ಟ್ಯಾಕ್ಸ್ ಕ್ಲಿನಿಕ್: ನಿಮ್ಮ ತೆರಿಗೆ ಪ್ರಶ್ನೆಗಳಿಗೊಂದು ಹೊಸ ವೇದಿಕೆ ಕಲ್ಪಿಸಿದ ಬೆಂಗಳೂರಿನ ಐಸಿಎಐ!

ಎಚ್. ಆರ್. ಪ್ರಭಾಕರ್, ತೆರಿಗೆ ಮತ್ತು ಆರ್ಥಿಕ ತಜ್ಣ ಬೆಂಗಳೂರು: ತೆರಿಗೆ ಎನ್ನುವುದು ನಮಗೆ ಅರ್ಥವಾಗುವ ವಿಷಯವಲ್ಲ ಎಂದುಕೊಳ್ಳುವವರ ನಡುವೆ ಸರಳವಾಗಿ ನಿಮ್ಮ ತೆರಿಗೆ ಕುರಿತ ಪ್ರಶ್ನೆಗಳಿಗೆ ನಾವು ಉತ್ತರ ಕೊಡುತ್ತೇವೆ ಎನ್ನುತ್ತಿದ್ದಾರೆ ಭಾರತೀಯ ಚಾರ್ಟರ್ಡ್ ಅಕೌಂಟೆಂಟ್ ಸಂಸ್ಥೆಯ ಅಧ್ಯಕ್ಷರಾದ ಶ್ರೀ. ಸಿ. ಎ ಬಿ.ಟಿ. ಶೆಟ್ಟಿಯವರು. ಹೌದು, ಶ್ರೀ ಸಾಮಾನ್ಯನಿಗೆ ತಾನು ಕೊಂಡುಕೊಳ್ಳುವ ಪೆಟ್ರೋಲ್ ಡೀಸೆಲ್ ಮೊದಲುಗೊಂಡು ಚಿನ್ನ ಬೆಳ್ಳಿಯವರೆಗೂ, ಬೈಕ್ ಕಾರ್ ನಿಂದ ಆರಂಭವಾಗಿ ಇಡೀ ಬದುಕಿನ ದುಡಿಮೆ ಒಟ್ಟುಗೂಡಿಸಿ ಕೊಂಡುಕೊಳ್ಳುವ ಫ್ಲ್ಯಾಟ್ ವರೆಗೂ ತಾನು ಎಷ್ಟು ತೆರಿಗೆ ಕಟ್ಟುತ್ತಿದ್ದೇನೆ, ಏಕೆ ಕಟ್ಟುತ್ತಿದ್ದೇನೆ ಎನ್ನುವ ವಿಚಾರವೇ ಗೊತ್ತಿಲ್ಲದೆ ತನ್ನ ಶ್ರಮದ ದುಡಿಮೆಯಲ್ಲಿ ಈ ದೇಶ ನಡೆಸಲು ತನ್ನ ಪಾಲಿನ ತೆರಿಗೆಯನ್ನು ಅಳಿಲು ಸೇವೆಯಂತೆ ಕಟ್ಟುತ್ತಲೇ ಇದ್ದಾನೆ. ಆದರೆ ಅದರ ರೂಪುರೇಷಗಳು ತೆರಿಗೆದಾರನ ಜವಾಬ್ದಾರಿ ಮತ್ತು ಕರ್ತವ್ಯಗಳು, ಯಾವ ತೆರಿಗೆ ಏಕೆ ಕಟ್ಟಬೇಕು, ಹೇಗೆ ಕಟ್ಟಬೇಕು ಅದರ ಇತಿ ಮಿತಿಗಳೇನು ಹೀಗೆ ಯೋಚಿಸುತ್ತಾ ಹೋದರೆ ಅನೇಕ ಸಂದರ್ಭಗಳಲ್ಲಿ ತಿಳಿಯದೇ ತೆರಿಗೆ ಕಟ್ಟುವ ಪ್ರಸಂಗಗಳೇ ಹೆಚ್ಚು ಎನ್ನಬಹುದು. ಕಾರಣ ತೆರಿಗೆ ಕುರಿತ ಜಾಗೃತಿಯ ಕೊರತೆ ನಮ್ಮಲ್ಲಿ ಇದ್ದೇ ಇದೆ. ಈ ನಿಟ್ಟಿನಲ್ಲಿ ಆದಾಯ ತೆರಿಗೆ, ಸರಕು ಮತ್ತು ಸೇವಾ ತೆರಿಗೆ, ಅಂತಾರಾಷ್ಟ್ರೀಯ ತೆರಿಗೆ, ಕಸ್ಟಮ್ ಡ್ಯೂಟಿ ಹೀಗೆ ಪ್ರತಿಯೊಬ್ಬ ಪ್ರಜೆಯೂ ಕೂಡ ಒಂದಿಲ್ಲೊಂದು ತೆರಿಗೆಯ ವ್ಯಾಪ್ತಿಗೆ ಒಳಪಟ್ಟರೂ ಕೆಲವೊಮ್ಮೆ ಮಾಹಿತಿಯ ಕೊರತೆ ಅವರನ್ನು ದ್ವಂದ್ವಕ್ಕೆ ದೂಡಿಬಿಡುತ್ತದೆ. ಈ ನಿಟ್ಟಿನಲ್ಲಿ (ಭಾರತೀಯ ಲೆಕ್ಕ ಪರಿಶೋಧಕರ ಸಂಸ್ಥೆ) ಬೆಂಗಳೂರು ಶಾಖೆ ಸಾರ್ವಜನಿಕರಿಗಾಗಿ ತಮ್ಮ bangalore@icai.org ಮೂಲಕ ಶ್ರೀ ಸಾಮಾನ್ಯರು ತಮ್ಮ ತೆರಿಗೆ ಕುರಿತಾದ ಯಾವುದೇ ಪ್ರಶ್ನೆಗಳನ್ನು ಈ ವೆಬ್ ಸೈಟ್ ಮೂಲಕ ಕಳುಹಿಸಿದರೆ ತಮ್ಮ ಸಂಸ್ಥೆಯ ಹಿರಿಯ ಸದಸ್ಯರಿಂದ ಮತ್ತು ತಜ್ಣರಿಂದ ಉತ್ತರವನ್ನು ಕೊಡುವ ಪ್ರಯತ್ನಕ್ಕೆ ನಾಂದಿ ಹಾಡುತ್ತಿದ್ದಾರೆ. ಏನಿದು ? ಇಂದಿನ ಕಾಲಘಟ್ಟದಲ್ಲಿ ವಿದೇಶ ಪ್ರಯಾಣವೂ ಎಲ್ಲರ ಕೈಗೆಟಕುತ್ತಿದೆ ಮತ್ತು ಅನೇಕರ ಮನೆಯ ಮಕ್ಕಳು ಒಂದಿಲ್ಲೊಂದು ದೇಶದಲ್ಲಿ ಉದ್ಯೋಗ ಮಾಡುತ್ತಿರುವುದು ಕೂಡ ಖರೆ. ಈ ನಿಟ್ಟಿನಲ್ಲಿ ವಿದೇಶ ಪ್ರಯಾಣದ ಬಗ್ಗೆ ಇರವಹುದು, ದುಬೈನಂತಹ ದೇಶಕ್ಕೆ ಹೋದಾಗ ಅಲ್ಲಿ ಕೊಂಡುಕೊಳ್ಳುವ ಚಿನ್ನ, ಅದರ ಇತಿಮಿತಿಗಳು, ಫ್ಲಾಟ್ ಕೊಳ್ಳುವ ಮುನ್ನ ವಹಿಸಿಬೇಕಾದ ಎಚ್ಚರಿಕೆಗಳು, ರೇರಾ ಕುರಿತ ಮಾಹಿತಿ, ತೆರಿಗೆ ಕುರಿತಾದ ಬದಲಾವಣೆಗಳು, ವಿದೇಶಿ ವಿನಿಮಯ, ಶೇರು ಮಾರುಕಟ್ಟೆ ಕುರಿತ ನಿಮ್ಮ ಪ್ರಶ್ನೆಗಳು, ನೀವು ಒಂದು ಮನೆ ಅಥವಾ ಸೈಟ್ ಮಾರಾಟ ಮಾಡಿದರೆ ಕಟ್ಟಬೇಕಾದ ತೆರಿಗೆ, ನೀವು ಕೊಳ್ಳುವ ದುಬಾರಿ ಕಾರು, ಹೈ ವ್ಯಾಲ್ಯೂ ಟ್ರಾನ್ಸಾಕ್ಷನ್ ಎಂದು ಕರೆಯಲ್ಪಡುವ ನಿಮ್ಮ ವ್ಯವಹಾರಗಳು ಕುರಿತು ನಿಮ್ಮೆಲ್ಲ ಪ್ರಶ್ನೆಗಳಿಗೆ ಉತ್ತರವಾಗುವ ಒಂದೇ ಸೂರಿನಡಿ ವೈವಿಧ್ಯಮಯ ಪ್ರಶ್ನೆಗಳಿಗೆ ಉತ್ತರವಾಗುವ ಕುರಿತ ಕಾರ್ಯಕ್ರಮವೇ ಈ ‘ಟ್ಯಾಕ್ಸ್ ಕ್ಲಿನಿಕ್’. ಯಾರು ಉತ್ತರಿಸುತ್ತಾರೆ? ಈ ವೇದಿಕೆಯಲ್ಲಿ ಬೆಂಗಳೂರು ಚಾರ್ಟರ್ಡ್ ಅಕೌಂಟೆಂಟ್ ಸಂಸ್ಥೆಯ ಹಿರಿಯ ಸದಸ್ಯರು, ನುರಿತ ತಜ್ಣರು ಯಾವುದೇ ಟ್ಯಾಕ್ಸ್ ಕುರಿತಾದ ನಿಮ್ಮ ಪ್ರಶ್ನೆಗಳಿಗೆ ಉತ್ತರವನ್ನು ನೀಡಲಿದ್ದಾರೆ. ಇದಕ್ಕೇನಾದರು ಶುಲ್ಕವಿದೆಯೇ? ಈ ಆನ್ ಲೈನ್ ವೇದಿಕೆ ಸಂಪೂರ್ಣ ಉಚಿತವಾಗಿದ್ದು ತನ್ಮೂಲಕ ರಾಜ್ಯದ, ದೇಶದ ಮತ್ತು ವಿದೇಶಗಳಲ್ಲಿ ನೆಲೆಸಿರುವ ಅನಿವಾಸಿ ಭಾರತೀಯರು ಸಹ ಭಾರತದ ತೆರಿಗೆ ಪದ್ಧತಿ ಮತ್ತು ಬದಲಾವಣೆಗಳ ಕುರಿತಾದ ಪ್ರಶ್ನೆಗಳನ್ನು ಕೇಳಬಹುದಾಗಿದೆ. ಎಂದಿನಿಂದ ಆರಂಭ? ಏಪ್ರಿಲ್ 23, 2021 ರಂದು ಕರ್ನಾಟಕ ಸರ್ಕಾರದ ಕಂದಾಯ ಮಂತ್ರಿಗಳಾದ ಶ್ರೀ. ಆರ್. ಅಶೋಕ್ ರವರು ಬೆಂಗಳೂರಿನ ಮಿಲ್ಲರ್ಸ್ ರಸ್ತೆಯಲ್ಲಿರುವ ಐಸಿಎಐ ಭವನದಲ್ಲಿ ಬೆಳಿಗ್ಗೆ 11 ಗಂಟೆಗೆ ಈ ಕಾರ್ಯಕ್ರಮ ಉದ್ಘಾಟಿಸಲಿದ್ದು ಕಾರ್ಯಕ್ರಮದಲ್ಲಿ ನೇರವಾಗಿ (ಕೋವಿಡ್ ಸೂಚನೆಗೆ ಅನುಗುಣವಾಗಿ) ನೂರು ಗಣ್ಯರು ಭಾಗವಹಿಸಿ, ಆನ್ ಲೈನ್ ಮೂಲಕ ಸಾವಿರಾರು ಮಂದಿ ಭಾಗವಹಿಸುತ್ತಿದ್ದಾರೆ. ಕಾರ್ಯಕ್ರಮದ ಉದ್ಘಾಟನೆಯ ನಂತರ ನಿಮ್ಮ ಯಾವುದೇ ಪ್ರಶ್ನೆಗಳಿದ್ದರೂ ನೀವು ಉತ್ತರವನ್ನು ಪಡೆದುಕೊಳ್ಳಬಹುದು. ಟೈಮ್ ಲಿಮಿಟ್ ಇದೆಯಾ? ಇದು ಇಂತಹುದೇ ದಿನಾಂಕ ಅಥವಾ ಸಮಯದ ಒಳಗೆ ಪ್ರಶ್ನೆಗಳನ್ನು ಕೇಳಬೇಕು ಎನ್ನುವ ನಿಯಮವೇನೂ ಇಲ್ಲ, ಕಾರಣ ವೆಬ್ ಸೈಟ್ ಮೂಲ ಕೇಳುವುದರಿಂದ ನಿಮ್ಮ ಪ್ರಶ್ನೆಗಳಿಗೆ ಉತ್ತರಿಸಲು ಸಮಯದ ಮಿತಿ ಅನ್ವಯವಾಗುವುದಿಲ್ಲ. ಸಿಎ ಬಿ.ಟಿ. ಶೆಟ್ಟಿ ಏನು ಹೇಳುತ್ತಾರೆ? ಈ ಕಾರ್ಯಕ್ರಮದ ಪ್ರಮುಖ ಉದ್ದೇಶ ಉಚಿತವಾಗಿ ಯಾವುದೇ ರೀತಿಯ ಟ್ಯಾಕ್ಸ್ ಕುರಿತಾದ ನಾಗರೀಕರ ಪ್ರಶ್ನೆಗಳಿಗೆ ಉತ್ತರಿಸುವುದು. ಕರ್ನಾಟಕದಲ್ಲಿ 20 ಸಾವಿರಕ್ಕೂ ಹೆಚ್ಚು ಸಿಎಗಳಿದ್ದು ಅದರಲ್ಲಿ ಆಯ್ದ ಹಿರಿಯ ತಜ್ಣರು ಸಾರ್ವಜನಿಕರ ಪ್ರಶ್ನೆಗಳಿಗೆ ಉತ್ತರಿಸಲಿದ್ದಾರೆ. ಎಷ್ಟೋ ಸಲ ವಿಷಯದ ಅರಿವಿಲ್ಲದೆ ತಪ್ಪು ಮಾಡಿದ, ಇಲಾಖೆಗೆ ಸರಿಯಾದ ರಿಟರ್ನ್ ಸಲ್ಲಿಸದ, ದಂಡದ ಸಮೇತ ನಂತರ ತೆರಿಗೆ ಕಟ್ಟಿದ ಜನ, ಸಂಸ್ಥೆಗಳು ಇವೆ. ಹಾಗಾಗಿ ಸಮಾಜದಲ್ಲಿ ಜಾಗೃತಿ ಮೂಡಿಸುವುದೇ ನಮ್ಮ ಪ್ರಮುಖ ಉದ್ದೇಶ. ಹೊಸ ಸದಸ್ಯರಿಗೆ ವೇದಿಕೆ ಇದೇ ಕಾರ್ಯಕ್ರಮದಲ್ಲಿ ಇತ್ತೀಚೆಗಷ್ಟೇ ಸಿಎ ಪರೀಕ್ಷೆ ಪಾಸ್ ಮಾಡಿ ತಮ್ಮ ಪ್ರಾಕ್ಟೀಸ್ ಪ್ರಾರಂಭಿಸಿರುವ ಸದಸ್ಯರಿಗೆ ಸ್ಪೂರ್ತಿ ತುಂಬುವ ಮೆಂಟರ್ ಶಿಪ್ ಟ್ಯಾಬ್, ನೆಟ್ವರ್ಕಿಂಗ್ ಟ್ಯಾಬ್, ಸದಸ್ಯರ ನೊಂದಣಿ ಮುಂತಾದ ಕಾರ್ಯಕ್ರಮಗಳು ಕೂಡ ಇದೇ ವೇದಿಕೆಯಲ್ಲಿ ನಡೆಯಲಿವೆ. ಹೆಚ್ಚಿನ ಮಾಹಿತಿಗಾಗಿ: ಗೆ ಭೇಟಿ ನೀಡಿ. ಫೋ.ನಂ: 080-43944868