ಇ-ಕಾಮರ್ಸ್ ಕಂಪನಿಯಲ್ಲಿ ಹೂಡಿಕೆ ಸೋಗಿನಲ್ಲಿ ವಂಚನೆ: ಲಕ್ಷಾಂತರ ರೂ. ಕಳೆದುಕೊಂಡ ಯುವಕ
ಇ-ಕಾಮರ್ಸ್ ಕಂಪನಿ ಹೆಸರೇಳಿಕೊಂಡು ಕರೆ ಮಾಡಿದ ಯುವತಿಯ ಮಾತು ನಂಬಿದ ಪ್ರತೀಕ್ ಎಂಬುವರು ಲಕ್ಷಾಂತರ ರೂ. ಹಣವನ್ನು ಹೂಡಿಕೆ ಮಾಡಿ ಇದೀಗ ಕೈಗೆ ಹಣ ವಾಪಸ್ ಬಾರದೆ ಕಂಗಾಲಾಗಿದ್ದಾರೆ. ಪೊಲೀಸರ ಮೊರೆ ಹೋಗಿದ್ದಾರೆ.
Admin
0
6
: ನಗರದ ಯುವಕನೊಬ್ಬನಿಂದ ಇ-ಕಾಮರ್ಸ್ ಕಂಪನಿಯಲ್ಲಿ 2.30 ಲಕ್ಷ ರೂ. ಮಾಡಿಸಿದ್ದ ಸೈಬರ್‌ ಖದೀಮರು, ಉಡುಗೊರೆ ಕೊಡುವುದಾಗಿ ನಂಬಿಸಿ ಮತ್ತೆ 5 ಲಕ್ಷ ರೂ. ಪಡೆದು ವಂಚಿಸಿರುವುದು ಬೆಳಕಿಗೆ ಬಂದಿದೆ.
ಹೂಡಿ ನಿವಾಸಿ ಪ್ರತೀಕ್(23) ವಂಚನೆಗೊಳಗಾದ ಯುವಕ. ಈತ ನೀಡಿದ ದೂರಿನ ಆಧಾರದ ಮೇಲೆ ಮುನ್ನಿದೇವಿ ಎಂಬಾಕೆಯ ವಿರುದ್ಧ ವೈಟ್‌ಫೀಲ್ಡ್‌ ಉಪವಿಭಾಗದ ಸಿಇಎನ್‌ ಠಾಣೆ ಪೊಲೀಸರು ಎಫ್‌ಐಆರ್‌ ದಾಖಲಿಸಿ ತನಿಖೆ ಕೈಗೊಂಡಿದ್ದಾರೆ.
ಈಝಿ ಬೈ ಟೈಮ್‌ ಕಂಪನಿ ಹೆಸರಿನಲ್ಲಿ ಪ್ರತೀಕ್‌ಗೆ ಕರೆ ಮಾಡಿದ್ದ ವಂಚಕಿ, ಇ-ಕಾಮರ್ಸ್ ಕಂಪನಿಯಲ್ಲಿ ಹಣ ಹೂಡಿಕೆ ಮಾಡಿದರೆ ಉತ್ತಮ ಲಾಭಾಂಶದ ಜತೆಗೆ ಉಡುಗೊರೆ ನೀಡುವುದಾಗಿ ನಂಬಿಸಿದ್ದಾಳೆ. ಇದನ್ನು ನಂಬಿದ ಪ್ರತೀಕ್ 2.30 ಲಕ್ಷ ರೂ. ಹೂಡಿಕೆ ಮಾಡಿದ್ದಾನೆ.
ಇದಾದ ಬಳಿಕ ನಿಮಗೆ ಉಡುಗೊರೆಯಾಗಿ ಟಿವಿ ಬಂದಿದ್ದು, 6 ಸಾವಿರ ರೂ. ಪಾವತಿಸುವಂತೆ ಮುನ್ನಿದೇವಿ ಹೆಸರಿನ ವಂಚಕಿ ಸೂಚಿಸಿದ್ದಾಳೆ. ಅದನ್ನೂ ನಂಬಿದ ಪ್ರತೀಕ್ 6 ಸಾವಿರ ರೂ. ಕಳುಹಿಸಿದರೂ ಟಿವಿ ಬರಲಿಲ್ಲ. ಇದರಿಂದ ಅನುಮಾನಗೊಂಡ ಆತ ಹಣ ವಾಪಸ್ ನೀಡುವಂತೆ ಒತ್ತಾಯಿಸಿದ್ದಾನೆ.
ಆಗ ವಂಚಕಿ, 'ನೀವು ಹೂಡಿಕೆ ಮಾಡಿದ್ದ ಹಣ ದುಪ್ಪಟ್ಟಾಗಿದ್ದು, 5 ಲಕ್ಷ ರೂ. ಪಾವತಿಸಿದರೆ ಸಂಪೂರ್ಣ ಹಣ ವರ್ಗಾಯಿಸುವೆ' ಎಂಬ ಷರತ್ತು ವಿಧಿಸಿದ್ದಾಳೆ. ಇದರಿಂದ ದಿಕ್ಕು ತೋಚದಂತಾದ ಪ್ರತೀಕ್ ಸ್ನೇಹಿತರ ಬಳಿ 5 ಲಕ್ಷ ರೂ. ಸಾಲ ಪಡೆದು ಆರೋಪಿ ಸೂಚಿಸಿದ ಬ್ಯಾಂಕ್‌ ಖಾತೆಗೆ ಜಮೆ ಮಾಡಿದ್ದಾನೆ. ಆ ಬಳಿಕವೂ ಹಣ ವಾಪಸ್ ಬರಲಿಲ್ಲ. ಮೊಬೈಲ್‌ಗೆ ಕರೆ ಮಾಡಿದರೆ, ಸಂಪರ್ಕಕ್ಕೆ ಸಿಗಲಿಲ್ಲ. ಮೋಸ ಹೋಗಿರುವುದು ಗೊತ್ತಾದ ಬಳಿಕ ಸಿಇಎನ್‌ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಈ ದೂರು ಆಧರಿಸಿ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.
