ಪ್ರತಿಭೆಯೊಂದರ ಅವಸಾನ: ಪುನೀತ್‌ ನಿರ್ಗಮನದಿಂದ ಶೂನ್ಯ

ವಿಜಯ ಕರ್ನಾಟಕ ಸಂಪಾದಕೀಯ ಕನ್ನಡ ಚಿತ್ರರಂಗದ ಜನಪ್ರಿಯ ನಟರಾದ ಪುನೀತ್‌ ರಾಜ್‌ಕುಮಾರ್‌ ಮೃತಪಟ್ಟಿದ್ದಾರೆ. 46ರ ಸಣ್ಣ ವಯಸ್ಸಿನಲ್ಲೇ ಈ ಪ್ರತಿಭಾವಂತ ನಟ ಮರಣಿಸಿರುವುದು ಆಘಾತ, ವಿಷಾದಕರ. ಅಗಲಿದ ನಟನಿಗೆ ಕನ್ನಡ ಚಿತ್ರರಂಗ ಮಾತ್ರವಲ್ಲದೆ, ಇಡೀ ಕರ್ನಾಟಕ ಕಂಬನಿ ಮಿಡಿದಿದೆ ಎಂದರೆ, ಅವರು ಕನ್ನಡದ ಜನಮನವನ್ನು ಹೇಗೆ ಮುಟ್ಟಿದ್ದರು ಎಂಬುದು ಅರ್ಥವಾಗುತ್ತದೆ. ಅವರು ನಟಿಸಿದ ಚಿತ್ರಗಳ ಸಂಖ್ಯೆ ದೊಡ್ಡದಲ್ಲ, ಅದರಿಂದ ಅವರು ಗಳಿಸಿಕೊಂಡ ಕನ್ನಡಿಗರ ಪ್ರೀತಿವಿಶ್ವಾಸ ದೊಡ್ಡದು. ಅವರು ವರನಟ ರಾಜ್‌ಕುಮಾರ್‌ ಅವರ ಪುತ್ರ ಎಂಬ ಕಾರಣಕ್ಕಷ್ಟೇ ಜನ ಅವರನ್ನು ಇಷ್ಟಪಟ್ಟಿದ್ದಲ್ಲ; ರಾಜ್‌ ಅವರಲ್ಲಿ ಕನ್ನಡಿಗರು ಕಂಡಿದ್ದ 'ಕನ್ನಡದ ಐಕಾನ್‌' ವ್ಯಕ್ತಿತ್ವವನ್ನು ಪುನೀತ್‌ ಅವರಲ್ಲಿಯೂ ಕಾಣಲು ಬಯಸಿದ್ದರು. ಅಪ್ಪು ಸಹ ಅಷ್ಟೇ ವಿನೀತ ಭಾವದಿಂದ ಅದನ್ನು ತಮ್ಮದಾಗಿಸಿಕೊಳ್ಳಲು ಯತ್ನಿಸುತ್ತಿದ್ದವರು. ಸಾಂಸ್ಕೃತಿಕ ವರ್ಚಸ್ಸಿನ ವ್ಯಕ್ತಿಗಳು ತೀರಿಕೊಂಡಾಗ ನಾವು ನಿಜಕ್ಕೂ ಮಹತ್ವದ್ದನ್ನು ಕಳೆದುಕೊಂಡ ಭಾವವನ್ನು ಅನುಭವಿಸುತ್ತೇವೆ. ಅದು ಅವರಿಂದ ಈ ನಾಡು ಪಡೆದ ಕೊಡುಗೆಯನ್ನು ನಾವು ಮೌನದಲ್ಲಿನೆನೆಯುವ ರೀತಿಯಾಗಿದೆ. ಸಂಚಾರಿ ವಿಜಯ್‌ ತೀರಿಕೊಂಡಾಗ ಕೂಡ ಇಂಥ ಶೂನ್ಯವನ್ನು ಅನುಭವಿಸಿದ್ದೆವು. ಪುನೀತ್‌ ಹಲವಾರು ಕಮರ್ಷಿಯಲ್‌ ಚಿತ್ರಗಳಲ್ಲಿ ನಟಿಸಿದ್ದರೂ, ಸಮಾಜಕ್ಕೆ ಅಪೂರ್ವ ಸಂದೇಶಗಳನ್ನು ನೀಡುವ, ಮುಖ್ಯವಾಹಿನಿಯದ್ದೆನಿಸದ ಚಿತ್ರಗಳಲ್ಲೂ ನಟಿಸಿದ್ದರು. ಅಂಥ ಚಲನಚಿತ್ರಗಳ ನಿರ್ಮಾಣದಲ್ಲೂ ಭಾಗಿಯಾಗಿದ್ದರು. ಪ್ರಾಮಾಣಿಕ ಅಧಿಕಾರಿ, ಭಾವುಕ ಪ್ರೇಮಿ ಮುಂತಾದ ಪಾತ್ರಗಳ ಮೂಲಕ ಹೃದಯ ಗೆದ್ದಂತೆಯೇ, ಸಮಾಜದಲ್ಲಿನೊಂದ ಜನರ ಕಾಳಜಿಗಳಿಗೆ ಧ್ವನಿ ನೀಡುವ ಪಾತ್ರಗಳನ್ನೂ ಮಾಡಿ ತಮ್ಮ ಕಾಯಕದ ವ್ಯಾಪ್ತಿಯನ್ನು ಇನ್ನಷ್ಟು ವಿಸ್ತರಿಸಿದ್ದರು. ಇದು ಅವರ ತಂದೆ, ವರನಟ ರಾಜ್‌ಕುಮಾರ್‌ ವ್ಯಕ್ತಿತ್ವವೂ ಆಗಿತ್ತು ಎಂಬುದನ್ನು ನಾವು ಮರೆಯಬಾರದು. ಗೋಕಾಕ್‌ ಚಳವಳಿಯ ನೇತೃತ್ವ ವಹಿಸಿ ಕನ್ನಡಿಗರ ದನಿ ಎನಿಸಿದ್ದ ರಾಜ್‌ ಅವರು ತಮ್ಮ ಪಾತ್ರಗಳು ಕಳಂಕವಿಲ್ಲದಂತಿರಬೇಕು ಎಂಬ ಹೊಣೆಯರಿತು ಮಾಡುತ್ತಿದ್ದರು; ಅದೇ ವರ್ಚಸ್ಸನ್ನು ಪುನೀತ್‌ ಕೂಡ ರೂಢಿಸಿಕೊಂಡಿದ್ದರು. ಜನಪ್ರಿಯವೆನಿಸದ ವಿಷಯಗಳನ್ನು ಇಟ್ಟುಕೊಂಡು ಕೆಲವು ಚಿತ್ರಗಳನ್ನು ಮಾಡಿದ್ದು, ಅವರ ಸಾಮಾಜಿಕ ಕಳಕಳಿಯ ದ್ಯೋತಕವೂ ಆಗಿತ್ತು. ಡಾ.ರಾಜ್‌ ಅವರಂತೆಯೇ ಪುನೀತ್‌ ಕೂಡ ನೇತ್ರದಾನ ಮಾಡಿದ್ದಾರೆ. ಚಿತ್ರರಂಗಕ್ಕೆ ಅತ್ಯಂತ ಅಪೂರ್ವವಾದ ಮಾದರಿಗಳನ್ನು ಹಾಕಿಕೊಟ್ಟು ಅಪ್ಪ- ಮಗ ತೆರಳಿದ್ದಾರೆ. ಪುನೀತ್‌ ಅವರ ಸಂಪರ್ಕಕ್ಕೆ ಬಂದಿದ್ದ ಪ್ರತಿಯೊಬ್ಬರೂ ಎಲ್ಲರಲ್ಲಿಒಂದಾಗುವ ಅವರ ಸೌಜನ್ಯ, ವಿನಯ, ತಿಳಿವಳಿಕೆಯ ಹಂಬಲಗಳನ್ನು ನೆನೆದುಕೊಂಡಿದ್ದಾರೆ. ಹಾಗೇ ಅವರು ಸಮಾಜದ ಮುಂದೆ ಡಂಗುರ ಬಾರಿಸಿಕೊಳ್ಳದೆ ಹಲವಾರು ಸೇವಾಕಾರ್ಯಗಳನ್ನು ಮಾಡುತ್ತಿದ್ದರು ಎಂಬುದೂ ಗೊತ್ತಾಗಿದೆ. ನಟನೊಬ್ಬ ಜನರ ಮನವನ್ನು ಆವರಿಸಿಕೊಳ್ಳಲು ಇವೆಲ್ಲವೂ ಕಾರಣವಾಗುತ್ತವೆ. ಸಿನಿಮಾ ನಾಯಕ ನಮ್ಮ ವ್ಯಕ್ತಿತ್ವದ ಛಿದ್ರಗಳ ಪ್ರತೀಕವಾಗದೆ, ನಾವು ಸಾಧಿಸಬೇಕಾದ ಮೌಲ್ಯೋನ್ನತಿಯ ಪ್ರತೀಕವಾದಾಗ ಆತ ಜನಮನದಲ್ಲಿ ಪಡೆಯುವ ಜಾಗವೇ ವಿಶಿಷ್ಟವಾದುದು. ಪುನೀತ್‌ ವಿಷಯದಲ್ಲಿ ಹಾಗಾಗಿದೆ. ಕನ್ನಡ ಸಿನಿಮಾಕ್ಕೆ ಇನ್ನಷ್ಟು ಪ್ರಸಿದ್ಧಿ, ಘನತೆ, ಸಾಮಾಜಿಕ ಆಯಾಮ ತಂದುಕೊಡಬಲ್ಲ ವರ್ಚಸ್ಸು ಅವರಲ್ಲಿಇತ್ತು. ಅದನ್ನು ಕಳೆದುಕೊಂಡಿದ್ದೇವೆ.