ರಾಮನವಮಿಯಂದು ಅಯೋಧ್ಯೆ ರಾಮಲಲ್ಲಾನಿಗೆ ಸೂರ್ಯರಶ್ಮಿಯ ಅಭಿಷೇಕ!
ಉತ್ತರಪ್ರದೇಶದ ಅಯೋಧ್ಯೆಯಲ್ಲಿ ನಿರ್ಮಿಸಲಾಗುತ್ತಿರುವ ಭವ್ಯ ರಾಮಮಂದಿರದಲ್ಲಿ ಸೂರ್ಯ ಕಿರಣವು ಪ್ರತಿ ರಾಮ ನವಮಿಗೆ ಗರ್ಭಗುಡಿಯ ಮೂರ್ತಿಯ ಮೇಲೆ ಬೀಳುವಂತೆ ವಿಶೇಷ ವಿನ್ಯಾಸದಲ್ಲಿ ರೂಪಿಸಲಾಗುತ್ತಿದೆ.
Admin
0
6
ಲಖನೌ: ಉತ್ತರಪ್ರದೇಶದ ಅಯೋಧ್ಯೆಯಲ್ಲಿ ನಿರ್ಮಿಸಲಾಗುತ್ತಿರುವ ಭವ್ಯ ರಾಮಮಂದಿರದಲ್ಲಿ ಸೂರ್ಯ ಕಿರಣವು ಪ್ರತಿ ರಾಮ ನವಮಿಗೆ ಗರ್ಭಗುಡಿಯ ಮೂರ್ತಿಯ ಮೇಲೆ ಬೀಳುವಂತೆ ವಿಶೇಷ ವಿನ್ಯಾಸದಲ್ಲಿ ರೂಪಿಸಲಾಗುತ್ತಿದೆ.
''ಒಡಿಶಾದ ಕೊನಾರ್ಕ್ನಲ್ಲಿರುವ 13ನೇ ಶತಮಾನದ ಖ್ಯಾತ ಶಿಲ್ಪಶಾಸ್ತ್ರ ವಿನ್ಯಾಸ ಸೂರ್ಯ ಮಂದಿರದಂತೆಯೇ ರಾಮ ಮಂದಿರವನ್ನೂ ನಿರ್ಮಿಸಲಾಗುತ್ತಿದೆ. ವಿಜ್ಞಾನಿಗಳು, ಶಿಲ್ಪಶಾಸ್ತ್ರ ತಜ್ಞರು ಮತ್ತು ಖಗೋಳಶಾಸ್ತ್ರಜ್ಞರಿಂದ ಈ ಬಗ್ಗೆ ಸಲಹೆ ಪಡೆದು ಮುಂದುವರಿಯಲಾಗುತ್ತಿದೆ,'' ಎಂದು ಶ್ರೀ ರಾಮ ಜನ್ಮಭೂಮಿ ತೀರ್ಥಕ್ಷೇತ್ರ ಟ್ರಸ್ಟ್‌ ಸದಸ್ಯ ಕಾಮೇಶ್ವರ್‌ ಚೌಪಾಲ್‌ ತಿಳಿಸಿದ್ದಾರೆ.
''ರಾಮಲಲ್ಲಾನ ಮೇಲೆ ರಾಮ ನವಮಿಯ ಆರಂಭದ ಮುಂಜಾನೆ ಸೂರ್ಯ ಕಿರಣವು ಬೀಳಬೇಕು. ಆ ಮೂಲಕ ಮೂರ್ತಿಗೆ ಪ್ರಾಕೃತಿಕ ಚೈತನ್ಯ ಸ್ಪರ್ಶವಾಗಬೇಕು. ಈ ಬಗ್ಗೆ ವಿಶೇಷ ವಿನ್ಯಾಸ ರಚಿಸಲು ದಿಲ್ಲಿ, ಮುಂಬಯಿ ಹಾಗೂ ರೂರ್ಕಿಯ ಐಐಟಿಯಲ್ಲಿನ ತಜ್ಞರು ಮತ್ತು ರಾಷ್ಟ್ರೀಯ ಕಟ್ಟಡ ನಿರ್ಮಾಣ ಇನ್‌ಸ್ಟಿಟ್ಯೂಟ್‌ನ ಸಿವಿಲ್‌ ಇಂಜಿನಿಯರ್‌ಗಳ ತಜ್ಞರ ಸಮಿತಿಯನ್ನು ರೂಪಿಸಲಾಗಿದೆ,'' ಎಂದು ಅವರು ಹೇಳಿದ್ದಾರೆ.
