ದೇಶದಲ್ಲಿಯೇ ಅತ್ಯಂತ ಜೀವನಯೋಗ್ಯ ರಾಜಧಾನಿ ಬೆಂಗಳೂರು: ಆರ್ಥಿಕ ಸಾಮರ್ಥ್ಯದಲ್ಲಿಯೂ ಸರಿಸಾಟಿಯಿಲ್ಲ!
ಭಾರತದಲ್ಲಿಯೇ ಅತ್ಯಂತ ಜೀವನಯೋಗ್ಯ ರಾಜ್ಯ ರಾಜಧಾನಿ ಎಂಬ ಖ್ಯಾತಿಗೆ ಬೆಂಗಳೂರು ಒಳಗಾಗಿದೆ. ಆರ್ಥಿಕ ಸಾಮರ್ಥ್ಯದಲ್ಲಿಯೂ ಇತರೆ ಎಲ್ಲ ರಾಜಧಾನಿಗಳಿಗಿಂತಲೂ ಬೆಂಗಳೂರು ಬಹಳ ಮುಂದಿದೆ ಎಂದು ಸಿಎಸ್‌ಇ ವರದಿ ತಿಳಿಸಿದೆ.
Admin
0
9
ಬೆಂಗಳೂರು: ವಿಪರೀತ ಟ್ರಾಫಿಕ್, ಹೊಗೆ, ಧೂಳು, ಜನದಟ್ಟಣೆ ಎಂದು ಜನರು ದೂಷಿಸುವ ನಗರ, ದೇಶದ ಅತ್ಯಂತ ಜೀವನಯೋಗ್ಯ ರಾಜ್ಯ ರಾಜಧಾನಿಗಳ ಪಟ್ಟಿಯಲ್ಲಿ ಮೊದಲ ಸ್ಥಾನ ಪಡೆದುಕೊಂಡಿದೆ.
ವಿಜ್ಞಾನ ಮತ್ತು ಪರಿಸರ ಕೇಂದ್ರವು ಬಿಡುಗಡೆ ಮಾಡಿರುವ 'ಈಸ್ ಆಫ್ ಲಿವಿಂಗ್ ಇಂಡೆಕ್ಸ್ 2020' ಪ್ರಕಾರ, ರಾಜ್ಯ ರಾಜಧಾನಿ ಬೆಂಗಳೂರು ಭಾರತದಲ್ಲಿಯೇ ಅತ್ಯಂತ ಎನಿಸಿಕೊಂಡಿದೆ. ಅದರ ನಂತರದ ಸ್ಥಾನದಲ್ಲಿ ನೆರೆಯ ತಮಿಳುನಾಡಿನ ಚೆನ್ನೈ ನಗರವಿದೆ. ಬಳಿಕ ಹಿಮಾಚಲ ಪ್ರದೇಶದ ರಾಜಧಾನಿ ಶಿಮ್ಲಾ, ಒಡಿಶಾ ರಾಜಧಾನಿ ಭುವನೇಶ್ವರ ಹಾಗೂ ಮಹಾರಾಷ್ಟ್ರ ರಾಜಧಾನಿ ಮುಂಬೈ ನಗರಗಳಿವೆ.
ವಿಜ್ಞಾನ ಮತ್ತು ಪರಿಸರ ಕೇಂದ್ರ ನಡೆಸಿದ ನಾಗರಿಕರ ಅಭಿಪ್ರಾಯ ಸಂಗ್ರಹದ ಸಮೀಕ್ಷೆಯಲ್ಲಿ ರಾಷ್ಟ್ರೀಯ ರಾಜಧಾನಿ ದಿಲ್ಲಿ ಆರನೇ ಸ್ಥಾನದಲ್ಲಿದೆ. ಆರ್ಥಿಕತೆ ಸಾಮರ್ಥ್ಯದಲ್ಲಿ ದಿಲ್ಲಿ ಕಳಪೆ ಸಾಧನೆ ಹೊಂದಿದೆ ಎಂದು ತಿಳಿಸಿದೆ.
ಒಟ್ಟು ಐದು ವಿಭಾಗಗಳಲ್ಲಿ ನಗರಗಳನ್ನು ಸಮೀಕ್ಷೆಗೆ ಒಳಪಡಿಸಲಾಗಿದೆ. ಅದರಲ್ಲಿ ಅತ್ಯಂತ ಜೀವನಯೋಗ್ಯ ಸೂಚ್ಯಂಕದಲ್ಲಿ ಬೆಂಗಳೂರು 66.7 ಅಂಕ ಪಡೆದು ಮೊದಲ ಸ್ಥಾನದಲ್ಲಿದೆ. ಚೆನ್ನೈ 62.61 ಅಂಕಗಳೊಂದಿಗೆ ಎರಡನೆಯ ಸ್ಥಾನದಲ್ಲಿದೆ. ಆದರೆ ಜೀವನ ಗುಣಮಟ್ಟದ ವಿಚಾರದಲ್ಲಿ 60.84 ಅಂಕಗಳೊಂದಿಗೆ ಚೆನ್ನೈ ಮೊದಲ ಸ್ಥಾನದಲ್ಲಿದ್ದರೆ, ಬೆಂಗಳೂರು 55.67 ಅಂಕಗಳನ್ನು ಪಡೆದು ಭೋಪಾಲ್ ನಂತರ ಮೂರನೇ ಸ್ಥಾನದಲ್ಲಿದೆ.
