ಶಾಸಕರ ಸಂಬಳ ಹೆಚ್ಚಿಸಲು ಮುಂದಾದ ದಿಲ್ಲಿ ಸರಕಾರ: ವಿವಿಧ ರಾಜ್ಯಗಳಲ್ಲಿ ಜನಪ್ರತಿನಿಧಿಗಳ ವೇತನ ಎಷ್ಟಿದೆ?

ಹೊಸದಿಲ್ಲಿ: ದಿಲ್ಲಿ ವಿಧಾನಸಭೆಯ ಸದಸ್ಯರ ವೇತನ ಹಾಗೂ ಭತ್ಯೆಗಳನ್ನು ಹೆಚ್ಚಿಸುವ ಪ್ರಸ್ತಾಪವೊಂದನ್ನು ದಿಲ್ಲಿ ಸಂಪುಟ ಮಂಗಳವಾರ ಚರ್ಚೆಗೆ ತೆಗೆದುಕೊಳ್ಳುವ ಸಾಧ್ಯತೆ ಇದೆ. ಕೇಂದ್ರ ಗೃಹ ಸಚಿವಾಲಯವು ಶಾಸಕರ ಪ್ರಸ್ತಾವಿತ ವೇತನ ಹೆಚ್ಚಳವನ್ನು 30,000 ರೂಪಾಯಿ ಮತ್ತು ಭತ್ಯೆಗಳನ್ನು 60,000ಕ್ಕೆ ನಿರ್ಬಂಧಿಸಿದೆ. ಇದರಿಂದ ಶಾಸಕರು ಮಾಸಿಕ ಗರಿಷ್ಠ 90,000 ರೂ ಪಡೆಯಬಹುದಾಗಿದೆ. ಪ್ರಸ್ತುತ ದಿಲ್ಲಿ ಶಾಸಕರು ತಿಂಗಳಿಗೆ 54,000 ರೂಪಾಯಿ ಮಾತ್ರ ವೇತನ ಪಡೆಯುತ್ತಿದ್ದಾರೆ. ಇದರಲ್ಲಿ 12,000 ಸಂಬಳ ಮತ್ತು 42,000 ಭತ್ಯೆ ಸೇರಿದೆ. ಮೂಲಗಳ ಪ್ರಕಾರ, ದಿಲ್ಲಿ ಸರಕಾರವು ಹಾಗೂ ಭತ್ಯೆ ಸೇರಿದಂತೆ ಪ್ರತಿ ತಿಂಗಳೂ 2.10 ಲಕ್ಷ ರೂ ವೇತನದ ಪ್ರಸ್ತಾಪ ಇರಿಸಿತ್ತು. ಆದರೆ ಇದಕ್ಕೆ ಒಪ್ಪಿಗೆ ಸೂಚಿಸಿಲ್ಲ. ಇತರೆ ರಾಜ್ಯಗಳಿಗೆ ಹೋಲಿಸಿದರೆ ದಿಲ್ಲಿ ಶಾಸಕರು ಅತಿ ಕಡಿಮೆ ಸಂಬಳ ಪಡೆಯುತ್ತಿದ್ದು, ಗರಿಷ್ಠ ಮಿತಿಯ ಸಂಬಳದ ನಿರ್ಧಾರ ಅಂತಿಮಗೊಂಡರೂ ಇದು ಕಡಿಮೆ ವೇತನವಾಗಿಯೇ ಉಳಿಯಲಿದೆ. ದಿಲ್ಲಿಯ ಜೀವನ ವೆಚ್ಚ ಅಧಿಕವಾಗಿರುವುದರಿಂದ ಸಂಬಳ ಹೆಚ್ಚಳ ಮಾಡಬೇಕೆಂದು ಸರಕಾರ ಮನವಿ ಮಾಡಿತ್ತು. 'ಬಿಜೆಪಿ ಮತ್ತು ಕಾಂಗ್ರೆಸ್ ಆಡಳಿತವಿರುವ ರಾಜ್ಯಗಳ ಶಾಸಕರು ದಿಲ್ಲಿ ಶಾಸಕರು ಪಡೆಯುವ ಒಂದೂವರೆ-ಎರಡು ಪಟ್ಟು ಹೆಚ್ಚು ವೇತನ ಪಡೆಯುತ್ತಿದ್ದಾರೆ' ಎಂದು ಮೂಲಗಳು ತಿಳಿಸಿವೆ. ಸಂಬಳ ಏರಿಕೆಯ ಪ್ರಸ್ತಾಪವು ಗೃಹ ಸಚಿವಾಲಯದ ಎದುರು