ರಾಜ್ಯದಲ್ಲಿ ತಕ್ಷಣಕ್ಕೆ ಕೊರೊನಾ 3ನೇ ಅಲೆ ಅಪಾಯವಿಲ್ಲ: ಅಪೌಷ್ಠಿಕ ಮಕ್ಕಳ ಮೇಲೆ ಇರಲಿ ನಿಗಾ..

ಮಹಾಬಲೇಶ್ವರ ಕಲ್ಕಣಿ : 'ಕೋವಿಡ್‌ ಮೂರನೇ ಅಲೆ ತಕ್ಷಣವೇ ಬರುತ್ತದೆ ಎನ್ನುವ ಆತಂಕ ಬೇಡ. ಬರುವುದಿದ್ದರೂ ನವೆಂಬರ್‌ ವೇಳೆಗೆ ಬಂದೀತು' ಎನ್ನುತ್ತಾರೆ, ಮಕ್ಕಳ ತಜ್ಞ ಡಾ. ಯೋಗಾನಂದ ರೆಡ್ಡಿ. ಮೂರನೇ ಅಲೆ ಎದುರಿಸುವ ನಿಟ್ಟಿನಲ್ಲಿ ಸರಕಾರ ರಚಿಸಿರುವ ತಾಂತ್ರಿಕ ಸಮಿತಿಯ ಸದಸ್ಯರಾಗಿರುವ ಯೋಗಾನಂದ ರೆಡ್ಡಿ ಅವರ ಅಭಿಪ್ರಾಯ ಇದು. 'ಒಂದು ಅಲೆ ಇಳಿದು ಮೂರ್ನಾಲ್ಕು ತಿಂಗಳ ಬಳಿಕವೇ ಮತ್ತೊಂದು ಅಲೆ ಬರುತ್ತದೆ. ಇನ್ನೂ ಎರಡನೇ ಅಲೆಯೇ ಮುಗಿದಿಲ್ಲ. ಹೀಗಿರುವಾಗ, ತಕ್ಷಣಕ್ಕೆ ಮತ್ತೊಂದು ಅಲೆಯ ಸಾಧ್ಯತೆ ಇಲ್ಲ' ಎಂದು ವಿಜಯ ಕರ್ನಾಟಕದ ಜತೆಗೆ ಮಾತನಾಡುತ್ತಾ ಅವರು ಹೇಳಿದರು. ಕೋವಿಡ್‌ನ್ನು ಅಲೆ ರೀತಿಯಲ್ಲಿ ಬೇರ್ಪಡಿಸುವುದೂ ಕಷ್ಟ. ಅಲೆಯನ್ನು ವೈಜ್ಞಾನಿಕವಾಗಿ ದೃಢೀಕರಿಸಲು ಸರಿಯಾದ ಅಂಕಿ-ಅಂಶಗಳಿಲ್ಲ. ಯಾವುದೇ ಸರ್ವೆ ಕೂಡ ಆಗಿಲ್ಲ. ಎಲ್ಲೋ ಒಂದು ಕಡೆ ತುಸು ಹೆಚ್ಚು ಸೋಂಕಿತರು ಕಂಡುಬಂದ ಮಾತ್ರಕ್ಕೆ ಅದನ್ನು ಅಲೆ ಎನ್ನಲಾಗದು ಎಂದು ರೆಡ್ಡಿ ಹೇಳಿದರು. ಏನೇ ಆದರೂ ಇನ್ನು ಮೂರ್ನಾಲ್ಕು ವಾರದಲ್ಲಿ ಮೂರನೇ ಅಲೆಯಂತೂ ಬರುವುದೇ ಇಲ್ಲ ಎಂದು ಖಚಿತವಾಗಿ ಹೇಳಿದ್ದಾರೆ. ಯಾರಿಗೆ ಅಪಾಯ?: ಮೂರನೇ ಅಲೆ ಮಕ್ಕಳ ಮೇಲೆ ದಾಳಿ ಮಾಡುತ್ತದೆ ಎಂಬ ಮಾತಿದೆ. ಹಾಗಿದ್ದರೂ ಅದರಿಂದ ಆರೋಗ್ಯವಂತ ಮಕ್ಕಳಿಗೆ ಅಪಾಯವಿಲ್ಲ. ಡಯಾಬಿಟೀಸ್‌-1 ಹಾಗೂ ಬೇರೆ ಗಂಭೀರ ರೋಗದ ಲಕ್ಷಣಗಳಿರುವ , ಅಪೌಷ್ಟಿಕತೆಯಿಂದ ಬಳಲುವ ಮಕ್ಕಳನ್ನು ಕಾಡಬಹುದು. ಇಂತಹ ಮಕ್ಕಳಲ್ಲಿ ರೋಗ ನಿರೋಧಕ ಶಕ್ತಿ ಕಡಿಮೆ ಇರುವುದೇ ಇದಕ್ಕೆ ಕಾರಣ ಎಂದು ಆರೋಗ್ಯ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ವೈದ್ಯರ ಸಮಸ್ಯೆ ಕಾಡದು: ರಾಜ್ಯದಲ್ಲಿ 3 ಸಾವಿರಕ್ಕೂ ಹೆಚ್ಚು ಮಕ್ಕಳ ವೈದ್ಯರಿದ್ದಾರೆ. ಇದರಿಂದ ಮಕ್ಕಳ ಚಿಕಿತ್ಸೆಗೆ ವೈದ್ಯರ ಸಮಸ್ಯೆಯಾಗದು ಎನ್ನುತ್ತಾರೆ ತಾಂತ್ರಿಕ ಸಮಿತಿ ಸದಸ್ಯ ಡಾ. ಜಗದೀಶ್‌ ಚಿನ್ನಪ್ಪ.