ಭೂಕಂಪನದಿಂದ ರಕ್ಷಣೆ: ಮಂದಿರ ನಿರ್ಮಾಣ ಪ್ರಗತಿಯ ಬಗ್ಗೆ ಮಾಹಿತಿ ನೀಡಿರುವ ಟ್ರಸ್ಟ್‌ನ ಮತ್ತೊಬ್ಬ ಹಿರಿಯ ಸದಸ್ಯರು, ದೇವಸ್ಥಾನದ ಮೊದಲ ಹಂತದ ಅಡಿಪಾಯ ಕಾಮಗಾರಿ ಪೂರ್ಣಗೊಂಡಿದೆ. 2023ರ ಡಿಸೆಂಬರ್‌ ಅಂತ್ಯಕ್ಕೆ ಮಂದಿರ ಪೂರ್ಣವಾಗಲು ನೀಲ ನಕ್ಷೆ ಕೂಡ ಹಾಕಿಕೊಳ್ಳಲಾಗಿದೆ. ಉತ್ತರಪ್ರದೇಶದಲ್ಲಿ ಭೂಕಂಪದ ಘಟನೆಗಳು ಹೆಚ್ಚಿರುವ ಕಾರಣ, ಮಂದಿರಕ್ಕೆ ಸೂಕ್ತ ರಕ್ಷಣೆ ಸಿಗುವಂತೆ ಎಚ್ಚರಿಕೆ ವಹಿಸಲಾಗುತ್ತಿದೆ. 2022ರ ಏಪ್ರಿಲ್‌ನಿಂದ ಮಂದಿರದ ಅಡಿಪಾಯದ ಮೇಲಿನ ಕಾಮಗಾರಿಗಳು ಶುರುವಾಗಲಿವೆ ಎಂದಿದ್ದಾರೆ.
ಈ ಮುಂಚೆ ತೀರ್ಮಾನಿಸಿದ್ದಂತೆ ಎರಡು ಅಂತಸ್ತುಗಳ ಬದಲು ಪರಿಷ್ಕೃತ ವಿನ್ಯಾಸವಾಗಿ ಮಂದಿರದಲ್ಲಿ ಒಟ್ಟು ಮೂರು ಅಂತಸ್ತುಗಳನ್ನು ನಿರ್ಮಿಸಲು ಟ್ರಸ್ಟ್‌ ಮುಂದಾಗಿದೆ. ಯೋಗಾ ಕೇಂದ್ರ, ಆಡಳಿತ ಕಚೇರಿ, ಗೋಶಾಲೆ, ವಸ್ತುಸಂಗ್ರಹಾಲಯ, ಸಂಶೋಧನಾ ಕೇಂದ್ರಗಳ ವಿಶಾಲ ಕಟ್ಟಡ ತಲೆ ಎತ್ತಲಿದೆ.
ಉತ್ತರ ಪ್ರದೇಶದ ಅಯೋಧ್ಯಾ ರಾಮ ಜನ್ಮಭೂಮಿ ಮತ್ತು ಬಾಬರಿ ಮಸೀದಿ ವಿಷಯದ ವಿವಾದ ದಶಕಗಳ ಇತಿಹಾಸ ಹೊಂದಿದೆ. 1528ರಲ್ಲಿ ಇಲ್ಲಿ ಬಾಬರಿ ಮಸೀದಿ ನಿರ್ಮಾಣವಾಗಿತ್ತು ಎನ್ನುವ ವಾದ. ಆದರೆ 1885ರಿಂದ ಈ ಕುರಿತು ಕಾನೂನು ಹೋರಾಟ ನಡೆಯುತ್ತಲೇ ಇತ್ತು. 1992ರ ಡಿಸೆಂಬರ್‌ 6ರಂದು ಬಾಬ್ರಿ ಮಸೀದಿಯನ್ನು ಧ್ವಂಸ ಮಾಡಲಾಯಿತು. ನಂತರ ಭಾರತದ ಹಿಂದೂ ಮತ್ತು ಮುಸ್ಲಿಂ ಸಮುದಾಯಗಳ ನಡುವೆ ಹಲವು ಗಲಬೆಗಳಾದವು. ರಾಮ್ ಲಲ್ಲಾ ಹೆಸರಿನಲ್ಲಿ 1989 ರಲ್ಲಿ ದಾವೆ ಹೂಡಲಾಗಿತ್ತು. ಇದಕ್ಕೆ ಕೊನೆಗೂ ಮುಕ್ತಿ ಸಿಕ್ಕಿದ್ದು ನವೆಂಬರ್‌ 9, 2019ರಲ್ಲಿ. ಈಗ ಅಯೋಧ್ಯೆಯಲ್ಲಿ ರಾಮಮಂದಿರ ನಿರ್ಮಾಣಕ್ಕೆ ಚಾಲನೆ ಸಿಕ್ಕಿದ್ದು, ನಿರ್ಮಾಣ ಕಾರ್ಯ ಪ್ರಗತಿಯಲ್ಲಿದೆ.