ಐದು ವರ್ಷಗಳಿಂದಲೂ ಬಾಕಿ ಉಳಿದಿದೆ ಎಂದು ಹೇಳಿವೆ. ದಿಲ್ಲಿ ಶಾಸಕರ ವೇತನವು ಕಳೆದ ಹತ್ತು ವರ್ಷಗಳಿಂದ ಒಮ್ಮೆಯೂ ಏರಿಕೆಯಾಗಿಲ್ಲ. 2011ರ ನವೆಂಬರ್‌ನಲ್ಲಿ ವೇತನವನ್ನು 54,000 ರೂಪಾಯಿಗೆ ಹೆಚ್ಚಿಸಲಾಗಿತ್ತು. ಎಲ್ಲ ವಸ್ತುಗಳ ಬೆಲೆ ಏರಿಕೆ ನಿರಂತರವಾಗಿ ಹೆಚ್ಚಳವಾಗುತ್ತಿದ್ದರೂ ಸಂಬಳ ಮಾತ್ರ ಏರಿಕೆಯಾಗಿಲ್ಲ ಎಂಬ ಅಸಮಾಧಾನ ವ್ಯಕ್ತವಾಗಿದೆ. 2.10 ಲಕ್ಷ ರೂಪಾಯಿಗೆ ಹೆಚ್ಚಿಸುವ ಪ್ರಸ್ತಾಪ ತಿರಸ್ಕಾರ ಮೊದಲಿಗೆ ಅಧಿಕಾರಕ್ಕೆ ಬಂದಾಗ ವೇತನ ಪರಿಷ್ಕರಣೆಯ ಕಾರ್ಯವನ್ನು ಆರಂಭಿಸಿತ್ತು. ಶಾಸಕರ ಸಂಬಳ ಹಾಗೂ ಭತ್ಯೆಯನ್ನು ಒಟ್ಟು 2.10 ಲಕ್ಷ ರೂಪಾಯಿಗೆ ಹೆಚ್ಚಿಸುವ ಮಸೂದೆಯನ್ನು 2015ರ ಡಿಸೆಂಬರ್‌ನಲ್ಲಿ ಅಂಗೀಕರಿಸಲಾಗಿತ್ತು. ಆದರೆ ಇದಕ್ಕೆ ಲೆಫ್ಟಿನೆಂಟ್ ಗವರ್ನರ್ ಪೂರ್ವಾನುಮತಿ ಬೇಕಿತ್ತು ಎಂಬ ಕಾರಣ ನೀಡಿ ಲೆಫ್ಟಿನೆಂಟ್ ಗವರ್ನರ್ ಕಡತವನ್ನು ವಾಪಸ್ ಕಳುಹಿಸಿದ್ದರು. ಬಳಿಕ ಹೊಸದಾಗಿ ಪ್ರಸ್ತಾಪ ಸಿದ್ಧಪಡಿಸಿದ್ದ , ಅದನ್ನು ಲೆಫ್ಟಿನೆಂಟ್ ಗವರ್ನರ್‌ಗೆ ಕಳುಹಿಸಿತ್ತು. ಬಳಿಕ ಅದು ಗೃಹ ಸಚಿವಾಲಯಕ್ಕೆ ರವಾನೆಯಾಗಿತ್ತು. ಆದರೆ ಅದಕ್ಕೆ ಪ್ರತಿಕ್ರಿಯೆ ನೀಡಿದ್ದ ಗೃಹ ಸಚಿವಾಲಯ, ಗರಿಷ್ಠ 90,000ಕ್ಕೆ ವೇತನ ಏರಿಸಬಹುದೆಂದು ಮಿತಿ ಹೇರಿತ್ತು. ಪ್ರಸ್ತಾಪವು ಬಹಳ ಸುದೀರ್ಘ ಪ್ರಕ್ರಿಯೆಯನ್ನು ಹೊಂದಿದೆ. ಪ್ರಸ್ತಾಪಕ್ಕೆ ಸಂಪುಟ ಅನುಮೋದನೆ ದೊರತರೆ ಅದನ್ನು ಎಲ್‌ಜಿ (ಲೆಫ್ಟಿನೆಂಟ್ ಗವರ್ನರ್) ಅನುಮೋದನೆಗೆ ಕಳುಹಿಸಬೇಕು. ಅದನ್ನು ಹಣಕಾಸು ಮಸೂದೆಯಂತೆ ವಿಧಾನಸಭೆಯಲ್ಲಿ ಮಂಡಿಸುವ ಮುನ್ನ ಎಲ್‌ಜಿ ಅನುಮತಿ ಬೇಕು. ಹಣಕಾಸು