ಬಿಜೆಪಿ ಎರಡಂಕಿ ದಾಟುವುದಿಲ್ಲ ಎಂದು ನುಡಿದ್ದಿದ್ದ ಪಿಕೆ ಭವಿಷ್ಯ ನಿಜವಾಯ್ತು:ಶಾ ವಿರುದ್ಧದ ಸ್ವೀಟ್‌ ರಿವೇಂಜ್‌ನಲ್ಲೂ ಯಶಸ್ಸು!

ಹೊಸದಿಲ್ಲಿ: ಪಶ್ಚಿಮ ಬಂಗಾಳದಲ್ಲಿ ಮಮತಾ ಬ್ಯಾನರ್ಜಿ ಅವರ ಗೆಲುವಿಗೆ ಚುನಾವಣಾ ತಂತ್ರಗಾರ ಸಾಥ್‌ ಕೊಟ್ಟಿದ್ದಾರೆ. ''ರಾಜ್ಯದಲ್ಲಿ ಬಿಜೆಪಿ ಸ್ಥಾನ ಗಳಿಕೆ ಎರಡಂಕಿ ದಾಟುವುದಿಲ್ಲ. ಒಂದು ವೇಳೆ ದಾಟಿದರೆ ನಾನು ಈ ಉದ್ಯೋಗ ತೊರೆಯುತ್ತೇನೆ,'' ಎಂದು ಈ ಹಿಂದೆ ಪಿಕೆ ಟ್ವೀಟ್‌ ಮಾಡಿದ್ದರು. ಈಗ ಆ ಮಾತನ್ನು ಉಳಿಸಿಕೊಂಡ ಹೆಗ್ಗಳಿಕೆ ಅವರದ್ದಾಗಿದೆ. ಪ.ಬಂಗಾಳದಲ್ಲಿ ಮಮತಾ ಅವರ ತೃಣಮೂಲ ಕಾಂಗ್ರೆಸ್‌ ಗೆಲ್ಲದೆ ಹೋದರೆ ಚುನಾವಣಾ ತಂತ್ರಗಾರಿಕೆಯ ಕಣ ತೊರೆಯುವ ಬಗ್ಗೆ ಮಾತನಾಡಿದ್ದ ಪಿಕೆ, ರಾಜ್ಯದಲ್ಲಿ ದೀದಿ ಗೆಲುವು ಖಾತರಿಯಾದ ಬಳಿಕವೂ ತನ್ನ ವೃತ್ತಿಯನ್ನು ತೊರೆಯುವ ಮಾತನ್ನಾಡಿದ್ದಾರೆ. ''ಬಂಗಾಳದಲ್ಲಿ ದೀದಿ ಗೆದ್ದಿದ್ದಾರೆ. ಆದರೆ ನನಗೆ ಇದು ಸಾಕಾಗಿದೆ. ಇದರಲ್ಲಿ ಬಹಳಷ್ಟು ಕಾಲ ಕಳೆದಿದ್ದೇನೆ. ಬೇರೇನಾದರೂ ಮಾಡಬೇಕಿದೆ. ಒಂದು ವಿಶ್ರಾಂತಿ ತೆಗೆದುಕೊಂಡು ಮುಂದುವರಿಯಲಿದ್ದೇನೆ,'' ಎಂದಿರುವ ಪ್ರಶಾಂತ್‌, ರಾಜಕೀಯ ಸೇರುವ ಕುರಿತ ಊಹಾಪೋಹ ತಳ್ಳಿಹಾಕಿದ್ದು, ''ನಾನು ವಿಫಲ ರಾಜಕಾರಣಿ,'' ಎಂದಿದ್ದಾರೆ. ಅವರ ಐ-ಪ್ಯಾಕ್‌ ಸಂಸ್ಥೆ, 2011ರಿಂದಲೂ ರಾಜಕೀಯ ನಾಯಕರಿಗೆ ಚುನಾವಣೆ ತಂತ್ರಗಾರಿಕೆಯನ್ನು ರೂಪಿಸಿಕೊಡುತ್ತಿದೆ. 2012ರಿಂದ 2016ರವರೆಗೂ ಇವರು ನರೇಂದ್ರ ಮೋದಿ ಜೊತೆಗಿದ್ದರು. 2012ರಲ್ಲಿ ಗುಜರಾತ್‌ನಲ್ಲಿ ನಡೆದ ವಿಧಾನಸಭೆ ಚುನಾವಣೆಯಲ್ಲಿ ಮುಖ್ಯಮಂತ್ರಿ ಮೋದಿ ಗೆಲುವಿಗೆ ಶ್ರಮಿಸಿದ್ದರು. 2014ರಲ್ಲಿ ಲೋಕಸಭೆ ಚುನಾವಣೆಯಲ್ಲಿ ನರೇಂದ್ರ ಮೋದಿ ಪ್ರಧಾನಿ ಅಭ್ಯರ್ಥಿಯಾಗಿ ಬಿಂಬಿತರಾದಾಗ, ಅವರ ಪರ ವ್ಯಾಪಕವಾಗಿ ಪ್ರಚಾರತಂತ್ರ ರೂಪಿಸಿದ್ದು ಇವರೇ. ಬಿಹಾರ ಚುನಾವಣೆಯಲ್ಲಿ ನಿತೀಶ್‌ ಕುಮಾರ್‌ ನೇತೃತ್ವದ ಮಹಾಘಟಬಂಧನ್‌ಗೆ ಪರವಾಗಿ ದುಡಿದ ಕಿಶೋರ್‌, ಅಲ್ಲಿಬಿಜೆಪಿ ಸೋಲಿಗೆ ಕಾರಣರಾದರು. 2017ರಲ್ಲಿ ಉತ್ತರಪ್ರದೇಶದಲ್ಲಿ ಕಾಂಗ್ರೆಸ್‌ ಪ್ರಚಾರವನ್ನು ರೂಪಿಸಲು ಹೋದ ಪ್ರಶಾಂತ್‌, ಅಲ್ಲಿ ಮಾತ್ರ ಗೆಲುವು ಸಾಧಿಸಲಾಗಲಿಲ್ಲ. 2018ರಲ್ಲಿ ಬಿಹಾರದಲ್ಲಿ ನಿತೀಶ್‌ ಅವರ ಜೆಡಿಯು ಪಕ್ಷವನ್ನು ಸೇರಿದ ಪ್ರಶಾಂತ್‌ ಅದರ ಉಪಾಧ್ಯಕ್ಷರಾದರು. 2019ರಲ್ಲಿ ಆಂಧ್ರಪ್ರದೇಶದಲ್ಲಿ ವೈಎಸ್‌ಆರ್‌ ಕಾಂಗ್ರೆಸ್‌ ಪರವಾಗಿ ದುಡಿದ ಪಿಕೆ, ಜಗನ್ಮೋಹನ್‌ ರೆಡ್ಡಿ ಅವರ ಭರ್ಜರಿ ಗೆಲುವಿಗೆ ಕಾರಣರಾದರು. 2020ರಲ್ಲಿ ದಿಲ್ಲಿಯಲ್ಲಿಆಪ್‌ ಪಕ್ಷದ ಪರ ನಿಂತ ಪಿಕೆ, ಆ ಪಕ್ಷದ ಜಯಭೇರಿಗೆ ಕಾರಣರಾದರು. - ಶಾ ವಿರುದ್ಧ ಸ್ವೀಟ್‌ ರಿವೇಂಜ್‌!- ಬಿಜೆಪಿಯ ಜೊತೆಗಿನ ತಮ್ಮ ಮೈತ್ರಿ ಕಡಿದುಕೊಳ್ಳಲು ಕಾರಣವಾಗಿದ್ದ ಅವರ ಮೇಲೆ ಸ್ವೀಟ್‌ ರಿವೆಂಜ್‌ ತೀರಿಸಿಕೊಂಡಿದ್ದಾರೆ ಪ್ರಶಾಂತ್‌ ಕಿಶೋರ್‌. ಪಶ್ಚಿಮ ಬಂಗಾಳದಲ್ಲಿ ಬಿಜೆಪಿಯ ವಿಜಯದ ರಥ ಮುಗ್ಗರಿಸಲು ಅವರ ವ್ಯೂಹಗಾರಿಕೆಯೂ ಕಾರಣವಾಗಿದೆ. 