ಪಂಜಾಬ್‌ ಬಳಿಕ ಛತ್ತೀಸ್‌ಗಢ ಕಾಂಗ್ರೆಸ್‌ನಲ್ಲಿ ಬಿಕ್ಕಟ್ಟು, ಸಿಎಂ ಬದಲಾವಣೆಗೆ ವಿರೋಧಿ ಬಣದ ಪಟ್ಟು

ರಾಯಪುರ: ಪಂಜಾಬ್‌ ಬಳಿಕ ಇದೀಗ ಛತ್ತೀಸ್‌ಗಢದಲ್ಲಿ ಮುಖ್ಯಮಂತ್ರಿ ಬದಲಾವಣೆಗೆ ಆಗ್ರಹ ಕೇಳಿ ಬರುತ್ತಿದೆ. ಎರಡುವರೆ ವರ್ಷದ ಅವಧಿಗೆ ಸಿಎಂ ಸ್ಥಾನವನ್ನು ಹಂಚಿಕೊಳ್ಳಲು ನಿರ್ಧರಿಸಲಾಗಿತ್ತು ಎಂಬ ವಿಚಾರ ಮತ್ತೆ ಮುನ್ನೆಲೆಗೆ ಬಂದಿದೆ. "ಇದೇ ವಿಚಾರವನ್ನು ಇಟ್ಟುಕೊಂಡು ಪದೇ ಪದೇ ಮುಖ್ಯಮಂತ್ರಿ ಬದಲಾವಣೆಗೆ ಒತ್ತಾಯಿಸುವ ಮೂಲಕ ರಾಜಕೀಯ ವಾತಾವರಣವನ್ನೇ ಹಾಳು ಮಾಡುವುದು ತಪ್ಪು," ಎಂದು ಮುಖ್ಯಮಂತ್ರಿ ಸೋಮವಾರ ಬೇಸರ ವ್ಯಕ್ತಪಡಿಸಿದ್ದಾರೆ. ಭಾನುವಾರ ಜಶ್‌ಪುರದಲ್ಲಿ ಎಐಸಿಸಿ ಕಾರ್ಯದರ್ಶಿ ಸಪ್ತಗಿರಿ ಶಂಕರ್‌ ಸಮ್ಮುಖದಲ್ಲಿ ಬಘೇಲ್‌ ಬೆಂಬಲಿಗರು ಹಾಗೂ ಆರೋಗ್ಯ ಸಚಿವ ಟಿಎಸ್‌ ಸಿಂಗ್‌ ಡಿಯೋ ನಡುವೆ ನಡೆದ ಸಂಘರ್ಷವನ್ನು ಉಲ್ಲೇಖಿಸಿ ಅವರು ಈ ಮಾತು ಹೇಳಿದ್ದಾರೆ. ಲಕ್ನೋಗೆ ತೆರಳುವ ಮುನ್ನ ರಾಯ್‌ಪುರದ ಸ್ವಾಮಿ ವಿವೇಕಾನಂದ ವಿಮಾನ ನಿಲ್ದಾಣದಲ್ಲಿ ಮಾಧ್ಯಮಗಳ ಜತೆ ಮಾತನಾಡಿದ ಅವರು, “ಮುಖ್ಯಮಂತ್ರಿ ಸ್ಥಾನದ ಬಗ್ಗೆ ಎಐಸಿಸಿ ಪ್ರಧಾನ ಕಾರ್ಯರ್ಶಿ ಪಿಎಲ್‌ ಪೂನಿಯಾ ಅವರು ಈಗಾಗಲೇ ಸ್ಪಷ್ಟಪಡಿಸಿದ್ದಾರೆ. ಹೀಗಾಗಿ ಇದೇ ಪ್ರಶ್ನೆಯನ್ನು ಪದೇ ಪದೇ ಕೇಳಿ ರಾಜ್ಯ ರಾಜಕೀಯ ವಾತಾವರಣವನ್ನೇ ಹಾಳು ಮಾಡುವುದು ತಪ್ಪು,” ಎಂದಿದ್ದಾರೆ. ಈ ಹಿಂದೆ ಪೂನಿಯ ಅವರು, ಎರಡುವರೆ ವರ್ಷಗಳಲ್ಲಿ ಮುಖ್ಯಮಂತ್ರಿ ಸ್ಥಾನ ಬದಲಾಗುವ ಯಾವ ಸೂತ್ರವೂ ಇರಲಿಲ್ಲ. ಭೂಪೇಶ್‌ ಬಘೇಲ್‌ ಅವರೇ ಛತ್ತೀಸ್‌ಗಢದ ಮುಖ್ಯಮಂತ್ರಿ ಎಂದಿದ್ದರು. ಆದರೆ ಇಂಥಹ ಘಟನೆಗಳ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿ ಬಘೇಲ್‌ ಹೇಳಿಲ್ಲ. “ಇದು ದುರದೃಷ್ಟಕರ. ಜಶ್‌ಪುರದಲ್ಲಿನ ಘಟನೆಯನ್ನು ತಡೆಯಬಹುದಾಗಿತ್ತು,” ಎಂದಷ್ಟೇ ಹೇಳಿ ಅವರು ಸುಮ್ಮನಾಗಿದ್ದಾರೆ. ಸಾಮಾಜಿಕ ಸಂಘಟನೆಗಳು ಮತ್ತು ಪಕ್ಷದ ಕಾರ್ಯಕರ್ತರೊಂದಿಗೆ ಸಭೆ ನಡೆಸಲು ಸಿಎಂ ಎರಡು ದಿನಗಳ ಪ್ರವಾಸಕ್ಕಾಗಿ ಲಕ್ನೋಗೆ ತೆರಳಿದ್ದು, ಅಲ್ಲಿಂದ ಅವರು ಹಿಮಾಚಲ ಪ್ರದೇಶಕ್ಕೆ ಪ್ರಯಾಣ ಬೆಳೆಸಲಿದ್ದಾರೆ. ಅಕ್ಟೋಬರ್ 28ರಿಂದ ಛತ್ತೀಸ್‌ಗಢದಲ್ಲಿ ಆರಂಭವಾಗಲಿರುವ ಬುಡಕಟ್ಟು ಉತ್ಸವದಲ್ಲಿ ಪಾಲ್ಗೊಳ್ಳಲು ಹಾಗೂ ನವೆಂಬರ್ 1 ರ ರಾಜ್ಯ ಸ್ಥಾಪನೆಯ ದಿನದಲ್ಲಿ ಭಾಗವಹಿಸಲು ಅವರು ರಾಜ್ಯಕ್ಕೆ ಹಿಂದಿರುಗಲಿದ್ದಾರೆ. ರಾಜ್ಯ ಕಾಂಗ್ರೆಸ್‌ನಲ್ಲಿ ನಾಯಕತ್ವ ಬದಲಾವಣೆಗೆ ನಡೆಯುತ್ತಿರುವ ಮುಸುಕಿನ ಗುದ್ದಾಟದ ಹಿನ್ನೆಲೆಯಲ್ಲಿ ಜಶ್‌ಪುರ್‌ ಘಟನೆ ನಡೆದಿತ್ತು. ಆಗಸ್ಟ್‌ನಲ್ಲಿ ಆರಂಭವಾಗಿದ್ದ ಈ ತಿಕ್ಕಾಟ ಇನ್ನೂ ನಿಲ್ಲುವಂತೆ ಕಾಣಿಸುತ್ತಿಲ್ಲ. ಭಾನುವಾರ ಆಗಿದ್ದೇನು? ಭಾನುವಾರ ಜಶ್‌ಪುರ್ ಜಿಲ್ಲಾ ಕಾಂಗ್ರೆಸ್ ಮಾಜಿ ಅಧ್ಯಕ್ಷ ಪವನ್ ಅಗರವಾಲ್ 2018ರ ವಿಧಾನಸಭಾ ಚುನಾವಣೆಯಲ್ಲಿ ಪಕ್ಷದ ಭರ್ಜರಿ ಗೆಲುವಿನಲ್ಲಿ ಸಿಂಗ್‌ ದೇವ್‌ ಕೊಡುಗೆಯನ್ನು ಹೊಗಳಲು ಆರಂಭಿಸಿದಾಗ ಘರ್ಷಣೆ ಆರಂಭವಾಯಿತು, “2.5 ವರ್ಷಗಳ ಸೂತ್ರವನ್ನು ಒಪ್ಪಿಕೊಂಡಿರುವಾಗ, ಸಿಂಗ್ ದೇವ್‌ ಅವರಿಗೆ ಅವಕಾಶ ನೀಡಬೇಕು. ಈ ಅವಧಿಯಲ್ಲಿ ಅವರು ಮಧ್ಯ ಪ್ರವೇಶಿಸಲಿಲ್ಲ ಅಥವಾ ಏನನ್ನೂ ಹೇಳಲಿಲ್ಲ. ಮೇಲಾಗಿ, ಭೂಪೇಶ್ ಬಘೇಲ್ ಮತ್ತು ಟಿಎಸ್ ಸಿಂಗ್ ದೇವ್ ಅವರ ಜಂಟಿ ಪ್ರಯತ್ನದಿಂದಲೇ ಛತ್ತೀಸ್‌ಗಢದಲ್ಲಿ ಕಾಂಗ್ರೆಸ್ ಅಧಿಕಾರಕ್ಕೆ ಬಂತು," ಎಂದಿದ್ದರು. ಇದರಿಂದ ಕೆರಳಿದ ಜಶ್‌ಪುರ್‌ ಜಿಲ್ಲಾ ಕಾಂಗ್ರೆಸ್‌ ಅಲ್ಪಸಂಖ್ಯಾತ ಘಟಕದ ಅಧ್ಯಕ್ಷ ಇಫ್ತಿಕರ್‌ ಹಸನ್‌ ಸ್ಟೇಜ್‌ಗೆ ಹತ್ತಿ ಅವರಿಂದ ಮೈಕ್ ಕಿತ್ತುಕೊಂಡಿದ್ದಲ್ಲದೆ, ಅವರ ಮೇಲೆ ಹಲ್ಲೆ ನಡೆಸಿದ್ದಾರೆ ಎನ್ನಲಾಗಿದೆ. ಇದರಿಂದ ಸಪ್ತಗಿರಿ ಶಂಕರ್‌ ಸಮ್ಮುಖದಲ್ಲಿಯೇ ಪಕ್ಷದ ಕಾರ್ಯಕರ್ತರ ನಡುವೆ ಹೊಯ್‌ ಕೈ ನಡೆದಿತ್ತು. ಇದು ತಹಬದಿಗೆ ಬರದ ಹಿನ್ನೆಲೆಯಲ್ಲಿ ಕೊನೆಗೆ ಪೊಲೀಸರೇ ಮಧ್ಯ ಪ್ರವೇಶಿಸಬೇಕಾಯಿತು. ನಂತರ ಪವನ್‌ ಅಗರ್‌ವಾಲ್‌, ಕುನ್ಕುರಿ ಶಾಸಕ ಎಂಡಿ ಮಿಂಜ್‌ ಅವರ ಕುಮ್ಮಕ್ಕಿನ ಮೇರೆಗೆ ತನ್ನ ಮೇಲೆ ಹಲ್ಲೆ ನಡೆಸಲಾಯಿತು ಎಂದು ದೂರಿದ್ದರು. ಇವೆಲ್ಲದಕ್ಕೂ ಮೊದಲು ಪಕ್ಷದ ಶಾಸಕ ಬೃಹಸ್ಪತಿ ಸಿಂಗ್‌ ತಮ್ಮ ಜೀವಕ್ಕೆ ಸಿಂಗ್‌ ದೇವ್‌ ಅವರಿಂದ ಅಪಾಯವಿದೆ ಎಂದು ಆರೋಪಿಸಿದ್ದರು. ಇದು ರಾಜ್ಯ ಕಾಂಗ್ರೆಸ್‌ನಲ್ಲಿ ಬಿಕ್ಕಟ್ಟಿಗೆ ಕಾರಣವಾಗಿತ್ತು. ಈ ಸಂದರ್ಭದಲ್ಲಿ ಸದನದಿಂದ ಹೊರನಡೆದಿದ್ದ ಸಿಂಗ್‌ ದೇವ್, ಉಂಟಾಗಿರುವ ಗೊಂದಲವನ್ನು ಸರಕಾರ ಬಗೆಹರಿಸುವವರೆಗೆ ತಾವು ಸದನಕ್ಕೆ ಕಾಲಿಡುವುದಿಲ್ಲ ಎಂದು ಘೋಷಿಸಿದ್ದರು. ತಮ್ಮ ಹೇಳಿಕೆ ಸಂಬಂಧ ಸ್ಪಷ್ಟನೆ ನೀಡುವಂತೆ ಬೃಹಸ್ಪತ್‌ ಅವರಿಗೆ ಕಾಂಗ್ರೆಸ್‌ ಶೋಕಾಸ್‌ ನೋಟಿಸ್‌ ನೀಡಿತ್ತು. ಅವರು ಸದನದಲ್ಲೇ ನಂತರ ತಮ್ಮ ಹೇಳಿಕೆಗೆ ವಿಷಾದ ವ್ಯಕ್ತಪಡಿಸಿದ್ದರು. ಆದರೆ ಈ ಬೆಳವಣಿಗೆ ಬಳಿಕ ದಿಲ್ಲಿಯಲ್ಲಿ ಒಂದು ತಿಂಗಳ ಕಾಲ ಬೀಡು ಬಿಟ್ಟಿದ್ದ ಸಿಂಗ್‌ ದೇವ್‌, ಸಂಭಾವ್ಯ ನಾಯಕತ್ವ ಬದಲಾವಣೆ ನಡೆಯಲಿದೆಯೇ ಎಂಬ ಪ್ರಶ್ನೆ ಹುಟ್ಟುವಂತೆ ಮಾಡಿದ್ದರು. ಸಿಂಗ್‌ ದೇವ್‌ ಮತ್ತು ಬಘೇಲ್‌ ನಡುವೆ ಕಾಂಗ್ರೆಸ್‌ ಹಲವು ಸುತ್ತಿನ ಸಭೆಯನ್ನೂ ನಡೆಸಿತ್ತು. ಸಿಎಂ ಬೆಂಬಲಿಗರು ದಿಲ್ಲಿಗೆ ತೆರಳಿ ತಮ್ಮ ಶಕ್ತಿ ಪ್ರದರ್ಶನವನ್ನೂ ನಡೆಸಿದ್ದರು. ಪಂಜಾಬ್‌ ಬೆಳವಣಿಗೆಯ ಹಿನ್ನೆಲೆಯಲ್ಲಿ ಇದು ತೀವ್ರಗೊಂಡಿತ್ತು. ಆದರೆ ಪಂಜಾಬ್‌ ಬೆಳವಣಿಗೆಗಳು ತಹಬದಿಗೆ ಬರುತ್ತಿದ್ದಂತೆ ಛತ್ತೀಸ್‌ಗಢ ಬಿಕ್ಕಟ್ಟೂ ತಣ್ಣಗಾಗಿತ್ತು. ಆದರೆ ಭಾನುವಾರದ ಬೆಳವಣಿಗೆಯಿಂದ ಈ ವಿಚಾರ ಮತ್ತೆ ಮುನ್ನೆಲೆಗೆ ಬಂದಿದ್ದು, ಮುಂದೆ ಏನಾಗಲಿದೆ ಎಂಬ ಪ್ರಶ್ನೆ ಹುಟ್ಟುಹಾಕಿದೆ.