ಮಸೂದೆಯನ್ನು ಸದನ ಅಂಗೀಕರಿಸಿ, ಅದನ್ನು ಎಲ್‌ಜಿ ಅನುಮೋದಿಸಿದ ಬಳಿಕವಷ್ಟೇ ವೇತನ ಏರಿಕೆ ಜಾರಿಗೆ ಬರುತ್ತದೆ. ಇತರೆ ರಾಜ್ಯಗಳಲ್ಲಿ ವೇತನ ಹೆಚ್ಚುಕರ್ನಾಟಕ, ತೆಲಂಗಾಣ, ಆಂಧ್ರಪ್ರದೇಶ ಮುಂತಾದ ರಾಜ್ಯಗಳಿಗೆ ಹೋಲಿಸಿದರೆ ದಿಲ್ಲಿ ಶಾಸಕರಿಗೆ ನೀಡುತ್ತಿರುವ ಸಂಬಳ ಬಹಳ ಕಡಿಮೆ ಇದೆ. ದಿಲ್ಲಿ ಶಾಸಕರ ವೇತನ ಮತ್ತು ಭತ್ಯೆಯನ್ನು ಪ್ರತಿ ತಿಂಗಳು 90,000ಕ್ಕೆ ನಿಗದಿಗೊಳಿಸಲು ಗೃಹ ಸಚಿವಾಲಯ ಅವಕಾಶ ನೀಡಿದೆ. ಇದರಲ್ಲಿ 30,000 ರೂಪಾಯಿ ಮಾಸಿಕ ಸಂಬಳ, 25,000 ರೂಪಾಯಿ ಕ್ಷೇತ್ರ ಭತ್ಯೆ, 15,000 ರೂಪಾಯಿ ಕಾರ್ಯಾಲಯ ಭತ್ಯೆ, 10,000 ರೂಪಾಯಿ ದೂರವಾಣಿ ಭತ್ಯೆ ಮತ್ತು 10,000 ರೂಪಾಯಿ ವಾಹನ ಭತ್ಯೆ ಒಳಗೊಂಡಿರುತ್ತದೆ. ಇತರೆ ಅನೇಕ ರಾಜ್ಯಗಳಲ್ಲಿ ಇನ್ನೂ ಹಲವು ಭತ್ಯೆಗಳು ಮತ್ತು ಸವಲತ್ತುಗಳು ಸಿಗುತ್ತಿದ್ದು, ದಿಲ್ಲಿಯಲ್ಲಿ ಅಂತಹ ಸೌಲಭ್ಯಗಳು ಲಭ್ಯವಿಲ್ಲ. ಮನೆ ಬಾಡಿಗೆ, ಕಚೇರಿ ಬಾಡಿಗೆ, ಸಿಬ್ಬಂದಿ ವೆಚ್ಚ, ಕಚೇರಿ ಉಪಕರಣಗಳು, ವಾಹನ, ಚಾಲಕ ಮುಂತಾದ ಅನುಕೂಲತೆಗಳು ಇತರೆ ಕೆಲವು ರಾಜ್ಯಗಳಲ್ಲಿ ಸಿಗುತ್ತಿವೆ. ಯಾವ ರಾಜ್ಯದಲ್ಲಿ ಎಷ್ಟು ವೇತನವಿದೆ?

• ತೆಲಂಗಾಣ - 2,50,000
• ಉತ್ತರಾಖಂಡ- 2,04,000
• ಗೋವಾ- 1,99,000
• ಆಂಧ್ರಪ್ರದೇಶ- 1,75,000
• ಕರ್ನಾಟಕ- 1,65,000
• ಗುಜರಾತ್- 1,50,000
• ಬಿಹಾರ- 1,35,000
• ಮಧ್ಯಪ್ರದೇಶ- 1,10,000
• ತಮಿಳುನಾಡು- 1,05,000
• ಒಡಿಶಾ- 1,00,000
• ಪಂಜಾಬ್- 84,000
• ಪಶ್ಚಿಮ ಬಂಗಾಳ- 81,800
• ಛತ್ತೀಸಗಡ- 80,000
• ಕೇರಳ- 70,000
• ದಿಲ್ಲಿ- 54,000