ಮಸೀದಿ ಒಳಗೆ ಮೌಲ್ವಿಯಿಂದಲೇ ಬಾಲಕಿ ಅತ್ಯಾಚಾರ

: ಕೋವಿಡ್‌ ಸೋಂಕು ಹಾವಳಿಯಿಂದ ಕಂಗೆಟ್ಟಿರುವ ರಾಷ್ಟ್ರ ರಾಜಧಾನಿ ದಿಲ್ಲಿ, ಮೇಲಿನ ಅತ್ಯಾಚಾರದ ಹೇಯ ಕೃತ್ಯಕ್ಕೆ ಸಾಕ್ಷಿಯಾಗಿದೆ. ನಗರ ಮಸೀದಿಯೊಂದರ ಪ್ರಾರ್ಥನಾ ಸ್ಥಳದಲ್ಲಿಯೇ ಹತ್ತು ವರ್ಷದ ಬಾಲಕಿ ಮೇಲೆ 48 ವರ್ಷದ ಮೌಲ್ವಿ ಎಸಗಿ, ಪೊಲೀಸರ ಅತಿಥಿಯಾಗಿದ್ದಾನೆ. ಭಾನುವಾರ ಸಂಜೆ ನಡೆದಿರುವ ಈ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಆರೋಪಿಯನ್ನು ಇಮಾಮ್‌ ಇಲ್ಯಾಸ್‌ ಎಂದು ಗುರುತಿಸಲಾಗಿದೆ. ಸ್ಥಳೀಯ ನ್ಯಾಯಾಲಯ ಆತನನ್ನು 14 ದಿನಗಳ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದೆ. ಘಟನೆ ಖಂಡಿಸಿ ಜನ ಪ್ರತಿಭಟನೆ ನಡೆಸಿದ್ದು, ಮಸೀದಿ ಪ್ರದೇಶದಲ್ಲಿ ಪೊಲೀಸ್‌ ಬಿಗಿಭದ್ರತೆ ಒದಗಿಸಲಾಗಿದೆ. ನಿರ್ಬಂಧದಿಂದ ನಿರ್ಜನ: ಅದು ಈಶಾನ್ಯ ದಿಲ್ಲಿಯ ಹರ್ಷ ವಿಹಾರ್‌ ಪ್ರದೇಶದಲ್ಲಿರುವ ಸಣ್ಣ ಮಸೀದಿ. ಭಾನುವಾರ ಸಂಜೆ ಆ ಮಸೀದಿಯಿಂದ ಕುಡಿಯುವ ನೀರು ತರಲು ಹತ್ತು ವರ್ಷದ ಮಗಳನ್ನು ಪೋಷಕರು ಕಳಿಸಿಕೊಟ್ಟಿದ್ದರು. ಕೋವಿಡ್‌ ನಿರ್ಬಂಧದಿಂದಾಗಿ ಮಸೀದಿಯಲ್ಲಿ ಅಂದು ಮೌಲ್ವಿ ಹೊರತುಪಡಿಸಿ ಯಾರೂ ಇರಲಿಲ್ಲ. ಬಾಲಕಿ ನೀರು ಹಿಡಿಯುತ್ತಿದ್ದಾಗ ಬಲವಂತದಿಂದ ಕರೆದೊಯ್ದ ಮೌಲ್ವಿ ಇಲ್ಯಾಸ್‌, ಅತ್ಯಾಚಾರ ಎಸಗಿದ. ನಂತರ ಚಾಕೋಲೆಟ್‌ ಕೊಟ್ಟು , ಯಾರಿಗೂ ಹೇಳದಂತೆ ರಮಿಸಿ ಮನೆಗೆ ಕಳಿಸಿದ್ದ. ಘಟನೆಯಿಂದ ಆಘಾತಗೊಂಡ ಬಾಲಕಿ, ಮೌಲ್ವಿಯ ದುಷ್ಕೃತ್ಯದ ಬಗ್ಗೆ ಪೋಷಕರಿಗೆ ವಿವರಿಸಿದ್ದಳು. ಮೌಲ್ವಿ ಪರಾರಿ: ಮಗಳ ನೋವಿನ ಸಂಗತಿ ತಿಳಿದು ಕುಪಿತಗೊಂಡ ಪೋಷಕರು, ಮಸೀದಿಗೆ ದೌಡಾಯಿಸಿ ಮೌಲ್ವಿಯನ್ನು ತರಾಟೆಗೆ ತೆಗೆದುಕೊಂಡರು. ಗದ್ದಲ ಹೆಚ್ಚಿ ಜನ ಸೇರುತ್ತಿದ್ದಂತೆಯೇ ಗಾಬರಿಗೊಂಡ ಮೌಲ್ವಿ ಮಸೀದಿಯ ಹಿಂಬದಿ ಕಾಂಪೌಂಡ್‌ ಜಿಗಿದು ಪರಾರಿಯಾದ. ಸ್ಥಳದಲ್ಲಿ ಸೇರಿದ ನೂರಾರು ಜನ ಪ್ರತಿಭಟನೆ ನಡೆಸಿದರು. ಆರೋಪಿ ವಿರುದ್ಧ ಪೋಕ್ಸೊ ಕಾಯಿದೆ ಅಡಿ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು, ಸೋಮವಾರ ಲೋನಿ ಪ್ರದೇಶದಿಂದ ಆತನನ್ನು ಬಂಧಿಸಿ ನ್ಯಾಯಾಲಯದ ವಶಕ್ಕೆ ಒಪ್ಪಿಸಿದರು. ಆರೋಪಿ ಮೌಲ್ವಿ ರಾಜಸ್ಥಾನದ ಭರತ್‌ಪುರ ನಿವಾಸಿಯಾಗಿದ್ದು, ಹಲವು ವರ್ಷಗಳ ಹಿಂದೆ ಕುಟುಂಬ ಸಮೇತ ದಿಲ್ಲಿಗೆ ಬಂದು ನೆಲೆಸಿದ್ದ. ಈತನಿಗೆ ನಾಲ್ಕು ಮಕ್ಕಳು ಇವೆ ಎಂದು ಪೊಲೀಸರು ತಿಳಿಸಿದ್ದಾರೆ. ಚಲಿಸುವ ರೈಲಿನಲ್ಲಿಬಾಲಕಿ ಮೇಲೆ ಅತ್ಯಾಚಾರ: ಮಹಾರಾಷ್ಟ್ರದ ಸತಾರಾ ಜಿಲ್ಲೆಯಲ್ಲಿ ಚಲಿಸುವ ರೈಲಿನ ಶೌಚಾಲಯದಲ್ಲಿ ಎಂಟು ವರ್ಷದ ಬಾಲಕಿ ಮೇಲೆ ಪಾನಮತ್ತ ಯೋಧ ಅತ್ಯಾಚಾರ ನಡೆಸಿ ಚಲಿಸುವ ರೈಲಿನಿಂದ ಹೊರದಬ್ಬಿದ ಹೇಯ ಘಟನೆ ನಡೆದಿದೆ. ಗಂಭೀರ ಗಾಯ ಮತ್ತು ಆಘಾತದ ನಡುವೆಯೇ ಸಂತ್ರಸ್ತ ಬಾಲಕಿ ತನ್ನ ಮೇಲೆ ನಡೆದ ಹೇಯ ಕೃತ್ಯದ ವಿವರ ನೀಡಿದ್ದು, ಆರೋಪಿಯನ್ನು ಬಂಧಿಸಲು ಪೊಲೀಸರಿಗೆ ನೆರವಾಗಿದೆ ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ. ಗೋವಾದಿಂದ ದಿಲ್ಲಿಗೆ ಹೊರಟಿದ್ದ ರೈಲಿನಲ್ಲಿ ಮಧ್ಯರಾತ್ರಿ 1.30ರ ಸುಮಾರಿಗೆ ಈ ಘಟನೆ ನಡೆದಿದೆ. ಗಾಯಗೊಂಡು, ಲೋನಾಂಡ್‌-ಸಲ್ಪಾ ನಡುವೆ ಹಳಿಯ ಮೇಲೆ ಬಿದ್ದಿದ್ದ ಬಾಲಕಿಯನ್ನು ಬೆಳಗ್ಗೆ 6 ಗಂಟೆ ಸುಮಾರಿಗೆ ರೈಲ್ವೆ ಪೊಲೀಸರು ಪತ್ತೆ ಮಾಡಿ ಆಸ್ಪತ್ರೆಗೆ ಸೇರಿಸಿದರು. ಚಿಕಿತ್ಸೆಯಿಂದ ಕ್ಷಿಪ್ರವಾಗಿ ಚೇತರಿಸಿಕೊಂಡ ಬಾಲಕಿ ತನ್ನ ಮೇಲೆ ನಡೆದ ದುಷ್ಕೃತ್ಯದ ವಿವರಗಳನ್ನು ನಿಖರವಾಗಿ ವಿವರಿಸಿದಳು. ತಕ್ಷಣ ಕಾರ್ಯಾಚರಣೆ ನಡೆಸಿದ ಪೊಲೀಸರು, ಬೆಳಗ್ಗೆ 7.30ಕ್ಕೆ ಅಹಮದಾಬಾದ್‌ ನಿಲ್ದಾಣ ತಲುಪಿದ ರೈಲಿನ ಬೋಗಿಗಳನ್ನು ಲಾಕ್‌ ಮಾಡಿ, ಆರೋಪಿಯನ್ನು ಸೆರೆ ಹಿಡಿದರು. ಇಷ್ಟಾಗುವವರೆಗೂ ರೈಲಿನಲ್ಲಿದ್ದ ಬಾಲಕಿಯ ಪೋಷಕರಿಗೆ ಮಾಹಿತಿಯೇ ಇರಲಿಲ್ಲ. 'ಮಗಳು ಮಲಗಿ ನಿದ್ರಿಸುತ್ತಿರಬಹುದು ಎಂದು ನಾವು ಭಾವಿಸಿದ್ದೆವು. ಪೊಲೀಸರು ಹೇಳುವವರೆಗೆ ನಮಗೇನೂ ತಿಳಿದಿರಲಿಲ್ಲ' ಎಂದು ಪೋಷಕರು ಹೇಳಿದ್ದಾರೆ.