ಅಮೆರಿಕ ಪ್ರವಾಸ: 65 ತಾಸಿನಲ್ಲಿ 20 ಸಭೆಯಲ್ಲಿ ಪಾಲ್ಗೊಂಡ ಪ್ರಧಾನಿ ನರೇಂದ್ರ ಮೋದಿ

ಹೊಸದಿಲ್ಲಿ: ಪ್ರಧಾನಿ ಅವರು ಕೈಗೊಂಡ ಮೂರು ದಿನಗಳ ಪ್ರವಾಸ ಅಮೋಘ ಯಶಸ್ಸು ಕಂಡಿದೆ. ಒಟ್ಟು 65 ತಾಸು ಅಮೆರಿಕದಲ್ಲಿದ್ದ ಅವರು, ಈ ಅವಧಿಯಲ್ಲಿ20 ಸಭೆಗಳಲ್ಲಿ ಪಾಲ್ಗೊಂಡು ನೂರಕ್ಕೂ ಅಧಿಕ ವಿಷಯಗಳ ಕುರಿತು ಚರ್ಚೆ ಮಾಡಿದ್ದಾರೆ. ಅಮೆರಿಕಕ್ಕೆ ಹೋಗುವ ಮತ್ತು ವಾಪಸಾಗುವ ವಿಮಾನ ಪ್ರಯಾಣದ ವೇಳೆಯಲ್ಲೂ ಪ್ರಧಾನಿ ಸಭೆಗಳನ್ನು ನಡೆಸಿದರು. ಕಡತಗಳ ವಿಲೇವಾರಿ ಬಳಿಕ ಅವರು ವಿಮಾನದಲ್ಲಿ ಅಧಿಕಾರಿಗಳೊಂದಿಗೆ ಒಟ್ಟು ನಾಲ್ಕು ಸುದೀರ್ಘ ಸಭೆಗಳನ್ನು ನಡೆಸಿದರು. ದಣಿವರಿಯದ ಕೆಲಸಗಾರ ಎನಿಸಿರುವ ಮೋದಿ, ಪ್ರವಾಸ ವೇಳೆ ಊಟ ಮತ್ತು ನಿದ್ರೆ ವಿಷಯದಲ್ಲಿ ಕೂಡ ಕಟ್ಟುನಿಟ್ಟಿನ ನಿಯಮಗಳನ್ನು ಪಾಲಿಸುತ್ತಾರೆ ಎಂದು ಹಿರಿಯ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ. ಅಮೆರಿಕಕ್ಕೆ ಹೋಗುವ ಮಾರ್ಗಮಧ್ಯ ಬುಧವಾರ ವಿಮಾನದಲ್ಲಿಅಧಿಕಾರಿಗಳ ಜತೆ ಎರಡು ಸಭೆ ನಡೆಸಿದರು. ಅಮೆರಿಕದಲ್ಲಿ ಇಳಿದ ಬಳಿಕ ಹೋಟೆಲ್‌ನಲ್ಲಿ ಮೂರು ಸಭೆ ಮುಗಿಸಿದರು. ಸೆ.23ರಂದು ಒಟ್ಟು ಐದು ಸಭೆಗಳಲ್ಲಿಪಾಲ್ಗೊಂಡರು. ಮೊದಲು ಗ್ಲೋಬಲ್‌ ಸಿಇಒಗಳ ಜತೆ ಚರ್ಚೆ, ನಂತರ ಅಮೆರಿಕ ಉಪಾಧ್ಯಕ್ಷೆ ಕಮಲಾ ಹ್ಯಾರಿಸ್‌ ಭೇಟಿ, ಜಪಾನ್‌ ಪ್ರಧಾನಿ ಯೋಶಿಹಿಡೆ ಸುಗಾ ಅವರೊಂದಿಗೆ ದ್ವಿಪಕ್ಷೀಯ ಮಾತುಕತೆ, ಅದು ಮುಗಿದ ಬಳಿಕ ಆಸ್ಪ್ರೇಲಿಯಾ ಪ್ರಧಾನಿ ಸ್ಕಾಟ್‌ ಮಾರಿಸನ್‌ ಜತೆ ಸಭೆ ನಡೆಸಿದರು. ನಂತರ ಮೂರು ಆಂತರಿಕ ಸಭೆಗಳ ಅಧ್ಯಕ್ಷತೆ ಕೂಡ ವಹಿಸಿದ್ದರು. ಸೆ.24, ಪ್ರಧಾನಿ ಪ್ರವಾಸದ ಮಹತ್ವದ ದಿನವಾಗಿತ್ತು. ಅಂದು ಅಮೆರಿಕ ಅಧ್ಯಕ್ಷ ಜೋ ಬೈಡೆನ್‌ ಜತೆ ಮಾತುಕತೆ, ನಂತರ ನಡೆದ ನಾಲ್ಕು ರಾಷ್ಟ್ರಗಳ ಕ್ವಾಡ್‌ ಶೃಂಗಸಭೆಯಲ್ಲಿ ಭಾಗಿಯಾದರು. ಇದರ ಜತೆಗೆ ಅಂದೇ ನಡೆದ ಮೂರು ಆಂತರಿಕ ಸಭೆಗಳಲ್ಲೂ ಅವರು ಪಾಲ್ಗೊಂಡು ಸಲಹೆ ಸೂಚನೆ ನೀಡಿದರು. ಸೆ.25ರಂದು ಸಾಮಾನ್ಯ ಸಭೆಯನ್ನು ಉದ್ದೇಶಿಸಿ ಮಾತನಾಡಿದರು. ನಂತರ ಭಾರತಕ್ಕೆ ಮರಳುವಾಗಲೂ ವಿಮಾನದಲ್ಲಿ ಮತ್ತೆ ಅಧಿಕಾರಿಗಳ ಜತೆ ಎರಡು ಸಭೆ ನಡೆಸಿದರು. ಹತ್ತಿರಕ್ಕೆ ಸುಳಿಯದ ಆಯಾಸಅಷ್ಟೆಲ್ಲಬಿಗಿಯಾದ ವೇಳಾಪಟ್ಟಿ ಇಟ್ಟುಕೊಂಡು ಪ್ರವಾಸ ಮುಗಿಸಿದರೂ ಕೂಡ ಪ್ರಧಾನಿ ಮೋದಿ ಅವರು ಕಿಂಚಿತ್ತೂ ಆಯಾಸಗೊಂಡಿಲ್ಲ. ಬಳಲಿಕೆ ಇಲ್ಲದೇ ಎಲ್ಲಾಸಭೆಗಳಲ್ಲಿಒಂದೇ ರೀತಿಯ ಉತ್ಸಾಹದಿಂದ ಪಾಲ್ಗೊಂಡರು. ''ತಮ್ಮಲ್ಲಿಆಲಸ್ಯ ಕಾಣಿಸಬಾರದು ಎನ್ನುವ ಕಾರಣ ಅವರೇ ಖುದ್ದಾಗಿ ಪ್ರಯಾಣದ ವೇಳಾಪಟ್ಟಿ ಬಗ್ಗೆ ಮುತುವರ್ಜಿ ವಹಿಸುತ್ತಾರೆ. ಸರಣಿ ಸಭೆಗಳು ಇರುವಂತೆ ನೋಡಿಕೊಳ್ಳುತ್ತಾರೆ. ಆ ರೀತಿ ಇದ್ದಾಗ ಅವರು ಹೆಚ್ಚು ಖುಷಿಗೊಳ್ಳುತ್ತಾರೆ,'' ಎಂದು ಅಧಿಕಾರಿಗಳು ತಿಳಿಸಿದರು. ಪ್ರವಾಸ ಸಂದರ್ಭ ಸಮಯ ಮತ್ತು ಹಣದ ಉಳಿತಾಯಕ್ಕೆ ಮೋದಿ ಅವರು ಅತಿ ಹೆಚ್ಚು ಮಹತ್ವ ನೀಡುತ್ತಾರೆ. ''ಹಿಂದೆ 1990ರಲ್ಲಿಅಮೆರಿಕ ಪ್ರವಾಸ ಕೈಗೊಳ್ಳುವಾಗ ಅವರು ರಿಯಾಯಿತಿ ದರದಲ್ಲಿ ವಿಮಾನದ ಮಾಸಿಕ ಪಾಸ್‌ಗಳನ್ನು ಖರೀದಿಸುತ್ತಿದ್ದರು. ಅದರಿಂದ ತುಂಬ ಕಡಿಮೆ ದರದಲ್ಲಿ ಪ್ರಯಾಣ ಕೈಗೊಳ್ಳಲು ಅವರಿಗೆ ಸಾಧ್ಯವಾಗುತ್ತಿತ್ತು. ಬಹುತೇಕ ರಾತ್ರಿ ವೇಳೆ ಪ್ರವಾಸ ಮಾಡುತ್ತಿದ್ದರು. ದಿನವಿಡೀ ಹೆಚ್ಚಿನ ಸ್ಥಳಗಳಿಗೆ ಭೇಟಿ ನೀಡಲು ಸಾಧ್ಯವಾಗುತ್ತಿತ್ತು. ಹೋಟೆಲ್‌ಗಳಲ್ಲಿ ಉಳಿದುಕೊಳ್ಳಲು ಅವರು ಒಂದು ಪೈಸೆಯನ್ನೂ ಖರ್ಚು ಮಾಡುತ್ತಿರಲಿಲ್ಲ. ದೇಹ ಮತ್ತು ಮನಸ್ಸಿನ ಮೇಲೆ ಅವರಿಗೆ ಅದ್ಭುತವಾದ ನಿಯಂತ್ರಣ ಇದೆ. ದೇಶದಿಂದ ದೇಶಕ್ಕೆ ಬದಲಾಗುವ ಟೈಮ್‌ ಝೋನ್‌ ಆಧರಿಸಿ ಅವರು ತಮ್ಮ ದೇಹವನ್ನು ಸುಲಭವಾಗಿ ಒಗ್ಗಿಸುತ್ತಾರೆ. ವಿಮಾನದಲ್ಲಿಯೇ ತಮಗೆ ಬೇಕಾದಷ್ಟು ವಿಶ್ರಾಂತಿ ಪಡೆದು, ಇಳಿದ ತಕ್ಷಣ ವೇಳಾಪಟ್ಟಿಯ ಬೆನ್ನ ಬೀಳುತ್ತಾರೆ. ಅದು ಅವರಿಗಿರುವ ಅಪರೂಪದ ಶಕ್ತಿ,'' ಎಂದು ಪ್ರಧಾನಿ ಆಪ್ತ ಮೂಲಗಳು ಬಣ್ಣಿಸಿವೆ. ಪುರಾತನ ಕಲಾಕೃತಿಗಳು ಹಸ್ತಾಂತರಪ್ರಧಾನಿ ನರೇಂದ್ರ ಮೋದಿ ಅವರು ಅಮೆರಿಕ ಪ್ರವಾಸದಿಂದ ಅಪರೂಪದ ಕಲಾಕೃತಿಗಳು ಮತ್ತು ಪುರಾತನ ವಿಗ್ರಹಗಳೊಂದಿಗೆ ವಾಪಸಾಗಿದ್ದಾರೆ. ಹಲವು ವರ್ಷಗಳ ಅಂತರದಲ್ಲಿ ಭಾರತದಿಂದ ಕಳ್ಳತನವಾಗಿ ತಮ್ಮ ದೇಶ ಸೇರಿದ್ದ ಅಮೂಲ್ಯ 157 ಕಲಾಕೃತಿಗಳನ್ನು ಅಮೆರಿಕ ಸ್ನೇಹ ಸೌಹಾರ್ದತೆಯ ಸಂಕೇತವಾಗಿ ಹಿಂದಿರುಗಿಸಿದೆ. ಸ್ಯಾಂಡ್‌ಸ್ಟೋನ್‌ನಲ್ಲಿ ಕೆತ್ತಿದ 10ನೇ ಶತಮಾನದ ರೇವಂತ ವಿಗ್ರಹ, 12ನೇ ಶತಮಾನದ ನಟರಾಜನ ಕಂಚಿನ ಅಪರೂಪದ ಪ್ರತಿಮೆ ಇವುಗಳಲ್ಲಿಸೇರಿವೆ. ಕ್ರಿಸ್ತ ಪೂರ್ವ 2000ನೇ ಇಸ್ವಿಯ ಕಲಾಕೃತಿಯೂ ಭಾರತಕ್ಕೆ ವಾಪಸಾಗಿದೆ. ಭಾರತ-ಅಮೆರಿಕ ನಡುವೆ ನ್ಯಾಯೋಚಿತ ವಾಣಿಜ್ಯ ಮತ್ತು ಸಾಂಸ್ಕೃತಿಕ ಸಹಕಾರ ಬಲವರ್ಧನೆಯ ಒಪ್ಪಂದವಾಗಿದ್ದು, ಅದಕ್ಕೆ ಪೂರಕವಾಗಿ ಈ ಪುರಾತನ ಕಲಾಕೃತಿಗಳನ್ನು ಹಿಂದಿರುಗಿಸಲಾಗುತ್ತಿದೆ ಎಂದು ಅಮೆರಿಕ ಪುರಾತತ್ವ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.