ಜನರ ರಕ್ಷಣೆಯಲ್ಲಿ ಸರಕಾರ ವಿಫಲ, ವಿಧಾನಸಭೆ ವಿಸರ್ಜಿಸಿ, ಚುನಾವಣೆ ಎದುರಿಸಿ: ಬಿಜೆಪಿಗೆ ಡಿಕೆಶಿ ಸವಾಲು
ಅಧಿಕಾರ ತೆಗೆದುಕೊಂಡ ದಿನದಿಂದ ರಾಜಕೀಯ ಅನಿಶ್ಚಿತತೆ ಇದೆ ಎಂದು ಯಡಿಯೂರಪ್ಪ ಹೇಳಿದ್ದಾರೆ. ಅದೇ ಅವರ ಆಡಳಿತ. ಅದೇ ಜನರಿಗೆ ಕೊಟ್ಟಿರುವ ಕೊಡುಗೆ
Admin
0
6
ಬೆಂಗಳೂರು: 'ಕೋವಿಡ್‌, ಪ್ರಕೃತಿ ವಿಕೋಪದಿಂದ ಜೀವ ಹಾಗೂ ಜೀವನಕ್ಕೆ ರಾಜ್ಯ ಪರದಾಡುತ್ತಿದ್ದರೂ ರಕ್ಷಣೆ ಮಾಡಲು ಸರಕಾರ ವಿಫಲವಾದ ಸರಕಾರ ವಿಸರ್ಜನೆ ಮಾಡಿ. ಜನ ತೀರ್ಪಿನ ಹೊಸ ಆಡಳಿತ ಬರಲಿ' ಎಂದು ಬಿಜೆಪಿಗೆ ಡಿ.ಕೆ. ಶಿವಕುಮಾರ್‌ ಸವಾಲೆಸೆದಿದ್ದಾರೆ.
ನಿವಾಸದಲ್ಲಿ ಭಾನುವಾರ ಕೋವಿಡ್‌ 19 ರಾಜ್ಯಮಟ್ಟದ ಕಾಂಗ್ರೆಸ್ ಮೇಲ್ವಿಚಾರಣಾ ಸಮಿತಿ ವರದಿ ಸ್ವೀಕರಿಸಿದ ನಂತರ ಮಾಧ್ಯಮಗಳ ಜತೆ ಮಾತನಾಡಿ ''ಸಿಎಂ ನೆರೆ ಪರಿಶೀಲನೆಗೆ ಇಂದು ಪ್ರವಾಸ ಮಾಡುತ್ತಿದ್ದಾರೆ. ಕಳೆದ ಮೂರು ವರ್ಷಗಳಿಂದ ಈ ರೀತಿ ಮಳೆ-ನೆರೆ ಬರುತ್ತಿದೆ. ಪಕ್ಷದಿಂದ ಆರ್‌.ವಿ. ದೇಶಪಾಂಡೆ ಹಾಗೂ ಸತೀಶ್‌ ಜಾರಕಿಹೊಳಿ ನೇತೃತ್ವದ ತಂಡಗಳು ನೆರೆ ಪರಿಶೀಲನೆಗೆ ತೆರಳಿವೆ. ಬೆಳಗಾವಿಯಲ್ಲಿ ಜನಪ್ರತಿನಿಧಿಗಳು ಹೆಚ್ಚಿದ್ದರೂ ಅವರದ್ದೇ ಸರಕಾರದಲ್ಲಿ ಕಳೆದ ವರ್ಷದ ನೆರೆಗೆ ಪರಿಹಾರ ನೀಡಲು ಸಾಧ್ಯವಾಗಿಲ್ಲ ಏಕೆ? ಮನೆ ಕಟ್ಟಿಕೊಡಲು ಆಗಿಲ್ಲ ಎಂದರೆ ಈ ಸರಕಾರ ಯಾಕಿರಬೇಕು''ಎಂದು ಪ್ರಶ್ನಿಸಿದರು.
''ಈ ಹಿಂದೆ ಪಶ್ಚಿಮ ಬಂಗಾಳ ಮತ್ತಿತರ ರಾಜ್ಯಗಳಲ್ಲಿ ನೆರೆ ಬಂದಾಗ ಪ್ರಧಾನ ಮಂತ್ರಿಗಳು ಅಲ್ಲಿಗೆ ಭೇಟಿ ನೀಡಿದ್ದರು. ನಮ್ಮ ರಾಜ್ಯಕ್ಕೆ ಅವರು ಬಂದಿಲ್ಲ, ಪರಿಹಾರ ಕೊಟ್ಟಿಲ್ಲ. ಇದು ಕೇಂದ್ರದ ಅನ್ಯಾಯವಲ್ಲವೇ? ಆದರೂ ಬಿಜೆಪಿ ಸಂಸದರು ಯಾಕೆ ಒತ್ತಡ ತರಲಿಲ್ಲ''ಎಂದು ಆರೋಪಿಸಿದರು.
''ಅಧಿಕಾರ ತೆಗೆದುಕೊಂಡ ದಿನದಿಂದ ರಾಜಕೀಯ ಅನಿಶ್ಚಿತತೆ ಇದೆ ಎಂದು ಯಡಿಯೂರಪ್ಪ ಹೇಳಿದ್ದಾರೆ. ಅದೇ ಅವರ ಆಡಳಿತ. ಅದೇ ಜನರಿಗೆ ಕೊಟ್ಟಿರುವ ಕೊಡುಗೆ''ಎಂದು ಟೀಕಿಸಿದರು.
ಸರಕಾರದ ಮಾಡುವ ಕೆಲಸ ಪಕ್ಷ ಮಾಡಿದೆ
''ಕೋವಿಡ್‌ ಸಮಯದಲ್ಲಿ ಕಾಂಗ್ರೆಸ್ ನಾಯಕರು, ಕಾರ್ಯಕರ್ತರು ಸ್ವಂತ ದುಡ್ಡಿನಲ್ಲಿಆಹಾರ ಕಿಚ್‌, ಆಕ್ಸಿಜನ..., ದಿನಸಿ ಕಿಚ್‌, ಸ್ಯಾನಿಟೈಸ್‌ ಕೊಟ್ಟಿದ್ದಾರೆ. ಬಿಜೆಪಿಯವರು ಸರಕಾರದ ದುಡ್ಡಲ್ಲಿತಮ್ಮ ಫೋಟೊ ಹಾಕಿಕೊಂಡು ಆಹಾರ ಕಿಟ್‌ ಕೊಟ್ಟಿದ್ದಾರೆ. ನಾವು ಸರಕಾರಕ್ಕೆ ಪರ್ಯಾಯವಾಗಿ 1225 ಆಂಬ್ಯುಲೆನ್ಸ್‌ ಸೇವೆ ಒದಗಿಸಿದ್ದೇವೆ. 12,53,000 ಮೆಡಿಕಲ್‌ ಕಿಟ್‌ ಹಂಚಿದ್ದೇವೆ. 93,47,867 ಆಹಾರ ಕಿಟ್‌ ನೀಡಿದ್ದೇವೆ. 24,654 ಆಕ್ಸಿಜನ್‌ ಸಿಲಿಂಡರ್‌ ನೀಡಿದ್ದೇವೆ. ವಲಸಿಗರಿಗೆ ನೆರಳಾಗಿ ನಿಂತಿದ್ದೇವು. ಇದಕ್ಕೆ ದಾಖಲೆಗಳಿವೆ''ಎಂದರು.
''10 ಸಾವಿರ ಹಾಸಿಗೆ, ಕೋವಿಡ್‌ ಔಷಧದಲ್ಲಿಅವ್ಯವಹಾರ ಬಯಲಿಗೆಳೆದೆವು. ಕೋವಿಡ್‌ ನಿಂದ ಸತ್ತವರನ್ನು ಸರಕಾರ ಅಮಾನವೀಯವಾಗಿ ನಡೆಸಿಕೊಂಡಿತು. 2ನೇ ಅಲೆ ಬಗ್ಗೆ ತಜ್ಞರು ಎಚ್ಚರಿಕೆ ನೀಡಿದ್ದರೂ ಜಾಗೃತವಾಗಲಿಲ್ಲ. ಸರ್ಕಾರ ಕೆಲಸ ಮಾಡುತ್ತದೋ, ಇಲ್ಲವೋ ಲೆಕ್ಕಿಸದೇ ನಮ್ಮ ಜವಾಬ್ದಾರಿ ನಾವು ನಿಭಾಯಿಸಿದೆವು. ಮನೆ ಮನೆಗೆ ಹೋಗಿ ಜನರಿಗೆ ನೆರವು ನೀಡಿದ್ದೇವೆ''ಎಂದರು.
''ಪಕ್ಷದ ಮುಖಂಡರು ಕೋವಿಡ್‌ ಸಂಕ್ರಮಣ ಕುರಿತು ಸಿದ್ಧಪಡಿಸಿದ ಮಧ್ಯಂತರ ವರದಿ ಬಂದಿದ್ದು, ಎಐಸಿಸಿಗೆ ಈ ವರದಿ ಕಳುಹಿಸಲಾಗುತ್ತದೆ. ಡೆತ್‌ ಆಡಿಟ್‌ ಮಾಡಲು ತಂಡಕ್ಕೆ ಸೂಚನೆ ನೀಡಿದ್ದು, ಪ್ರತಿ ಬ್ಲಾಕ್‌ ಮಟ್ಟದಲ್ಲೂಚುರುಕಾಗಿ ಕಾರ್ಯನಿರ್ವಹಿಸುತ್ತಿವೆ. ಈ ಸಮಯದಲ್ಲಿಆಡಳಿತ ಪಕ್ಷದ ಒಬ್ಬ ಮಂತ್ರಿ, ಶಾಸಕ, ಕಾರ್ಯಕರ್ತರು ಯಾರಾದರೂ ಒಬ್ಬರು ಇಂತಹ ಕೆಲಸ ಮಾಡಿದ್ದರೆ ಹೇಳಿ''ಎಂದು ಸವಾಲು ಹಾಕಿದರು.
ಸತ್ತಿಲ್ಲ ಅಂದರೆ ಪರಿಹಾರ ಏಕೆ ಕೊಟ್ಟರು
''ಮುಖ್ಯಮಂತ್ರಿಗಳೇ ಆಕ್ಸಿಜನ್‌ ಇಲ್ಲದೆ ಯಾರೂ ಸತ್ತಿಲ್ಲಎಂದು ಕೇಂದ್ರ ಸರಕಾರಕ್ಕೆ ಮಾಹಿತಿ ನೀಡಿದ ಮೇಲೆ ಚಾಮರಾಜನಗರದಲ್ಲಿಸತ್ತ 24 ಜನರ ಕುಟುಂಬಕ್ಕೆ ತಲಾ 2 ಲಕ್ಷ ಪರಿಹಾರ ನೀಡಿರುವುದೇಕೇ..? 36 ಜನ ಆಕ್ಸಿಜನ್‌ ಇಲ್ಲದೆ ಸತ್ತಿದ್ದಾರೆ ಎಂದು ಹೈಕೋರ್ಟ್‌ ನೇಮಕ ಮಾಡಿದ ಸಮಿತಿ ವರದಿ ತಿಳಿಸಿದೆ''ಎಂದು ಸರಕಾರ ನಿಲುವಿಗೆ ಕಿಡಿಕಾರಿದರು.
