ದೂರು ನೀಡಿದ 24 ಗಂಟೆಗಳಲ್ಲಿ ನಕಲಿ ಖಾತೆಗಳನ್ನು ರದ್ದುಗೊಳಿಸಬೇಕು: ಸಾಮಾಜಿಕ ಮಾಧ್ಯಮ ಕಂಪೆನಿಗಳಿಗೆ ಸೂಚನೆ

ಹೊಸದಿಲ್ಲಿ: ಸಾಮಾಜಿಕ ಜಾಲತಾಣಗಳಲ್ಲಿ ನಕಲಿ ಖಾತೆಗಳ ಹಾವಳಿಯನ್ನು ನಿಯಂತ್ರಿಸಲು ಮಹತ್ವದ ನಿರ್ಧಾರವನ್ನು ತೆಗೆದುಕೊಂಡಿದೆ. ಇತ್ತೀಚಿನ ದಿನಗಳಲ್ಲಿ ಸಾಮಾಜಿಕ ಜಾಲತಾಣ ಬಳಕೆದಾರರ ನಕಲಿ ಖಾತೆಗಳನ್ನು ಸೃಷ್ಟಿಸಿ ಅವರ ಸ್ನೇಹಿತರನ್ನು ಸಂಪರ್ಕಿಸಿ ಹಣ ಕೇಳುವ ಅಪರಾಧ ಚಟುವಟಿಕೆ ಸಾಮಾನ್ಯವಾಗಿದೆ. ಇದಕ್ಕೆ ಕಡಿವಾಣ ಹಾಕಲು ಸರಕಾರ ಮುಂದಾಗಿದೆ. ಗಣ್ಯ ವ್ಯಕ್ತಿಗಳು, ಉದ್ಯಮಿಗಳು ಮತ್ತು ಸಾಮಾನ್ಯ ಬಳಕೆದಾರರ ನಕಲಿ ಪ್ರೊಫೈಲ್ ಚಿತ್ರ ಒಳಗೊಂಡ ಖಾತೆಗಳ ಕುರಿತು ಸಂಬಂಧಿಸಿದ ವ್ಯಕ್ತಿ ಅಥವಾ ಅವರ ಪರವಾಗಿ ಬೇರೆ ಯಾರಾದರೂ ಗಮನಕ್ಕೆ ತಂದ 24 ಗಂಟೆಗಳ ಒಳಗೆ ಆ ಖಾತೆಗಳನ್ನು ತೆಗೆದು ಹಾಕುವುದನ್ನು ಕಡ್ಡಾಯಗೊಳಿಸಿ ಟ್ವಿಟ್ಟರ್, , ಇನ್‌ಸ್ಟಾಗ್ರಾಂ ಹಾಗೂ ಯೂಟ್ಯೂಬ್‌ಗೆ ಕೇಂದ್ರ ಸೂಚನೆ ನೀಡಿದೆ. ಕುರಿತಾದ ದೂರು ದಾಖಲಾದ ಕೂಡಲೇ ಸಂಸ್ಥೆಗಳು ಕ್ರಮ ತೆಗೆದುಕೊಳ್ಳುವುದನ್ನು ಹೊಸ ಐಟಿ ನಿಯಮ ಕಡ್ಡಾಯಗೊಳಿಸಿದೆ. 'ಉದಾಹರಣೆಗೆ, ಒಬ್ಬ ಜನಪ್ರಿಯ ಸಿನಿಮಾ ನಟ, ಕ್ರಿಕೆಟರ್, ರಾಜಕಾರಣಿ ಅಥವಾ ಯಾವುದೇ ಸಾಮಾನ್ಯ ಬಳಕೆದಾರ ಫಾಲೋವರ್‌ಗಳನ್ನು ಸೃಷ್ಟಿಸಿಕೊಳ್ಳಲು, ತನ್ನ ಸಂದೇಶಗಳನ್ನು ಹರಡಲು ಅಥವಾ ಬೇರೆ ಅಕ್ರಮ ಚಟುವಟಿಕೆಗಳಿಗೆ ಬಳಸಿಕೊಳ್ಳಲು ತಮ್ಮ ಚಿತ್ರವನ್ನು ಬೇರೊಬ್ಬರು ಬಳಸಿಕೊಂಡಿದ್ದಾರೆ ಎಂಬ ಆಕ್ಷೇಪ ಹೊಂದಿದ್ದಾಗ ಅವರು ಅಂತಹ ಖಾತೆಯನ್ನು ತೆರವುಗೊಳಿಸುವಂತೆ ಕಂಪೆನಿಗಳಿಗೆ ಹೇಳುವ ಹಕ್ಕನ್ನು ಹೊಂದಿದ್ದಾರೆ. ಸಾಮಾಜಿಕ ಮಾಧ್ಯಮ ಸಂಸ್ಥೆಗಳಿಗೆ ರೂಪಿಸಲಾಗಿರುವ ನೂತನ ಐಟಿ ನಿಯಮಗಳಡಿಯಲ್ಲಿ ಈ ಅಂಶವನ್ನು ಸೇರಿಸಲಾಗಿದೆ. ಬಳಕೆದಾರರು ಗಮನಕ್ಕೆ ತಂದ ಒಂದು ದಿನದ ಒಳಗೆ ಅವರು ಕ್ರಮ ತೆಗೆದುಕೊಳ್ಳಬೇಕು' ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಸಾಮಾಜಿಕ ಮಾಧ್ಯಮಗಳಲ್ಲಿ ಬಳಕೆದಾರರ ಪ್ರೊಫೈಲ್ ಚಿತ್ರದ ಜತೆಗೆ, ಅವರ ಪ್ರೊಫೈಲ್‌ನಲ್ಲಿ ಕಾಣಿಸುವ ಎಲ್ಲ ವಿವರಗಳನ್ನೂ ನಮೂದಿಸಿ, ಅದನ್ನೇ ಹೋಲುವ ಖಾತೆಗಳನ್ನು ಸೃಷ್ಟಿಸಲಾಗುತ್ತಿದೆ. ಬಳಿಕ ಅವರ ಸಂಪರ್ಕದಲ್ಲಿರುವ ವ್ಯಕ್ತಿಗಳನ್ನು ಗುರುತಿಸಿ ಅವರಿಗೆ ಸ್ನೇಹದ ವಿನಂತಿಯನ್ನು ಕಳಿಸಲಾಗುತ್ತಿದೆ. ಹೆಚ್ಚಿನವರು ಅವರೇ ಹೊಸ ಖಾತೆ ಸೃಷ್ಟಿಸಿ ಸ್ನೇಹದ ವಿನಂತಿ ಕಳುಹಿಸಿದ್ದಾರೆ ಎಂದುಕೊಂಡು ಅದನ್ನು ದೃಢೀಕರಿಸುತ್ತಾರೆ. ಹೀಗೆ ಒಬ್ಬರ ಖಾತೆಯ ಪ್ರವೇಶ ದೊರೆತ ನಂತರ ಅವರು ಅದನ್ನು ತಮ್ಮ ಅಕ್ರಮ ಚಟುವಟಿಕೆಗಳಿಗೆ ಬಳಸಿಕೊಳ್ಳುತ್ತಾರೆ. ಟ್ವಿಟ್ಟರ್‌ನಲ್ಲಿ ಕೂಡ ಪರಿಶೀಲಿಸಿದ ಖಾತೆಗಳಲ್ಲಿ 'ಬ್ಲೂ ಟಿಕ್' ಇದ್ದರೂ, ಅನೇಕರು ನಕಲಿ ಖಾತೆಗಳನ್ನು ನಂಬಿ ಮೋಸ ಹೋಗುತ್ತಿದ್ದಾರೆ. ಇಂತಹ ಖಾತೆಗಳು ಹಣ ವಸೂಲಿ, ಅಶ್ಲೀಲ ಚಿತ್ರಗಳು ಹಾಗೂ ವಿಡಿಯೋಗಳ ಪ್ರದರ್ಶನ, ಸುಳ್ಳು ಸುದ್ದಿ ಹರಡುವಿಕೆ ಮುಂತಾದವುಗಳಿಗೆ ಬಳಕೆಯಾಗುತ್ತಿವೆ.