ಇನ್ನು ಆರ್ಥಿಕತೆಯ ಸಾಮರ್ಥ್ಯದಲ್ಲಿ ಬೆಂಗಳೂರು 100ಕ್ಕೆ 78.82 ಅಂಕಗಳೊಂದಿಗೆ ಪ್ರಥಮ ಸ್ಥಾನದಲ್ಲಿದೆ. ಬೇರೆ ಯಾವ ರಾಜಧಾನಿಯೂ ಬೆಂಗಳೂರಿಗೆ ಪೈಪೋಟಿ ನೀಡುವ ಮಟ್ಟಕ್ಕೆ ಇಲ್ಲ. 50.73 ಅಂಕಗಳನ್ನು ಪಡೆದಿರುವ ದಿಲ್ಲಿ ಎರಡನೆಯ ಸ್ಥಾನದಲ್ಲಿರುವುದು, ಆರ್ಥಿಕತೆ ವಿಚಾರದಲ್ಲಿ ಬೆಂಗಳೂರಿನ ನಾಗಾಲೋಟವನ್ನು ಸೂಚಿಸುತ್ತದೆ.
ಸುಸ್ಥಿರತೆಯಲ್ಲಿ ಪೈಪೋಟಿಸುಸ್ಥಿರತೆ ವಿಚಾರದಲ್ಲಿ ಅನೇಕ ನಗರಗಳು ಬೆಂಗಳೂರಿಗೆ ಪೈಪೋಟಿ ನೀಡುತ್ತಿವೆ. 69.16 ಅಂಕ ಪಡೆದಿರುವ ಶಿಮ್ಲಾ ಮೊದಲ ಸ್ಥಾನದಲ್ಲಿದ್ದರೆ, ರಾಯ್ಪುರ 63.77, ಮುಂಬಯಿ 74ರಷ್ಟು ಅಂಕಗಳನ್ನು ಪಡೆದಿವೆ. ಬೆಂಗಳೂರಿಗೆ ಸುಸ್ಥಿರತೆ ವಿಚಾರದಲ್ಲಿ ನೂರಕ್ಕೆ 59.97 ಅಂಕಗಳು ದೊರಕಿದ್ದು, ನಾಲ್ಕನೇ ಸ್ಥಾನದಲ್ಲಿದೆ. ಇನ್ನು ನಾಗರಿಕ ಗ್ರಾಹಕ ಸಮೀಕ್ಷೆಯಲ್ಲಿ ಭುವನೇಶ್ವರ 94.8 ಅಂಕಗಳನ್ನು ತನ್ನ ಖಾತೆಗೆ ಹಾಕಿಕೊಂಡಿದೆ. ಬೆಂಗಳೂರು ಈ ವಿಚಾರದಲ್ಲಿ ಬಹಳ ಹಿಂದೆ ಇದ್ದು, 78 ಅಂಕ ಗಳಿಸಿದೆ. ಬೆಂಗಳೂರಿಗಿಂತಲೂ ಜೈಪುರ, ಶಿಮ್ಲಾ, ಚೆನ್ನೈ, ಗಾಂಧಿನಗರ, ಭೋಪಾಲ್ ನಗರಗಳು ಮುಂದೆ ಇವೆ.
ಇದು ಭಾರತದ ಪರಿಸರ ಸ್ಥಿತಿ 2021ರ ಕುರಿತಾದ ಇತ್ತೀಚಿನ ಸಿಎಸ್‌ಇ ವರದಿಯ ಭಾಗವಾಗಿದೆ. ಅತ್ಯುತ್ತಮ ಆಡಳಿತದ ವಿಚಾರದಲ್ಲಿ ಭೋಪಾಲ್, ರಾಯ್ಪುರ, ಮುಂಬಯಿ ಹಾಗೂ ದಿಲ್ಲಿ ಕ್ರಮವಾಗಿ ಒಂದರಿಂದ ನಾಲ್ಕನೇ ಸ್ಥಾನ ಪಡೆದುಕೊಂಡಿವೆ.
ಆರ್ಥಿಕತೆಯಲ್ಲಿ ಬೆಂಗಳೂರು ಗ್ರೇಟ್!ಒಟ್ಟಾರೆಯಾಗಿ ಬೆಂಗಳೂರು ಅತ್ಯುತ್ತಮ ನಗರ ಎಂದೆನಿಸಿಕೊಂಡಿದೆ. ನಂತರದ ಸ್ಥಾನದಲ್ಲಿ ಚೆನ್ನೈ ಇದೆ. 'ಉತ್ತಮ ಆರ್ಥಿಕ ಸಾಮರ್ಥ್ಯವನ್ನು ಪ್ರದರ್ಶಿಸಿರುವ ಏಕೈಕ ರಾಜ್ಯ ರಾಜಧಾನಿಯೆಂದರೆ ಬೆಂಗಳೂರು. ಇದು 100ಕ್ಕೆ 78.8 ಅಂಕಗಳನ್ನು ಪಡೆದುಕೊಂಡಿದೆ. ಚೆನ್ನೈ, ಮುಂಬಯಿ, ದಿಲ್ಲಿ ಹಾಗೂ ಹೈದರಾಬಾದ್ ಆರ್ಥಿಕತೆ ವಿಚಾರದಲ್ಲಿ ಮಧ್ಯಭಾಗದಲ್ಲಿವೆ. ಉಳಿದೆಲ್ಲವೂ 30ಕ್ಕಿಂತ ಕಡಿಮೆ ಅಂಕ ಪಡೆದಿವೆ' ಎಂದು ತಿಳಿಸಿದೆ. ಈ ಸೂಚ್ಯಂಕದಲ್ಲಿ ನಾಲ್ಕು ರಾಜಧಾನಿಗಳಾದ ಡಿಸ್ಪುರ್, ದಮನ್, ಅಮರಾವತಿ ಮತ್ತು ಕೋಲ್ಕತಾ ನಗರಗಳನ್ನು ಹೆಸರಿಸಿಲ್ಲ.
