ಮೋದಿ ತವರಲ್ಲಿ'ಬ್ರ್ಯಾಂಡ್‌ ನ್ಯೂ' ಕ್ಯಾಬಿನೆಟ್‌; 'ಕಾಮರಾಜ್‌ ಸೂತ್ರ'ದ ಮೊರೆ ಹೋದ ಬಿಜೆಪಿ!

ಗಾಂಧಿನಗರ: ಗುಜರಾತ್‌ನಲ್ಲಿ ಮುಖ್ಯಮಂತ್ರಿಯನ್ನು ದಿಢೀರ್‌ ಬದಲಿಸಿ ಅಚ್ಚರಿ ಮೂಡಿಸಿದ್ದ ಬಿಜೆಪಿಯು, ಹೊಸ ಸಂಪುಟ ರಚನೆಯಲ್ಲಿಯೂ 'ಕಾಮರಾಜ್‌ ಸೂತ್ರ' ಅನುಸರಿಸುವ ಮೂಲಕ ಎಲ್ಲರ ನಿರೀಕ್ಷೆಗಳನ್ನು ತಲೆಕೆಳಗು ಮಾಡಿದೆ. ಗುರುವಾರ ಪ್ರಮಾಣವಚನ ಸ್ವೀಕರಿಸಿದ 24 ಸಚಿವರಲ್ಲಿ 21 ಮಂದಿ ಇದೇ ಮೊದಲ ಬಾರಿ ಸಂಪುಟಕ್ಕೆ ಸೇರ್ಪಡೆಯಾಗಿದ್ದಾರೆ. ಮುಂದಿನ ವರ್ಷದ ಅಂತ್ಯದಲ್ಲಿ ನಡೆಯುವ ವಿಧಾನಸಭೆ ಚುನಾವಣೆಯಲ್ಲಿ ಆಡಳಿತ ವಿರೋಧಿ ಅಲೆಯನ್ನು 'ಬ್ರ್ಯಾಂಡ್‌ ನ್ಯೂ ಕ್ಯಾಬಿನೆಟ್‌' ಮೂಲಕ ದಮನಗೊಳಿಸಲು ಮುಂದಾಗಿದೆ. ನಿರ್ಗಮಿತ ಮುಖ್ಯಮಂತ್ರಿ ವಿಜಯ್‌ ರೂಪಾನಿ ಸಂಪುಟದಲ್ಲಿ ಸಚಿವರಾಗಿದ್ದ ಯಾರೊಬ್ಬರಿಗೂ ಈ ಬಾರಿ ಅವಕಾಶ ನೀಡಿಲ್ಲ. ಮೂವರು ಮಾಜಿ ಸಚಿವರಿಗೆ ಅವಕಾಶ ನೀಡಲಾಗಿದ್ದರೂ, ಅವರು ರೂಪಾನಿ ಸಂಪುಟದಲ್ಲಿ ಇರಲಿಲ್ಲ. ಹೀಗಾಗಿ 'ಯಾರಿಗೂ ಸತತ ಅಧಿಕಾರ ಇಲ್ಲ' ಎಂಬ ಸಿದ್ಧಾಂತವನ್ನೂ ಪಾಲಿಸಲಾಗಿದೆ. ಒಟ್ಟು 10 ಮಂದಿ ಸಂಪುಟ ಸಚಿವರಾಗಿ, 14 ಮಂದಿ ಸಹಾಯಕ ಸಚಿವರಾಗಿ (ಅವರಲ್ಲಿ ಐದು ಮಂದಿ ಸ್ವತಂತ್ರ ನಿರ್ವಹಣೆ) ಗುರುವಾರ ಮಧ್ಯಾಹ್ನ ಪ್ರಮಾಣ ವಚನ ಸ್ವೀಕರಿಸಿದ್ದಾರೆ. ಬಲಿಷ್ಠ ಹೈಕಮಾಂಡ್‌ ಇರುವುದರಿಂದ ಹಳಬರು ಬಂಡಾಯ ಏಳುವ ಸಾಧ್ಯತೆ ಕಡಿಮೆ. ಗುಜರಾತ್‌ನಲ್ಲಿ ಕಳೆದ 27 ವರ್ಷಗಳಿಂದ ನಿರಂತರವಾಗಿ ಆಡಳಿತ ನಡೆಸುತ್ತಿರುವ ಬಿಜೆಪಿಗೆ ಈ ಸಲ ಆಡಳಿತ ವಿರೋಧಿ ಅಲೆ ಏಳುವ ಭೀತಿ ಕಾಣಿಸಿಕೊಂಡಿದೆ. ಅಲ್ಲದೆ ಸೂರತ್‌ ನಗರಪಾಲಿಕೆಯಲ್ಲಿ ಎಂಟು ಸ್ಥಾನ ಗೆದ್ದಿದ್ದ ಆಮ್‌ ಆದ್ಮಿ ಪಾರ್ಟಿ ನಿಧಾನವಾಗಿ ತಳವೂರುತ್ತಿರುವುದರ ಜತೆಗೆ ಪ್ರಬಲ ಪಾಟೀದಾರ್‌ ಸಮುದಾಯದ ಮನ ಗೆಲ್ಲುವ ಪ್ರಯತ್ನ ಮಾಡುತ್ತಿರುವುದು ಕೂಡ ತಲೆ ನೋವಾಗಿದೆ. ಇದು ಪ್ರಧಾನಿ ನರೇಂದ್ರ ಮೋದಿ ಮತ್ತು ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಅವರ ತವರು ರಾಜ್ಯವಾದ್ದರಿಂದ ಮುಂಬರುವ ವಿಧಾನಸಭೆ ಚುನಾವಣೆಯನ್ನು ಗೆಲ್ಲಲೇಬೇಕಾದ ಅನಿವಾರ್ಯತೆಯೂ ಪಕ್ಷಕ್ಕೆ ಇದೆ. ಈ ಎಲ್ಲ ಕಾರಣಗಳಿಂದ ಮುಖ್ಯಮಂತ್ರಿಯಿಂದ ಹಿಡಿದು ಸಚಿವರವರೆಗೆ ಹೊಸಬರಿಗೆ ಮಣೆ ಹಾಕಲಾಗಿದೆ. ಕಳೆದ ಸೋಮವಾರ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಿರುವ 59 ವರ್ಷದ ಭೂಪೇಂದ್ರ ಪಟೇಲ್‌ ಸಹ ಇದೇ ಮೊದಲ ಬಾರಿ ಶಾಸಕರಾಗಿ ಆಯ್ಕೆಯಾದವರು. ಅವರ ಸಂಪುಟದಲ್ಲಿಯೂ ಯುವ ಮುಖಗಳಿಗೆ ಆದ್ಯತೆ ನೀಡಲಾಗಿದೆ. ಇಬ್ಬರು ಮಹಿಳೆಯರಿಗೂ ಅವಕಾಶ ನೀಡಲಾಗಿದೆ. ಖುದ್ದು ಅಮಿತ್‌ ಶಾ ಅವರೇ ಸಂಪುಟದ ಹೊಸ ಸದಸ್ಯರ ಪಟ್ಟಿ ಸಿದ್ಧಪಡಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಸಂಪುಟ ರಚನೆ ಬೆನ್ನಲ್ಲೇ ಖಾತೆ ಹಂಚಿಕೆ ಮಾಡಿರುವ ಮುಖ್ಯಮಂತ್ರಿ, ಗೃಹ, ಗಣಿ, ಉದ್ಯಮ ಸೇರಿದಂತೆ ಪ್ರಮುಖ ಎಂಟು ಖಾತೆಗಳನ್ನು ತಮ್ಮ ಬಳಿಯೇ ಉಳಿಸಿಕೊಂಡಿದ್ದಾರೆ. ''ಮುಖ್ಯಮಂತ್ರಿಯನ್ನು