ದಾರೆ. ಪರಿಹಾರ:ಈ ಬಾರಿ ಬೆಳೆ ಪರಿಹಾರ ಪಡೆಯಲು ಸ್ವತಃ ರೈತರೆ ಮುಂಗಾರು ಬೆಳೆಯ ನೋಂದಣಿ ಮಾಡಿಕೊಳ್ಳಬೇಕು ಎಂದು ಹೇಳಿದ್ದರಿಂದ ತಾಲೂಕಿನ ಬಹುತೇಕ ರೈತರ ಅರಿವಿನ ಕೊರತೆ ಅಥವಾ ಸಮೀಕ್ಷೆ ತಂಡದ ನಿರ್ಲಕ್ಷ್ಯದಿಂದ ಬಹುತೇಕ ಮೆಣಸಿನ ಗಿಡಗಳಿರುವ ಹೊಲಗಳಲ್ಲಿ ಮೆಕ್ಕೆ ಜೋಳದ ಬೆಳೆ ಇದೆ ಎಂದು ತಪ್ಪಾಗಿ ನೋಂದಣಿಯಾಗಿದೆ. ಸಂಬಂಧಿಸಿದ ಅಧಿಕಾರಿಗಳು ಇಂಥ ರೈತರ ಮೆಣಸಿನ ಕಾಯಿ ಬೆಳೆ ಪರಿಶೀಲಿಸಿ ಪರಿಹಾರ ಧನ ನೀಡಬೇಕು ಎಂದು ತಾಲೂಕಿನ ಜಂಗಮ ಸೋವೆನಹಳ್ಳಿ ಗ್ರಾಮದ ಕೆರೆಹಳ್ಳಿ ಗಣೇಶ, ಗಂಗಮ್ಮನ ಹಳ್ಳಿ ಕೊಟ್ರೇಶ, ಗೊಲ್ಲರ ಸಣ್ಣ ತಿಮ್ಮಪ್ಪ ಹಾಗೂ ಇತರರು ಮನವಿ ಮಾಡಿದ್ದಾರೆ. ತಾಲೂಕಿನಲ್ಲಿ ವರ್ಷದಿಂದ ವರ್ಷಕ್ಕೆ ಮೆಣಸಿನಕಾಯಿ ಬೆಳೆಯುವ ರೈತರು ಹೆಚ್ಚುತ್ತಿದ್ದಾರೆ. ನಾನಾ ಸಮಸ್ಯೆಗಳ ಮಧ್ಯೆಯೂ ಇವರು ಬೆಳೆಯುವ ಮೆಣಸಿನ ಕಾಯಿಗಳ ಮಾರಾಟಕ್ಕೆ ಸಮೀಪದಲ್ಲಿ ಮಾರುಕಟ್ಟೆ ಇಲ್ಲದ ಪರಿಣಾಮ ಮಾರಾಟ ಮಾಡುವುದು ಹಾಗೂ ಸಂಗ್ರಹಿಸಿ ಇಟ್ಟುಕೊಳ್ಳುವುದು ಕಷ್ಟವಾಗಿದೆ. ಬೆಳೆದ ಮೆಣಸಿನ ಕಾಯಿ ಮಾರಾಟ ಮಾಡಲು ಬಾಡಿಗೆ ವಾಹನ ಮಾಡಿಕೊಂಡು ಹಾವೇರಿ ಜಿಲ್ಲೆಯ ಬ್ಯಾಡಿಗಿಗೆ ಹೋಗುತ್ತಾರೆ. ಇಂಥ ಸಂದರ್ಭದಲ್ಲಿ ಖರ್ಚು ಹೆಚ್ಚು ಬರುತ್ತದೆ ಎಂದು ಹೇಳುವ ಬೆಳೆಗಾರರು ತಾಲೂಕು ಕೇಂದ್ರದ ಎಪಿಎಂಸಿಯಲ್ಲಿ ಮೆಣಸಿನಕಾಯಿ ಮಾರಾಟಕ್ಕೆ ಅನುಕೂಲ ಮಾಡಿಕೊಡಬೇಕು ಎಂಬ ಒತ್ತಾಯಗಳಿವೆ. ಮುಂಗಾರಿನಲ್ಲಿ ಉತ್ತಮ ಮಳೆ ಬಂದಿದ್ದರಿಂದ ಉತ್ಸುಕರಾಗಿಯೇ ಮೆಣಸಿನ ಬೀಜ ಬಿತ್ತಿದ್ದೆವು. ಆದರೆ, ಗಿಡಗಳು ಬೆಳೆಯುತ್ತಿದ್ದಂತೆ ಏನೇನೋ ರೋಗಗಳು ಕಾಡಲಾರಂಭಿಸಿದವು. ಆದರೂ ಅಳಿದುಳಿದ ಮೆಣಸಿನ ಗಿಡಗಳನ್ನು ಹಾಳು ಮಾಡಲು ಅಕಾಲಿಕ ಮಳೆ ಬಂದು ಗಿಡಗಳೆಲ್ಲಾ ಹಾಳಾಗಿ ನಮಗೆ ಮತ್ತೊಷ್ಟು ಕಷ್ಟಕೊಟ್ಟಿದೆ. ಹಾಗಾಗಿ ನಮಗೆ ಬೆಳೆಹಾನಿ ಪರಿಹಾರ ಕೊಡಬೇಕು ಎಂದು ಹೇಳುತ್ತಾರೆ ಜಂಗಮಸೋವೆನಹಳ್ಳಿಯ ಮೆಣಸಿನಕಾಯಿ ಬೆಳೆಗಾರ ಕೆಂಗಪ್ಪನವರ ತಿಪ್ಪೇಸ್ವಾಮಿ.