ಭಾರತದ ಮೊದಲ ಸ್ವದೇಶಿ ನಿರ್ಮಿತ ಯುದ್ಧ ವಿಮಾನ ವಾಹಕ ಐಎನ್‌ಎಸ್ ವಿಕ್ರಾಂತ್ ಮುಂದಿನ ವರ್ಷದಿಂದ ಕಾರ್ಯಾಚರಣೆ: ರಾಜನಾಥ್ ಸಿಂಗ್

ಕೊಚ್ಚಿ: ಭಾರತದ ಮೊದಲ ಸ್ವದೇಶಿ ನಿರ್ಮಿತ ಯುದ್ಧ ವಿಮಾನ ವಾಹಕ ನೌಕೆ ಮುಂದಿನ ವರ್ಷ ಕಾರ್ಯಾಚರಣೆಗೆ ಲಭ್ಯವಾಗಲಿದೆ ಎಂದು ರಕ್ಷಣಾ ಸಚಿವ ಶುಕ್ರವಾರ ತಿಳಿಸಿದರು. ಈ ನೌಕೆಯ ಯುದ್ಧ ಸಾಮರ್ಥ್ಯ, ತಲುಪವ ಶಕ್ತಿ ಹಾಗೂ ವೈವಿಧ್ಯವು ಭಾರತದ ರಕ್ಷಣಾ ವ್ಯವಸ್ಥೆಯ ಸಾಮರ್ಥ್ಯವನ್ನು ಭಾರಿ ಪ್ರಮಾಣದಲ್ಲಿ ಹೆಚ್ಚಿಸಲಿದೆ ಎಂದು ಅವರು ಕೊಚ್ಚಿಯ ನೌಕಾ ನೆಲೆಯಲ್ಲಿ ಹೇಳಿದರು. ಕೊಚ್ಚಿನ್ ಬಂದರಿನ ಎರ್ನಾಕುಲಂನ ಹಡಗು ನಿರ್ಮಾಣ ಸ್ಥಳದಲ್ಲಿ ಐಎನ್ಎಸ್ ವಿಕ್ರಾಂತ್ ನಿರ್ಮಾಣ ಪ್ರಗತಿಯನ್ನು ವೀಕ್ಷಿಸಿದ ಅವರು, ಅದನ್ನು ಭಾರತದ ಹೆಮ್ಮೆ ಹಾಗೂ ಆತ್ಮನಿರ್ಭರ ಭಾರತದ ಪ್ರಕಾಶಮಾನ ಉದಾಹರಣೆ ಎಂದು ಬಣ್ಣಿಸಿದರು. 'ಈ ಯೋಜನೆಗೆ ಎನ್‌ಡಿಎ ಸರಕಾರ ಅನುಮೋದನೆ ನೀಡಿತ್ತು. ಕೋವಿಡ್ 19 ನಡುವೆಯೂ ಇತ್ತಿಚೀನ ದಿನಗಳಲ್ಲಿ ಗಣನೀಯ ಪ್ರಗತಿ ಸಾಧಿಸಿದೆ. ಮುಂದಿನ ವರ್ಷ ಈ ಸ್ವದೇಶಿ ಯುದ್ಧವಿಮಾನ ವಾಹಕವನ್ನು ಕಾರ್ಯಾಚರಣೆಗೆ ತೊಡಗಿಸುವುದು ಭಾರತದ 75ನೇ ಸ್ವಾತಂತ್ರ್ಯೋತ್ಸವಕ್ಕೆ ಅತ್ಯಂತ ಸೂಕ್ತ ಕೊಡುಗೆಯಾಗಲಿದೆ' ಎಂದು ಅವರು ಹೇಳಿಕೆ ನೀಡಿದರು. ಇದಕ್ಕೂ ಮುನ್ನ ಗುರುವಾರ ಕರ್ನಾಟಕದ ಕಾರವಾರದಲ್ಲಿನ ಸೀಬರ್ಡ್ ಭೇಟಿಯ ವೇಳೆ ಭಾರತೀಯ ನೌಕಾಪಡೆ ನಡೆಸುತ್ತಿರುವ ವಿಸ್ತರಣಾ ಕಾಮಗಾರಿಯನ್ನು ವೀಕ್ಷಿಸಿದರು. ಇದು ಮುಂದಿನ ದಿನಗಳಲ್ಲಿ ಏಷ್ಯಾದ ಅತಿ ದೊಡ್ಡ ನೌಕಾನೆಲೆಯಾಗಲಿದ್ದು, ಹಿಂದೂ ಮಹಾಸಾಗರ ಪ್ರದೇಶ ಹಾಗೂ ಅದರಾಚೆಗೆ ನೌಕಾಪಡೆಯ ಕಾರ್ಯಚಟುವಟಿಕೆಗಳಿಗೆ ನೆರವಾಗುವ ಮೂಲಸೌಕರ್ಯ ಸೌಲಭ್ಯಗಳನ್ನು ಒದಗಿಸಲಿದೆ. ಸರಕಾರವು ಪ್ರಬಲ ನೌಕಾಪಡೆಯನ್ನು ನಿರ್ಮಿಸಲು ಸಂಪೂರ್ಣ ಬದ್ಧವಾಗಿದೆ. ಈ ಎರಡೂ ಯೋಜನೆಗಳು ನಮ್ಮ ದೃಢ ಗಮನಕ್ಕೆ ಉದಾಹರಣೆಯಾಗಿವೆ ಎಂದರು.