2019ರಲ್ಲಿ ತೃಣಮೂಲ ಕಾಂಗ್ರೆಸ್‌ ಪಿಕೆ ಅವರನ್ನು ನೇಮಿಸಿಕೊಂಡಿತು. ಬಂಗಾಳಕ್ಕೆ ಕಾಲಿಟ್ಟ ಪ್ರಶಾಂತ್‌, 'ದೀದಿ ಕೆ ಬೋಲೋ' ಎಂಬ ಕಾರ್ಯಕ್ರಮ ಆರಂಭಿಸಿದರು. ಪಕ್ಷದ ತಳಹಂತದ ವರಿಷ್ಠರ ಮೇಲೆ ಜನರಿಗಿದ್ದ ಸಿಟ್ಟನ್ನು ಅರಿತ ಪ್ರಶಾಂತ್‌, ಏನೇ ಇದ್ದರೂ ನೇರವಾಗಿ ದೀದಿಗೆ ಹೇಳಿ ಎಂದು ಜನರನ್ನು ಮಮತಾ ಅವರ ಸಮೀಪಕ್ಕೆ ತಂದರು. 'ದ್ವಾರೇ ಸರ್ಕಾರ್‌' (ಮನೆ ಬಾಗಿಲಿಗೆ ಸರಕಾರ) ಅಂಥದೇ ಇನ್ನೊಂದು ಯೋಜನೆ. 'ಬಾಂಗ್ಲಾರ್‌ ಗಾರ್ಬೊ ಮಮತಾ' (ಬಂಗಾಳದ ಹೆಮ್ಮೆ ಮಮತಾ), 'ಬಾಂಗ್ಲಾನಿಜೇರ್‌ ಮೆಯೇಕಿ ಚೇ' (ಬಂಗಾಳಕ್ಕೆ ಬೇಕು ತನ್ನದೇ ಮಗಳು) ಮುಂತಾದ ಸ್ಲೋಗನ್‌ಗಳು ಜನರನ್ನು ಸೆಳೆದವು. ಬಿಜೆಪಿಯ ನರೇಂದ್ರ ಮೋದಿ ಹಾಗೂ ಅಮಿತ್‌ ಶಾ ಬಂಗಾಳದಲ್ಲಿಜೋರಾಗಿ ಪ್ರಚಾರ ತಂತ್ರ ನಡೆಸ ತೊಡಗಿದಾಗ ವಿಚಲಿತಗೊಂಡ ಪಿಕೆ, ಅವರನ್ನು ಹಣಿಯಲು ಮಮತಾ ಅವರನ್ನು 'ಬಂಗಾಳದ ಪುತ್ರಿ' ಹಾಗೂ ಮೋದಿ-ಶಾ 'ಅನ್ಯರು' ಎಂಬ ಭಾವನೆಯನ್ನು ಬಿತ್ತುವ ಕಾರ್ಯತಂತ್ರ ಹೆಣೆದರು. ಬಿಜೆಪಿ ಐಟಿ ಸೆಲ್‌ನ ಅಮಿತ್‌ ಮಾಳವೀಯ ರಾಜ್ಯದಲ್ಲಿಪಕ್ಷದ ಪ್ರಚಾರ ಉಸ್ತುವಾರಿ ಹೊತ್ತುಕೊಂಡಾಗ, ಅವರನ್ನು ಎದುರಿಸಲು ತೃಣಮೂಲದ ಐಟಿ ಸೆಲ್‌ ಅನ್ನೂ ಪಿಕೆ ಬಲಪಡಿಸಿದರು. 'ಖೇಲಾ ಹೋಬೆ'(ಆಟಕ್ಕೆ ಬನ್ನಿ) ಮುಂತಾದ ಘೋಷಣೆಗಳನ್ನು ಜನಪ್ರಿಯಗೊಳಿಸಲಾಯಿತು.