ಮಧ್ಯಪ್ರದೇಶ: ಕೋರ್ಟ್‌ ಹೆಸರಲ್ಲಿ ನಕಲಿ ತೀರ್ಪು ಸಿದ್ಧಪಡಿಸಿದ ಐಎಎಸ್‌ ಅಧಿಕಾರಿ ಬಂಧನ..!
ಐಎಎಸ್‌ ಅಧಿಕಾರಿಯ ಕುಕೃತ್ಯ ವಿಶೇಷ ನ್ಯಾಯಾಧೀಶರ ಗಮನಕ್ಕೆ ಬಂದ ಬಳಿಕ, ಅವರು ಪೊಲೀಸರಿಗೆ ದೂರು ನೀಡಿದ್ದರು. ನ್ಯಾಯಾಧೀಶರು ನೀಡಿದ ದೂರಿನ ಆಧಾರದ ಮೇಲೆ, ಐಎಎಸ್‌ ಅಧಿಕಾರಿ ವರ್ಮಾ ಅವರನ್ನು ಬಂಧಿಸಲಾಗಿದೆ.
Admin
0
6
ಇಂದೋರ್‌ (ಮಧ್ಯಪ್ರದೇಶ): ಸ್ಥಳೀಯ ಹೆಸರಲ್ಲಿ ಸಿದ್ಧಪಡಿಸಿ, ಅಧಿಕಾರ ವಂಚನೆ ಎಸಗಿದ ಆರೋಪದ ಮೇಲೆ ಮಧ್ಯಪ್ರದೇಶದ ಐಎಎಸ್‌ ಅಧಿಕಾರಿಯೊಬ್ಬರನ್ನು ಪೊಲೀಸರು ಭಾನುವಾರ ಬಂಧಿಸಿದ್ದಾರೆ.
ಸಂತೋಷ್‌ ವರ್ಮಾ ಬಂಧಿತ ಐಎಎಸ್‌ ಅಧಿಕಾರಿ. ರಾಜ್ಯ ಆಡಳಿತ ಸೇವಾ ಅಧಿಕಾರಿಯಾಗಿದ್ದ ಇವರು, ಕಳೆದ ವರ್ಷ ಐಎಎಸ್‌ ಸೇವೆಗೆ ಬಡ್ತಿ ಪಡೆದಿದ್ದರು. ಮಹಿಳೆಯೊಬ್ಬರ ಮೇಲೆ ಹಲ್ಲೆ ನಡೆಸಿದ ಪ್ರಕರಣ ಇವರ ವಿರುದ್ಧ ದಾಖಲಾಗಿತ್ತು. ಈ ಪ್ರಕರಣವು ಅವರ ಬಡ್ತಿ ಕನಸಿಗೆ ಅಡ್ಡಿಯಾಗಿತ್ತು.
ಏನೇ ಆದರೂ ಸರಿ ಐಎಎಸ್‌ ಅಧಿಕಾರಿಯಾಗಲೇಬೇಕು ಎಂಬ ಹಠ ಅವರಲ್ಲಿ ಬೆಳೆದಿತ್ತು. ಅದಕ್ಕೆ ಅವರು ಕಂಡುಕೊಂಡದ್ದು, ನಕಲಿ ತೀರ್ಪು ಸಿದ್ಧಪಡಿಸುವ ಅಡ್ಡದಾರಿ..! ಜಿಲ್ಲಾ ವಿಶೇಷ ನ್ಯಾಯಾಧೀಶರ ಹೆಸರಲ್ಲಿ ಅವರು ಎರಡು ನಕಲಿ ತೀರ್ಪುಗಳನ್ನು ಸಿದ್ಧಪಡಿಸಿ, ತಮ್ಮ ಕನಸು ನನಸಾಗಿಸಿಕೊಂಡಿದ್ದರು.
ಮೊದಲ ತೀರ್ಪಿನಲ್ಲಿ ಮಹಿಳೆ ಮೇಲೆ ಹಲ್ಲೆ ನಡೆಸಿದ್ದ ಪ್ರಕರಣದಿಂದ ಖುಲಾಸೆಗೊಳಿಸಲಾಗಿತ್ತು. ಇನ್ನೊಂದು ಆದೇಶದಲ್ಲಿ ವ್ಯಾಜ್ಯ ಇತ್ಯರ್ಥಕ್ಕೆ ಮಹಿಳೆ ಸಮ್ಮತಿಸಿರುವಂತೆ ತೋರಿಸಲಾಗಿತ್ತು.
ಈ ಪ್ರಕರಣ ಖುದ್ದು ವಿಶೇಷ ನ್ಯಾಯಾಧೀಶರ ಗಮನಕ್ಕೆ ಬಂದ ಬಳಿಕ, ಅವರು ಪೊಲೀಸರಿಗೆ ದೂರು ನೀಡಿದ್ದರು. 'ನ್ಯಾಯಾಧೀಶರು ನೀಡಿದ ದೂರಿನ ಆಧಾರದ ಮೇಲೆ ಐಎಎಸ್‌ ಅಧಿಕಾರಿ ವರ್ಮಾ ಅವರನ್ನು ಬಂಧಿಸಲಾಗಿದೆ' ಎಂದು ನಗರ ಪೊಲೀಸ್‌ ವರಿಷ್ಠಾಧಿಕಾರಿ ಹರೀಶ್‌ ಮೋಟ್ವಾನಿ ತಿಳಿಸಿದ್ದಾರೆ.