ಮಾತ್ರ ಬದಲಿಸಿ, ಹಳೆಯ ಸಂಪುಟ ಉಳಿಸಿಕೊಂಡರೆ ಪರಿಣಾಮಕಾರಿ ಆಡಳಿತ ಅಸಾಧ್ಯ. ಹಳೆಯ ಸಚಿವರಿಂದ ಹೊಸತನ್ನು ನಿರೀಕ್ಷಿಸುವುದು ಕಷ್ಟ. ಅವರು ಹಿಂದಿನ ಅದೇ ವಿಫಲ ಯೋಜನೆಗಳನ್ನೇ ಮುಂದುವರಿಸುತ್ತಾರೆ. ಇದರಿಂದ ಸರಕಾರದ ಬಗೆಗಿನ ಜನರ ಭಾವನೆ ಬದಲಾಗುವುದಿಲ್ಲ. ಸಂಪುಟವೇ ಸಂಪೂರ್ಣವಾಗಿ ಬದಲಾದರೆ ಮಾತ್ರ ಆಡಳಿತದಲ್ಲಿಯೂ ಹೊಸತನ ನಿರೀಕ್ಷಿಸಬಹುದು. ಈ ಲೆಕ್ಕಾಚಾರದೊಂದಿಗೆ ಗುಜರಾತಿನಲ್ಲಿ ಈ ತರುಣ ಸಂಪುಟದ ಪ್ರಯೋಗವಾಗಿದೆ,'' ಎನ್ನುವುದು ಬಿಜೆಪಿ ಕೇಂದ್ರ ನಾಯಕರೊಬ್ಬರ ಅಭಿಪ್ರಾಯ. ಜಾತಿವಾರು ಲೆಕ್ಕಾಚಾರ ಸಿಎಂ ಹೊರತುಪಡಿಸಿ ಪಾಟೀದಾರ್‌ ಸಮುದಾಯದ 8, ಒಬಿಸಿ 6, ಪರಿಶಿಷ್ಟ ಪಂಗಡ 4, ಪರಿಶಿಷ್ಟ ಜಾತಿ 3, ಬ್ರಾಹ್ಮಣ ಮತ್ತು ಕ್ಷತ್ರಿಯ ಸಮುದಾಯಗಳ ತಲಾ ಇಬ್ಬರಿಗೆ ಸಂಪುಟದಲ್ಲಿ ಪ್ರಾತಿನಿಧ್ಯ ನೀಡಲಾಗಿದೆ. ರಾಜೇಂದ್ರ ತ್ರಿವೇದಿ, ಕಿರೀತ್‌ಸಿಂಗ್‌, ರಾಘವ್‌ಜಿ ಪಟೇಲ್‌ ಈ ಹಿಂದೆ ಸಚಿವರಾಗಿದ್ದವರು. ತ್ರಿವೇದಿ ಅವರು ವಿಜಯ್‌ ರೂಪಾನಿ ಸರಕಾರದ ಮೊದಲ ಅವಧಿಯಲ್ಲಿ ಸಚಿವರಾಗಿದ್ದರೆ, ಎರಡನೇ ಅವಧಿಯಲ್ಲಿ ವಿಧಾನಸಭಾಧ್ಯಕ್ಷರಾಗಿದ್ದರು. ರಾಣಾ ದಶಕದ ಹಿಂದೆ ಎರಡು ಅವಧಿಗೆ ಮಂತ್ರಿಯಾಗಿದ್ದರೆ, ರಾಘವ್‌ಜಿ ಎರಡು ದಶಕದ ಹಿಂದೆ ಸಚಿವರಾಗಿದ್ದರು. ಏನಿದು ಕಾಮರಾಜ್‌ ಸೂತ್ರ? ತಮಿಳುನಾಡು ಮುಖ್ಯಮಂತ್ರಿಯಾಗಿ ಸತತ ಮೂರನೇ ಅವಧಿಗೆ ಆಯ್ಕೆಯಾಗಿದ್ದ ಕೆ.