ಮತ್ತೊಂದು ಛಾಪಾ ಕಾಗದ ದಂಧೆ ಬಯಲಿಗೆ: ಐವರ ವಶ, ಕಂತೆ ಕಂತೆ ಛಾಪಾ ಕಾಗದ, ಸೀಲ್‌, ಯಂತ್ರಗಳು ವಶ

ಬೆಂಗಳೂರು: ನಗರದಲ್ಲಿ ಮತ್ತೊಂದು ದಂಧೆ ಬಯಲಾಗಿದೆ. ಮುದ್ರಿಸಿ ಮಾರಾಟ ಮಾಡುತ್ತಿದ್ದ ನಾಲ್ಕು ಅಡ್ಡೆಗಳ ಮೇಲೆ ಪೂರ್ವ ವಿಭಾಗದ ಪೊಲೀಸರು ದಾಳಿ ನಡೆಸಿ, ಐವರನ್ನು ವಶಕ್ಕೆ ಪಡೆದುಕೊಂಡು ಮುದ್ರಿತಗೊಂಡಿದ್ದ ಛಾಪಾ ಕಾಗದಗಳು, ಸೀಲ್‌ ಹಾಗೂ ತಯಾರಿಸಲು ಬಳಸುತ್ತಿದ್ದ ಯಂತ್ರಗಳನ್ನು ವಶಪಡಿಸಿಕೊಂಡಿದ್ದಾರೆ. ಪೂರ್ವವಿಭಾಗದ ಡಿಸಿಪಿ ಡಾ. ಶರಣಪ್ಪ ನೇತೃತ್ವದಲ್ಲಿ ಬ್ಯಾಟರಾಯನಪುರ ಠಾಣೆ ಪೊಲೀಸರು, ವಿವೇಕನಗರ ಠಾಣೆ ಪೊಲೀಸರು ಶನಿವಾರ ಮುಂಜಾನೆ ನಕಲಿ ಛಾಪಾ ಕಾಗದ ಮುದ್ರಿಸುತ್ತಿದ್ದ ಬ್ಯಾಟರಾಯನಪುರ, ಜೆಜೆನಗರದ ಮೂರು ಮನೆಗಳು ಮತ್ತು ವಿವೇಕ್‌ನಗರದ ಒಂದು ಮನೆಯ ಮೇಲೆ ದಾಳಿ ನಡೆಸಿದ್ದಾರೆ. ಈ ವೇಳೆ ಐವರನ್ನು ವಶಕ್ಕೆ ಪಡೆಯಲಾಗಿದ್ದು, ಕಂತೆ ಕಂತೆ ಛಾಪಾ ಕಾಗದಗಳು ಹಾಗೂ ಸೀಲ್‌, ಇಂಕ್‌ಪ್ಯಾಡ್‌, ಛಾಪಾ ಕಾಗದ ಮುದ್ರಿಸುವ ಯಂತ್ರಗಳನ್ನು ವಶಕ್ಕೆ ಪಡೆಯಲಾಗಿದೆ. ''ಪ್ರಕರಣವೊಂದರ ಸಂಬಂಧ ಕಳೆದೊಂದು ತಿಂಗಳಿಂದ ತನಿಖೆ ನಡೆಸಲಾಗುತ್ತಿತ್ತು. ಈ ವೇಳೆ ನಕಲಿ ಛಾಪಾ ಕಾಗದ ಮುದ್ರಿಸಿ ಮಾರಾಟ ಮಾಡುತ್ತಿರುವ ಬಗ್ಗೆ ಮಾಹಿತಿ ಸಿಕ್ಕಿತ್ತು. ಈ ಮಾಹಿತಿ ಆಧಾರದ ಮೇಲೆ ನ್ಯಾಯಾಲಯದ ಅನುಮತಿ ಪಡೆದು ದಾಳಿ ಮಾಡಲಾಗಿದೆ'' ಎಂದು ಪೂರ್ವ ವಿಭಾಗದ ಡಿಸಿಪಿ ಡಾ. ಶರಣಪ್ಪ ವಿಜಯ ಕರ್ನಾಟಕಕ್ಕೆ ತಿಳಿಸಿದರು. ''ವಶಕ್ಕೆ ಪಡೆದಿರುವ ಆರೋಪಿಗಳು ನಕಲಿ ಛಾಪಾಕಾಗದ ಮುದ್ರಣ ಮಾಡುವಲ್ಲಿ ಯಾವ ಪಾತ್ರ ವಹಿಸುತ್ತಿದ್ದರು ಎಂಬುದು ತಿಳಿದುಬಂದಿಲ್ಲ. ಅದನ್ನು ಪತ್ತೆಹಚ್ಚಲು ಅವರನ್ನು ವಿಚಾರಣೆಗೊಳಪಡಿಸಲಾಗಿದೆ'' ಎಂದು ಹೇಳಿದರು. ''ಆರೋಪಿಗಳು ನಕಲಿ ಛಾಪಾ ಕಾಗದಗಳನ್ನು ಬಳಸಿ 2002ರ ಹಿಂದೆ ನೋಂದಣಿ ಅಥವಾ ಒಪ್ಪಂದ ಮಾಡಿಕೊಂಡಿರುವ ದಾಖಲೆಗಳನ್ನು ಸೃಷ್ಟಿಸಿ ಬೇರೆಯವರು ಆಸ್ತಿ ಕಬಳಿಸುವುದು ಹಾಗೂ ವಂಚನೆ ಮಾಡುವ ಆರೋಪ ಕೇಳಿಬಂದಿತ್ತು. ಸದ್ಯ ಆರೋಪಿಗಳನ್ನು ವಶಕ್ಕೆ ಪಡೆಯಲಾಗಿದ್ದು, ತನಿಖೆ ಮುಂದುವರಿದಿದೆ. ತನಿಖೆ ಬಳಿಕ ಸತ್ಯಾಂಶ ಹೊರಬರಲಿದೆ'' ಎಂದು ವಿವರಿಸಿದರು. ಈ ಹಿಂದೆ ಕರೀಂ ಲಾಲ್‌ ತೆಲಗಿ ನಡೆಸಿದ್ದ ಕೋಟ್ಯಂತರ ರೂ. ಮೌಲ್ಯದ ನಕಲಿ ಛಾಪಾ ಕಾಗದ ಹಗರಣ ಇಡೀ ದೇಶವನ್ನೇ ಬೆಚ್ಚಿಬೀಳಿಸಿತ್ತು. ಆತನ ಬಂಧನದ ಬಳಿಕ ಛಾಪಾ ಕಾಗದದ ಬಳಕೆಯ ವಿಧಾನವನ್ನೇ ಬದಲಿಸಲಾಗಿತ್ತು. ಆದರೂ, ಅಲ್ಲೊಂದು ಇಲ್ಲೊಂದು ನಕಲಿ ಛಾಪಾ ಕಾಗದ ಹಗರಣ ಪ್ರಕರಣಗಳು ತೆರೆದುಕೊಳ್ಳುತ್ತಿದ್ದವು. ಇದೀಗ ಡಿಸಿಪಿ ಶರಣಪ್ಪ ನೇತೃತ್ವದ ತಂಡ ಬೆಂಗಳೂರಿನಲ್ಲಿ ಮತ್ತೊಂದು ಛಾಪಾ ಕಾಗದ ಹಗರಣವನ್ನು ಬಯಲಿಗೆಳೆದಿದೆ.