‘ನಮ್ಮಲ್ಲಿ ಲಸಿಕೆ ಇಲ್ಲ’ - 3ನೇ ಹಂತದ ಲಸಿಕೆ ಅಭಿಯಾನಕ್ಕೂ ಮುನ್ನ ದಿಲ್ಲಿಯ ಅಳಲು
ಮೇ 1 ರಿಂದ 18 ವರ್ಷ ಮೇಲ್ಪಟ್ಟವರಿಗೆ ಲಸಿಕೆ ನೀಡುವ ಅಭಿಯಾನ ಆರಂಭವಾಗಲಿದ್ದು, ಇದಕ್ಕೂ ಮೊದಲು ರಾಜ್ಯಗಳಲ್ಲಿ ಲಸಿಕೆ ಕೊರತೆ ಕಂಡು ಬಂದಿದೆ. ಮಹಾರಾಷ್ಟ್ರದ ಬಳಿಕ ಇದೀಗ ದಿಲ್ಲಿ ಕೂಡ ನಮ್ಮಲ್ಲಿ ಬೇಡಿಕೆಯಷ್ಟು ಲಸಿಕೆ ಇಲ್ಲ ಎಂದು ಹೇಳಿದೆ.
Admin
0
8
ಹೊಸದಿಲ್ಲಿ: 18 ವರ್ಷ ಮೇಲ್ಪಟ್ಟವರಿಗೆ ಇದೇ ಮೇ 1 ರಿಂದ ದೇಶಾದ್ಯಂತ ಲಸಿಕೆ ಅಭಿಯಾನ ಆರಂಭವಾಗಲಿದ್ದು, ಇದಕ್ಕೂ ಮುನ್ನ ನಮಲ್ಲಿ ಲಸಿಕೆ ಇಲ್ಲ ಎಂದು ಸರಕಾರ ಹೇಳಿದೆ.
ದಿಲ್ಲಿ ಸರಕಾರ ಖಾಸಗಿ ಕಂಪನಿಗಳಿಂದ ಲಸಿಕೆ ಪೂರೈಕೆಯನ್ನು ಎದುರು ನೋಡುತ್ತಿದೆ ಎಂದು ಆರೋಗ್ಯ ಸಚಿವ ಸತ್ಯೇಂದರ್‌ ಜೈನ್‌ ಹೇಳಿದ್ದು, ಲಸಿಕೆ ಬಂದ ತಕ್ಷಣ ಜನರಿಗೆ ಮಾಹಿತಿ ನೀಡಲಾಗುವುದು ಎಂದು ಹೇಳಿದ್ದಾರೆ.
“ಸದ್ಯ ನಮ್ಮ ಬಳಿ ಲಸಿಕೆ ಇಲ್ಲ. ನಾವು ಲಸಿಕೆ ಸಂಬಂಧ ಕಂಪನಿಗೆ ಮನವಿ ಮಾಡಿದ್ದೇವೆ. ಲಸಿಕೆ ಬಂದಾಗ ನಿಮಗೆ ಹೇಳುತ್ತೇವೆ,” ಎಂದು ಜೈನ್‌ ಮಾಹಿತಿ ನೀಡಿದ್ದಾರೆ. ಜತೆಗೆ ಉತ್ಪಾದಕರು ಯಾವಾಗ ಲಸಿಕೆ ಪೂರೈಸುತ್ತೇವೆ ಎಂಬುದನ್ನು ಹೇಳಿಲ್ಲ ಎಂದಿದ್ದಾರೆ.
ಸೋಮವಾರವಷ್ಟೇ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್‌, ವಿವಿಧ ಉತ್ಪಾದಕರಿಂದ 1.34 ಕೋಟಿ ಡೋಸ್‌ ಲಸಿಕೆ ಖರೀದಿಸಲು ಸರಕಾರ ಒಪ್ಪಿಗೆ ನೀಡಿದೆ ಎಂದು ಹೇಳಿದ್ದರು.
ಇತ್ತ ಮಹಾರಾಷ್ಟ್ರದಲ್ಲಿಯೂ ಬೇಡಿಕೆ ತಕ್ಕಷ್ಟು ಲಸಿಕೆ ಲಭ್ಯವಿಲ್ಲ. ಹೀಗಾಗಿ ಮೇ 1 ರಿಂದ 18 ವರ್ಷ ಮೇಲ್ಪಟ್ಟವರಿಗೆ ಲಸಿಕೆ ನೀಡದೇ ಇರಲು ಉದ್ಧವ್‌ ಠಾಕ್ರೆ ಸರಕಾರ ನಿರ್ಧರಿಸಿದೆ.