ಕಾಮರಾಜ್‌ ಅವರು 1963ರಲ್ಲಿ ತಮ್ಮ ಹುದ್ದೆಗೆ ರಾಜೀನಾಮೆ ನೀಡಿದರು. ಅಲ್ಲದೇ, ಕೇಂದ್ರದಲ್ಲಿಯೂ ಹಳಬರ ರಾಜೀನಾಮೆ ಪಡೆದು ಪಕ್ಷ ಸಂಘಟನೆಗೆ ನಿಯೋಜಿಸುವಂತೆ ಪ್ರಧಾನಿ ಜವಾಹರ ಲಾಲ್‌ ನೆಹರೂ ಅವರಿಗೂ ಸಲಹೆ ಮಾಡಿದರು. 1962ರಲ್ಲಿ ನಡೆದ ಲೋಕಸಭೆ ಹಾಗೂ ವಿಧಾನಸಭೆ ಚುನಾವಣೆಗಳಲ್ಲಿ ಕಾಂಗ್ರೆಸ್‌ ಭರ್ಜರಿ ಗೆಲುವು ಸಾಧಿಸಿದ್ದರೂ, ಪಕ್ಷದ ಜನಪ್ರಿಯತೆ ಕುಸಿಯುತ್ತಿರುವುದನ್ನು ಕಾಮರಾಜ್‌ ಗುರುತಿಸಿದ್ದರು. ಅವರ ಸಲಹೆಯನ್ನು ಗಂಭೀರವಾಗಿ ಪರಿಗಣಿಸಿದ ನೆಹರು ಅವರು ಲಾಲ್‌ ಬಹದ್ದೂರ್‌ ಶಾಸ್ತ್ರಿ ಸೇರಿದಂತೆ ತಮ್ಮ ಸಂಪುಟದ ಆರು ಸಚಿವರು, ಆರು ಮುಖ್ಯಮಂತ್ರಿಗಳ ರಾಜೀನಾಮೆ ಪಡೆದಿದ್ದರು. ಕೆಲವೇ ದಿನಗಳಲ್ಲಿ ಕಾಮರಾಜ್‌ ಅವರನ್ನು ಅಖಿಲ ಭಾರತ ಕಾಂಗ್ರೆಸ್‌ ಸಮಿತಿ ಅಧ್ಯಕ್ಷರಾಗಿ ನೇಮಕ ಮಾಡಿದ್ದರು. ಫಲ ನೀಡಿದ ಪಿಣರಾಯಿ ತಂತ್ರ ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್‌ ಸಹ 2021ರ ವಿಧಾನಸಭೆ ಚುನಾವಣೆ ವೇಳೆ ಹೊಸಬರಿಗೆ ಮನ್ನಣೆ ನೀಡಿದ್ದರು. ತಮ್ಮ ಸಂಪುಟದ ಐವರು ಸಚಿವರು ಹಾಗೂ 33 ಶಾಸಕರಿಗೆ ಟಿಕೆಟ್‌ ನಿರಾಕರಿಸಿದ್ದರು. ಸಂಪುಟ ರಚನೆ ಸಂದರ್ಭದಲ್ಲಿಯೂ ಕೊರೊನಾ ಬಿಕ್ಕಟ್ಟನ್ನು ಸಮರ್ಥವಾಗಿ ನಿಭಾಯಿಸಿದ್ದ ಕೆ.ಕೆ.ಶೈಲಜಾ ಅಂತಹವರನ್ನೂ ಕೈ ಬಿಟ್ಟು ಹೊಸ ಮುಖಗಳಿಗೆ ಆದ್ಯತೆ ನೀಡಿದ್ದರು. ಇನ್ನು ಖುದ್ದು ಬಿಜೆಪಿ ಸಹ ದಿಲ್ಲಿ ಪಾಲಿಕೆಗಳ ಚುನಾವಣೆಯಲ್ಲಿ ಸಂಪೂರ್ಣವಾಗಿ ಹೊಸಬರನ್ನು ಕಣಕ್ಕಿಳಿಸಿ, ಆಪ್‌ ಸರಕಾರವಿದ್ದರೂ ಪಾಲಿಕೆಗಳನ್ನು ಗೆದ್ದುಕೊಂಡಿತ್ತು.