ಜನರಿಗೆ ಕೊರೊನಾ ಲಸಿಕೆ ನೀಡಲು ತಡವಾದರೆ ನಿತ್ಯ 6 ಲಕ್ಷ ಕೇಸ್‌: 3ನೇ ಅಲೆ ಕಾಡುವುದು ಖಂಡಿತ ಎಂದ ವರದಿ!
ದೇಶದಲ್ಲಿ ಲಸಿಕೆ ಅಭಿಯಾನಕ್ಕೆ ಹೆಚ್ಚಿನ ವೇಗ ನೀಡಬೇಕು. ಪ್ರತಿ ದಿನ ಒಂದು ಕೋಟಿ ಜನರಿಗೆ ಲಸಿಕೆ ನೀಡಬೇಕು. ಆಗ ಮಾತ್ರ ಮೂರನೇ ಅಲೆಯಲ್ಲಿ ನಿತ್ಯ ಸೋಂಕಿತರ ಸಂಖ್ಯೆ ಎರಡು ಲಕ್ಷ ಆಗಿರುತ್ತದೆ. ಇಲ್ಲದಿದ್ದರೆ ಆರು ಲಕ್ಷ ಪ್ರಕರಣ ದಾಖಲಾಗಲಿವೆ ಎಂದು ಧ್ಯಯನ ವರದಿಯೊಂದು ಎಚ್ಚರಿಕೆ ನೀಡಿದೆ. ಈ ಬಗ್ಗೆ ಸಂಪೂರ್ಣ ಮಾಹಿತಿ ಇಲ್ಲಿದೆ.
Admin
0
6
ಹೊಸದಿಲ್ಲಿ: ದೇಶದಲ್ಲಿ ಮೂರನೇ ಅಲೆ ಭೀತಿ ಬೆನ್ನಲ್ಲೇ ಕ್ಷಿಪ್ರಗತಿಯಲ್ಲಿ ಕೊರೊನಾ ನಿರೋಧಕ ಲಸಿಕೆ ನೀಡದಿದ್ದರೆ ನಿತ್ಯ ಆರು ಲಕ್ಷ ಕೊರೊನಾ ಪ್ರಕರಣ ದಾಖಲಾಗಲಿವೆ ಎಂದು ಅಧ್ಯಯನ ವರದಿಯೊಂದು ಎಚ್ಚರಿಕೆ ನೀಡಿದೆ. ಅಕ್ಟೋಬರ್‌ನಲ್ಲಿ ಮೂರನೇ ಅಲೆ ಉಂಟಾಗಲಿದೆ ಎಂದು ರಾಷ್ಟ್ರೀಯ ವಿಪತ್ತು ನಿರ್ವಹಣೆ ಸಂಸ್ಥೆ (ಎನ್‌ಡಿಐಎಂ) ತಿಳಿಸಿದ ಬೆನ್ನಲ್ಲೇ ನೂತನ ವರದಿಯು ಆತಂಕ ಹೆಚ್ಚಿಸಿದೆ.
ಪಂಡಿತ್‌ ದೀನ ದಯಾಳ್‌ ಉಪಾಧ್ಯಾಯ ಎನರ್ಜಿ ವಿಶ್ವವಿದ್ಯಾಲಯ ಹಾಗೂ ನಿರ್ಮಾ ವಿಶ್ವವಿದ್ಯಾಲಯ ಅಧ್ಯಯನ ಮಾಡಿದ್ದು, ''ದೇಶದಲ್ಲಿ ಲಸಿಕೆ ಅಭಿಯಾನಕ್ಕೆ ಹೆಚ್ಚಿನ ವೇಗ ನೀಡಬೇಕು. ಪ್ರತಿ ದಿನ ಒಂದು ಕೋಟಿ ಜನರಿಗೆ ಲಸಿಕೆ ನೀಡಬೇಕು. ಆಗ ಮಾತ್ರ ಮೂರನೇ ಅಲೆಯಲ್ಲಿ ನಿತ್ಯ ಸೋಂಕಿತರ ಸಂಖ್ಯೆ ಎರಡು ಲಕ್ಷ ಆಗಿರುತ್ತದೆ. ಇಲ್ಲದಿದ್ದರೆ ಆರು ಲಕ್ಷ ಪ್ರಕರಣ ದಾಖಲಾಗಲಿವೆ,'' ಎಂದು ತಿಳಿಸಿದೆ. ಅಕ್ಟೋಬರ್‌ ಮೊದಲ ವಾರದಲ್ಲಿ ಮೂರನೇ ಅಲೆ ಆರಂಭವಾಗುತ್ತದೆ.
ಹಾಗಾಗಿ ಕ್ಷಿಪ್ರವಾಗಿ ಲಸಿಕೆ ನೀಡಬೇಕು ಹಾಗೂ ಹೆಚ್ಚಿನ ಸಂಖ್ಯೆಯಲ್ಲಿಹಾಸಿಗೆ ವ್ಯವಸ್ಥೆ ಮಾಡಬೇಕು ಎಂದು ಎನ್‌ಡಿಐಎಂ ಈಗಾಗಲೇ ಎಚ್ಚರಿಸಿದೆ. ಹಲವು ಅಧ್ಯಯನ ವರದಿಗಳು ಸಹ ಕೆಲವೇ ವಾರದಲ್ಲಿ ಆರಂಭವಾಗಲಿದೆ ಎಂದು ತಿಳಿಸಿವೆ. ಕೊರೊನಾ ಎರಡನೇ ಅಲೆ ಅವಧಿಯಲ್ಲಿ ನಿತ್ಯ ನಾಲ್ಕು ಲಕ್ಷ ಪ್ರಕರಣ ದಾಖಲಾಗಿದ್ದವು. ಅಲ್ಲದೆ, ಆಮ್ಲಜನಕ, ಹಾಸಿಗೆ, ವೆಂಟಿಲೇಟರ್‌ ಸಮಸ್ಯೆ ಉದ್ಭವಿಸಿ, ಸರಕಾರದ ವಿರುದ್ಧ ಭಾರಿ ಟೀಕೆ ವ್ಯಕ್ತವಾಗಿತ್ತು. ನರೇಂದ್ರ ಮೋದಿ ಅವರ ಖ್ಯಾತಿ ಸಹ ಶೇ.66ರಿಂದ ಶೇ.24ಕ್ಕೆ ಇಳಿದಿದೆ.
