ರಾಜ್ಯದಲ್ಲಿ ನಿಯಂತ್ರಣಕ್ಕೆ ಬರ್ತಿಲ್ಲ ಕೊರೊನಾ ಅಬ್ಬರ.. ಸಂಪೂರ್ಣ ಲಾಕ್‌ಡೌನ್‌ ಒಂದೇ ಪರಿಹಾರ..?

: ಜನತಾ ಎಂಬ ಕಾಟಾಚಾರದ , ಕೊರೊನಾ ಮಾರಿಗೆ ರತ್ನಗಂಬಳಿ ಹಾಸಿದೆ..! ಈ ಕರ್ಫ್ಯೂವನ್ನು ಜನರು ಗಂಭೀರವಾಗಿ ಪರಿಗಣಿಸಿಯೇ ಇಲ್ಲ..! ರಾಜ್ಯಾದ್ಯಂತ 12 ದಿನಗಳ ಜನತಾ ಕರ್ಫ್ಯೂ ಎಂದು ಘೋಷಿಸಿದ್ದೇ ತಡ ಬೆಂಗಳೂರಿನಿಂದ ಹುಟ್ಟೂರಿನತ್ತ ಧಾವಿಸಿದ ಜನರು, ಅಲ್ಲಿಯೂ ಕೊರೊನಾ ಸೋಂಕನ್ನು ಹರಡಿಸಿಬಿಟ್ಟಿದ್ದಾರೆ..! ಇವೆಲ್ಲದರ ಫಲವಾಗಿ ರಾಜ್ಯದಲ್ಲಿ ಒಂದೇ ದಿನ 50 ಸಾವಿರಕ್ಕೂ ಹೆಚ್ಚು ಪ್ರಕರಣಗಳು ದಾಖಲಾಗುತ್ತಿವೆ. ಅದರಲ್ಲೂ ಬೆಂಗಳೂರು ಒಂದೇ ದಿನ 23 ಸಾವಿರ ಹೊಸ ಸೋಂಕಿತರು ಸೃಷ್ಟಿಯಾಗಿದ್ದಾರೆ. ಸಾವಿನ ಸಂಖ್ಯೆ ಕೂಡಾ ಭಾರೀ ಏರಿಕೆ ಕಾಣುತ್ತಿದೆ. ಯುವಕರೂ ಕೂಡಾ ವೈರಸ್‌ಗೆ ಸುಲಭದ ತುತ್ತಾಗುತ್ತಿದ್ದಾರೆ. ಈ ಹಂತದಲ್ಲಿ ಮತ್ತೆ ಸಂಪೂರ್ಣ ಲಾಕ್‌ಡೌನ್‌ಗೆ ಆಗ್ರಹ ಶುರುವಾಗಿದೆ. ಜೀವವೂ ಮುಖ್ಯ, ಜೀವನವೂ ಮುಖ್ಯ ಎಂಬ ಆಶಯದೊಂದಿಗೆ ಜನತಾ ಕರ್ಫ್ಯೂ ಜಾರಿಗೆ ತಂದಿತ್ತು ಸರ್ಕಾರ. ಇದರ ಅಂಗವಾಗಿ ಬೆಳಗ್ಗೆ 6 ರಿಂದ ಸಂಜೆ 6ರವರೆಗೆ ಅಂಗಡಿ-ಮುಂಗಟ್ಟು ತೆರೆಯಲು ಅವಕಾಶವಿದೆ. ಶಾಲಾ-ಕಾಲೇಜು, ಜಿಮ್, ಸಾರ್ವಜನಿಕ ಸಾರಿಗೆ.. ಹೀಗೆ ಕೆಲವೊಂದನ್ನು ಹೊರತುಪಡಿಸಿ ಮಿಕ್ಕೆಲ್ಲಾ ಚಟುವಟಿಕೆಗಳೂ ಅಬಾಧಿತವಾಗಿವೆ. ಆದ್ರೆ, ಈ ಸಡಿಲಿಕೆಯೇ ಕೋವಿಡ್‌ಗೆ ವರವಾಗಿದೆ. ಒಂದು ಹಂತದಲ್ಲಿ ಸಂಪೂರ್ಣ ಲಾಕ್‌ಡೌನ್ ವಿಧಿಸಿದರೆ ಜನರಿಗೆ ಹಣಕಾಸು ಪರಿಹಾರ ಪ್ಯಾಕೇಜ್ ನೀಡಬೇಕಾಗಬಹುದು ಎಂಬ ಆತಂಕ ಒಂದೆಡೆಯಾದರೆ, ಬೊಕ್ಕಸಕ್ಕೆ ಆದಾಯ ಕಡಿಮೆಯಾಗುವ ಹೊಡೆತ ಇನ್ನೊಂದೆಡೆ.. ಹೀಗಾಗಿ, ಸರ್ಕಾರ ಸಂಪೂರ್ಣ ಲಾಕ್‌ಡೌನ್‌ಗೆ ಒಲವು ತೋರುತ್ತಿಲ್ಲ. ಈ ಹಂತದಲ್ಲಿ ಜನರೂ ಪಾಠ ಕಲಿಯುತ್ತಿಲ್ಲ. ಕೊರೊನಾ ಮೊದಲ ಅಲೆಯಲ್ಲಿ ಇದ್ದಂತೆ ಕಂಟೈನ್‌ಮೆಂಟ್ ಝೋನ್‌ಗಳನ್ನು ಸೀಲ್‌ಡೌನ್ ಕೂಡಾ ಮಾಡುತ್ತಿಲ್ಲ. ಜನರೂ ಕೂಡಾ ಗಂಭೀರತೆ ಕಳೆದುಕೊಂಡಿದ್ದಾರೆ. ಇಷ್ಟೆಲ್ಲಾ ಸಾವು ನೋವುಗಳು ಆಗುತ್ತಿದ್ದರೂ ಯುವ ಸಮುದಾಯ ಲಸಿಕೆ ಹಾಕಿಸಿಕೊಳ್ಳಲು ನೋಂದಣಿ ಪ್ರಕ್ರಿಯೆಯನ್ನೇ ಮಾಡುತ್ತಿಲ್ಲ..! ಇನ್ನು ಬೆಳಗ್ಗೆ 6ರಿಂದ ಸಂಜೆ 6ರವರೆಗೆ ಅಗತ್ಯ ವಸ್ತುಗಳ ಖರೀದಿಗೆ ಅವಕಾಶ ನೀಡಿದ್ದರೂ, ಬೆಳಗ್ಗೆಯೇ ಮಾರುಕಟ್ಟೆಗಳಲ್ಲಿ ಜಮಾಯಿಸುತ್ತಿದ್ದಾರೆ. ಸಾಮಾಜಿಕ ಅಂತರ ಮರೆಯುತ್ತಿದ್ದಾರೆ. ಗಾಳಿಯಲ್ಲೂ ಹರಡಬಲ್ಲದು ಎಂದು ಸಾಬೀತಾಗಿರುವಾಗ, ಮನೆಯಲ್ಲಿ ಒಂಟಿಯಾಗಿದ್ದರೂ ಕೊರೊನಾ ಬರುವ ಸಾಧ್ಯತೆ ಇರುವಾಗ, ಬೀದಿಯಲ್ಲಿ ಅಡ್ಡಾಡಿದರೆ ಸುಮ್ಮನೆ ಬಿಡುತ್ತಾ..? ಅದೂ ಕೂಡಾ ಮೂಗು ಮುಚ್ಚದಂತೆ, ಕಾಟಾಚಾರಕ್ಕೆ ಮಾಸ್ಕ್ ಧರಿಸುವ ಮಂದಿಗೆ ಅಮರಿಕೊಳ್ಳದೆ ಇರುತ್ತಾ..? ನಾವು ಹೇಗೋ ನಮ್ಮ ಸಮಾಜವೂ ಹಾಗೆ.. ನಾವು ಹೇಗೋ ನಮ್ಮ ನಾಯಕರೂ ಅದೇ ರೀತಿ ಇರ್ತಾರೆ. ಕೊರೊನಾ ಮರಣ ಮೃದಂಗ ಬಾರಿಸುತ್ತಿದ್ದರೂ ಪ್ರಜೆಗಳಿಗೇ ಗಂಭೀರತೆ ಬಂದಿಲ್ಲ, ಇನ್ನು ಪ್ರಜಾಪ್ರತಿನಿಧಿಗಳಿಂದ ಮಾತ್ರ ಈ ಗಂಭೀರತೆಯನ್ನು ನಿರೀಕ್ಷೆ ಮಾಡಿದರೆ ಹೇಗೆ..? ಕೆಲವು ಜನಪ್ರತಿನಿಧಿಗಳು ಕೊರೊನಾ ಕಾಲದಲ್ಲೂ ಹಣ ಗಳಿಸುವ ಕರಾಳ ದಂಧೆ ನಡೆಸ್ತಿರುವ ಉದಾಹರಣೆಗಳ ಮಧ್ಯೆಯೇ, ಪ್ರಾಮಾಣಿಕ ಕೆಲಸಗಾರರೂ ಎದ್ದು ಕಾಣ್ತಿದ್ದಾರೆ. ಇದರ ಫಲವಾಗಿಯೇ ಸಂಪೂರ್ಣ ಲಾಕ್‌ಡೌನ್‌ ಆಗಬೇಕು ಎಂಬ ಕೂಗು ಪಕ್ಷಾತೀತವಾಗಿ ಕೇಳಿ ಬರ್ತಿದೆ. ಈ ಹಂತದಲ್ಲಿ ಸಾಮಾನ್ಯ ಜನರಾದ ನಾವು ಏನೆಲ್ಲಾ ಮುನ್ನೆಚ್ಚರಿಕೆ ಪಾಲಿಸಬೇಕು ಎಂದು ಹೊಸದಾಗಿ ಹೇಳಬೇಕಿಲ್ಲ. ಸರ್ಕಾರ, ಮಾಧ್ಯಮ, ಜನ ನಾಯಕರು, ಸೆಲಬ್ರಿಟಿಗಳು ಕಳೆದ ಒಂದು ವರ್ಷದಿಂದ ಜಾಗೃತಿ ಪಾಠ ಮಾಡುತ್ತಲೇ ಬಂದಿದ್ದಾರೆ. ಈ ಪಾಠದ ಒಂದೆರಡು ಸಾಲುಗಳನ್ನಾದ್ರೂ ಜನರು ಪಾಲನೆ ಮಾಡಲು ಆರಂಭಿಸಿದರೆ ಸಾಕು..!